Read Bilua Maka 9 Bible Online

Maka 9 - Bilua bible

Maka 9

¹Ni vota obeta olake bazubazuto ni eri kiolake, “Kake mela me koi mebeta evani mela ta puliako vou inio meta me lelou aṉa maba a eveni lala ta a lekasa puilou komia peuru ma peuru kale,” kiolake vo Jisu.

²Ni varimuja ṉaniu ko tova inio Jisu ta o pitoemake Pita, ni Jemisi ni Jone, ni o mati kailake okate ala sopu kale ni seta sai ke kiada pado. Ni sai kebeta eva keru inio Jisu ko velo ta kota besiziake,

³ni voko sabosabo melai tapo simanamanato kota evake, puliala maba komia peuru ma peuru kale ala o sopuekako suma jaria tapo.

⁴Nio sea zouke ta ke keake Mosese ni Ilaija qomai puratake ni qo vati pesipesitake vo Jisu.

⁵Nio Pita ta eri kiolake Jisu kasi, “Lekasa, matu uri nio eṉeta koi ṉo sate. Sole uri tu eṉeta ṉe ereko koi zouke kokukoku, kala ta ṉovo, kala ta Mosese vo, kala pado ta Haija vo.”

⁶Pita ta soa utu pesio ota evake ako seta keta matu ṉake sole.

⁷Nio kama pado lei ta ko boulumake se, ni seta ke viqake Baṉara ko kora koa leikale, ni eri kiolake, “Nei nio vo a ṉavivo Meqora, vo aṉa a matu roquevani, tu tava viqomo vo ni luluekomo vo kiolani,” kiolake.

⁸Ni taukavole seta ke lilitake melai seta pui ke keake nioqa, melai Jisu o kiada pado inio obeta lojoake sai se sate.

⁹Ni seke saqora keru sopu kale azo, nio Jisu ta o bazuemake sea zouke disaipeli madu ni eri kiolake sekasi, “Meta puliala mevai bazuekou koa keazakeazato meme qeako, ti kobeta barolou aṉa maba a eveni lala ko mata saevo voukale azo,” kiolake.

¹⁰Ni sea zouke ta ke zorikake Jisu mati kiolani, melai ke ṉavio kude inio seta kekai pesipesitake ko quli Jisu omai bazuekako ni eri kikelake, “Loma quli kio esa ko voukale azo ama mata saevo ko kalo?” kikelake.

¹¹Ni seta ke kuimaevake vo Jisu ni eri kikelake, “Noi sole inio vo Mosese ko Bazu kekai nianiiekatani ta eri kikela, ‘Ilaija inio kuleto o kilou puliako vo Baṉara o soroevo ala Pakio kilo,’ kikela?” kikelake.

¹²Nio Jisu ta eri kiolake sekasi, ‘Tuvevo Ilaija inio o kilou kuleto tu o korokorotikou kiadama quli. Melai noi sole inio ko Tabu ama Riki ta eri kikola, aṉa maba a eveni lala ta a dolailou ni kelai kaikuapou se maba madu?

¹³Melai aṉata eri kiala mekasi, vo Ilaija ta lula ota kuevi, melai maba poso ta pui kepa ideve, melai ke vati lulueke ke ṉaviko vatolo, omadeuvo Tabu ama Riki kikolani jari.”

¹⁴Ni so keru Jisu ni sea zouke disaipeli madu ke baroa keru sea siakava disaipeli madu kasi inio seta ke meake matu kubo vaki ke aramumani se. Ni kake sea maba poso ta vo Mosese ko Bazu kekai nianiiekatani ni seta ke mati zolizolievake sea siakava disaipeli madu.

¹⁵Ni so keru sea maba poso ke vea keru vo Jisu, seta keta matu vuzeike, ni kevai rereake tu ke toraevo vo.

¹⁶Nio Jisu ta o kuimaemake voko disaipeli madu ni eri kiolake, “Loma quli kio me meqai zolizoliekiniako?” kiolake.

¹⁷Ni kala maba sea vaki kale ala ta o vati tiorikake ni eri kiolake, “Tanala, aṉata a vati kueva aṉavo meqora ṉokasi ziolo kovai onobatani ni pui o roveani pesio.

¹⁸Ni so keru koa ziolo kovai baroa keru, kota ko piva vo miduku kale, ni ko ruakaruakaeva, ni taka o roinaroinaeka, ni matu lekuleku ko iva. Ni aṉata a basema ṉoko disaipeli madu tu keta va reriko koa ziolo, kiala, melai seta pui ke rovea,” kiolake.

¹⁹Nio Jisu ta eri kiolake, “Mea maba poso mela komia taku kalea mela ta puliama oqu samela. Noi tinia tu keu nio aṉata a elou mekasi? Aṉata aqai aquria meko bulo ko zokele sole! Vati kuemo voa rusu aṉa kasi!” kiolake.

²⁰Ni seta ke vati olake voa rusu Jisu kasi. Ni so keru koa ziolo ko vea keru vo Jisu, kota ko pivake voa rusu miduku kale ni ko niuqeniuqelivake ni ko ruakaruakaevake.

²¹Ni vo Jisu ta o kuimaevake voa rusu vo mama, ni eri kiolake, “Noi tinia tu keu nio nei eri o evani?” Ni vota o vati tiorikake ni eri kiolake, “Voko alilo keru azo.

²²Ni matu kubo taku inio koa ziolo ta kokai zaria tu vouvaevo nea rusu so sole kota ko piva uza kale ni jukale. Sole ṉota ṉo rovea tea, ṉota roqueṉela ni tauveṉela eṉe,” kiolake.

²³Nio Jisu ta eri va kiolake, “Ṉota ṉo basela aṉa tu aṉata a dauvemelou me. Melai vo maba ovai oquvo ala vo Baṉara ta kiadama quli ti olu vokasi,” kiolake.

²⁴Ni voa mama kala ta ota matu zaivotake, ni eri kiolake, “Aṉata oqu salala, melai a baseṉa ṉo tu ṉota pizatika mata aṉako oqu!” kiolake.

²⁵Ni Jisu ta o meake ta matuma vaki ta ko tanita padoilo sekasi, so sole vota o riqaekake koa ziolo, ni eri kiolake, “Noa qiqili ni poka ṉo ivani ṉa ziolo ṉa. Ṉota saqore voa rusu kale azo ni pui mata ṉovai tova amaqeovou!”

²⁶Nio voa ziolo ta ota upaupatake, ni o niuqeniuqelivake voa rusu, sai kazo inio o saqorake vokale azo. Ni voa rusu ta ota vouva jaria velo, ni kiadama maba poso ta eri kikelake, “Vota ota vouva!”

²⁷Melai Jisu ta o tauvevake ni ota va noqoekake voko ṉase ni o lojoevake, ni vota ota lojoake.

²⁸Ni koko tova inio Jisu ta ota amaqeake pade kale, ni voko disaipeli madu ta ke kuimaevake vo ke kiadakoi ni eri kikelake, “Noi sole inio eṉeta pui ṉe rovea reriko ko ziolo?” kikelake.

²⁹Nio Jisu ta eri ma kiolake se, “Vararaito kale ko kiada inio meta me roveovou reriko ko ziolo poso,” kiolake vo Jisu.

³⁰Ni Jisu ni voko disaipeli madu ta ke vaekake koa zae ni keta olake Qalili kude. Ni Jisu ta pui okai zariake tu maba poso ta kevai nianiiovou vo, lai nio vo o evakoi,

³¹ako vota o nianiiekima sole voko disaipeli madu ke kiadakoi. Ni vota eri kiolake sekasi, “Aṉa maba a eveni lala ta ke vaelou se ruqe ama maba poso ko ṉase topi, tu seta ke vouvaelou, melai zouke ama ṉaniu kale aṉata mata a jaevou.”

³²Melai seta pui ke paqumukake voko nianiiekato kikolani, ni keta paṉaoke tu kevai kuimaeko.

³³Ni Jisu ni voko disaipeli madu ke baroa keru Keponeami inio seta keta amaqeake pade kale ni sai nio Jisu ta o kuimaemake voko disaipeli madu ni eri kiolake, “Loma quli kio me meqai zolizoliekinialama keve tona?” kiolake.

³⁴Melai seta pui ke vati tiorikake, ako seko talio kale seta kekai zolizoliekiniake sole ke ṉavio kude ko eri, “Lala inio raura kala anime azo?”

³⁵Nio Jisu ta ota papuake ni o padoemake voko toni omuqa disaipeli madu, ni eri ma kiolake, “Vo oka zariovo ala raura elo ta o zarazarailou o ṉavi ni kiadamu vo nabulu o elou, so inio raura o elou Baṉara ko lekasa puo kale.”

³⁶Nio vota opa odievake kala silo ala meqora ni o lojoevake seko tanama kale, ni vota ovai qoloekake voko ṉase ni eri kiolake,

³⁷“Vo o baroekivani kala nea silo ala meqora jari ala voko luluelo aṉa ko kio kale ta o baroekila inio aṉa, ni vo o baroekilani aṉa ta pui o baroekila aṉa a qiada, melai vota o baroekiva inio mata vo o soroeleni aṉa,” kiolake vo Jisu.

³⁸Ni vo Jone ta eri kiolake vokasi, “Tanala, eṉeta ṉe veala kala maba vo obe rerikani ko ziolo ṉoko ṉikale, ni eṉeta ṉe bazuevala vo tu o epezo, ako vota pui anime kale ala sole,” kiolake.

³⁹Nio Jisu ta eri kiolake sekasi, “Meta pui me doqorivou vo. Ako voa maba vo o erekani ko aqasiele ama iruruputo aṉako ṉikale ta koko tova ta pui ruqe kaselo inio opa elou sole aṉa.

⁴⁰Ako vo pui o melati kanaekivani anime, vo inio o tauvemelani anime sole.

⁴¹Ni tuvevo avole aṉata a bazuemela me, ni kala ta o katimelou me omadeu kapa ju pala ako meta aṉako disaipeli mela sole, ta vo Baṉara inio reketekete saṉa o ivou voa maba,” kiolake.

⁴²Ni Jisu ta obeta olake bazubazuto ni eri kiolake, “Kala maba ta o saruevou kala nea meqora jari ala, vo o tuvevo puelani aṉa, ni ota va epezikou voko lai oqu aṉa, ta voa maba o saruevani vo ta ko male tu tava titieko ko matu lado o qonaqona topi ni duluevo vo kolo kale.

⁴³Kama quli ṉoko saevo kale ama ta sarueko saṉa ko iṉou ṉo, ta ṉota ṉo ṉamukou ko. Kota matu tapata tu ṉamuko ko, melai uri tu ṉamuka. Omadeuvo ṉota ṉo ṉamuka jari ṉoko ṉase ma kiti, ko ruqe ama kalo saṉa ko iṉako ṉo, ma ṉoko vilu, ko ruqe ama zario saṉa ko iṉako ṉo. Uri tu amaqeo vo Baṉara ko lekasa puo kale ama saevo kale omadeu rana vilu sate, melai pui uri tu ke risaeṉou ṉo omuqa rana vilu sate heli ko uza kale.

⁴⁴

⁴⁵

⁴⁶

⁴⁷

⁴⁸Ako sai ko muako sivi ta pui ko vouvako, ni ko uza ko siqaemako ta vou pide ama baino sama.

⁴⁹Soloti ta tu ko keuviekako ko sailao tu pui ko sapeo. Omadeuvo so jari nio ko tola ni tapata ta ko katima se maba poso ko nianiio tu pui ke sarueko.

⁵⁰Soloti ta uri ama quli, melai kota ka mumailou koko kava roquroqu inio kota puliama kalo sama. Ni omadeuvo so jari nio meta pui me vaekou meko sarueko inio me melai kalo pidea mela. So sole vaekomo meko sarueko koko tizaekako meko bairumuo,” kiolake vo Jisu.