Read Bilua Maka 16 Bible Online

Maka 16 - Bilua bible

Maka 16

¹Ni Sabati ko tova inio Maqidalama Mere, ni Mere Jemisi ko niania, ni Salome ta ke tatabaraekake uria tui kama oela meresini sama tu kepa ka loqaeko Jisu ko tupu kikelake.

²Nio Sade lekito puliako ṉaniu peato nio seta keta olake niami keaka kasi.

³Nio seko talio kale seta eri kikelake ke navio kude, “Lala inio o mela vatutikou koa lado koa kea ko veutu kale azo?” kikelake. Ako koa lado ta qole ama ikio sole. Melai so keru seke baroa keru sai, seta ke keake ta koa lado ta lula kota vatuta.

⁵So sole seta keta amaqeake ni ke veake kala vairu ala maba tapo sabosabo sala obeta papuake seko palo rana vasi, ni seta keta matu vuzeike.

⁶Melai voa vairu ala maba ta eri ma kiolake, “Meta pui vuzeilo ako aṉata aqai nianiia ta meta me vailiva vo Nazareti ala Jisu, vo ke patoevalani korosi topi. Melai vota puliala koi, ako vota lula ota saevala sole. Ni kemo, koi nio ke tekuevalakoi.

⁷Tu meta olamo tu pa mai bazuekomo voko disaipeli madu ni Pita komia bazu. Ni meta eri kimevou, ‘Jisu ta ota olala Qalili meko kuleto, ni sai nio meba velou omadeuvo o ṉavi obe melati kiovevo jari,’ ” kiolake.

⁸So sole seta ke saqorake koa kea ko poro kale azo, ni keta soqoike, ako seta keta ṉake ni keta dederake sole. Ni puliala kevai bazuekake seke viqema quli, ako keta ṉake sole.

⁹[11]Ni so keru Sade keru omadeu vikale Jisu mata o saeve keru, vota okai puratake kuleto ko Maqidalama Mere, koa rekoreko vo lula ota ka ṉamukema sikeura ziolo poso.

¹⁰Ni so keru inio Maqidalama Mere ta ko olake ni kopa bazuemake Jisu ko baerebaere poso, sai se kebe va buniubuniuakoi vo Jisu.

¹¹Ni so keru seke viqa keru koa rekoreko ko eri kio, kota ko veala vo Jisu ota tova saevala, seta maba pui tuvevo ke ikake ko.

¹²Ni koko tova inio Jisu ta mata okai puratake omuqa voko disaipeli kidi qopeta taliakoi keve tona Jerusalema ko kupekupe. Melai voko velo ta edolovoa velo qo evake.

¹³Ni so keru qo vaita keru, nio nioqata qo bazuemake se disaipeli madu nioqa kale amu, melai seta mata pui tuvevo ke ikake nioqa.

¹⁴Ni koko tovatova nio Jisu ta omai puratake voko toni omadeu disaipeli madu kebeta vuatakoi. Ni vota o riqaemake se, ako seko bulo ta zokele ni seta pui tuvevo ke imake sole seke veveni voko mata saevo.

¹⁵Nio Jisu ta eri ma kiolake se, “Meta me ziovou kiadama peuru poso kale komia peuru ma peuru kale ni meqai bazutou aṉako Uri ama Bazu kiadama maba poso kasi.

¹⁶Ni vo tuvevo o iko ala koa Uri ama Bazu ni bapitaiso o elo ala nio o pakiovou. Melai vo o kapakapato ala ta Baṉara inio o titizivou vo.

¹⁷Ni seke tuvevo puto amu ta Baṉara inio o katimou se ko pizato ni ke erekou aqasiele ama iruruputo. Ni seta ke rerikou ko ziolo poso aṉako ṉikale, ni seta kekai pesiovou azaazama pesio.

¹⁸Ni seta kebe kamakou ko vou sama dole, ni ke nozuekou vou sama quli melai pui kepa vouvou. Ni kemai ivikou seko ṉase se vere amu ni seta keta urikou,” kiolake vo Jisu.

¹⁹Ni so keru vo Lekasa Jisu o paikake mati pesipesito se, ti vo Baṉara ta obe koivievake inio vo aukale. Ni sai nio vota o papuake vo Baṉara ko palo rana vasia rana tu o lekasa puo.

²⁰Ni koko tova inio se disaipeli madu ta ke olake kiadama zae poso kale ni kekai bazubazutake ko Uri ama Bazu sai. Ni vo Lekasa Jisu ta o tauvemake se, ni ko quli se kekai bazubazutake quli ta oma mamola puekake koko tuveano. Ako koa omadeuma taku kale inio seta ke erekake sole ko aqasiele ama iruruputo voko pizato kale.