Read Bilua Maka 1 Bible Online

Maka 1 - Bilua bible

Maka 1

¹Komia Uri ama Bazu ta Jisu Karisito, Baṉara vo Meqora ko kasevako,

²vo Baṉara ovai bazuekema vo poropita Aisea tu eria rikieko o elo, “Baṉara ta eri kiolake, ‘Aṉata a joroevou aṉavo talitalio ko maba ṉoko kuleto tu oṉa inainaekou ṉoko keve,’

³ni, ‘Kala ta o velavelaova lealea kama zaekale matuma kora kale, ni eri kiola, “Meta va inainaekomo vo Baṉara ko keve, ni sare ikomo koa keve sai vo o taliovoa koi!” kiola.’ ”

⁴Nio so inio vo Jone ta o puratake lealea kama zaekale, ni bapitaiso o imake se maba poso ni o bazubazutake ni eri kiolake, “Meta liliziomo meko sarueko kale azo ni bapitaiso emo, inio vo Baṉara ta ota mela akoekou meko sarueko poso,” kiolake.

⁵Nio matu kubo maba madu Jiudia rana mu ni Jerusalema matu peuru kale amu ta ke olake didievole vo Jone. Ni seta kekai eraeraoke seko sarueko poso Baṉara kasi, nio vo Jone ta bapitaiso o imake se Jodani sukuru kale.

⁶Vo Jone ta o kiakeni kameli ko toukale ke erekema sabosabo, ni okai bibuliovini tabarioma tupu biaṉa ko, ni voko sailao ta sesekalau ni piru ama variqore ko epa.

⁷Ni vota eri kiolake voko bazubazuto kale sea maba poso kasi, “Voa maba vo o kilo ala aṉako tova, vo inio raura kala aṉa kasi azo. So sole aṉata maba pui a male tu vovo mabaku va elo tu ava rupasiko voko buti ko raitoraito.

⁸Ni aṉata bapitaiso a imela me jukale, melai vo inio bapitaiso o imelou me vo Tabu ala Auvana kale,” kiolake.

⁹Puliako tu keu Jisu ta o kuevake Nazareti peuru kale azo, Qalili ranʼazo, nio Jone ta bapitaiso o ivake vo Jodani sukuru kale.

¹⁰Ni Jisu ta obe kailake ju ko tana topi, nio vota o keake au ko veukazio ni vo Baṉara vo Auvana ta ovai saqorake vo, ni voa Auvana ko velo ta ova kurou jari ala.

¹¹Ni vota o viqake ko kora aukale azo ama ko eri kikolako, “Ṉota a ṉavivo Meqora ṉa, a matu roqueṉani ṉa. Ṉo inio aṉa aṉa matu zoleivani ṉa,” kikolako.

¹²Komi quli ko tova inio vo Tabu ala Auvana ta o vati olake vo Jisu lealea kama zaekale.

¹³Nio vota o evake sai ariku toni ṉaniu, ni Setani ta o zolizolievake vo. Ni sai ta piru ama ariku kiti ama biaṉa sakoi, melai se mateana poso ta ke kuevake ni kepa tauvevake vo Jisu.

¹⁴Ni Jone Bapitaiso ke pirieva ko tova, nio Jisu ta ota olake Qalili ranama peuru poso kale ni okai bazubazutake vo Baṉara ko Uri ama Bazu.

¹⁵Ni eri kiolake, “Ko tutututuki ama taku ta kobeta kueva, ni vo Baṉara ko lekasa puo ta sipole! Tu meta liliziomo meko ruqe kale azo ni tuvevo ikomo ko Uri ama Bazu,” kiolake.

¹⁶Ni vota obeta ketaina Qalili toupa ko ketaketa ni vota o keake omuqa abu ko maba kidi, Saimone ni vovo visi Aduru qopeta abuke toupa kale nioqako saru kale.

¹⁷Nio vo Jisu ta eri kiolake nioqa kasi, “Kueko tu lulueloko aṉa. Ako qeta niuniu ko abu ko maba kidi qela melai erisaṉa aṉata a qelati nianiiekikou ko maba ko odiemo aṉa kasi,” kiolake.

¹⁸So sole koa taku kale inio nioqata qo vaekake nioqako saru ni koa ziole qo luluevake vo.

¹⁹Ni vota mata o sasa vatutake ni vota o keake mata kainioqa tamania Jemisi ni Jone, vo Zebeti ko meqora kidi. Nioqata koaka topi qope vuarikake nioqako saru.

²⁰So sole koa taku kale inio Jisu ta o keake nioqa ni o nokaekake nioqa, ni nioqata qo vaevake nioqavo mama Zebeti ni vo ke tauvevani iruruputo ko maba poso koaka topi, ni koa ziole qo luluevake vo Jisu.

²¹Ni Jisu ni voko disaipeli madu ta ke baroake Keponeami matu peuru kale. Nio Sabati ṉaniu kale Jisu ta o amaqeake ilusato ko pade kale ni vota o nianiiekimake se maba poso.

²²Nio seke didievani vo ta kekai vuzeike voko nianiiekimo se, ako vota pui se Mosese ko Bazu kekai nianiiekatani jari sole; melai voko nianiiekato ta vo Baṉara ko pizato sama.

²³Ni koa taku kale inio kala maba ziofo kovai onobatani ta o amaqeake ilusato ko pade kale ni ota karakararautake,

²⁴ni eri kiolake, “Nazareti ala Jisu ṉa! Noni ṉo iṉelo kinola inio? Ṉo queva koi tu niumaeṉelole eṉe kio? Eṉeta lula ṉeṉai nianiia ṉo ta ṉota vo Baṉara vo Tabu ala Maba ṉa vo o soroeṉeni ṉa inio!” kiolake.

²⁵Nio vo Jisu ta o riqaekake koa ziolo ni eri ka kiolake, “Ṉota moizai, ni saqore nea maba tona azo!” kiolake.

²⁶Nio koa ziolo ta ko dededederivake vo ni ota karakararautake, ni kota kota saqorake voa maba kale azo.

²⁷Nio sea kiadama maba poso ta keta vuzeike ni eri kikelake ke ṉavio kude, “Loma quli kio komi? Esa komi ta kama vairu ama nianiiekato ikio? Ako nea maba ta pizato sala ni o riqaeka ko ziolo poso, ni kota ko zoriva sole!” kikelake.

²⁸Ni vo Jisu ko bazu ta kokai aerake kiadakoi koa Qalili rana.

²⁹Ni Jisu ni voko disaipeli madu ni Jemisi ni Jone ta ke vaekake koa ilusato ko pade, ni tutumazi avole keta olake Saimone ni Aduru ko pade kasi.

³⁰Ni so keru Jisu o baroa keru koa pade kasi, nio seta kevai bazuekake vo Saimone ko ravaza, o reko ko niania ko vere kobeta tekuako kobo topi.

³¹So sole vo Jisu ta o olake kokasi, ni ota ka noqoekake koko ṉase, ni o zolaekake ko. Nio koa vere ta ko vaekake koa rekoreko, ni ko niaemake se.

³²Nio raisiraisi ṉaniu obe jeita keru nio maba poso ta ke mati olake matu kubo maba madu seke verepani ni ziolo komai onobatani Jisu kasi.

³³Ni kiadama maba poso koa matu peuru kale amu ta ke padoivake koa pade ko taqo kale.

³⁴Nio vo Jisu ta o urikimake kubo madu se azaazama vere samu, ni ota ma ṉamukake matu kubo ziolo poso. Melai vota pui o zariemake sea ziolo poso tu ke kaseko ta vota Baṉara vo Meqora inio kio, ako seta lula kebe vai nianiia vo sole.

³⁵Omadeu vikale, puliako ṉaniu peato inio Jisu ta ota toiratake nio o vaekake Saimone ni Aduru ko pade. Ni ota olake koa peuru kale azo ivulu ama zaekale vararaitole.

³⁶Nio Saimone ni voko lolo poso ta ke vailivake vo,

³⁷ni so keru seke vea keru vo, seta eri kikelake vokasi, “Ṉoela, kiadamu ta ke vailiṉa ṉo,” kikelake.

³⁸Nio vo Jisu ta o mati tiorikake ni eri ma kiolake, “Animeta me zio mata kama peuru poso kale tu aṉata a bazubazutou sekasi, ako Sokale avo inio aṉa koi aqai kuevivo sole,” kiolake.

³⁹So sole vo ni voko disaipeli madu ta kekai taliake kiadama zae poso Qalili, ni vota o bazubazutake seko ilusato ko pade poso kale ni o rerikake ko ziolo poso.

⁴⁰Ni kala pokupoku ala maba ta o olake Jisu kasi, ni o iqeiqeake voko tanama kale ni eri kiolake vokasi, “Tanala, ṉota ṉoqa zariovou ta, ṉota ṉo roveovou urikilo aṉa!” kiolake.

⁴¹Ni vo Jisu ta o matu roquevake vo, ni o rauqazake ni o tibaevake vo ni eri kiolake vokasi, “Aqa zaria, tu urike!” kiolake.

⁴²Nio maba koa omadeuma taku kale inio voa maba ta ko vaevake koa pokupoku, ni ota urikake.

⁴³Nio Jisu ta o matu pasevake vo ni eri kiolake voa maba kasi, “Pui ṉoqai bazutou komi kala kasi, melai ṉota ola sidopu avole vo siama kasi tu o lelepiṉo saita inio ṉota ṉo erekou koa siqasiqa vo Mosese ko Bazu ko melati soruekako tu kiadamu ta ke tuvevo puekou ko ṉota erisaṉa ta ṉoda urika kio.”

⁴⁵Melai so keru voa maba o vaita keru, vota o taniekake kai bazubazuto koa kiadama zae poso kale. Ni Sokale avo inio Jisu ta pui o roveake talio maba ko vilu kasa koa peuru poso kale. Melai vota o evake koa peuru poso ko kupekupe, sai maba poso pui ke evakoi, melai sai melai sea maba poso ta kebe vai olaolaitake seke kuevani azaazama peuru poso kale azo.