Read Bilua Maka 14 Bible Online

Maka 14 - Bilua bible

Maka 14

¹Ni omuqa ṉaniu ta ikoana ti Alokato ni Isiti pide ama Bereti ko Ṉojola ikio. Ni se raura kama siama madu ni se Mosese ko Bazu kekai nianiiekatani ta ke erekake ko korokorotato tu ke noqoevo vo Jisu moizavole ni ke vouvaevo kikelake.

²Melai seta mata eri kikelake, “Animeta pui me noqoevou vo koa matuma ṉaniu kale, ako pui uri tu maba poso ta ke melai korakorailo anime ni ke erekou ko riṉoteṉote sole,” kikelake.

³Ni vo Jisu ta ota olake Betani peuru kale vo Saimone lulavo pokupoku ala o eveni ko pade kasi. Ni Jisu obeta vuata keru inio kama pado rekoreko ta ko kati olake kama pado teamuteamu sukasukati ama lumu sama, matu bulebule ama, ko matu uria tui ama nadi ka kikelako papapapa kale ko ereima, ni matuma tatabara sama, ni koa teamuteamu ta matu tatabara kama dikidoke ama lado alebasita ka kikelako. Ni koa rekoreko ta ko lobitikake koa teamuteamu ni ko raibikake koa lumu Jisu ko lezu topi.

⁴Ni kake maba madu ta keta korakoraivake ke navio kude, ni eri ka kikelake, “Noi sole inio ṉota ṉo niumaeka koa lumu?

⁵Ako ṉoqai tatabaraova tea, matu kubo seleni kio ṉoqai kovou nio ṉo qatimou se ozaoza kamu,” kikelake. Ni seta kekai karaṉake.

⁶Nio Jisu ta eri ma kiolake se, “Vaeka; pui kai karaṉo koa rekoreko! Ako kota ko ereka inio koko uri ama iruruputo sole aṉa kasi.

⁷Ako se ozaoza kama maba madu meme qasemani ta mekasi nio kebeta eloa koi kiada keru, sole kiada keru me dauvemo amu inio se. Melai aṉata pui mekasi aba eloa lala sole kiada keru.

⁸Nio komia rekoreko ta ko erekala ko kokai roveako, ni koko raibiko ko uria tui ama lumu aṉako tupu topi ta ko inainaeka inio aṉako mutailo.

⁹Ni aṉata a bazuemela me, lai ma lai komia Uri ama Bazu Baṉara ko lekasa puo ko ko pikairiovoa koi komia peuru ma peuru kale, ta kekai bazubazutou komia rekoreko ko erekako uri ama iruruputo tu maba poso ta ke kerukeruekou ko,” kiolake vo Jisu.

¹⁰Ni kala sea toni omuqa disaipeli azo, o ṉi ta Jiudasi Isikarioti, ta o olake raura kama siama madu kasi ni omai bazuekake ko taku ni zae seke noqoevoa koi vo Jisu.

¹¹Ni seta kekai matu zoleivake vo mati kiolani ni seta ke vati takumatake vo tu ke kativo ko takula. Sole Jiudasi ta o kati vailake lama taku kio uri ama taku tu oma luavivo se vo Jisu.

¹²Ni kulekuleto ama ṉaniu koa puliama isiti sama bereti ko ṉojola kuo ta ko baroake. Komia taku kale inio ke vouvaekani ko sipi ko meqora poso Alokato ko sailao kaqe. Nio voko disaipeli madu ta ke kuimaevake vo Jisu ni eri kikelake, “Lai nio ṉoqai zariakoi ṉo tu eṉeta ṉeba ṉa inainaekou ko Alokato ko Ṉojola ko sailao?” kikelake.

¹³Nio Jisu ta o soroekake omuqa voko disaipeli kidi ni eri kiolake, “Qeta olako peuru kale Jerusalema ni kala maba o borikani ko bovu ju sama ta o toraeqelou qe. Qe luluevou vo

¹⁴koa pade kale vo o amaqeovoa koi, ni eri kiqevou koa pade sala kasi, ‘Animevo tanala inio okai zaria kai nianiio koa lose sai vo ni voko disaipeli madu ke erekoa koi ko Alokato ko sailao,’ kiqevou.

¹⁵Ti vota ope qela kasekou nio matuma lose okate ama, ni kota supisupiti ama lomaloma sama, ni sai nio qeta qe inainaekou kiadama quli,” kiolake.

¹⁶So sole nioqata qo zolaike, ni qota olake peuru kale. Ni qo keake pade ko poro ni kiadama quli koko poro kale ama omadeuvo Jisu be kati kiovevo jari, ni sai nio nioqata qo inainaekake ko Alokato ko sailao.

¹⁷Ni koa raisiraisi nio Jisu ni voko toni omuqa disaipeli ta keta olake koa pade kasi.

¹⁸Nio so keru se kebeta vuata keru nio Jisu ta eri kiolake, “Aṉata a bazuemela me, kala me azo ta o saiqorilou aṉa vo obeta vuatani aṉa sase,” kiolake.

¹⁹Nio sea disaipeli madu ta duki keta evake, ni sea kiadamu ta ke kuimaevake kala mati kala vo Jisu, ni eri kikelake, “Lekasa, aṉa inio esa ma?” kikelake.

²⁰Nio Jisu ta o mati tiorikake ni eri kiolake, “Kala mea toni omuqa azo vo aṉa sase o suseko ala voko bereti komia taroro kale vo inio o saiqorilo ala aṉa.

²¹Melai aṉa maba a eveni lala ta soa vou inio a elo avo ko Tabu ama Riki kikovevo sole. Melai matu ruqe ama quli kio kovai barolou voa maba vo o saiqorilo ala aṉa maba a eveni lala, ni noni kaqe inio ota alile?” kiolake vo Jisu.

²²Ni se kebeta vuata keru nio Jisu ta o koake ko bereti, ni mauru o ikake, ni o palamukake ni o katimake voko disaipeli madu, ni eri kiolake, “Komi ta ko mamola pueka aṉako tupu. Meta komo ni kumo.”

²³Ni vota mata o koake ko kapa vaini ko ju sama ni o kasekake voko uriavo Baṉara kasi, ni o katimake voko disaipeli madu, ni sea kiadamu ta ke nozuekake.

²⁴Nio Jisu ta mata eri kiolake sekasi, “Komia kapa vaini sama ta ko mamola pueka aṉako dara, koko rereovo ama tu ko pakiemo kubo maba poso, ni komia aṉako vou kio ko vinaeko ama vo Baṉara ko leveleveo maba poso kasi.

²⁵Ni aṉata eri kiala mekasi, aṉata pui mata aba nozuekou komia vaini ko ju ti kobeta barolou koa ṉaniu so keru aṉa mata a nozuekou keru ko vairu ama vaini ko ju Baṉara ko lekasa puo kale,” kiolake vo Jisu.

²⁶Ni seta kekai keraoke ka pado ilusato ko kera, ni keta olake Olive Ore sama Sopu kale.

²⁷Ni se kebeta ola keru Olive Ore sama Sopu kale nio Jisu ta eri kiolake sea disaipeli madu kasi, “Mea kiada mela ta meda soqoilou ni me vaelou aṉa, ako ko Tabu ama Riki kikovevo ta eri nio sole, ‘Vo Baṉara ta o vouvaevou vo sipi o kati vailani ni se sipi poso ta keta birebireilou.’

²⁸Melai so keru vo Baṉara mata o saevilou keru aṉa voukale azo, aṉata a ziovou Qalili meko kuleto,” kiolake.

²⁹Nio Pita ta eri kiolake Jisu kasi, “Nia kiadamu ta keta ṉa soqoilou melai aṉata pui aba vaeṉou ṉo,” kiolake.

³⁰Ni Jisu ta eri va kiolake, “Pita, puliako kokorako zialo omuqama taku oduadu ipu kale, nio ṉota eri la kiṉovou zouke taku, ‘Aṉata pui avai nianiia vo,’ kiṉovou,” kiolake.

³¹Nio Pita ta eri kiolake matuvole, “Kebe vouvaelo kikevou ṉo sate melai aṉata pui aba ṉai zoliovou!” kiolake. Ni sea kiadama disaipeli madu ti omadeuvo kikelake.

³²Ni Jisu ni voko disaipeli madu ta kebeta olake ni kekai baroake ka pado zae Qetisemani ṉi sama, ni so keru seke baroa keru sai, vo Jisu ta eri kiolake sekasi, “Meta tarelomo koi tu aṉata a zio tu aba vararaito,” kiolake.

³³Ni vota o mati olake sea toni omuqa azo Pita ni Jemisi ni Jone, ke kiadakoi. Ni Jisu ta matu upotuqu ota evake,

³⁴ni vota eri kiolake sea zouke kasi, “Aṉata matu duki ada eva ni sipole ko vouvaelou koa duki. Tu meta koi ni pui me maroṉou melai me vararaitou aṉa sase,” kiolake.

³⁵Ni vota o sasa vatutake sekasi azo, ni ota iqeiqeake miduku kale ni ota vararaitake, tu ko roveovou ta, vota pui o kovou koa taku tolailo ko,

³⁶nio vota eri kiolake, “A Mama ṉa, kiadama quli ti pui tapata ikio ṉokasi. Sole tala vatutika komia upotuqu ko kapa aṉa kasi azo. Melai pui ṉo erekou aṉako zario kikolani, melai vaeka tu ko ereilo ṉoko vatolo kikolani jari.”

³⁷Nio vota o vaitake sekasi ni o meake sea zouke disaipeli kebeta maroṉake. Ni vota eri kiolake Pita kasi, “Saimone, ṉoda maroṉa kio? Ṉota pui ṉo rovea toirato ni vararaito aṉa sate kama omadeu aoa tiniavo?” kiolake.

³⁸Ni vota mata eri ma kiolake, “Meta vailomo ni vararaitomo nio meta pui me amaqeovou zolizolito kale. Ako meta meqai zaria ereko ko sidopu, melai meta lekuleku ama maba poso mela.”

³⁹Ni vota mata ota tova vaitake vararaitole, ni vota okai vararaitake koa omadeuma vararaito.

⁴⁰Koko tova inio vota mata o vaitake sea zouke disaipeli madu kasi, ni o meake ta kebeta maroṉake, ako keta matu dudeake sole. Ni pui ke roveake vati tioriko vo kiolani.

⁴¹Ni voko zouke ama vararaito ko tova inio vota mata o vaitake sea disaipeli madu kasi ni eri ma kiolake, “Meta mebeta maroṉa ni mamaza kio? Kota korota inio meko maroṉo ni mamazo! Ako taku ta kota baroa sole! Ni keatini, aṉa maba a eveni lala ta a qatiziovou se ruqe ama maba madu ko ṉase topi.

⁴²Zolaimo tu meda zio. Keatini, nei ta voineni voa maba obeta kueva vo o saiqorilani aṉa sole!” kiolake.

⁴³Ni so keru Jisu obeta pesipesita keru nio Jiudasi, kala sea toni omuqa disaipeli madu kale ala, ta o baroake. Ni vo ke luluevani ta matu kubo vaki ke borikake ko benisi ni kubau, se raura kama siama madu ni se vo Mosese ko Bazu kekai nianiiekatani ni se lotu tanatanamu ke soroemeni.

⁴⁴Nio vo Jiudasi ta lula o bazueme sea vaki ni eri mati kiove, “Vo aṉa a lumevo ala, vo inio voa maba me mevai zariani. So sole me noqoevou ni me vati vailou me vati ziovou keru,” kiolake.

⁴⁵Nio vo Jiudasi ta tutumazi avole o olake Jisu kasi ni eri kiolake, “Tanala,” kiolake ni o lumevake vo.

⁴⁶So sole seta ke noqoevake vo Jisu.

⁴⁷Melai kala sea disaipeli azo ta o ravuzikake voko benisi koko teamuteamu kale azo tu o pazovo kiolake vo Ṉisa Siama vo nabulu, ni ota va pikekake voko taliṉa.

⁴⁸Sai nio Jisu ta eri ma kiolake sea vaki, “Meko kerukeru kale ta aṉata kala matu ruqe ala kuiloa lala ni pazokinio ko maba lala la kimela inio meta meda kueva benisi poso ni kubau poso sate tu noqoelole aṉa, kio?

⁴⁹Aṉa inio abeta eva ni a nianiiekatani lala kiadama ṉaniu poso ubutiania Jelepade kale melai pui me noqoela sai. Melai komi quli ta ko ereiva tu ko Tabu ama Riki kikovevo ta tuvevo ko elo,” kiolake.

⁵⁰Ni sai nio sea kiadama disaipeli madu ta keta va soqoike.

⁵¹Melai kala vairu ala maba, o kiakeni kama pado matu uri ama suma nio o luluevake vo Jisu. Ni vo melai ke noqoevo kikelake,

⁵²melai omai vaekake o suma, ti ota soqoike solemauru ala.

⁵³Ni se kepa noqoeveni vo Jisu ta ke vati olake vo Ṉisa Siama ko pade kasi, sai raura kama siama madu ni lotu tanatanamu ni Mosese ko Bazu kekai nianiiekatani ke padoivakoi.

⁵⁴Ni vo Pita melai obe luluemake se, melai vaṉa inio ota ma taliake. Ni so keru vo o baroa keru vo Ṉisa Siama ko pade ko taqo kale vota ota amaqeake ni ota papuake se vailo ko maba madu sate ni ota ṉadarake uza ketaketa.

⁵⁵Ni se raura kama siama madu ni se Jiu amu ko lotu tanatanamu ta ke madoekake tu kevai kuiriko kama kuiripato vo Jisu tu ke vouvaevo vo, melai seta pulia quli keta va keake.

⁵⁶Ako matu kubo maba madu inio ke kasekake lipalipa kama quli Jisu kale avo melai seko pesipesi ta azaazavo kota evake.

⁵⁷Sai nio mata kake maba poso ta ke lojoake ni keva lipalipatake vo Jisu,

⁵⁸ni eri kikelake, “Eri nio kiolani nea maba, ‘Aṉata a biresukou komia maba ko erekema Jelepade ni zouke ṉaniu kale inio a baikou orumuko koa Jelepade maba pui kopa kai roveovo ama orumuko,’ nio kiolani,” kikelake.

⁵⁹Ni so melai maba pui ko luluekinia seko pesipesi.

⁶⁰Nio vo Ṉisa Siama ta o lojoake sea kiadamu ko kuleto, ni o kuimaevake vo Jisu ni eri kiolake, “Ṉota ṉobe viqa inio nia maba poso ko kasa iṉo ṉo. Ta noi nio pui ṉo opata?” kiolake.

⁶¹Melai Jisu ta moiza, ni pulia quli o kasekake. Nio koko tova inio mata vo Ṉisa Siama ta o kuimaevake vo Jisu ni eri kiolake, “Tuvevo ṉo inio voa Pakio ṉa, ni vo Raura kala Baṉara vo Meqora ṉa?” kiolake.

⁶²Ni vo Jisu ta o vati tiorikake ni eri kiolake, “Tuvevo aṉa inio. Ni meta me lelou aṉa maba a eveni lala ta a bapuvou vo Piza kala Baṉara ko palo rana tu a lekasa puo ni a qilou aukale ama leikale!” kiolake.

⁶³Nio vo Ṉisa Siama o viqa keru komi quli vota ota matu korakoraivake, ti obe rotiekake inio voko sabosabo, ni eri kiolake, “Animeta pui meba vai zariovou mata kala voko tuvevo o kaseko ala,

⁶⁴ako meta lula me viqala me ṉavi voko aṉararailo sama pesio sole. So sole noni ta meko pitoto?” kiolake. Nio sea kiadamu ta ke vati tiorikake ni eri kikelake, “Vota maba o vouvou,” kikelake.

⁶⁵Nio kake ta keva supatake vo, ni keta va lupikake voko vilu ni ke pazovake, ni eri kikelake, “Kaseva lala inio o pazoṉa!” kikelake. Ni se vailo ko maba madu ta ke vati olake ni ke pazovake.

⁶⁶Ni vo Pita obeta eva keru titizato ko pade ko poro kale inio kama pado sinaqu rusu vo Ṉisa Siama ko nabulu ta ko alokatake.

⁶⁷Ni kota ko veake vo Pita obeta ṉadarake ni ko toiritoirivake, ni eri kikolake, “Ṉo melai vo Nazareti ala Jisu kalea laṉa, kio?” kikolake.

⁶⁸Melai Pita ta ota zoliake, ni eri kiolake, “Ṉoiza, aṉata pui aqai nianiia ni pui a baqumuka ṉo kiṉolani,” kiolake ni ota saqora veutu ko ketaketa, ti kokorako ikio kobeta ziake.

⁶⁹Ni koa nabulu ta mata ko veake vo ni ko bazuemake maba poso sai kebeta evani, ni eri kikolake, “Nea maba ta kala sekale ala inio,” kikolake.

⁷⁰Melai Pita ta eri kiolake, “Aṉata maba pui avai nianiia nea maba,” kiolake. Ni puliako tu keu nio mata sai ke evani maba poso ta eri va kikelake, “Tuvevo ṉo inio kala ṉa sekalea laṉa ako ṉo melai Qalilia laṉa sole,” kikelake.

⁷¹Melai Pita ta eri kiolake, “Aṉata maulu a bika ni tuvevo ama quli kio a qaseka ni vo Baṉara ta o koqotaelou aṉa a lipalipatou ta! Aṉata maba pui avai nianiia voa maba, vo meme qasevani!” kiolake,

⁷²ti kokorako ikio kobeta ziake omuqama taku. Ni Pita ta o kerukeruekake Jisu va kiovevo vo, ko eri, “Puliako kokorako zialo omuqa taku, inio ṉota ṉoda la zoliovou aṉa zouke taku, ni eri kiṉovou, ‘Aṉata pui avai nianiia vo,’ kiṉovou,” kiolake, ti obeta matu ṉuisiṉuisiake inio zialo.