Read Bilua Luke 12 Bible Online

Luke 12 - Bilua bible

Luke 12

¹So maqa inio kubo vuro maba ta ke padoivake, ni seta keta matu ibaibaekiniake ni keta jutujutuekiniake, nio eri kiolake vo Jisu kuleto voko disaipeli madu kasi, “Tama balauvomo se Parese madu, ako seta lipalipa kamu sole.

²Ako kiadama quli ko mutamuta kama quli ta kasa ko elou, ni kiadama moizamoizala poso ta ko paqumuilou.

³So sole ko quli meme rukuekako kutumana kale ta ko dimaziovou zakaremu kale, ni ko quli me vazavazaole me qasekako me qiadakoi ta ko velavelaovou ubutiania ni maba poso ta ke viqou ko.

⁴“Aṉata a bazuemela a baerebaere poso mela, meta pui meda ma ṉalou seke vouvaeko amu meko tupu ni koko tova seta pui ke rovea ereko mata kama ruqe ama quli mekasi.

⁵Melai aṉata a mela kasevou ta vo Baṉara inio meda va ṉalo ala, vo o roveani vouvaemelo me ni koko tova pizato sala tu o risaemelo me heli ko uza kale. Meta tuvevo ilomo aṉa, vo inio vo vo me meda va ṉalo ala!

⁶“Sike pitikole ko tatabara ta matu zara. Melai puliama ka pado koa pitikole ta ukaka o ika vo Baṉara.

⁷Ni meko tou meko lezu topi ama ta lula o ataeke muli vo Baṉara. So sole meta pui me ṉalou, ako meta matu qulepoa mela kubo pitikole azo vo Baṉara ko vilu kasa sole!”

⁸Ni Jisu ta mata eri kiolake, “Aṉata a bazuemela me, vo o bazubazuemo ala se maba madu ko vota aṉavo inio, aṉa maba a eveni lala melai a bazuemou vo Baṉara ko mateana poso ta vota aṉavo inio.

⁹Melai vo olai zoliovo ala ni olai keduvo ala aṉa ubutiania, aṉa maba a eveni lala melai avai keduvou vo Baṉara ko mateana poso ko tanama kale.

¹⁰“Vo ruqe kaselo o elo ala aṉa maba a eveni lala ta kota va akoilou koa sarueko; melai vo ruqe kasevo o elo ala vo Tabu ala Auvana[33] ta pui kopa tava akoilou koa sarueko.”

¹¹Ni vo Jisu ta mata eri kiolake voko disaipeli madu kasi, “Ni so keru seke melati ziovou keru titizikinio kale seko ilusato pade poso kale, ni se qavuna poso ni se lekasa poso ko tanama kale, meta pui tiṉoliṉoli meqai elou ko noi nio me kimevo avo kio seke melai kuirikani me ko ruqe kasi.

¹²Ako vo Tabu ala Auvana inio o melati vakakukou koa taku so me kimevo avo sole,” kiolake.

¹³Ni kala pado maba koa padopadoilo kale ala ta eri kiolake Jisu kasi, “Tanala, bazueva aṉavo kaka tu ola pitasiko aṉako puaro koa vikuvikula ko eqevo mama o qelai vikuekema eqe kaqe.”

¹⁴Nio Jisu ta o vati tiorikake vo ni eri kiolake, “Baerebaere, puliala inio opa katileni aṉa koa pizato tu aṉata a ditiziko ma a qela pitasiko qe koa vikuvikula puaro.”

¹⁵Ni vota eri kiolake sea kiadamu kasi, “Kati vailomo tu pui viluloqu elo, ako vo maba ko tuvevo ama saevo ta pui kubo kama ma kama vo o ṉeamukako kale inio ko eva sole.”

¹⁶Nio Jisu ta omai bazuekake komia podepodeti ni eri kiolake, “Kala batiro ala maba ta obeta evake vo matu masuru ama miduku sala.

¹⁷So sole vota o kerukerutake ni eri kiolake, ‘Puliama kama pado zae tu aṉata a vaeko kiadama aṉako sailao. Sole noi nio a qalou?

¹⁸Eri nio a qalo avo,’ kiolake, ‘Aṉata a biresukou aṉako pade poso aṉa sailao aqai vaekako, ni matuma a erekou. Sai nio aṉa a badoekoa koi ko vuiti ni kiadama aṉako lomaloma poso.

¹⁹Nio aṉata eri kiavou a ṉaviko saevo kasi, Qulepo ala maba ṉa! Ṉota ṉo ṉeamuka kiadama uri ama lomaloma ko ṉoko saevo ko maleziko ama kubo sabere poso. So sole rurukaovi, vuate, nozute ni zolei!’

²⁰Melai vo Baṉara ta eri kiolake vokasi, ‘Noa sarubea laṉa! Komia ipu inio ṉoko saevo ta ko paitou, ni lala inio o ṉeamukou kiadama koa lomaloma poso ko ṉo lula ṉo inainaekema?’ ”

²¹Ni Jisu ta eri kiolake, “Omadeuvo so jari inio keta elou sea kiadamu seke padoekani ke ṉaviko batiro poso, melai seta ozaoza kamu vo Baṉara ko vilu kasa,” kiolake.

²²Nio Jisu ta eri kiolake voko disaipeli madu kasi, “So inio aṉata a bazuemela me tu meta pui tiṉoliṉoli kai elo ko quli meme quovo ama quli ko meko tupu ko saevikako, ma ko quli meme qiako ama quli.

²³Ako saevo ta kobe qulepa sailao azo ni tupu ta kobe qulepa sabosabo azo sole.

²⁴Meta kemo ko okale ama biaṉabiaṉa poso, seta pui ke papaka kama rui ni pui ke sabereputa, ni puliama varivaripato ko pade samu sai seke padoekakoi ko sailao, melai vo Baṉara inio o niaekani koa biaṉabiaṉa poso. Meta meda ka matu qulepa ko biaṉabiaṉa poso, so sole pui ukaka opa imelou me!

²⁵Keatini; kala me azo ta o rovea rosikiko voko saevo tiṉoliṉoli elo kale kio? Maba pui!

²⁶Meta pui me rovea ereko komia silo ama quli, so sole noi sole inio meta tiṉoliṉoli meqai eva meko sabosabo ni soama quli?

²⁷Ako keatini, ko piru ama sisusisu koko qotupako ta pui ko iruruputako ni pui ko turuekako koko sabosabo. Melai aṉata a bazuemela me, komia omadeu pado sisusisu ko ileile ta kobe kai paloasa vo matu batiro ala Lekasa Solomone o kiakema sabosabo ko ileile.

²⁸Ni koa sisusisu poso ta ko eva seulele valuvalu matu puju ama taku kale, ni koko tova inio maba poso ta ke saqaeka ni ke risaeka uza kale. Melai vo Baṉara ta matu ileilea zaloniko o eve koa seulele sisusisu kale. Meta pui me duvevo puekou ta vo Baṉara ta o saboemelou me sabosabo kale, omadeuvo vota o zalonika jari ko seulele sisusisu kale, ta meko oqu ta matu silo ama ikio!

²⁹“So sole meta pui duki elo, kiada keru meko saevo kale meta pui niuniala elo loma quli kio me quovo ama ni me nozueko ama kio ko kerukeru kale.

³⁰Ako komia peuru ma peuru kale ama kutumana kamu inio kuleto ke ikani kiada keru ko sailao ni ju seko vailizato kale. Melai meta pui se jari me qalou, ako mevo aukale ala Mama ta lula okai nianiia ko quli poso ko meko saevo ko korotikako quli sole.

³¹So sole meta me atanaziekou koa saevo vo Baṉara ko lekasa puo kale ama ni me erekou vo oka zariako quli, nio vota o katimelou me kiadama quli meko saevo ko korotiko ama.”

³²Ni vo Jisu ta mata eri kiolake voko disaipeli madu kasi, “Meta pui ṉalo, mea silo ama rovaṉa sipi jaria mela, ako mevo Mama ta ota zoleiva tu o lekasa puemelou me o ṉaviko lekasa puo jari.

³³Meta kai tatabaraomo meko lomaloma poso ni katimomo koko seleni se ozaoza kamu. Koa keve kale meta erekomo kama noqola vesa seleni ko, ko pui kopa purailo ama, ni vailikomo ko aukale ama batiro, tu se kuilokuilo amu ta pui ke kovou, ni puliama kokorosi kopa niumaekou.

³⁴Ako sai meko batiro ko evakoi, sai nio meko bulo kale ama kerukeru ko eloa koi kiada keru.

³⁵“Ka inainaomo ko quli ko kilo ama, ni koikarikomo meko sabosabo ni pakekomo ko juke,

³⁶omadeuvo se nabulu poso ke tarevani sevo tanala vo o vaitani bau vuato kai zomano kale azo. So keru vo o kueva ni o tubitubita keru, koa taku kale inio seta lula keta inainaova tu keva veuko ko tibulu.

³⁷Ni keta zoleilou sea nabulu poso sevo tanala o kilou keru, vo o toraemou keru se toiratoirati amu kebeta tarevani vo! Aṉata a bazuemela me, vota o ivikou voko topia sabosabo, ni o bazuemou se tu ke papu, ni o niaemou se.

³⁸Sea nabulu poso ta keta zoleilou so keru vo o toraemou keru se inaina kamu, obe mai barou ipu tiania ma ipu raneto melai!

³⁹Mata kala podepodeti ta eri; vo pade ko raki sala ta okai nianiiovou koa taku so keru vo kuilokuilo ala maba okai kilo ama taku, ta vota pui nio opa zarievou tu voa kuilokuilo ala maba ta okai amaqeo voko pade kale kuilole.

⁴⁰So sole me melai inainaomo, ako aṉa maba a eveni lala ta a vaitou koa taku kale ko me pui me baqumukako kale sole,” kiolake.

⁴¹Ni Pita ta eri kiolake, “Lekasa, eṉe disaipeli madu ṉela inio ko kaseṉela komia podepodeti ma kiada ṉela ko ikio ṉo qaseka kio?” kiolake.

⁴²Nio vo Lekasa Jisu ta o tiorizatake, ni eri kiolake, “Lala inio vo kerula kala ni nianiiola nabulu? Vo raura o ivo ala vovo lekasa, tu o mati vailo koa pade kale ke iruruputani ni oma puariko ala ko sailao koa korokoroti ama vuato ko taku kale.

⁴³Voa nabulu ta ota zoleilou vovo lekasa o vaitou keru ni o kelou keru voko uri ama iruruputo vo obe erekako.

⁴⁴Aṉata a bazuemela me, voa lekasa ta raura o ivou nea nabulu tu vo inio o kati vailou kiadama voko lomaloma.

⁴⁵“Melai voa nabulu ta eri kiovou o ṉaviko bulo kale, ‘Aṉavo lekasa ta pui taukavole opa vaito ala inio,’ kiovou, ti vota o taniekou ruterutemo vokale amu se nabulu poso, lasive amu ni reko amu, ni o vuatavuataitou ni o saposapoitou ni o doililiputou,

⁴⁶nio voa lekasa ta o vaitou kama pado ṉaniu kale voa nabulu pui okai kuirikako ni koa taku vo pui okai nianiiako kale. Ni vovo lekasa ta matuma koqotato o kativou tu vota okai zomanou se pui ke zoripatani ke kovo ama koqotato.

⁴⁷“Vo nabulu vo okai nianiiani vovo lekasa ko vatolo, melai vota pui o inainaova tu vota o ereko, ta o koqotailou matuma koqotato kale.

⁴⁸Melai voa nabulu vo pui okai nianiiani vovo lekasa oka zariako quli, melai vota o erekou kama quli sarusaru ama, vota o koqotailou silo ama koqotato kale. Vo matuma koidi o koani vo Baṉara kasi azo ta ota vai zariovou vo Baṉara matuma zoripato, omadeuvo vo kubo quli o ṉeamukani ta keta va pasekou kubo quli jari.

⁴⁹“Aṉata a quevi vaekole ko uza[34] komia peuru ma peuru, ni aṉata aqa matu zaria tu kota taukavole ko baino!

⁵⁰Aṉata bapitaiso a elou edoloma pado bapitaiso[35] kale, ni upotuqu aqai eva ko ti kobeta paitou!

⁵¹Meta me qerukeruta ta aṉata a quevi tu bulekole ko peuru ma peuru kimela, kio? Pui, pui bulekole, melai aṉata a quevi tu pitasimole se peuru ma peuru kale amu.

⁵²Erisaṉa azo, sea sike maba omadeu saidi kale ke eveni ta keta pitasiovou, nio zouke madu ta ke kanaekikou omuqa kidi ni omuqa kidi ta qo kanaekimou zouke madu.

⁵³Ni mama poso ta ke kanaekimou seko lasive meqora poso, ni seko lasive meqora poso ta ke kanaekimou seko mama poso, ni se niania poso ta ke kanaekimou seko reko meqora poso, ni seko reko meqora poso ta ke kanaekimou seko niania poso, ni se niania ravaza poso ta ke kanaekimou seko reko meqora ravaza poso, ni se reko meqora ravaza poso ta ke kanaekimou seko niania ravaza poso, ako kake sea saidi kale ta tuvevo ke ilou aṉa, melai kake sea saidi kale ta pui tuvevo kepa ilo amu aṉa sole,” kiolake.

⁵⁴Ni Jisu ta mata eri kiolake se maba poso kasi, “So keru meme qea keru ko lei ko koilo ivere kale azo ṉaniu ko sulupakoi vasia rana, ta ‘Koe, nioro kota elou,’ kimela. Ni kota so ko kava.

⁵⁵Ni so keru meme lainika keru ko ururu ko puzeto lealea kama zaekale azo ko kuevako, meta me qaseka ta kota vualavuala kama kimela, ni kota tuvevo soama.

⁵⁶Mea lipalipa kamela! Meta me rovea paqumuko ko miduku kale ama quli ni ko okale ama quli ni me rovea pidokiko ko varo ko talio ni kilo, melai noi sole inio meta pui me baqumuka ko aṉa a erekako quli mekasi ko kio ni kalo komia taku kale?” kiolake.

⁵⁷Ni Jisu ta obeta olake pesio ni eri ma kiolake, “Noi sole inio meta pui me bitoeka tu meta me qorotiko meko tapata poso me ṉavio kude?

⁵⁸Esa kala ta o ṉati ziovou ṉo titizato kale, ṉota vati korotika koa tapata vokasi puliako qe barolo titizato kale. Melai pui ṉo qorotikou ko tea, vota o ṉati ziovou inio ṉo titizato ko maba kasi, vo o vaeṉo ala ṉo vo pulisi ko ṉase topi, vo o vaeṉo ala ṉo pirito pade kale.

⁵⁹Aṉata a bazueṉa ṉo, ṉota ṉo elou sai ni pui ṉoba saqorou ti kobeta barolou koa taku ṉoṉo okotikou keru tabariko ṉoko ronu,” kiolake.