Read Bilua Matiu 9 Bible Online

Matiu 9 - Bilua bible

Matiu 9

¹Nio vo Jisu ta o zazuke vaka topi ni o pakekake koa toupa ni o vaitake Keponeami o ṉaviko peuru kale.

²Sai nio kake maba madu ta ke vati olake kala maba vokasi, pui o roveani vezokato, ke borivani bourobouro kale. Nio so keru vo Jisu ota ma kea keru seko oqu vota eri kiolake voa vere ala maba kasi, “Zolei, meqora! Ṉoko sarueko poso ta kota ṉa akoiva,” kiolake.

³Nio kake vo Mosese ko Bazu ko nianiiekato ko maba madu ta keta kuimaekiniake ke ṉavio kude ni eri kikelake, “Nea maba ta o aṉararaiva inio vota Baṉara jari ala!” kikelake.

⁴Melai vo Jisu ta ota mai mamurake seko kerukeru ni vota eri ma kiolake se, “Noi sole inio ruqe ama kerukeru me ereka meko bulo kale?

⁵Maba pui tapata tu eri kio, ‘Ṉoko sarueko poso ta kota ṉa akoiva,’ ako meta pui me qea voko sarueko ta kota va akoiva kio ma pui, melai matu tapata ikio tu eri kio, ‘Loje tu tali,’ ako mea kiada mela ta me qelou ta vota ota lojoa kio ma pui sole.

⁶Sole aṉata kasa a mela elou me, aṉa maba a eveni lala ta pizato salala komia peuru ma peuru kale tu a akoekou maba ko sarueko poso,” kiolake. Nio vo Jisu ta eri kiolake voa maba kasi, vo pui o roveani vezokato, “Ṉota loje ni lokieka ṉoko kobo ni ola ṉo bade kasi!” kiolake.

⁷So sole voa maba ta ota lojoake ni ota vaitake o ṉaviko pade kasi.

⁸Nio so keru sea maba poso ke kea keru ko quli ko ereivako quli, seta keta ṉake ni ke ilusivake vo Baṉara voko kativo kale ko urikato ni akoekato ko pizato ke ṉavi jari ala va kikelani.

⁹Nio vo Jisu ta o vaekake koa zae ni voko talio kale vota o veake kala maba takisi o koani o ṉi ta Matiu[10] obeta papuake voko iruruputo ko pade kale sai maba kovai olakoi seko takisi tabarikole. Sai nio Jisu ta eri kiolake vokasi, “Luluela aṉa.” Nio Matiu ta o lojoake ni koa ziole o luluevake vo.

¹⁰Nio vo Jisu ta ota olake Matiu ko pade kasi ni vota o mati vuatake matu kubo takisi ke koani, ni matu kubo madu, se Jiu ama lotu tanatanamu ruqe amu ma kikelani, ni o ṉaviko disaipeli madu,

¹¹Nio kake se Parese madu ta ke keake ko quli, ni ke kuimaemake voko disaipeli madu, ni eri kikelake, “Noi sole inio mevo tanala ta o mati vuata nia maba poso se takisi ke koani ni se ruqe amu?” kikelake.

¹²Nio vo Jisu ta ota ma viqake se kikelani, ni vota eri kiolake, “Se uria saevomu ta pui keva zaria vo dokita, melai seke verepani nio keva zariani vo.

¹³So sole meta olamo ni pa kai nianiimo Baṉara kiovevo ko Tabu ama Riki kale, ko eri kikelako, ‘Aṉata pui aqa zaria biaṉa kale ama siqasiqa melai aṉata aqa zaria ko tauvezato sama roquano,’ kikovema. Ako aṉata pui a queva nokaemole se sidopu amu, melai aṉata a queva tu nokaemole se ruqe ama maba poso,” kiolake.

¹⁴Ni vo Jone ko disaipeli madu ta ke kuevake Jisu kasi ni ke kuimaevake vo, ni eri kikelake, “Noi sole inio eṉe ni se Parese madu ta kubo taku ṉe dabutabua eṉeko pui vuato kale, melai ṉoko disaipeli madu ta keta vuata?” kikelake.

¹⁵Nio vo Jisu ta o mati tiorikake se ni eri kiolake sekasi, “Vo o rorotani ko baerebaere poso ni o ṉavi vo o rorotani ta omadeukoi kebeta elou ta seta pui duki kepa elou. Melai ko barolou keru koa taku, so keru aṉa voa vairua rorotoa lala jaria lala ko vou ko taku keru inio seta pui ke vuatou.

¹⁶“Pui ko mabua tu animeta me qati turutou vairu ama suma tana kama suma kale ko lula ko rotiziako, ako koa vairu ama suma ta ko matu rotiekou sole koa tana kama suma me busaekou keru.

¹⁷Ni puliala maba inio o teamuka vairu ama vaini ko ju tana kama teamuteamu[11] kale, ako vairu ama vaini ko ju ta ko pisaekou tana kama teamuteamu ni koa vaini ko ju ta kota raibiziovou ni koa teamuteamu ta kota niaqariovou. So sole meta raibikomo vairu ama vaini ko ju vairu ama teamuteamu kale tu koa omuqa quli ta pui ko niumailou. So jari nio koa vairu ama bazu aṉa a melai bazuekako ta pui me qati valuvaluekou tana kama bazu.”

¹⁸Nio vo Jisu obeta bazubazuta keru inio kala Jiu amu vo tanala ta o kuevake Jisu kasi, ni o iqeiqeake voko tanama kale, ni eri kiolake vokasi, “Aṉako meqora ta kota la voula, sole kua tu pa kai ivika ṉoko ṉase tu kota kola saevo.”

¹⁹So sole vo Jisu ni voko disaipeli madu ta ke zolaike ni ke luluevake voa tanala.

²⁰Ni so keru se kebeta talia keru inio kama rekoreko malea vere ko koako toni omuqa sabere ta ko kuevake Jisu ko tova ni kota va tibaekake voko sabosabo ko paka.

²¹Ni koa rekoreko ta tuvevo ko ikake, ni eri kikolake, “Aṉata ada va tibaekou pala vo Jisu ko sabosabo ko paka ti ada urikou,” kikolake.

²²Nio vo Jisu ta oka lilitake koa rekoreko ni o keake ko, nio eri kiolake kokasi, “Zolei, meqora. Ṉoko vai oqu vo Baṉara ta ko urikiṉa ṉo,” kiolake. Ni maba koa taku kale inio kota kota urikake.

²³Nio so keru vo Jisu o baroa keru voa tanala vo kota va vouvani voko meqora ko pade kasi vota o meake seke ziaroreani ni ke kevuezani tu ke puratiko seko duki.

²⁴Nio vota eri ma kiolake se, “Mea kiada mela ta saqoromo! Koa meqora ta pui ko vouva, melai kota kota maroṉa inio!” kiolake. Nio seta kevai niureake vo Jisu.

²⁵Ni so keru sea maba poso ke saqorima keru kupele inio vo Jisu ta o amaqeake koa meqora ko lose kale ni ota ka noqoekake koko ṉase ni kota kota zolaike.

²⁶Ni vo Jisu ko aqasiele ama iruruputo ko bazu ta kokai aerake koa kiadama zae poso Qalili rana.

²⁷Ni vo Jisu ta o vaekake koa zae, ni ota taliake, ni omuqa maba leqa kanioqa ta qo taniekake luluevo vo, ni nioqata qota upaupatake ni eri kiqolake, “Devita ko vikuvikula kalea laṉa, ṉota roqueqela eqe!” kiqolake.

²⁸Ni vo Jisu ta ota amaqeake pade kale, ni sai nio nioqata qovai olake vo, so sole Jisu ta eri kiolake nioqa kasi, “Noi nio? Qepe tuvevo pueka ta aṉata a urikiqelou qe, kio?” kiolake. Ni nioqata qo vati tiorikake vo ni eri kiqolake, “Zio, Lekasa! Eqeta qe tuvevo pueka,” kiqolake.

²⁹Nio vo Jisu ta ota ka tibaekake nioqako vilu ni eri kiolake, “Sole ko ereilo tani qeko tuvevo puto kikolani jari,” kiolake.

³⁰Nio nioqako vilu ta kota urikake ni qota keazakeazatake. Melai Jisu ta o bazuevake nioqa tu nioqata pui qokai bazutou edolomu kasi ko quli koko ereivako nioqa kasi.

³¹Melai nioqata qo vaitake ni qovai bazubazutake vo Jisu koa zae poso kale.

³²Ni nioqa omuqa maba ko tova inio kake maba madu ta ke vati olake kala maba pui o pesiani Jisu kasi, ako vota ziolo kovai onobatani sole.

³³Melai vo Jisu ta ota va rerikake koa ziolo ni voa maba ta ota pesipesitake, ni sea kiadamu ta keta vuzeike, ni eri kikelake, “Animeta puliaka taku inio meba keve eri ama quli komia kiadama Izireli zaekale!” kikelake.

³⁴Melai se Parese madu ta eri kikelake, “Se ziolo poso vo lekasa inio o kativa vo koa pizato nio vota o rerika koa ziolo poso,” kikelake.

³⁵Ni vo Jisu ta okai taliake kiadama matumatuma peuru poso ni silosilo ama zavaṉa poso. Ni vota o nianiiekatake seko ilusato ko pade poso kale, ni okai bazubazutake ko Uri ama Bazu vo Baṉara ko lekasa puo ko. Ni vota o urikimake maba poso seko azaazama vere poso kale azo.

³⁶Ni so keru o mea keru matu kubo maba madu inio vota o matu roquemake se, ako seta duki ni puliama tauvezato samu sole, omadeuvo ko sipi puliama koko vijaro ko maba sama jari.

³⁷Ni vota eri kiolake o ṉaviko disaipeli madu kasi, “Matu kubo madu ta ke inainaova tu ke tuvevo puelo aṉa, melai pui kubo madu se kepa tauvemo amu. Omadeuvo jari nio koa epa ta kubo, melai pui kubo madu seke kajorani.

³⁸So sole vararaitomo vo epa ko Lekasa kasi, tu vota o soroemo voko iruruputo ko maba poso tu ke kajoriko voko epa,” kiolake.