Read Bilua Matiu 7 Bible Online

Matiu 7 - Bilua bible

Matiu 7

¹Nio vo Jisu ta obeta olake bazubazuto ni eri kiolake sekasi, “Meta pui me ditizimou edolomu, nio vo Baṉara ta pui o titizimelou me,

²ako vo Baṉara ta o titizimelou me koa omadeuma keve kale meme ditizimani jari kake edolomu. Ni koa omadeuma podepodeti kale ko me memai titizikako kale edolomu inio mata vo Baṉara ta o titizimelou me. Meta me matu titizimou edolomu inio vo Baṉara ta o matu titizimelou me. Melai meta baise ama titizato me erekou edolomu kasi nio vo Baṉara ta baisea titizimelo o elou me.

³Noi sole inio ṉota ṉoqa zaria kazieko ṉovo lolo ko vuruvuru voko vilu kale ama, melai ṉota pui ṉo lainika koa kobukobu ṉo ṉaviko vilu kale ama?

⁴Ṉota pui eri kio ṉovo lolo kasi, ‘Zariela tu aṉata ada ṉa kazieko ṉoko vilu kale ama vuruvuru,’ kiṉovou, melai ṉo ṉaviko vilu kale ta ikoana matuma kobukobu!

⁵Ṉoa lipalipa kalaṉa! Kazieka kuleto ṉo ṉaviko vilu kale ama kobukobu, saita inio ṉota ṉo qelou ni ṉo qaziekou ṉovo lolo ko vilu kale ama vuruvuru.[7]

⁶“Pui ṉamuko ko tabu ama lomaloma ruqe ama maba poso kasi. Soa katimo me elou ta meta me qatika jari nio ko siele tabu ama lomaloma. Ako kota ko titiziovou ni ko nanaemelou sole. Ni soa katimo me elou ta meta me risaeka jari bolo kasi meko jiku. Kota kokai lojolou ni ko niumaekou sole.

⁷“Pasekomo uri ama quli Baṉara kasi inio meta me qovou, vailikomo vokasi inio meta me qelou, tubitubitomo inio vota o mela veukou ko veutu.

⁸Ako kiadamu seke paseto amu vokasi ta ke kovou, ni seke vailizatani ta ke kelou, ni seke tubitubitani ta oma veukou ko veutu.

⁹Kala mea mama poso mela ta o kativou vovo meqora ko lado vo o paseka keru ko sisu, kio? Puliala!

¹⁰Ma kala ta o kativou ko dole so keru vo o paseka keru ko niuniu, kio? Pui!

¹¹Meta ruqea mela melai meta meqai zaria katimo ko uri ama quli meko meqora poso. Mevo aukale ala Mama ta o melai paloasa me, sole me rovea tuvevo pueko ta vota o katimou ko matu uri ama quli seke pasekani vokasi!

¹²“Meta uri erekomo se edolomu kasi, omadeuvo me meqa zariani jari tu seta ke erekou ko uri mekasi, ako ko ikio vo Mosese ko Bazu ni se poropita madu ko nianiiekato ko omele ama kio ni kalo ko kasekako sole.

¹³“Amaqeomo riro ama veutu kale kude, koko odiemelo ama saevo kale, ako heli ko veutu ta repaso ama ni koa keve sai ko olako ta malumu ama, ni matu kubo maba madu ta ke lulueka ko.

¹⁴Melai koa veutu saevo kasi ko amaqimako ta riro ama, ni koa keve sai ko olako ta tapata tu lulueko ni pui kubo madu nio kepa kai barolou koa saevo.”

¹⁵Nio vo Jisu ta obeta olake bazubazuto ni eri kiolake sekasi, “Meta tama balauvomo se lipalipa kama poropita madu seke kuevani mekasi. Seko kupekupe ama kalo ta sipi ko inobe jari, melai seko omele ama kerukeru ta niumaniuma kama piru siele jari.

¹⁶Meta memai nianiiovou se seke erekako quli kale. Ako animeta pui meba kajorikou ko lebu esoro kada topi sole. Ni so jari se ruqe ama maba madu ta pui kepa puratikou uri ama iruruputo.

¹⁷Ko puṉazo koilo ko evako ore ta ko ereka uri ama epa, ni ko saitanoqe ama ore ta ko ereka ruqe ama epa.

¹⁸Ni ko puṉazo koilo ama ore ta pui kopa erekou ruqe ama epa, ni ko saitanoqe ama ore ta pui kopa erekou uri ama epa.

¹⁹Ni kiadama ore ko pui ko uria epamatako ta ko roizaiva ni ko risaiva uza kale. Omadeuvo so jari nio vo Baṉara ta o koqotaemou kiadamu se pui uri ke erekani.

²⁰So inio meta memai nianiiovou sea lipalipa kama poropita madu seke erekako quli kale seko saevo kale.

²¹“Pui sea kiadamu se eri la kikolani aṉata sevo Lekasa lala inio kepa amaqeovou vo Baṉara ko lekasa puo kale, melai seke erekani aṉavo aukale ala Mama oka zariako quli tu ke ereko inio ke amaqeovou sai.

²²Ni titizato ko ṉaniu ko barolou keru inio kubo madu se kekai lipalipaitani ko sidopu ta eri kikevou aṉa kasi, ‘Ṉota eṉevo Lekasa ṉa! Ṉoko ṉikale eṉeta ṉe bazubazute, ni ṉoko ṉikale eṉeta ṉe rerike ko ziolo poso ni ṉe erekake kubo aqasiele ama iruruputo!’ kikevou.

²³Melai aṉata eri kiavou sekasi, ‘Meta maba pui aṉako mela, tu olamo aṉa kasi azo, me ruqe ama maba poso mela.’ ”

²⁴Nio vo Jisu ta mata eri ma kiolake se, “Kala vo o viqani komia aṉako bazubazu ni o luluekani ta kala nianiiola maba jari, vo o orumukani voko pade miduku sama lado topi.

²⁵Nio ko nioro ta ko pia, ni nioqololo ta ko saqora, ni ururu ta ko buirita ni ko puzeka koa pade. Melai kota pui ko pia, ako kota vinavina kama oruorumu sama sole lado topi.

²⁶Melai kala vo o viqani komia aṉako bazubazu ni pui o luluekani ta kala sarube ala maba jari, vo o orumukani voko pade karokoni topi.

²⁷Nio ko nioro ta ko pia, ni nioqololo ta ko saqora, ni ururu ta ko buirita ni ko puzeka koa pade, ni kota kota pia ni kota biresua,” kiolake vo Jisu.

²⁸Nio vo Jisu ta o paikake voko bazubazuto, ni sea vaki ta kekai vuzeike voko nianiiekimo se,

²⁹ako vota pui se Mosese ko Bazu kekai nianiiekatani jari ama nianiiekato sala sole, melai voko nianiiekato ta vo Baṉara ko pizato sama.