Read Bilua Luke 15 Bible Online

Luke 15 - Bilua bible

Luke 15

¹Omadeu taku so keru kubo maba madu se takisi ke koani ni mata kake ruqe ama maba madu ke kuevi keru Jisu kasi tu didievole vo kikelake,

²nio se Parese madu ni se Mosese ko Bazu kekai nianiiekatani ta ke taniekake ṉuruṉuruo ni eri kikelake, “Nea maba ta o baroekima se ruqe ama maba madu ni o mati palaita se!” kikelake.

³So sole vo Jisu ta omai bazuekake se komia podepodeti ni eri kiolake:

⁴“Kala me azo ta omadeu paizana sipi sala ni kala pado se azo ta ota va mumailou, ta vota noni o kalou? Vota o vaemou sea siakava toni siakava sipi sai seke vuatakoi zama zaekale ni vota o kailou vailivole vo o mumaivani pado ni vota opa vati inotou vo.

⁵Ni so keru vo o velou keru voa sipi nio voa maba ta ota matu zoleilou ni o vakare puevou vo

⁶ni o vati vaitou peuru kale. Ni vota o nokaemou voko baerebaere poso ni voko lolo poso ni vota eri kiovou sea kiadamu kasi, ‘Aṉata ada matu zoleiva, ako aṉata lula aba veala vo ota la mumaivani sipi sole. So sole lati zomanomo zoleilo!’

⁷So inio aṉata a bazuemela me, omadeuvo so jari nio vo Baṉara ta ovai qulepoa zoleilou voa omadeu pado maba vo o liliziani voko ruqe kale azo kokai paloasako vo omai zoleivani zoleilo kale sea siakava toni siakava paṉapaṉao maba poso se puliama lilizio kekai zariani,” kiolake.

⁸Ni mata eri ma kiolake vo Jisu, “Kama pado rekoreko toni Quriki seleni[41] sama kota ka mumaima ka pado seleni koa toni kasi azo—noi nio koko kalo avo? Kota ko bainaekou ko juke, ni ko zarupikou ko pade ko poro, ni kota ko uria vailikou ti kobe kati inotou nio.

⁹“Ni so keru koko kati inotou keru inio kota ko nokaemou koko baerebaere poso ni koko lolo poso, ni eri kikovou sekasi, ‘Aṉata ada matu zoleiva, ako a qati inotala koa seleni kota la mumaima sole. Sole lati zomanomo zoleilo!’ kikovou.

¹⁰Aṉata a bazuemela, omadeuvo so jari nio vo Baṉara ko mateana madu ta keva zoleiva voa omadeu maba sarueko sala vo o liliziani,” kiolake vo Jisu.

¹¹Ni Jisu ta obeta olake bazubazuto ni eri kiolake mata, “Kala maba ta obeta evake omuqa lasive meqora sala.

¹²Ni vo visi ala meqora ta eri kiolake vokasi, ‘Mama, ṉota katila erisaṉa kiadama lomaloma ko aṉako kena ka kiṉolako.’ So sole voa maba ta ova pitasikake kiadama lomaloma vovo kaka ko kasi azo.

¹³Ni puliako tu keu nio voa visi ala meqora ta okai tatabaraovake kiadama voko kena koa lomaloma ni seleni okai koake ti obe vaekake inio o peuru. Ni vota ota olake kala vaṉala matu peuru kale, ni sai nio vota o ruvurikake voko seleni ruqe ama iruruputo kale ni olaquavo ota evake.

¹⁴Vota o ruvurikake kiadama quli vo o ṉeamukema quli, ti kobeta baroake inio ko matuma nioṉe koa peuru kale ni vota ota azopake.

¹⁵So sole vota o pasekake ko iruruputo koa peuru kale ala maba kasi, ni voa maba ta o soroevake vo tu vota o kati vailo voko bolo rovaṉa.[42]

¹⁶Nio vota oka zariake kai atapo ko bolo ko kuako sailao kale, melai puliala kala pado maba ta o niaevake vo tu o vuato.

¹⁷Ni koko tova inio vota o tova kerukerutake, nio eri kiolake, ‘Kei, kiadama a mama ko nabulu poso ta matu kubo sailao samu, melai aṉa koi ta luapole sipole ada vouvou!

¹⁸Aṉata a zolailou tu a zio a mama kasi tu eri pa kiavo, Mama, aṉata lula a jarueka vo Baṉara kasi ni ṉokasi.

¹⁹Pui a male tu lai nokaeke aṉata ṉovo meqora lala la kio; melai ṉo nabulu jaria kerukeruelo eve, pa kiavo,’ kiolake.

²⁰So sole vota o zolaike ni o vaitake vovo Mama kasi. “Ni so keru vo obeta kueva keru puliako sipole iko ko pade, inio vovo mama ta o veake vo; voa mama ta o matu roquevake vo, nio vota o rereake ni o toraevake ni o zuzuevake ni o lumevake vo.

²¹Nio voa meqora ta eri kiolake vovo mama kasi, ‘Mama, aṉata lula a jarueka Baṉara kasi ni ṉokasi, aṉata pui a malezika tu lai nokae ṉovo meqora,’ kiolake.

²²Melai vovo mama ta o nokaemake voko nabulu poso ni eri kiolake, ‘Taukavole kati kuemo ko matu ileile ama rosia sabosabo ni vai kiakomo. Vai sulanikomo ko riṉi o seseu kale ni vai kiakomo ko buti voko kiti topi.

²³Ni olamo tu pa vouvaekomo ko posu ama bulumakau ko meqora tu me vati vuato ni me vati zoleilo!

²⁴Ako nea meqora aṉavo ta lula ota vovini jari nio, melai vota mata o saeva erisaṉa, vota lula ota mumaini melai vota mata o purata sole,’ kiolake. Nio ko ṉojola ta ko tanitake.

²⁵“Ni koa taku kale ta vo kaka kala meqora ta kiaro kale obeta evake. Ni voko vaito kale sipole okai baro ko pade kio keru, inio vota o viqake ko kera ni pekao.

²⁶So sole vota o nokaevake kala pado nabulu ni o kuimaevake, ‘Loma ikio kota ereiva?’ kiolake.

²⁷Nio voa nabulu ta o vati tiorikake vo ni eri kiolake, ‘Ṉovo visi ta ota vaitala ni ṉovo mama ta o vouvaekala kama pado posu ama bulumakau ko meqora, ako vota pui o vouva melai ovai vaita sole,’ kiolake.

²⁸“Sai nio voa kaka kala meqora ta ota matu korakoraivake so sole vota pui oka zariake amaqeo koa pade ko poro kale, nio vovo mama ta o saqorake kupele tu o odievo vo kiolake tu o amaqeo pade ko poro kale.

²⁹Melai voa kaka kala meqora ta o vati tiorikake vovo mama ni eri kiolake, ‘Keatini, kiadama koa sabere poso aṉata ṉovo nabulu jaria iruruputo aṉai eva, ni puliaka taku inio ada ṉa pazoka ṉoko bazu poso. Melai pulia quli kio lula ṉo qatila aṉa. Silo ama qouti meqora melai puliama aṉa kaqe tu aṉata a ereko kama pado ṉojola aṉako baerebaere poso sase!

³⁰Melai nea ṉovo meqora vo ota ṉa ruvurikani ṉoko seleni takuto iruruputo kale, ta o vaita keru peuru kale inio ṉota ṉova vouvaeka ko posu ama bulumakau ko meqora!’ kiolake.

³¹Nio mama kala ta o vati tiorikake vo ni eri va kiolake, ‘Meqora, ṉota ṉo eva kiada keru aṉa kasi ni kiadama aṉako quli ta ṉoko ikio.

³²Uri kio animeta me ereka ko ṉojola ni me zoleiva, ako ṉovo visi vo lula ota vovini jari ala ta mata o saeva erisaṉa, vo lula ota mumaini melai vota mata o purata,’ kiolake.”