Read Bilua Maka 6 Bible Online

Maka 6 - Bilua bible

Maka 6

¹Ni Jisu ta o vaekake koa zae ni ota vaitake o ṉaviko ṉisa peuru kale Nazareti, ni voko disaipeli madu melai ke luluevake vo.

²Ni Sabati ṉaniu kale vota o taniekake nianiiekato ilusato ko pade kale. Ni matu kubo maba madu ta ke padoivake sai, ni so keru seke tava viqa keru voko nianiiekato seta keta vuzeike, ni eri kikelake, “Lai nio nea maba o koakoi voko bokao? Ni noi nio soa matu nianiiola? Ni noi nio vota pizato sala ni o ereka aqasiele ama iruruputo?

³Ako vota kamada inio, ko Mere vo meqora, ni voko visi poso inio se Jemisi ni Josepa ni Jiudasi ni Saimone, ni voko saqi poso melai koi nio seko peuru melai,” kikelake. So sole seta maba kevai kaikuapake se Nazareti amu.

⁴Melai vo Jisu ta eri kiolake sekasi, “Vo poropita ta keta va paṉaovou kiadama zae poso kale amu, melai seta kevai kaikuapou o ṉaviko ṉisa peuru kale amu, ni o ṉaviko mabamu, ni o ṉaviko saidi,” kiolake.

⁵So sole vo Jisu ta pui o roveake ereko kubo aqasiele ama iruruputo koa peuru kale, melai kake pala inio omai ivikake voko ṉase ni o urikimake se.

⁶Nio vo Jisu ta ota matu vuzeike, ako seta maba puliama tuvevo puto samu vokasi sole. Ni Jisu ta ota olake saizama zavaṉa poso kale, ni o nianiiekimake se maba poso.

⁷Ni vota o nokaemake sea toni omuqa disaipeli madu omadeukoi, ni vota o soroemake se omuomuqa kidi. Ni puliako vo soroemo se vota o katimake ko pizato tu ke reriko ko ziolo poso,

⁸ni vota eri ma kiolake, “Meta pulia quli me borikou meko talio kale, melai daṉa ko kiada. Pui me borikou ko bereti, ni pui me borikou ko vesa, ni pui me borikou ko takula meko kukulu kale.

⁹Meta me qiakou ko buti, melai pui me borikou kama meko sabosabo.

¹⁰Sai se maba poso ke baroekimeloa koi, meta sai nio mebeta elou koa pade kale ti kobeta barolou so keru meme vaekou koa peuru,

¹¹Melai so keru meme barolou keru kama pado peuru kale ni maba poso ta pui ke baroekimelou ni pui ke didiemelou me, ta meta me vaekou koa peuru, ni me bapazikou meko kiti kale ama pari tu ko mamola pueko seta pui Baṉara ko madu inio,” kiolake.

¹²So sole seta keta olake ni ke bazubazutake tu maba madu ta ke liliziovou seko ruqe kale azo.

¹³Ni seta ke rerikake ko ziolo poso, ni kemai loqaekake ko Olive oela seke verepani ni ke urikimake se.

¹⁴Nio vo Lekasa Herodi Anitipasi[3] ta o viqake vo Jisu ko aqasiele ama iruruputo ko bazu, ako koa bazu kokai zaroake sole koa kiadama zae poso Qalili rana ko evako. Ni kake maba poso ta eri kikelake, “Jone Bapitaiso inio ota tova saeva voukale azo! So inio vota pizato sala ni o ereka aqasiele ama iruruputo,” kikelake.

¹⁵Nio kake ta eri kikelake, “Vota Ilaija inio,” kikelake, ni kake ta mata eri kikelake, “Vota kala Poropita inio lulali ala poropita jari ala,” kikelake.

¹⁶Melai vo Herodi o viqe keru ko, vota eri kiolake, “Vo Jone, vo a lezueveni, vo inio ota tova saeva voukale azo!”

¹⁷Vo Herodi ta soa pesio ota evake ako lula buti nio vota o soruemevo voko solodia madu ni ke noqoeve vo Jone, ni ke pirieve vo seini kale ni ke vaeve vo pirito pade kale. Vota o erekake ko quli ko Herodiasi ko zario kale avo, vo o raekema, melai kota vovo kaka Pilipi ko reko ikio.

¹⁸Eri sole inio o ereke ko quli: Vo Jone Bapitaiso ta pui o lalamatake bazuevo vo Herodi ni eri kiolake, “Kota pui korokoroti ikio ṉota ṉoda va raeka ṉovo kaka ko reko,” kiolake.

¹⁹Ni so keru azo inio ko Herodiasi ta kovai kaikuapake vo Jone ni kovai zariake vouvaevo, melai kota pui ko roveake,

²⁰a ko vo Herodi ta ota va paṉaovake sole vo Jone, ako vota ovai nianiia ta Jone ta kala vo Baṉara vo tabu ala ni sidopu ala maba sole vota o vati vailake. Ni vota okai zariake didievo vo kiada keru, matu tiṉoliṉoli kobe ivake melai voko bazu.

²¹Nio so keru vo Herodi ko alilo ṉaniu ko baroa keru vota o erekake ko alilo ṉaniu ko ṉojola ni o taipazimake se Qavuna madu ko tanamu ni pazokinio ko maba poso ko kuleto amu ni Qalili ama maba poso ko lekasa poso tu kekai zomano koa voko ṉojola. Ni so keru inio ko Herodiasi ta ko keake uri ama taku tu ko vouvaevo vo Jone.

²²Ni ko Herodiasi ko meqora ta ko amaqeake koa alilo ṉaniu ko ṉojola kale ni ko pekaoke tu seta ke kelo ko. Ni vo Herodi ni voko lolo poso ta kekai matu zoleike ko. Nio vo Herodi ta eri kiolake koa sinaqu rusu kasi, “Loma quli ṉo ṉoqai zariovo ama? Aṉata a qatiṉou ṉo.”

²³Ni vota o erekake piza kama leveleveo koa sinaqu rusu kasi ni maulu o pikake ni eri kiolake, “Ko quli ṉoṉo baseko ama quli ta aṉata a qatiṉou ṉo, matuma quli kobe elou melai uri,” kiolake.

²⁴So sole koa sinaqu rusu ta ko olake ko niania kasi ni eri kikolake, “Loma quli kio aṉata a basekou?” Ni koko niania ta ko kati tiorikake ni eri kikolake, “Vo Jone Bapitaiso ko lezu,” kikolake.

²⁵Ni koa sinaqu rusu ta matu taukavole ko vaitake vo lekasa kasi ni ko bazuevake ni eri kikolake, “Aṉata aqai zaria tu ṉota ṉo qatilou komia erisaṉa vo Jone Bapitaiso ko lezu peleta kale!” kikolake. Ako so inio kota kokai nianiiovou voko vou kikolake.

²⁶Ni so keru vo lekasa o viqa keru koko zario, vota matu duki ota evake, melai vota lula piza kama leveleveo o ereke kokasi sea maba poso o taipazimeni ko tanama kale, sole pui o roveake pazoko koa sinaqu rusu ko zario.

²⁷Sole vota o soroevake kala vovo solodia tu opa kovo vo Jone ko lezu. Nio voa solodia ta o olake pirito pade kale ni opa lezuevake vo Jone.

²⁸Saita inio vota o teamukake peleta kale ni opa katikake koa sinaqu rusu, ni kota kopa katikake koko niania.

²⁹Ni so keru vo Jone ko disaipeli madu ke viqa keru voko vou seta ke olake ni kepa borikake voko tupu ni kepa mutakake.

³⁰Ni se apositolo madu ta ke vaitake ni ke toraevake vo Jisu, ni seta kevai bazuekake kiadama quli seke erekako ni ke mati nianiiekikake se maba madu.

³¹Ni sai ta matu kubo maba madu ke zio ni vaito putani sole Jisu ni voko disaipeli madu ta puliama taku ke koake tu ke vuato. So sole vota eri kiolake sekasi, “Ariamo tu meda zio me qiadakoi, kama olomoiza kama zaekale, nio sai nio me mamazou.”

³²So sole seta keta pakeake koa toupa ko koa pake olomoiza kama zaekale.

³³Melai matu kubo maba madu ta ke meake seko zolailo, ni kemai nianiiake se. So sole seta ke vaekake seko peuru poso ni keta rereake ketainole koa olomoiza kama zaekale, ni se inio kuleto keta baroake koa zaekale puliako Jisu ni voko disaipeli madu barolo.

³⁴Nio so keru Jisu o saqora keru vaka topi azo, vota o meake sea matuma vaki, ni vota o matu roquemake se ako seta puliama vilua pikopiko samu jari sole, omadeuvo ko sipi puliama koko vijaro ko maba sama jari. Nio vota o mati nianiiekikake matu kubo bazubazu.

³⁵Ni raisiraisi kota evake inio voko disaipeli madu ta ke olake Jisu kasi ni eri kikelake, “Lula matu raisiraisi kota eva ni koi ta ivulu ama zaekale inio,

³⁶tu vaitoema nia matuma vaki ni bazuema tu seta ke zio tu kepa tatabaraeko ko sailao peuru poso kale, nio ke vuatou,” kikelake.

³⁷Melai vo Jisu ta o mati tiorikake ni eri kiolake, “Me inio me niaemou sea maba poso,” kiolake. Nio seta eri kikelake, “Noni ko kalou inio animeta me roveovou niaemo nia vaki, ako varimuja kaboso ko tabara kale me qovo ama bereti melai pui me male,” kikelake.

³⁸Nio Jisu ta mata eri kiolake sekasi, “Meta olamo ni pa kai nianiimo latau bereti kio sekasi.” Nio seta kekai nianiiake ni eri kikelake, “Sike silo ama bereti ni omuqa niuniu ko kiada,” kikelake.

³⁹Ni Jisu ta o bazuemake voko disaipeli madu ni eri kiolake, “Meta bazuemomo sea vaki tu ke pitapitasio poqala poso kale ni ke papu koa paqauva seulele topi.”

⁴⁰So sole sea maba poso ta tetebara papu ke evake omadeu paizana sike toni mati kama poqala kale.

⁴¹Ni vo Jisu ta o koake koa sike bereti ni koa omuqa niuniu, ni o tadatake aukale ni o kati vararaitake ni uriavo o kasekake Baṉara kasi. Ni vota o palapalamukake ko bereti ni o katimake voko disaipeli madu, ni sea disaipeli madu ta kema puarikake sea vaki, ni mata oma puarikake koa omuqa niuniu sea kiadamu.

⁴²Ni sea kiadamu ta ke vuatake ni keta atapake muli.

⁴³Ni sea disaipeli madu ta kekai sukatikake toni omuqa suakao koko palakiako sailao.

⁴⁴Ni sea kiadamu ke vuateni ta sike vuro maba madu, melai seta pui kepa ataeme se rekoreko ni meqora poso se sate ke vuateni.

⁴⁵Ni koa taku kale inio Jisu ta o bazuemake voko disaipeli madu tu ke zazu vaka topi tu kebeta pakeo Qalili toupa ko koa pake Betiseida zavaṉa kale, so maqa inio vota o vaitoemou sea vaki.

⁴⁶Nio o vaitoema sea vaki ko tova inio vota ota olake sopu kale vararaitole.

⁴⁷Nio raisiraisi kota baroake ta voa vaka ta lula koa toupa ko tiania ota baroake, melai Jisu ta obeta evake o kiada pado koa zaekale.

⁴⁸Ni vota o meake sea disaipeli madu ta kebeta vouvaekiniake qeluto kapea ururu kale. Nio vaqaza obe peata keru nio Jisu ta ota taliake toupa ko ju topi, sipole omai alokatake se.

⁴⁹Nio ke vea keru vo seta eri kikelake, “Kota ziolo ikio!” kikelake. Nio seta keta upaupatake,

⁵⁰ako sea kiadamu ta ke veake vo ni keta matu ṉake sole. Melai tutumazi avole Jisu ta eri kiolake sekasi, “Meta pui ṉalo; aṉa ta Jisu lala inio,” kiolake.

⁵¹Ni vota ota zazuke sekasi koa vaka topi, ni ko ururu ta kota jamaoke. Ni sea disaipeli madu ta keta matu vuzeike,

⁵²ako seta pui kepa uria paqumuke sole, vo Jisu ko niaemo sea sike vuro maba madu ta Baṉara ko pizato kale inio, ako seko kerukeru ta kutumana sole.

⁵³Nio seta lula keta pakea Qalili toupa ko koa pake ṉaniu o sulupakoi vasia rana Qenesareti, ni sai nio seta ke titiekake seko vaka.

⁵⁴Ni so keru seke saqora keru koa vaka topi azo sai zama maba poso ta kevai nianiiake vo Jisu.

⁵⁵So sole seta ke taliekake ko bazu koa zae poso kale, ni seta ke mati olake se vere ama maba poso seko kobo sase vokasi lai ma lai o olakoi.

⁵⁶Ni kiadama zae poso kale Jisu o olakoi matuma peuru kale ni silo ama zavaṉa poso kale, ni siqo kale ni maketi ko zae poso kale, se maba poso ta kevai padoivake vo, ni seta ke mati olake se vere ama maba poso vokasi. Ni kevai zaivotake tu seta ke tibaeko pala vo Jisu ko sabosabo, ni sea kiadamu seke tibaekeni ta keta urikake muli.