Read Bilua Maka 8 Bible Online

Maka 8 - Bilua bible

Maka 8

¹Ni komi quli ko tova inio matu kubo vaki ta mata ke olake Jisu kasi. Ni seta puliama sailao samu, so sole vota o nokaemake voko disaipeli madu ni eri kiolake,

²“Aṉata a matu roquema nia maba poso, ako seta lula zouke ṉaniu keta eva sole anime kasi ni vairutu seta puliama sailao samu.

³Ni aṉata pui aqa zaria vaitoemo se puliako niaemo, ako lekuleku ke ekale sole ke vaitou keru ke peuru poso kale, ako kake ta matu vaṉʼazo ke kuevini sole,” kiolake vo Jisu.

⁴Ni voko disaipeli madu ta eri kikelake vokasi, “Ta lai nio animeta me qovou ko sailao komia lealea kama zaekale nio me niaemou nia maba poso?” kikelake.

⁵Ni vo Jisu ta eri kiolake sekasi, “Latau bereti kio ikoana mekasi?” Ni seta ke vati tiorikake ni eri kikelake, “Sikeura bereti,” kikelake.

⁶Nio vo Jisu ta o bazuemake sea vaki tu ke papu miduku kale. Ni vota opa koake koa sikeura bereti, ni o kati vararaitake ni uriavo o kasekake Baṉara kasi, ni o palapalamukake ni vota o katimake o disaipeli madu, ni se disaipeli madu ta ke puarikake sea maba poso kasi.

⁷Ni seta mata kama kejuma niuniu samu. So sole vo Jisu ta mata uriavo o kasekake Baṉara kasi, ni vota o bazuemake voko disaipeli madu tu mata ke puariko.

⁸Nio sea kiadamu ta ke vuatake ni keta maqinake. Ni koko tova se disaipeli madu ta kekai sukatikake sikeura suakao koko palakiako sailao.

⁹Ni sea kiadamu ta ariku vuro madu inio koa taku keru, melai rekoreko ni meqora poso ta pui kepa ataeme. Ni Jisu ta o soroemake sea maba poso ke peuru poso kale,

¹⁰ni raisiraisi vota ota zazuke vaka topi ni ota olake Dalamanuta peuru kale.

¹¹Ni kake Parese madu ta ke olake Jisu kasi ni kekai zariake madoevo vo, tu keta va kelo kama saruilo. So sole seta ke soroevake vo tu oma ereko kama aqasiele ama iruruputo, tu seta tuvevo ke iko ta vo Baṉara ta ovai zoleiva vo Jisu kio.

¹²Melai Jisu ta ota voniu kozatake ni eri kiolake, “Noi sole inio mea maba poso mela komia taku kalea mela ta meqai zaria kelo ko aqasiele ama iruruputo? Tuvevo avole aṉata a bazuemela me, aṉata pui aba erekou ko aqasiele ama iruruputo tu meta me qelou,” kiolake vo Jisu.

¹³Nio Jisu ni voko disaipeli madu ta ke vaemake se ni keta zazuke vaka topi, ni keta pakeake Qalili toupa ko koa pake ṉaniu o peatakoi vasia rana.

¹⁴Ni se disaipeli madu ta ukaka ke ike tu ke boriko kama bereti seko malezimo ama, so keru ke zazi keru vaka topi, melai omadeu bereti ko kiada ta ikoana sekasi koa vaka topi.

¹⁵Ni Jisu ta o balauvimake se ni eri kiolake, “Taka balauvomo se Parese madu ni Herodi[5] ko isiti,” kiolake.

¹⁶Ni seta ke pesipesitake ke ṉavio kude ni eri kikelake, “Animeta pui meba borikala ko bereti nio nei so mela kiola,” kikelake.

¹⁷Melai vo Jisu ta obe kai nianiiake se kikelani, so sole vota eri ma kiolake, “Noi sole inio meta meqai pesipesita me ṉavio kude meko pui boriko ko bereti? Meta pui nio meqai nianiia ni pui nio me baqumuka kio? Meko kerukeru ta kutumana kobeta eva kio?

¹⁸Ni meta vilu samela melai pui me rovea kelokelozato? Ni taliṉa samela melai pui me rovea viqaviqazata? Ni lula ukaka me ika

¹⁹so keru aṉa a balamuke keru sike bereti se sike vuro maba kasi kio? Ni latau suakao kio meme jukatikema koko palakiovima sailao?” Ni seta ke vati tiorikake ni eri kikelake, “Toni omuqa suakao,” kikelake.

²⁰Ni mata “Latau suakao kio me jukatikema koko palakiovima sailao so keru aṉa a niaeme keru ariku vuro maba madu sikeura bereti kale?” kiolake. Nio seta ke vati tiorikake ni eri kikelake, “Sikeura suakao,” kikelake.

²¹Nio Jisu ta mata eri ma kiolake, “Meta maba pui nio soikoni meqai nianiia, ma?” kiolake.

²²Ni so keru seke baroa keru Betiseida peuru kale, kake maba poso ta ke vati olake kala leqa kala maba Jisu kasi. Ni seta ke pasevake vo tu ovai iviko voko ṉase tu o urikivo.

²³Nio Jisu ta ota va noqoekake voko ṉase ni o vati olake edolokoi koa peuru ko kupekupe, ni vota ota va supatake voko vilu ni ota va kamakake ni eri kiolake vo leqa kala maba kasi, “Noi nio, ṉobe kea kama quli kio?” kiolake.

²⁴Nio nea maba ta ota keazata ni eri kiolake, “E, aṉata a mea maba poso kebeta talia, melai ore jaria melo,” kiolake.

²⁵So sole Jisu ta mata ota va tova kamakake voko vilu. Ni koa taku inio nea maba ta ota keazatake, ni o roveake uria kelo kiadama quli.

²⁶Ni Jisu ta o matu pasevake voa maba tu pui o vaitou koa peuru kale, melai tutumazi avole o ziovou o ṉaviko pade kasi.

²⁷Ni Jisu ni voko disaipeli madu ta keta olake Sizaria Pilipai ko ketaketama peuru poso kale. Ni se kebeta talia keru keve tona inio Jisu ta o kuimaemake voko disaipeli madu ni eri kiolake, “Lala lala ta bela kikela se maba poso?” kiolake.

²⁸Ni seta eri kikelake, “Kake ta Jone Bapitaiso ṉa ṉa kikela. Mata kake ta Ilaija ṉa ṉa kikela. Ni mata kake ta mata kala poropita ṉa ṉa kikela,” kikelake.

²⁹Ni vota mata o kuimaemake se ni eri kiolake, “Ta meta lala lala inio bela kimela?” Nio vo Pita ta o vati tiorikake ni eri kiolake, “Ṉota vo Baṉara o pitoeṉeni Pakio ṉa,” kiolake.

³⁰Ni Jisu ta o bazuemake se tu seta pui kekai bazutou ta vo inio vo Baṉara o pitoeveni Pakio.

³¹Ni vo Jisu ta o taniekake nianiiekimo voko disaipeli madu, ni eri kiolake, “Aṉa maba a eveni lala ta ke tolaelou ni kelai keduvou se lotu tanatanamu ni se raura kama siama madu ni Mosese ko Bazu kekai nianiiekatani. Ni seta ke vouvaelou aṉa, melai zouke ala ṉaniu kale inio mata a jaevou,” kiolake.

³²Ni ko quli vo Jisu o mati nianiiekikake ta matu zakaremu o ika sekasi. Nio vo Pita ta o vati edoliake vo Jisu ni o riqaevake vo.

³³Melai vo Jisu ta oma lilitake voko disaipeli madu ni ova ririzake vo Pita ni eri va kiolake, “Ose Setani, ako koa kerukeru ta pui vo Baṉara kasi azo ko kuevako sole, melai maba kasi azo,” kiolake vo Jisu.

³⁴Ni Jisu ta o nokaemake sea vaki ni voko disaipeli madu o ṉavi kasi ni eri kiolake, “Vo oka zariani luluelo aṉa ta vota pui o kerukeruilou o ṉavi o kiada melai vota o tolailou aṉa ko luluelo kale omadeuvo vo maba vo o borikani jari o ṉaviko korosi, vo okai vouvo ama.

³⁵Ako kala vo oka zariani pakieko voko tupu kale ama saevo, ta vota o niumaeka inio voko saevo tovama saevo kale ama. Melai vo o ṉamuko ala voko tupu kale ama saevo aṉa ni aṉako Uri ama Bazu ko lulueko ko kio kale ta o kovou noqola kama saevo.

³⁶Noi nio? Kala maba o ṉeamukani komia peuru ma peuru kale ama batiro melai okai suatani ko noqola kama saevo ta obe tauveziovo ala inio komia peuru ma peuru ama quli kale, kio? Maba pui!

³⁷Pulia quli ta opa katikou tu o kovo ko noqola kama saevo.

³⁸Ako voa maba vo ota la qurato ala aṉa ni aṉako nianiiekato se oqu pide amu ni boutare sama maba poso kasi komia taku kale amu, ta aṉa maba a eveni lala melai ada va zoliovou voa maba so keru aṉa a vaitou keru aṉavo Mama ko ṉaṉaidara kale ni voko mateana madu sase.”