Read Bilua Luke 18 Bible Online

Luke 18 - Bilua bible

Luke 18

¹Jisu ta omai bazuekake voko disaipeli madu kama pado podepodeti tu o nianiiekimo tu seta ke vararaito kiada keru, ni pui niaba ke elou.

²Nio vota eri kiolake, “Kama pado matu peuru kale ta inovoana kala pado titizato ko maba vo pui ota va paṉaovani vo Baṉara ni maba.

³Ni kama pado naboko ta mata ikoana sai koa omadeuma matu peuru kale, koko olaolaitake voa maba kasi vai titiole vo tu o kati korotiko ko tapata, ko ni kovo kana ko tiania ko evako, ni eri kikolake, ‘Titiziva vo o niumaelani aṉa!’ kikolake.

⁴Ni kuleto voa titizato ko maba ta ota lupaoke ereko ko titizato, melai koko tova inio eri kiolake, ‘Tuvevo aṉata pui ada va paṉaovani lala inio vo Baṉara ni so jari maba,

⁵melai komia naboko ta kolai vaitavaitaita koko tapata sate. Sole uri tu aqa korotiko koko tapata, ako pui so tea kota sarube ko ilou aṉa sole,’ kiolake.”

⁶Ni vo Lekasa Jisu ta obeta olake pesio ni eri kiolake, “Tava viqomo vo ruqe ala titizato ko maba ko pesio kikolani.

⁷Noi nio? Vo Baṉara ta pui opa titizimou se ruqe amu, seke niumaemani o ṉaviko madu se kevai titiani ipu ni ṉaniu tu o tauvemo, kio? Vota pui taukavole opa tauvemou se, kio?

⁸Aṉata a bazuemela me, vota o korotimou ni taukavole o tauvemou se. Melai noi nio, so keru aṉa maba a eveni lala a vaitou keru miduku kale ta a melou kubo maba madu se kelai oquani aṉa ma pui kio?” kiolake.

⁹Ni Jisu ta o kasekake komia podepodeti se ke ṉavi nio sidopu amu kikelani kasi seke perimani edolomu.

¹⁰Eri kiolake vo Jisu, “Omadeu taku omuqa maba ta qopeta evake qo keveni nioqa Jelepade kale vararaitole, kala Parese ni kala pado ta takisi o koani maba.

¹¹“Ni vo Parese ta o edoliake lojolo o kiada ni o vararaitake ni eri kiolake, ‘Aṉata a ilusiṉa ṉo, Baṉara, aṉata pui kuilokuiloa lala ni pui lipalipa kalala, pui a zavematani lala, kiadama maba poso jari. Aṉata a ilusiṉa ṉo aṉata pui voa takisi o koani jaria lala.

¹²Aṉata a dabutabua omuqa ṉaniu omadeu vuiki kale ni aṉata a qatiṉani lala ṉo aṉako toni ama kiadama aṉako koazato kale ama,’ kiolake.

¹³Melai vo takisi o koani maba ta o lojoake sasa vaṉa buti ni ota paṉaoke tadatiko voko loilo aukasi, melai vota o pazokake voko dumidumi voko duki kai elo kale voko sarueko poso ni eri kiolake, ‘Baṉara, ṉota akoela aṉa, aṉata ruqea lala sole!’ kiolake.”

¹⁴Nio Jisu ta eri kiolake, “Aṉata a bazuemela me, takisi o koani nio sidopu ala Baṉara ko kelokelozato kale so keru vo o vaite keru voko pade kasi, pui Parese. Ako vo Baṉara ta zara o ivou vo o raurarauraivani, melai vota raura o ivou vo o zarazaraivani,” kiolake.

¹⁵Ni kake maba poso ta ke mati kuevake seko molele poso Jisu kasi tu vota omai iviko se voko ṉase. Ni se disaipeli madu ta ke meake se ni seta ke riqaemake se tu seta pui ke mati zio Jisu kasi,

¹⁶melai Jisu ta o nokaemake se silo ama meqora poso tu ke kilo vokasi nio eri kiolake voko disaipeli madu kasi, “Meta pui kaitimo se silo ama meqora poso tu ke kilo aṉa kasi, ako sea maba poso nia sasa rusu jari ke kalo amu nio ke ṉeamukou vo Baṉara ko lekasa puo kale ama mauruto sole.

¹⁷Meta kerukeruekomo komi! Se meqora poso pui kubo kerukeru kale ke koani ko puaro jaria kovo me elou vo Baṉara ko lekasa puo pado inio me roveovou amaqeo voko lekasa puo kale tu kai zomanole voko mauruto,” kiolake.

¹⁸Ni kala Jiu ala lekasa ta o kuimaevake vo Jisu ni eri kiolake, “Uri ala Tanala ṉa, loma uri ama iruruputo a erekou nio aṉata a qovou ko noqola kama saevo?”

¹⁹Nio Jisu ta eri kiolake, “Noi sole inio uri ala la kiṉola? Puliala ta uri ala melai Baṉara o kiada inio uri ala.

²⁰Ṉota ṉoqai nianiia vo Baṉara ko Bazu poso ko eri kikolako, ‘Ṉota pui ṉo zavematou, ṉota pui ṉo vouvatou, ṉota pui ṉo quilou, ṉota pui ṉovai kuirikou kala lipalipa kama quli, ṉota ṉoda ka paṉaovou ṉoko mama ni niania kidi,’ kikolako.”

²¹Nio voa maba ta eri kiolake, “So keru aṉako siloa lala keru azo ti aṉata a zorikako ikio koa kiadama bazubazu,” kiolake.

²²Nio so keru Jisu o viqa keru ko, vota eri kiolake, “Mata omadeu quli kio ṉota ṉo erekou. Ola tu pa kai tatabaraovi kiadama ṉoko lomaloma ni katima se ozaoza kamu koko seleni, inio ṉota batiro saṉa ṉo elou Baṉara kasi; saita inio ṉo luluelou aṉa.”

²³Melai so keru o viqa keru ko, inio vota matu duki ota evake, ako vota matu batiro ala sole.

²⁴Nio Jisu ta o keake voko duki elo nio eri kiolake, “Matu tapata tu se batiro ama maba poso ta kekai amaqeo vo Baṉara ko lekasa puo!

²⁵Koko tapata tu vo batiro ala maba ta o amaqeo Baṉara ko lekasa puo kale ta kokai paloasa koko tapata tu kala kameli ta o amaqeo nila ko purapura kale,” kiolake.

²⁶Ni sea maba poso seke viqeni koa pesio ta ke kuimaevake vo ni eri kikelake, “Sole lala inio vo o roveovo ala pakio?” kikelake.

²⁷Nio Jisu ta o tiorizatake ni eri kiolake, “Ko pui ko roveako maba madu kasi ta ko rovea vo Baṉara kasi,” kiolake.

²⁸Sai nio vo Pita ta eri kiolake, ‘Ta noi nio eṉe? Ako eṉeta lula ṉe vaekeni ṉela inio ṉe ṉaviko quli poso tu ṉe lulueṉo ṉo.”

²⁹Ni Jisu ta eri ma kiolake se, “Aṉata a bazuemela me, vo o kerukeruekani vo Baṉara ko lekasa puo ti o vaekani voko peuru, ma reko, ma visi poso, ma mama ni niania, ma meqora poso,

³⁰ta vo Baṉara inio ova besiekou ko ti vota o kovou matu kubo quli komia peuru ma peuru kale. Ni koko kilo ama taku kale inio voa maba ta o kovou ko noqola kama saevo,” kiolake.

³¹Ni Jisu ta o edolimake sea toni omuqa disaipeli ni eri kiolake sekasi, “Viqomo! Animeta meda ola inio Jerusalema peuru kale sai kiadama quli poropita madu ke rikiekema quli aṉa maba a eveni lala kasi ko ereilo ama ka kikevema ta tuvevo avole kota ereilou.

³²Seta ke lati ziovou aṉa se pui Jiu amu kasi, tu seta kelai balebaleitou ni ke niumaniumaelou ni kelai supatou.

³³Ni seta ke sisiparu puelou ni ke vouvaelou, melai zouke ala ṉaniu kale inio aṉata mata ada tova saevou,” kiolake.

³⁴Melai se disaipeli madu ta pulia quli ke paqumukake vo kiolani, koa pesio poso ko kio ni kalo ta kota ma daipaike sole, so sole seta pui kekai nianiiake vo Jisu o kasekema quli.

³⁵Ni so keru Jisu sipole o baro kiola keru Jeriko matu peuru kale, inio kala leqa kala maba ta obeta papuake keve ko ketaketa, obeta pasepasetake.

³⁶Ni so keru vo o viqa keru kubo maba ko alokato, inio vota o kuimaemake se, “Loma quli kio kota ereiva?” kiolake.

³⁷Nio seta ke bazuevake, “Nazareti ala Jisu ta ota alokata,” va kikelake.

³⁸So sole vota o upaupatake nokao, “Jisu! Devita ko vikuvikula kalea laṉa! Roquela aṉa!” kiolake.

³⁹Ni se Jisu ko kuleto ke olani ta ke riqaevake vo tu o moizailo kikelake. Melai so keru inio vota o naizatikake nokao, “Devita ko vikuvikula kalea laṉa, ṉota roquela aṉa!” kiolake.

⁴⁰So sole Jisu ta o dokolake ni o soruemake se tu seta ke vati kilo voa leqa kala maba vokasi. Ni so keru vo sipole o eva keru, inio Jisu ta o kuimaevake vo, ni eri kiolake,

⁴¹“Loma ikio ṉota ṉoqa zaria tu aṉata aṉa ereko ṉo?” kiolake. Ni voa leqa kala ta eri kiolake, “Lekasa, aṉata aqa zaria keazato,” kiolake.

⁴²Nio Jisu ta eri kiolake vokasi, “Keazakeazate tea erisaṉa! Noko vai oqu vo Baṉara ta ko urikiṉa ṉo sole.”

⁴³Ni maba koa taku kale inio vota o roveake kelokelozato, ni vota o luluevake vo Jisu, ni o ilusivake vo Baṉara. Nio koa matuma vaki ta ke keake ko, ni sea kiadamu ta ke ilusivake vo Baṉara.