Read Bilua Maka 15 Bible Online

Maka 15 - Bilua bible

Maka 15

¹Omadeu vikale inio se raura kama siama madu ni se lotu tanatanamu, ni vo Mosese ko Bazu kekai nianiiekatani, ni sea kiadama matuma maba poso ta ke padoivake tu ke vatoeko Jisu ke ivo avo. Nio seta keta va piriekake voko ṉase, ni ke vati olake ni kepa vaevake Romu ala Qavuna Paelati ko pade kasi.

²Nio Paelati ta o kuimaevake vo ni eri va kiolake, “Ṉo inio se Jiu amu vo Aikovakova ṉa, kio?” va kiolake. Nio Jisu ta o vati tiorikake ni eri kiolake, “Tuvevo ṉo kiṉolani jari,” kiolake.

³Ni se raura kama siama madu ta kevai kuirikake matu kubo ruqeruqe ama kuiripato,

⁴sole Paelati ta mata o tova kuimaevake ni eri kiolake, “Noi sole inio pui ṉo opatika nia maba poso keṉai kuirikako quli?” kiolake.

⁵Melai Jisu ta ota lupaoke tu o kaseko kama ruku, so sole Paelati ta ota matu vuzeike.

⁶Kiadama Alokato ko Ṉojola keru, Paelati ko kalo ta o saqorivou kala maba pirito pade kale ala se maba poso kevai zariani tu o saqoro.

⁷Ni koa taku kale ta iniseana kake maba poso pirito pade kale seke erekeni ko niumaniumato ni pazokinio Jerusalema seko vati pikipikinio puto kale vo Romu ala Qavuna, ni ke vouvaemeni maba poso. Ni kala sekale ala inio vo Barabasi.

⁸Nio matuma vaki ta ke padoivake Paelati ko pade kasi ni ke pasevake vo tu vota o ereko koa kalo vo o erekako kiada keru jari ama.

⁹Nio Paelati ta o kuimaemake se, ni eri kiolake, “Meta mevai zaria tu aṉata a mela rupasivo me Jiu amu mela vo aikovakova?” kiolake.

¹⁰Ako vota okai nianiiake ta seko va konoilo kale inio se raura kama siama madu ta ke vati keve vo Jisu vokasi sole.

¹¹Melai se raura kama siama madu ta ke zuruzuruemake sea vaki tu seta ke pasevo vo Barabasi, tu vo inio o rupasivou, ni Jisu ta pui.

¹²Nio Paelati ta mata o kuimaemake se, ni eri kiolake, “Sole loma quli kio a erekou nea maba kasi vo me eri va kimelani vo inio vo Jiu amu mela vo aikovakova va kimelani?” kiolake.

¹³Ni seta ke velavelaoke matuma kora kale ni eri kikelake, “Patoevomo vo korosi topi tu o vou!” kikelake.

¹⁴Nio Paelati ta o mati tiorikake ni eri ma kiolake, “Melai loma quli sarueko ikio nea maba o erekako?” kiolake. Melai seta mata ke velavelaoke matuma kora kale ni eri kikelake, “Patoevomo vo korosi topi tu o vou!” kikelake.

¹⁵Ni vo Paelati ta okai zariake zolemo sea vaki, so sole vota oma rupasivake vo Barabasi. Ni vota o katimake vo Jisu se solodia madu tu kepa pazovo vo ni kepa patoevo korosi topi.

¹⁶Ni se solodia madu ta ke vati olake vo Jisu Qavuna ko matu pade ko tianiama vola kale, ni seta ke padoemake sea kiadama solodia madu omadeukoi.

¹⁷Ni seta kevai kiakake vo Jisu soqu jaria domu ama suma, ni seta keva viriviriekake ko tarapae kada sama siakona kale, ni kevai kiakake vo.

¹⁸Sai kazo inio kevai balebaleitake rauraevo ni eri kikelake, “Raurai, se Jiu amu vo Aikovakova ṉa!” kikelake.

¹⁹Ni seta keta va pazokake o lezu ore kale ni kevai supatake ni keva iqeiqeake ni keva loqunake.

²⁰Nio ke paikake vai balebaleito saita inio seta mata keta va ivikake koa rosi ama soqu domu ama sabosabo ni kevai kiakake mata o ṉaviko sabosabo. Saita inio ke vati olake tu kepa patoevo korosi topi.

²¹Ni se kebeta talia keru keve tona inio seta ke toraevake kala maba o ṉi ta Saimone, vo obeta kuevani matu peuru kale o ṉaviko peuru kale azo, ni se solodia madu ta ke zuruzuruevake vo tu o boriko Jisu ko korosi. Ni nea Saimone ta Sairini peuru kale ala Alekezada ni Rupasi vo mama.

²²Ni seta ke vati olake vo Jisu ka pado zaekale koko ṉi ta Qoloqota, ni koko kio ni kalo ta “Reikareika kama Lezu ko Zae.”

²³Ni sai nio seta ke kativake ko vaini ko ju, moa ke kati valuvaluekema, tu siru kota va naitiko voko tupu, tu pui o lainikou koa matuma tola kikelake. Melai Jisu ta ota lupaoke nozueko.

²⁴Nio se solodia madu ta ke patoevake vo Jisu korosi topi. Koko tova inio seta kekai puarikiniake vo Jisu ko suma seko kai daisimato kale, tu kekai nianiio lala inio ota va kovou koa sabosabo, kikelake.

²⁵So keru seke patoeve keru vo Jisu ta siakava koloko kale inio vikale.

²⁶Ni seta ke vaekake ka pado bazu, ko quli se kevai kuirikako, voko korosi topi. Ni koa bazu kikolani ta eri, “Se Jiu amu vo Aikovakova.”

²⁷Ni so jari seta ke patoekake omuqa kuilokuiloa nioqa omuqa korosi topi Jisu sate, kala ta voko palo rana ni kala ta voko made rana.[9]

²⁸

²⁹Ni so keru se maba poso ke alokata keru sai, seta keva uriuriaṉa putake, ni kevai balebaleitake vo Jisu, ni eri kikelake, “Koe! No inio ṉo biresukou ko Jelepade ni zouke ṉaniu kale mata ṉo dova orumukou kiṉolani ṉa!

³⁰Sole pakiovi ṉo ṉavi, ni saqore koa korosi topi azo!” kikelake.

³¹Ni omadeuvo jari mata se raura kama siama madu ni se Mosese ko Bazu kekai nianiiekatani melai keva balebaleitake ni eri kikelake ke ṉavio kude, “Edolomu inio o pakiemani, ta noi sole inio pui o pakia o ṉavi!

³²Sole uri tu me velo nea Baṉara o soroevani Pakio se Izireli mu vo Aikovakova o saqorou ta koa korosi topi azo erisaṉa, so inio tuvevo me ivou!” kikelake. Ni omuqa kuilokuiloa nioqa ke patoekeni nioqa Jisu sate nioqako omuqa korosi topi melai qo ruqeruqe kasevake vo.

³³Ni ṉadale inio kutumana ta ko boulukake koa Jerusalema ko pado ama levoano,[10] zouke aoa tiniavo.

³⁴Ni matu sebiviuru keru inio Jisu ta ota velavelaoke ni eri kiolake o ṉaviko pesio kale, “Eloi, Eloi, lama sabakatani?” koko kio ni kalo ta, “A Baṉara ṉa, a Baṉara ṉa, noi sole inio ṉo vaela aṉa?”

³⁵Ni kake maba poso sai ke lojoani ta keta va viqake vo kiolani, ni eri kikelake, “Didievomo, vota o nokaeva inio tu vo Ilaija,” kikelake.

³⁶Ni kala se azo ta o rereake ni opa koake ko kuna zaute ni o duluekake paza kama vaini jukale, ni o ikake ore ko kata topi ni ova okekake vo Jisu tu vota o kuzueko kiolake. Saita inio eri kiolake, “Me daruano saita tu me velo, ako Ilaija obe kilou savo saqorivole komia korosi topi azo!” kiolake.

³⁷Ni matuma upaupato sate inio Jisu ta ota utupake.

³⁸Ni koa taku kale inio ko Jelepade kale ama suma otu ta omuqa teze kota evake, koko okate azo ko tanitake rotizio ti ko raki kale.

³⁹Ni vo solodia madu vo kuleto ala vo obeta lojoani korosi ko kuleto o kea keru Jisu ko vou, vota eri kiolake, “Koe, matu tuvevo, nea maba ta vo Baṉara vo Meqora tivoine!” kiolake.

⁴⁰Ni kake rekoreko melai sai kebeta lojoake ni ke vati vailake vo Jisu vaṉʼazo ni kake sea rekoreko azo ta Maqidalama Mere, ni Mere vo visi ala Jemisi ni Josepa ko niania, ni Salome.

⁴¹Se inio lula ke lulueveni vo Jisu Qalili o irurupute keru, ni ke tauveveni. Ni matu kubo rekoreko melai sai, seke lulueveni vo Jisu Qalili azo Jerusalema.

⁴²Ni Sabati ṉaniu ko ka inainao ko taku keru Porare raisiraisi, sipole Sabati kio keru,

⁴³nio vo Josepa Arimatiala ta ota baroake. Vo inio kala o tarekani vo Baṉara ko lekasa puo ko kilo, ni vota kala sea Jiu ama lotu tanatanamu ko Kauniseli kale ala. Lula kota raisika sole vota o amaqeake parani putole Paelati ko kuleto ni opa pasekake Jisu ko tupu vokasi.

⁴⁴Ni so keru inio Paelati ta aqasiele ota evake, ta Jisu ta lula ota vouva. Nio vota o nokaevake se solodia madu ko kuleto ala ni o kuimaevake, ni eri kiolake, “Tuvevo ikio ta Jisu ta lula ota voula?” kiolake.

⁴⁵Nio so keru vo okai nianiia keru pado Jisu ko vou inio vota ova zariekake vo Josepa vo Jisu ko tupu tu opa kovo.

⁴⁶Ni vo Josepa ta opa tatabaraekake matu uri ama suma, ni opa saqorikake Jisu ko tupu korosi topi azo, ni o sudekake koa suma kale ni opa vaekake niami keaka kale, ko ke roitikema lado kale. Saita inio vota o bekolikake ka pado matuma lado koa niami keaka ko veutu tona.

⁴⁷Ni Maqidalama Mere ni Mere Josepa ko niania nio qo veve sai Jisu ko tupu opa mutakekoi.