Read Bilua Maka 2 Bible Online

Maka 2 - Bilua bible

Maka 2

¹Ni kama ṉaniu poso ko tova inio Jisu ta mata ota vaitake Keponeami, ni kiadama maba poso ta keta va viqake voko bazu, ta vota pade kasi.

²Nio matu kubo maba madu ta keta padoivake koa pade kale ni keta sukatake, ni veutu ko kupekupe melai puliama rora. Nio so keru vo Jisu obe kai bazubazuta keru vo Baṉara ko bazu nia maba poso kasi,

³nio ariku madu ke borivani kala pui o roveani vezokato ta ke baroake.

⁴Melai matu kubo maba ke padoivani sai, sole seta pui ke roveake vati zio nea maba Jisu kasi. Sole seta ke vati koitake vo kabu topi Jisu ko ijatinia ni ke puraekake ko kabu ni ke soloevake vo o kobo sase Jisu ko tanama kale.

⁵Nio vo Jisu ta ota mai nianiiake seko oqu, nio vota eri kiolake voa maba pui o roveani vezokato kasi, “Meqora! Noko sarueko poso ta kota ṉa akoiva,” kiolake.

⁶Ni kake vo Mosese ko Bazu ko nianiiekato ko maba madu ta sai ni eri kikelake seko kerukeru kale,

⁷“Noi sole inio nea maba ta soa pesio ota eva? Vota ota aṉararaiva ta vota Baṉara jari inio! Ako vo Baṉara o kiada inio o roveani akoeko sole ko sarueko,” kikelake.

⁸Melai vo Jisu ta ota mai mamurake seko kerukeru ni vota eri ma kiolake se, “Noi sole inio meta soama kerukeru me ereka meko bulo kale?

⁹Maba pui tapata tu eri kio, vo pui o vezokatani maba kasi, ‘Ṉoko sarueko poso ta kota ṉa akoiva,’ ako meta pui me qea voko sarueko ta kota va akoiva kio ma pui. Melai matu tapata ikio tu eri kio, ‘Loje ni borika ṉo qobo tu tali,’ kio, ako mea kiada mela ta me qelou ta vota o lojoa kio ma pui sole.

¹⁰Sole aṉata kasa a mela elou me, aṉa maba a eveni lala ta pizato salala komia peuru ma peuru kale tu a akoekou maba ko sarueko poso,” kiolake. Nio vo Jisu ta eri kiolake voa pui o roveani vezokato maba kasi,

¹¹“Ṉota loje ni lokieka ṉoko kobo ni ola ṉo bade kasi!” kiolake.

¹²Nio so keru se kebe vea keru, inio voa maba ta ota lojoake, ni o lokiekake o kobo, ni ota olake. Nio sea kiadamu ta aqasiele keta evake ni ke ilusivake vo Baṉara, ni eri kikelake, “Lulavo azo ti pui me qeani eri jari ama quli,” kikelake.

¹³Ni vo Jisu ta mata ota vaitake Qalili toupa ko keta kale. Ni matu kubo vaki ta kevai kuevake vo, ni vota o nianiiekimake se.

¹⁴Ni vota mata o sasa vatutake, ni o veake kala maba takisi o koani o ṉi ta Livai, Alepiasi vo meqora, obeta papuake voko iruruputo ko pade kale, sai maba kovai olakoi seko takisi tabarikole. Sai nio vo Jisu ta eri kiolake vokasi, “Luluela aṉa,” kiolake. Nio Livai ta o lojoake ni koa ziole o luluevake vo.

¹⁵Ni koko tova inio Jisu ta ota vuatake Livai ko pade kasi. Melai matu kubo takisi ko maba poso, ni matu kubo madu se Jiu ama lotu tanatanamu ruqe amu ma kikelani ta ke luluevake vo Jisu, so sole kake sekale amu ni o disaipeli madu ta ke zomanake vuato Jisu sase.

¹⁶Ni kake vo Mosese ko Bazu kekai nianiiekatani, Parese madu ta ke veake vo Jisu ko mati vuato se Jiu ama lotu tanatanamu se ruqe amu ma kikelani, ni se takisi ke koani, ni eri kikelake, “Noi sole inio nea maba ta ota vuata nia maba poso se takisi ke koani ni se ruqe amu sate?” kikelake.

¹⁷Nio vo Jisu ta ota ma viqake se kikelani ni eri ma kiolake, “Se uria saevomu ta pui kevai zaria vo dokita, melai seke verepani nio kevai zariani vo. So jari nio aṉata pui a queva nokaemole se sidopu amu, melai aṉata a queva nokaemole se ruqe ama maba poso,” kiolake.

¹⁸Ni omadeu taku inio vo Jone ko disaipeli madu ni se Parese madu ta ke tabutabuake seko pui vuato kale. Nio kake maba madu ta ke kuevake Jisu kasi ni ke kuimaevake vo ni eri kikelake, “Noi sole inio vo Jone ko disaipeli madu ni se Parese madu ta keta tabutabua seko pui vuato kale, melai ṉoko disaipeli madu ta pui soa tabutabuo ke eva?” kikelake.

¹⁹Nio vo Jisu ta o mati tiorikake se ni eri kiolake sekasi, “Vo o rorotani ko baerebaere poso ni o ṉavi vo o rorotani ta omadeukoi kebeta elou ta seta pui kepa tabutabuovou.

²⁰Melai ko barolou keru koa taku, so keru aṉa voa vairua rorotoa lala jaria lala ko vou ko taku keru inio seta pui ke vuatou.

²¹“Pui ko mabua tu animeta me qati turutou vairu ama suma tana kama suma kale ko lula ko rotiziako, ako koa vairu ama suma ta ko matu rotiekou sole koa tana kama suma me busaekou keru.

²²Ni puliala maba inio o teamuka vaini ama vaini ko ju tana kama teamuteamu kale, ako vairu ama vaini ko ju ta ko pisaekou tana kama teamuteamu ni koa vaini ni koko teamuteamu ti omadeu niumailo kota elou. So sole meta raibikomo vairu ama vaini ko ju vairu ama teamuteamu kale. So jari nio koa vairu ama bazu aṉa a melai bazuekako ta pui me qati valuvaluekou tana kama bazu.”

²³Ni vo Jisu ta o alokatake vuiti kiaro kale Sabati ṉaniu keru, ni voko disaipeli madu ta vo sate, ni seta ke kajorikake kama vuiti ko rurururu.

²⁴Nio so keru se Parese madu ke kea keru komi quli, seta eri kikelake Jisu kasi, “Noko disaipeli madu ta ke ereka komi quli Sabati ṉaniu kale, ni seta ke pazoka inio animeko Bazu vo Mosese o katimelema,” kikelake.

²⁵Nio vo Jisu ta o mati tiorikake se ni eri ma kiolake, “Meta pui me baqumukako ikio ko Tabu ama Riki kikolani, vo Devita o kaevo so keru vo ni voko vaki ke luape keru?

²⁶Tabu ama Riki kikolani ta vota o amaqeake Baṉara ko pade kale, Abiata Ṉisa Siama o eve keru, ni o koake ko bereti Baṉara kasi ko katiziovima, ni o kuake ko, ni mata o katimake voko maba poso. Koa kalo ta ko bikoirika Mosese ko Bazu ako koa bereti ta siama madu ke kiada inio koma zarizia tu ke kuo. Melai vo Baṉara ta pui opa vai korakorai vo Devita, sole me melai pui me ṉelai korakorailou eṉe.”

²⁷Nio vo Jisu ta mata eri kiolake sekasi, “Vo maba kaqe inio vo Baṉara ta o ereke ko Sabati, melai pui Sabati kio raura kama maba kasi azo.

²⁸So sole aṉa maba a eveni lala inio koko Raki ko Sabati,” kiolake.