Read Bilua Luke 19 Bible Online

Luke 19 - Bilua bible

Luke 19

¹Ni vo Jisu ta obeta olake ni o amaqeake Jeriko matu peuru kale ni vota obeta taliake sai kude.

²Sai ta inevoana kala matula maba vo takisi o koani, o ṉi ta Zakiasi, ni vota kala batiro ala maba.

³Ni vota o madoekake tu velo vo Jisu noni ala inio vo kio, melai vota kala silo ala ni puju ala maba sole pui o roveake velo vo Jisu, ako matuma vaki sole.

⁴So sole vota o rereake koa matuma vaki ko kuleto ni ota koitake sikomo ore topi tu o velo vo Jisu vo o alokatani koa keve kude kiolake.

⁵Ni so keru Jisu o baroa keru koa zaekale, inio vota o tadatake, ni eri kiolake Zakiasi kasi, “Taukavo saqore Zakiasi, ako aṉata a elou ṉoko pade kale vairutu sole,” kiolake.

⁶Ni Zakiasi ta taukavole o saqorake ni vota o baroekivake vo Jisu voko matuma zoleilo sate.

⁷Nio kiadama maba poso ke keve keru koa kalo, seta ke taniekake ṉuruṉuruo, ni eri kikelake, “Nea maba ta ota ola ni ota eva vo ruqe ala maba ko pade kale!” kikelake.

⁸Nio Zakiasi ta o lojoake ni eri kiolake Lekasa Jisu kasi, “Keatini, Lekasa! Kiadama aṉako lomaloma ta omuqa kobu a ikou ni omadeu kobu ta a qatimou se ozaoza kamu. Ni vo aṉa lipalipaito kale ada va kuilikeni voko quli ta ava besiekou ariku avole,” kiolake.

⁹Nio Jisu ta eri kiolake vo ni sai ke evani kasi, “Pakio ta kokai baroa komia pade vairutu, ako nea maba melai kala pado vo Ebarahami ko vikuvikula kale ala sole.[49]

¹⁰Ako aṉa maba a eveni lala ta a quevi vailimole ni pakiemole seke mumaivani,” kiolake.

¹¹Nio so keru se maba poso ke viqe keru koa pesio poso vo o rukuekema, Jisu ta obeta olake vai bazuto kala pado podepodeti sekasi. Koa taku ta vota lula Jerusalema ko sipole ota baroake, ni seko kerukeru kale ta vo Baṉara ko lekasa puo ta taukavole kota barolou kikelake.

¹²So sole vota eri kiolake, “Omadeu taku kala pado raura kala maba ta obeta evake, vo o keveni kama pado matu vaṉama peuru kale lekasa puilole, ni sai kazo inio o vaitou o peuru kale kioveni.[50]

¹³Nio puliako vo zio, vota o nokaemake toni voko nabulu madu ni vota omai okotikake katimo sea kiadamu omaomadeu ko qolo seleni,[51] ni eri ma kiolake se, ‘Meta kai iruruputomo ni mata kai komo kama seleni aṉa zio maqa,’ kiolake.

¹⁴Melai voko peuru kale amu ta kevai kideipake vo, so sole seta ke vati luluekake kama pado bazu ko eri kikolako, ‘Eṉeta pui ṉeva zaria nea maba tu vota eṉevo lekasa o elo,’ kikolako.

¹⁵“Melai vota o koake ko lekasa puo ko pizato koa vaṉama peuru kale ti o vaitake o peuru kale lekasa puole. Nio so keru voko mata vaito keru voko peuru kale, vota omai soroekake ko bazu voko nabulu poso kasi, tu o kelo latau seleni kio lula kekai koako koa seleni vo o katimema kiolake.

¹⁶Nio vo kuleto ala ta o kuevake ni eri kiolake, ‘Tanala, aṉata lula aqai koe toni qolo seleni voa omadeu ṉo qatileni kale.’

¹⁷Nio vovo lekasa ta eri kiolake, ‘Koe, matu uri ama koidi ṉo ereke, uri ala nabulu ṉa! Ṉota uria ereko ṉo eve ko silo ama quli, so sole aṉata lekasa a iṉou ṉo toni peuru kale.’

¹⁸Ni omuqala pado nabulu ta o kuevake ni eri kiolake, ‘Tanala, aṉata sike qolo seleni mata aqai koe voa omadeu ṉo qatileni kale.’

¹⁹Nio voa lekasa ta eri kiolake vokasi, ‘Ṉota lekasa ṉo elou sike peuru kale,’ kiolake.

²⁰“Ni kala pado nabulu ta o kuevake ni eri kiolake, ‘Tanala, komi ta ṉo qolo seleni. Aṉata a judeke suma kale ni a dukieke ko.

²¹Aṉata ada ṉa ṉava ṉo, ako ṉota kala tapata kala maba ṉa sole, ako ṉota ṉo qoazatani ṉa kubo seleni sai ṉoṉo amaqikakoi silo pala ni edolomu ko iruruputo kale batiro ṉo evani ṉa sole.’

²²Nio voa lekasa ta eri kiolake vokasi, ‘Noa ruqe ala nabulu ṉa! Ṉo ṉaviko pesio kale inio aṉata kuiripato saṉa a iṉou! Ṉota ṉoqai nianiia ta aṉata kala tapata kala maba lala, a qoazatani lala kubo seleni sai aṉa a amaqikakoi silo pala ni edolomu ko iruruputo kale batiro a evani lala.

²³Nio noi sole inio ṉota pui ṉoba vaeke baṉa kale aṉako seleni? Nio aṉata ada ka kovo nio koko puratiko ama sai aṉako vaito keru.’

²⁴“So sole vota eri kiolake se sai voko sipole ke lojoani kasi, ‘Tava komo koa qolo seleni tu kativomo voa nabulu toni seleni sala.’

²⁵Melai seta eri kikelake vokasi, Tanala, vota lula toni seleni sala inio!’

²⁶Ni vota eri kiolake, ‘Aṉata a bazuemela me, vo uria kai iruruputo o evani vo o koako ta vovo lekasa ta mata o kativou vo mata kama, tu kota kubo kova elo. Melai vovo lekasa ta ota va kovou vo pui okai uria iruruputani voko puaro koa silo pala melai.

²⁷Erisaṉa se aṉako kana poso se pui kelai zariani aṉa tu ama lekasa puo ta mati kuemo koi ni vouvaemomo aṉako kuleto!’ kiolake.”

²⁸Ni vo Jisu ko so kio ko tova vasi nio seta kebeta olake Jerusalema, ni vo Jisu ta seko kuleto vasi o taliani.

²⁹Nio sipole o baro kiola keru Betipeji ni Betani sai Olive Ore sama Sopu kale, vota o soroekake omuqa disaipeli kidi vima sase.

³⁰Ni puliako vo soroeko nioqa vota eri kiolake, “Olako ukoa peuru kale animeko kuleto vasi, ni so keru qeqe amaqeovou keru sai, inio qeta qe velou kala doqi vo meqora ke titieveni barabara topi vo puliako keru maba kovai zazuani. Qeta qe rupasivou ni qe vati kilou koi.

³¹Nio kala ta esa o kuimaeqelou qe, ‘Noi sole inio qeta qe rupasiva vo?’ qela kiovou ta, ‘Animevo Lekasa inio ova zaria,’ vati kiqevou,” kiolake.

³²So sole nioqata qo olake ni qo keake ko quli vo Jisu okai bazuekema nioqa.

³³Nio so keru nioqa qope rupasiva keru voa doqi meqora, ke ṉavi samu ta eri ka kikelake nioqa kasi, “Noi sole inio qeta qe rupasiva voa doqi meqora?” kikelake.

³⁴“Animevo Lekasa inio ova zaria,” kiqolake,

³⁵ti zariekato sate nioqata qo vati olake voa doqi meqora Jisu kasi. Ni nioqata qovai sakekake nioqako topi ama sabosabo voa biaṉa ko momo topi ni qo zazuevake vo Jisu vo topi.

³⁶Ni vo obeta ola keru inio maba poso ta ke ivikake seko topi ama sabosabo ni ke saluekake keve tona voko kuleto.

³⁷Ni so keru vo o baroi keru Jerusalema ko sipole, Olive Ore sama Sopu kale azo ko saqorako keve kasi, inio vo ke luluevani matuma vaki ta ke tanitake va zoleilo vo Baṉara ni ke ilusivake vo matuma kora kale, koa matu aqasiele ama quli seke kevema quli kale avo. Seta eri kikelake,

³⁸“Baṉara ta mauru o ivou vo Lekasa vo o kuevani voko ṉikale! Bule ta ko elou aukale ala Baṉara ni maba ko tiania! Ilusivomo vo Baṉara!”

³⁹Nio kake se Parese madu seke eveni koa matuma vaki ko valuvalu ta eri kikelake Jisu kasi, ‘Tanala, ṉota bazuema ṉoko disaipeli madu tu ke moizailo!” kikelake.

⁴⁰Nio Jisu ta o mati tiorikake se ni eri kiolake, “Aṉata a bazuemela me, ke moizailou se tea, ko lado poso ta kota tanito nio velavelao,” kiolake.

⁴¹Ni vota o baroake Jerusalema matu peuru ko ketaketa, ni so keru vo o keve keru ko, vota oka ziake ko,

⁴²ni eri kiolake, “Meta meqai nianiia vairutu ko bule ko imelo ama quli tea uri! Melai meta pui me rovea kelo ko erisana!

⁴³Ako taku ko kilo ama kale inio meko kana madu ta ke kilou ni ke melai kasakeovou ni ke levoemelou qoloemelo me.

⁴⁴Ni seta ke biresukou meko lado otu ni ke ruvurimelou me, ni pulia quli ta kopa elou sai meko peuru ko evakoi, ako meta pui me nianiieka komia taku so keru vo Baṉara oka zaria keru pakiemelo me sole,” kiolake.

⁴⁵Ni Jisu ta o amaqeake Jelepade ko zaekale ni o butuemake se sai kekai tatabaraekiniani ko lomaloma,

⁴⁶ni vota oma ririzake se ni eri ma kiolake, “Kota ko rikiziovi Tabu ama Riki kale ko eri ka kiovema vo Baṉara, ‘Aṉako Jelepade ta vararaito ko pade ko elou.’ Melai meta se kuilokuilo amu kekai mutaivako keaka jari meda va ika!” kiolake.

⁴⁷Ni kiadama ṉaniu kale Jisu ta o nianiiekatake Jelepade kale. Nio se raura kama siama madu, ni Mosese ko Bazu kekai nianiiekatani ni se Jiu amu ko tanatanamu ta keva zariake vouvaevo vo,

⁴⁸melai seta pui ke roveake kelo kama pado keve tu ke vouvaevo vo, ako kiadama maba poso ta pui ke dokolake didievo vo sole, pui keka zariake tu kai suato kama pado voko pesio sole.