Read Bilua Maka 12 Bible Online

Maka 12 - Bilua bible

Maka 12

¹Ni vo Jisu ta mata o nianiiekimake se kama pado podepodeti kale ni eri kiolake, “Inevoana kala kiaruzo ko maba vo o papakani ko vaini voko kiaro kale, ni vota o qaramukake koa kiaro ko levoano, ni vota o erekake ka pado zae se keta ka zuzuekoa koi ko vaini ko epa ko ju, ni o lojoevake kala okate ala pade o lovelove kaqe. Koko tova inio voa maba ta oma zariekake koa kiaro kake maba poso, ni vota ota olake vaṉama peuru kale. Melai vota o kovou ka kena koa kiaro kale ama epa seko korotato ke erekema kale.

²“Nio kajoro ko taku ko baroa keru, vota o soroevake vovo nabulu tu opa kovo voko kena koa epa ko.

³Melai sea iruruputo ko maba madu ta ke butuevake voa nabulu ni ke pazovake, ni ke vaitoevake pulia quli sate.

⁴“Ni koko tova voa tanala ta mata o soroevake kala vovo nabulu, melai sea iruruputo ko maba madu ta keta va pazokake o lezu ni ke niumaevake.

⁵“Melai voa tanala ta mata o soroevake kala vovo nabulu, ni seta ke vouvaevake vo. Ni omadeuvo jaria tapata inio ke imake mata kake voko nabulu poso, kake ta ke pazomake ni kake ta ke vouvaemake.

⁶“Inevoana vokasi o ṉavivo meqora, vo o roquevani, ni koko tovatova inio voa tanala ta o soroevake vo, ‘Ako vo inio keta va paṉaovo ala sole,’ kiolake.

⁷Melai so keru se kekai iruruputani koa vaini kiaro ke vea keru voa meqora, seta eri kikelake, ‘Nei nio komia kiaro sala vo meqora, vo o besievo ala vovo mama tu kiaro ko raki ota ka elo. Ariamo tu me vouvaevo, nio komia vaini kiaro vo kovai vikuvo ama ta animeko ko elou!’

⁸So sole seta ke noqoevake voa meqora ni ke vouvaevake ni keta va ṉamukake voko vouma tupu vaini kiaro ko kupekupe.”

⁹Nio Jisu ta o kuimaemake sea maba poso ni eri kiolake, “Sole noi nio o imou voa vaini kiaro sala maba se kekai iruruputani koa kiaro voko vaito keru? Vota o kilou ni o vouvaemou sea ruqe ama maba poso, ni ota ma kovou koa kiaro ni oma zariekou edolomu.”

¹⁰Ni Jisu ta mata o erevake kala podepodeti o ṉavi kale avo ni eri kiolake sekasi, “Meta pui me ataekako ikio ko Tabu ama Riki kikovevo? Ko eri kikolako, ‘Koa lado se pade ke erekani kekai keduima pui uri ama ka kikevema, ko ikio erisaṉama qulepo ama pade ko lado kiadama lado poso azo.

¹¹Kota vo Baṉara inio soa ereko o eve ni matu aqasiele koko uria kelo,’ kikolako.”

¹²Ni se Jiu mu ko tanatanamu ta kekai zariake noqoevo vo Jisu, ako seta kekai nianiiake ta vota kuiripato saṉa omai ikake koa vaini kiaro ko podepodeti kale sole. Melai seta keta ma ṉake sea matuma vaki, sole seta ke vaevake vo ni keta olake.

¹³Ni kake Parese madu ni kake vo Herodi[8] ko poqala zuvarato ko maba madu ta ke soroemake tu ke madoeko zaraevo vo Jisu seko kuimaevo kale.

¹⁴Nio seta eri kikelake, “Tanala, eṉeta ṉeṉai nianiia ta ṉota sidopua laṉa ni ṉota ṉo mati nianiiekikani ṉa maba madu Baṉara ko tuvevo ama kalo, ni ṉota pui ṉoqai bazutani ṉa ko maba poso ko zolemako quli pala. Sole ṉota ṉela bazueka ṉoko kerukeru. Uri kio ko animea Jiu mu mela ta me dabariko ko takisi Romu ala Matu Lekasa kasi, ma pui? Noni kikola animeko Bazu?” kikelake.

¹⁵Melai Jisu ta lula obe tamai nianiia seko ruqe ama vatolo, sole vota eri ma kiolake, “Meta mela zaria pala inio madoelo aṉa! Kati kuemoni ka pado koa siliva seleni tu a qelo,” kiolake.

¹⁶Sole seta ke kativake kama pado koa Romu amu ko takula, ni vota eri kiolake, “Lalako loilo ni ṉi kio komia takula topi ko evako?” Ni seta ke vati tiorikake ni eri kikelake, “Matula Lekasa Romu ala ko,” kikelake.

¹⁷Nio Jisu ta eri ma kiolake, “Uri, sole Romu ala Matu Lekasa ko ta kativomo vo Romu ala Matu Lekasa, ni Baṉara ko ta kativomo vo Baṉara,” kiolake. Ni seta kevai vuzeike vo Jisu.

¹⁸Ni kake Sadiusi madu, se pui tuvevo ke ikani maba ko mata saevo voukale azo, ta ke kuevake Jisu kasi tu ke madoeko zaraevo vo, ni eri kikelake,

¹⁹“Tanala, vo Mosese ta o ṉela rikieke komia Bazu ko eri kikolako, ‘Kala maba ta o vouvou ni meqora pide ama o vaekou voko reko, ta vovo visi nio mata o tova raekou koa naboko tu nioqata meqora saṉa qo elou tu sea meqora poso ta vo o vovini kaka ko meqora poso kerukeruilo ke elou,’ kikolako.

²⁰Ni iniseana koi ke eveni sikeura tamania, ni sevo kaka ta o raekake ka pado reko ni puliako tu kati keu vota ota vouvake puliako meqora saṉa elo.

²¹Sole koa naboko ta mata ko raevake kovo kuleto ala lasive vo visi ni vo melai ota vouvake puliako meqora saṉa elo. Ni koa omadeuvo kobeta kake zouke ala kasi,

²²ti kobeta baroake sikeurala kasi, seko pui meqora kai ereko ko ni seko vou. Nio koko tovatova inio ko ṉavi koa reko ta kota vouvake.

²³Nio sea sikeura tamania ti ke raeke muli koa reko, sole lalako reko ikio ko elou so keru se mata ke tova saevou keru voukale azo?” kikelake.

²⁴Nio vo Jisu ta eri ma kiolake se, “Meta meda saruiva meko kerukeru kale, ako meta pui meqai nianiia ko Tabu ama Riki kikovevo, voukale azo mata saevo ko bazu, ni Baṉara ko pizato melai pui meqai nianiia sole.

²⁵Ako so keru seke vovini ke saevou keru voukale azo, seta pui kepa rorotou, omadeuvo se aukale ama mateana madu jari.

²⁶Melai meta pui me duvevo puekou se voumu ko mata saevo, ta meta maba pui me baqumukani mela inio vo Mosese ko buka ko kasekako koa urusana ko bainema sasa ore topi sai o eve keru ama bazu. Ako sai nio ko rikiziovikoi sole vo Baṉara ko eri vati kio vo Mosese, ‘Aṉa inio vo Ebarahami vo Baṉara lala ni vo Aisake vo Baṉara lala ni Jekopi vo Baṉara lala,’ kikovekoi.

²⁷Ni vota saevomu vo Baṉara inio melai pui voumu, so sole Ebarahami ni Aisake ni Jekopi melai keta tova saevou. So sole meta meda matu saruiva inio,” kiolake vo Jisu.

²⁸Ni kala vo Mosese ko Bazu okai nianiiekatani ta o didiemake se, ni ota ma viqake ta Jisu ta o katimake se Sadiusi madu uri ama opato. So sole vota o olake Jisu kasi ni o kuimaevake vo ni eri kiolake, “Loma ikio matu qulepo ama bazu kiadama vo Mosese ko Bazu azo?” kiolake.

²⁹Nio Jisu ta o vati tiorikake, ni eri kiolake, “Ko matu qulepo ama bazu kiadama vo Mosese ko Bazu azo ta komi, ‘Meta didielomo me Izireli mu mela! Vo Baṉara animevo Lekasa ta vo tivoineni animevo Lekasa,

³⁰ni meta roquevomo vo Baṉara mevo Lekasa pado ama meko bulo kale ni pado ama meko vatolo kale ni pado ama meko kerukeru kale ni pado ama meko pizato kale.’

³¹Ni omuqama matu qulepo ama bazu ta komi, ‘Meta roquemomo edolomu me ṉavi me roquivani jari.’ Ni puliama mata kama bazu ta matu qulepo ama komia omuqa bazu azo.”

³²Ni vo Mosese ko Bazu okai nianiiekatani ta eri kiolake Jisu kasi, “Matu uri, tanala! Ni ṉo kiṉolani ta tuvevo, ako vo Baṉara ta Lekasa tivoine ni puliala mata kala melai vo o kiada.

³³So sole vo maba ta o roquevou vo Baṉara kiadama voko bulo kale ni kiadama voko kerukeru kale ni kiadama voko pizato kale, ni vota o roquemou edolomu o ṉavi o roquiva jari. Ni komia omuqa bazu ta matu qulepo ama bazu tu me zorikou kobe kai paloasa ko biaṉa ko siqasiqa.”

³⁴Ni Jisu ta ota vai nianiiake nea maba ko uponianiio sama opato, nio vota eri kiolake vokasi, “Ṉota pui vaṉa vo Baṉara ko lekasa puo kasi azo.” Ni sai kazo inio sea kiadamu ta keta matu paṉaovake tu mata ke kuimaevo vo Jisu.

³⁵Ni Jisu ta obeta nianiiekata keru Jelepade kale inio vota o kuimaemake se ni eri kiolake, “Noi sole inio se vo Mosese ko Bazu kekai nianiiekatani ta eri kikela, ‘Vo Baṉara o soroevo ala Pakio ta o alilou vo Devita ko vikuvikula kale?’

³⁶Melai Tabu ala Auvana inio o kativake ko kerukeru vo Aikovakova Devita ti vota eri kiolake o kera kale, ‘Vo Baṉara ta eri vati kiolake aṉavo Lekasa, ṉota papi aṉako palo rana tu ṉo lekasa puo, ti kobeta barolou so keru aṉa a vaemou keru kiadama ṉoko kana poso ṉoko pizato kale.’

³⁷“Ni vo Devita ta ova nokae voa Pakio ta vovo Lekasa, sole noi nio voa Pakio ta vo Devita ko vikuvikula kale ala inio?” kiolake. Ni sea matuma vaki ta ke didievake vo Jisu ni keta zoleike.

³⁸Ni so keru vo o nianiiekima keru sea vaki, vota eri kiolake, “Tama balauvomo se Mosese ko Bazu kekai nianiiekatani, seke lipiani seko rosia sabosabo sate tu maba poso ta ke rauraemo se tatabarao ko zaekale sai maba poso ke padoivakoi.

³⁹Ni tama balauvomo seke pitoekani kai papu raura kama papupapu ilusato ko pade kale, ni ke pitoekani qulepo ama zae ṉojola kale.

⁴⁰Se inio keta ma bibizikani se naboko poso ko pade poso seko ubeubemo kale, ni koko tova se inio kekai lipalipaitani ko rosi ama vararaito ubutiania tu maba madu ta ke melou pala! Melai seko koqotailo ta matu palopaloasi ama kota elou!”

⁴¹Ni vo Jisu obeta papua keru Jelepade kale sai kekai katizatako zae ko ketaketa, inio vota o mati vailake seke pikani seko takula,

⁴²ni vota mata o keake kama pado matu ozaoza kama naboko ko kuevake ni ko pikake omuqa diri seniti.

⁴³Ni so keru inio Jisu ta o nokaemake voko disaipeli madu ni eri kiolake sekasi, “Aṉata a bazuemela me, komia ozaoza kama naboko ko vaekake ta kobe kai paloasa sea kiadamu seke pikazatani ke vaekako.

⁴⁴Ako seta ke vaeka sole kama kobu pala seko batiro, melai komia naboko ta koko ozaoza kale ko vaeka koa kiadama koko ṉeamukako sole,” kiolake.