Read Bilua Maka 4 Bible Online

Maka 4 - Bilua bible

Maka 4

¹Ni vo Jisu ta mata o nianiiekimake se Qalili toupa ko keta kale. Ni matu kubo vaki ke padoivani sai ta ke aramuvake vo, sole vota ota zazuke vaka topi ni ota papuake sai. Ni voa vaka ta o totuke, ni sea vaki ta ke lojoake koa toupa ko ketaketa.

²Ni vo Jisu ta omai nianiiekikake se matu kubo quli podepodeti kale, ni vota eri ma kiolake,

³“Meta didielomo! Omadeu taku inio vo sisu o risarisaekani maba ta ota olake ni o risarisaekake ko vuiti ko sisu voko kiaro kale.

⁴Ni so keru vo o risarisaeka keru koa rui kiaro kale, kama ta kota piake keve tona, ni ko okale ama bianabiana ta ko kuevake ni ko kuake koa sisu.

⁵Ni kama ta ko piake lado poro kale, sai puliama kubo miduku sakoi Ni koa sisu ta kapiavole kota qotupa, ako pui mota kama koa miduku sole.

⁶Melai vo ṉaniu ta o peata ni vota o vualavualaekake koa qotuqotu ni kota kota kajaova ako koko raki ta pui vaṉa ko ola sole.

⁷Ni kama rui ta ko piake rikosasana ko qotupakoi, ni ko rikosasana ta omadeu qotupo ko kati evake ni ko lupikake ni ko vouvaekake ko, ni puliama epa ko ereka.

⁸Melai kama sisu ta ko piake uri ama miduku kale, ni kota ko uria qotupake ni ko velokake ni kota epamatake. Ni kama koko epa ko rurururu ta zouke toni sisu sama, ni kama ta varimuja toni, ni kama ta omadeu paizana sama.”

⁹Ni Jisu ta mata eri kiolake, “Meta paqumukomo ko quli meme viqako quli!”

¹⁰Ni Jisu o kiada obeta eva keru, nio kake seke viqani voko bazu ta ke kuevake vokasi voko toni omuqa disaipeli madu sate, ni ke pasevake vo tu zakaremu oma iko koa podepodeti ko kalo.

¹¹Nio Jisu ta eri kiolake sekasi, “Vo Baṉara ta kasa o mela ika me voko lekasa puo ko mutamuta kama nianiio, melai sea kupekupe ke evani maba poso ta ke viqou pala inio podepodeti kale.

¹²Sokale avo inio seta ke toiritoirizatou melai pulia quli kepa kelou, ni seta ke viqou melai pui kepa patapataekou. Sokale avo inio seta pui ke vaeka seko ruqeruqe ama kalo ni so inio vo Baṉara ta pui opa tama akoekou seko sarueko.”

¹³Ni vo Jisu ta o kuimaemake se, ni eri kiolake, “Noi nio, meta pui me baqumuka komia podepodeti kio? Sole noni kale avo inio meta mata meqai nianiiovou mata kama edoloma podepodeti?

¹⁴Nea maba vo o risarisaekani ko sisu, ta omadeuvo kala maba, vo okai bazubazutani vo Baṉara ko Bazu jari.

¹⁵Ni kake maba poso ta koa sisu koko piako keve tona jari, so keru seke viqa keru koa bazu, vo Setani ta o kueva ni ota ma koa koa bazu.

¹⁶Ni kake maba poso ta koa sisu koko piako lado poro kale jari. So keru seke viqa keru koa bazu, kapiavole seta ke koa koa bazu ni kekai zoleiva.

¹⁷Melai kota pui ko matu saqora seko kerukeru kale, sole pui tu ko keuva. Nio tapata ni naqunaquto komai baroa keru, kapiavole seta ke vaeka seko oqu.

¹⁸Ni kake maba poso ta koa sisu koko piako rikosasana ko qotupakoi jari, so keru seke viqa keru koa bazu,

¹⁹melai seko riteraite kai elo komia miduku kale ama saevo ni seko roqueko ko batiro ni edoloma quli kai zario ta ko pirieka koa bazu omadeuvo rikosasana ta ko pirieka ko sisu jari, so sole koa bazubazu ta pui ko rovea qotupo ni pui ko epamata seko saevo kale.

²⁰Melai kake maba poso ta koa sisu koko piako uri ama miduku kale jari. Nio se inio ke viqani koa bazu, ni ke tukiekani, ni kota kota epamata, ni kama koko epa ko rurururu ta zouke toni sisu sama, ni kama ta varimuja toni, ni kama ta omadeu paizana sama,” kiolake vo Jisu.

²¹Ni Jisu ta obeta olake bazubazuto ni eri kiolake, “Kake ta ke pakeka ko juke ni mola sau ke kati opoeka, ma kobo ko sapera ko vima ke vaeka, melai pui ke vaeka ko ṉavi juke ko papupapu topi, kio? Pui!

²²Sole ko quli ko meme qamikako quli ta kasa ko elou ubutiania, ni ko quli koko mutaivako quli ta kasa ko elou.

²³Meta paqumukomo ko quli meme viqako quli!”

²⁴Ni vota mata eri kiolake sekasi, “Meta me uria kerukeruekou ko me mebe viqako quli! Ako sai meme baroloa koi meko kai mamuro kale koa bazu, sai nio mata meme baroloa koi meko kovo kale vo Baṉara ko mauruto. Ni vo Baṉara ta mata o katimelou mata kama nianiio koko topi tiniavo ama.

²⁵Ni kala vo lula o koani koa nianiio ta vo Baṉara ta o kativou mata kama, melai vo puliama sala ta vo Baṉara ta ota va parakikou koa silo pala nianiio kobe elo ama vo tona,” kiolake.

²⁶Ni vo Jisu ta obeta olake bazubazuto, ni eri kiolake, “Vo Baṉara ko lekasa puo ta kala maba vo o papakani ko sisu voko kiaro kale jari.

²⁷Ni ipu kale voa maba ta ota maroṉa, ni vikale inio vota mati o toirata. So inio voa maba ko kalo. So maqa inio koa sisu ta kota qotupa, melai vota pui okai nianiia, noi sole inio koa sisu ta ko qotupa.

²⁸Melai kota miduku ikio ko qotupika ni ko epamuka. Ni kuleto ama quli koko puratako ta koko leko ni koko tova ta koko rurururu ni koko tova inio koko epa ko eva.

²⁹Ni koa epa ta ko muqara, ni voa maba ta o tanieka kajoro voko likoto kale ako kajoro ko taku ta kota baroa sole.”

³⁰Ni vo Jisu ta eri ma kiolake se, “Vo Baṉara ko lekasa puo ta eria podetiko inio a elou podepodeti kale.

³¹Kota matu silo ama masitadi ore ko sisu jari, vo maba o papakako voko kiaro kale, ni koko sisu ta matu mina kama komia peuru ma peuru kale ama ore ko sisu azo.

³²Melai so keru ko rapuka keru inio matuma papapapa ko eva kiadama papapapa azo koa kiaro kale ama. Ni kota matuma kata sama ni ko akazako biaṉabiaṉa poso ta ke ereka seko ere koko kata ko laumuna kale.”

³³Soama podepodeti poso kale inio vo Jisu ta okai bazubazutake voko bazu maba poso kasi, ni okai bazutake matu kubo podepodeti komi jari ama, seko kai nianiio ko male avo.

³⁴Ni kiadama quli ti o mati nianiiekikake podepodeti kale. Ni voko bazubazu ta podepodeti kale ko kiada. Melai so keru vo ni voko disaipeli madu ke kiadakoi ke eva keru inio vota o mati uria rupasika kiadama quli.

³⁵Ni koa omadeuma ṉaniu ko raisiraisi, nio Jisu ta o bazuemake voko disaipeli madu ni eri kiolake, “Animeta meda pakeo toupa ko ka pake,” kiolake.

³⁶So sole sea disaipeli madu ta ke vaemake sea vaki ni ke zazuke vaka topi, voa vaka vo Jisu lula ovai zazuani, ni seta ke olake vo sate. Ni kama vaka melai ko luluemake se.

³⁷Ni ota podoloa koi nio matuma ururu ta kota buiritake, ni boguzu ta kokai zazuke koa vaka ni sipole keta duluike.

³⁸Melai vo Jisu ta obeta maroṉake vaka ko ṉoma lezu teqoteqo topi. Ni voko disaipeli madu ta ke olake ni ke toirativake vo ni eri kikelake, “Lekasa, noi nio ṉota pui upotuqu ṉo eva? Eṉeta sipole ṉeda vouva!” kikelake.

³⁹Nio vo Jisu ta o lojoake ni o kaqarikake ko ururu ni eri kiolake, “Epeze!” ni vota mata o kaqarikake ko boguzu ni eri kiolake, “Buleovi!” ni ko ururu ta kota epezake puzeto, ni ko boguzu ta kota buleake, ni koa varo ta matuma manilo kota evake.

⁴⁰Ni Jisu ta eri kiolake voko disaipeli madu kasi, “Noi sole inio meda ṉava? Meko oqu ta matu silo!” kiolake.

⁴¹Melai sea disaipeli madu ta keta matu ṉake ni eri kikelake ke ṉavio kude, “Nonia matu aqasiele ala maba inio vo nei? Ururu ni boguzu melai ko zorivani!” kikelake.