Read Bilua Luke 20 Bible Online

Luke 20 - Bilua bible

Luke 20

¹Omadeu ṉaniu kale so keru Jisu Jelepade kale obe nianiiekima keru se maba poso ni obe mai bazubazueka keru ko Uri ama Bazu, nio se raura kama siama madu ni se Bazu kekai nianiiekatani, ni se tanatanamu ta ke kuevake,

²ni eri kikelake vokasi, “Bazueṉela, lala inio o zarieṉa inio ṉota ṉo ereka komi quli, ni lala inio o katiṉa ṉo koa pizato?” kikelake.

³Ni Jisu ta o mati tiorikake se ni eri kiolake, “Aṉa melai aqa zaria melai kuimaevo me kala pado kuimanao.

⁴Sole meta bazuelomo, lala inio o kative vo Jone koa pizato, inio vota bapitaiso o imake se maba poso? Vo Baṉara inio o kative koa pizato ma maba inio?” kiolake.

⁵So sole seta keta tanitake pesipesito ke ṉavio kude, “Noi nio kimevou? Ako vo Baṉara inio o kative koa pizato kimevou, ta vota eri nio mela kiovou, ‘Noi sole inio meta pui tuvevo meba ive vo Jone?’

⁶Ni animeta mata eri kimevou, ‘Maba inio o kative koa pizato’ kimevou, ta kiadama nia vaki koi ke evani vairutu ta ke taimelou anime lado kale, ako seta ke tuvevo pueveni vo Jone ta kala poropita inio sole,” kikelake.

⁷So sole seta ke opatake, ni eri kikelake, “Eṉeta pui ṉeqai nianiia,” kikelake.

⁸Nio Jisu ta eri kiolake sekasi, “Sole aṉa melai pui aba melai bazuekou me lalako pizato kale inio aṉata a ereka komi quli,” kiolake.

⁹Ni vo Jisu ta omai bazuekake se maba poso komia podepodeti. “Omadeu taku inio kala lekasa ta obeta evake vo o papakeni kama pado vaini kiaro, ni vota oma zariekake koa kiaro kake maba poso, saita inio vota ota olake vaṉama peuru kale tu keule. Melai vota o kovou ka kena koa kiaro kale ama epa seko korotato ke erekema kale.

¹⁰“Ni kajoro ko taku ta kota baroake, nio vota o soroevake kala pado vovo nabulu se kekai iruruputani koa kiaro kasi kovole voko kena koa epa ko. Melai se kekai iruruputani koa kiaro ta ke pazovake voa nabulu ni ke vaitoevake vo pulia quli sate.

¹¹So sole vota mata o soroevake omuqala vovo nabulu. Ni vo melai mata ke pazovake se kekai iruruputani koa kiaro, ni ke quraqurativake vo ni ke vaitoevake vo pulia quli sate.

¹²So sole vota o soroevake zouke ala nabulu. Ni vo melai tabi ma tabi ke ivake ni ke butuevake kiaro kupekupe.

¹³Nio voa kiaro sala lekasa ta eri kiolake, ‘Noni a qalou? Aṉata a joroevou aṉavo maba meqora, vo a roquevani, ni esa seta ke velou ni keta va maba panaovou vo!’ kiolake.

¹⁴Melai so keru se kekai iruruputani koa vaini kiaro ke vea keru vo, inio seta eri kikelake ke navio kude, ‘Nei nio komia kiaro sala vo meqora, vo o besievo ala vovo mama tu kiaro ko raki ota ka elo. Ariamo tu me vouvaevo, tu komia vaini kiaro vo kovai vikuvo ama ta animeko ko elou!’ kikelake.

¹⁵So sole seta ke butuevake vo koa kiaro ko kupekupe ni ke vouvaevake vo.” Ni Jisu ta o kuimaemake se keta va viqani koa bazu ni eri kiolake, “Sole noi nio o imou voa vaini kiaro sala maba se kekai iruruputani koa kiaro voko vaito keru?

¹⁶Vota o kilou ni opa vouvaemou nio sea maba madu, ni koa vaini kiaro ta oma zariekou edolomu,” kiolake. Ni so keru se maba poso ke viqa keru ko ta eri kikelake, “Maba pui so!” kikelake.

¹⁷Melai Jisu ta omai vilumuake se ni o kuimaemake se, “Pui so tea, koa Tabu ama Riki kale ko kaseivako ta puliama kalo sama, ko eri kikolako, ‘Koa lado se pade ke erekani kekai keduima pui uri ama ka kikevema, ko ikio erisaṉama qulepo ama pade ko lado kiadama lado poso azo,’ kikolako.

¹⁸“Vo o pialo ala koa qulepo ama lado topi ta silosilo pala ko ivou, ni koa lado ta kovai pialou kala ta kota ko mujamujarivou vo ni pari jari ko ivou,” kiolake.

¹⁹Nio koa taku keru inio se raura kama siama madu ni se Mosese ko Bazu kekai nianiiekatani ta keka zariake noqoevo vo Jisu, ako seta kekai nianiiake ta vota kuiripato saṉa omai ikake koa podepodeti sole, melai seta keta ma ṉake se maba poso.

²⁰So sole sea lekasa poso ta ke vailikake kama keve, ni seta ke tabarimake kake tu kekai lipalipaito ko seta Mosese ko Bazu ke sidopua luluekani maba poso inio kio, ni seta ke soroemake se tu ke tulumuvo vo seko kuimakuimaevo kale vo, tu seta ke roveovou vai kuiriko kama ruqe ni ke roveovou vaevo Romu ama qavuna madu ko pizato kale.

²¹Nio sea lipalipaito ko maba poso ta eri kikelake Jisu kasi, “Tanala, ṉo kiṉolani ṉoko nianiiekato kale ta sidopu ama. Ni eṉeta ṉeqai nianiia ta ṉota pui ṉoda ka ṉavani ṉa maba poso ko kerukeru, melai ṉota sidopu avole ṉoqai nianiiekata vo Baṉara ko tuvevo ama bazu kiadama maba madu kasi.

²²Sole ṉota ṉela bazueka ṉoko kerukeru. Uri kio ko anime Jiu mu mela ta me buariko ko takisi Romu ala Matu Lekasa kasi ma pui? Noni kikola animeko Bazu?” kikelake.

²³Melai Jisu ta ota mai potoake seko vimazioputo so sole eri ma kiolake,

²⁴“La kasekomoni ko siliva seleni. Lalako loilo ni ṉi kio ko topi ko evako?” kiolake. Nio seta ke vati tiorikake, “Matula Lekasa Romu ala ko,” kikelake.

²⁵So sole Jisu ta o bazuemake se, “Uri, sole Romu ala Matu Lekasa ko ta kativomo vo Romu ala Matu Lekasa, ni Baṉara ko ta kativomo vo Baṉara,” kiolake.

²⁶Seta pui ke roveake vai kuiriko ko sarueko voko pesio kale maba madu ko tanama kale, so sole seta moiza keta evake, ako aqasiele kekai evake voko opato sole.

²⁷Ni kake Sadiusi madu se voukale azo ta puliama mata saevo kopa elou kikeveni ta ke kuevake Jisu kasi tu ke madoeko zaraevo vo, ni eri kikelake,

²⁸“Tanala, Mosese ta o ṉela rikieke ko Bazu eri kikolako, ‘Kala ta o vouvou ni o vaekou voko reko meqora pide ama, ta vovo visi ta o raekou koa naboko tu nioqata meqora saṉa qo elou tu sea meqora poso ta vo o vovini kaka ko meqora poso kerukeruilo ke elou,’ kikolako.

²⁹Omadeu taku sikeura tamania ta kebeta evake, ni kaka kala ta ota rorotake ni vota ota vouvake puliako meqora ereko.

³⁰So sole vovo omuqala ta o raekake mata koa reko, ni vo melai o vouvake puliako meqora ereko,

³¹ni so jari vo zouke ala. Sea sikeura tamania ti ke raekake muli koa reko, ni keta vouvake muli puliako meqora ereko.

³²Ni sea kiadamu ko vou ko tova inio koa reko ta kota vouvake.

³³Nio sea sikeura tamania ti ke raeke muli koa reko, sole lalako reko ikio ko elou so keru se mata ke tova saevou keru voukale azo?” kikelake.

³⁴Nio Jisu ta o mati tiorikake se, “Komia miduku kale ama saevo kale ta lasive ni reko ta ke raekinia,

³⁵melai so keru seke malezikani ko voukale azo ama mata saevo ke tova saevou keru ta seta pui kepa rorotou.

³⁶Seta omadeuvo se mateana madu jari inio keta elou ni seta pui kepa roveovou vou. Seta vo Baṉara ko meqora poso inio, ako seta mata keta saevou voukale azo.

³⁷Mosese ta lula uria kaseko o eve ta maba ta mata o saevou voukale azo kiove. Ko urusana ko bainema sasa ore topi sai o eve keru ama bazu kale inio vota o rikieke voko eri va kio vo Baṉara, ‘Ebarahami vo Baṉara, ni Aisake vo Baṉara, ni Jekopi vo Baṉara,’ kio.

³⁸Vota se saevomu vo Baṉara, pui se voumu vo, ako kiadamu ta ke saeva voko rana sole,” kiolake.

³⁹Nio kake se Mosese ko Bazu kekai nianiiekatani ta eri kikelake, “Uri ama opato, tanala!” kikelake.

⁴⁰Ako sea kiadamu ta keta matu paṉaovake tu vai tova kuimaeko kama kuimanao poso sole.

⁴¹Nio Jisu ta o kuimaemake se ni eri kiolake, “Noi sole inio se Mosese ko Bazu kekai nianiiekatani ta eri kikela, ‘Vo Baṉara o soroevo ala Pakio ta o alilou vo Devita ko vikuvikula kale?’

⁴²Aṉata soa kuimanao a eva, ako o ṉavi Devita inio eri kioveni o kera kale sole, ‘Vo Baṉara ta eri vati kiolake aṉavo Lekasa: Ṉota papi aṉako palo rana tu ṉo lekasa puo,

⁴³ti kobeta barolou so keru aṉa a vaemou keru kiadama ṉoko kana poso ṉoko pizato kale.’

⁴⁴“Devita ta voa Pakio inio vovo Lekasa va kioveni, sole noi nio vota o alilou Devita ko koilokoilo kale?” kiolake.

⁴⁵Ni so keru kiadama sea maba poso kebe tava viqa keru nio eri kiolake voko disaipeli madu kasi,

⁴⁶“Tama balauvomo se Mosese ko Bazu kekai nianiiekatani, seke lipiani seko rosia sabosabo sate tu maba poso ta ke rauraemo tatabarao ko zaekale sai maba poso ke padoivakoi. Ni tama balauvomo seke pitoekani kai papu raura kama papupapu ilusato ko pade kale ni ke pitoekani qulepo ama zae ṉojola kale.

⁴⁷Se inio keta ma bibizikani naboko poso ko pade poso seko ubeubemo kale, ni koko tova se inio kekai lipalipaitani ko rosi ama vararaito ubutiania tu maba madu ta ke melou pala! Melai seko koqotailo ta matu palopaloasi ama kota elou!” kiolake.