Read Bilua Luke 7 Bible Online

Luke 7 - Bilua bible

Luke 7

¹Ni so keru Jisu o paika keru bazubazuto se maba poso kasi inio vota o olake Keponeami peuru kale.

²Ni koa peuru kale ta inevoana kala Romu ala sirula vo nabulu vo o matu roquevani, ni vota ota verepake ni sipole ota vou kiolani.

³Nio so keru voa sirula ota va viqa keru Jisu ko bazu, vota o soroemake kake Jiu ama tanatanamu vokasi tu kepa kuimaevo tu vota o zio tu opa urikivo vovo nabulu kiolake.

⁴Nio seta ke kuevake Jisu kasi ni kevai matu titiake vo ni eri kikelake, “Nea maba ta ko male tu ṉota ṉo dauvevo.

⁵Vota o roquemelani anime Jiua mela ni vo inio o mela erekeni ko ilusato ko pade sole,” kikelake.

⁶So sole Jisu ta o olake se sate. Ni vo sipole o baroa keru koa pade kasi inio voa sirula ta o soroemake kake voko baerebaere poso tu kepa vai bazueko vo Jisu ko eri kio, “Tanala, ṉota pui jairozo kilo, ako aṉata pui ko malea lala tu ṉota ṉo qilo aṉako pade kasi sole.

⁷Ni aṉa melai pui a male tu a qilo ṉokasi, melai pesio kale pala ṉo qasekou koa mauruto ni aṉavo nabulu ta o urikou.

⁸Ako aṉa inio se raura kamu ko zara lala sole, ni sea solodia madu ta aṉako zara kamu. Nio aṉata a bazueva kala, ‘Ola!’ va kiala, ni vota o ola. Mata aṉata a bazueva kala, ‘Kua!’ va kiala, ni vota o kueva. Ni aṉata a bazueva aṉavo nabulu, ‘Ereka komi!’ va kiala, ni vota o ereka ko. Sole ṉoko pesio melai soa pizato kota elou,” kiolake.

⁹Nio Jisu ta ota vuzeike so keru vo ota va viqa keru koa pesio, so sole vota o vabaliake, ni eri kiolake koa matu vaki kasi, se vo ke lulueveni, “Aṉata a bazuemela me, komi jari ama oqu sala maba ta puliakoi aba veve, se Izireli amu kasi melai pui aba keve soama oqu!” kiolake.

¹⁰Nio se bazu ke borikani ta ke vaitake voa sirula ko pade kasi ni seta ke veake voa sirula vo nabulu ta lula ota urikake.

¹¹Ni koko tova inio Jisu ta ota olake kala pado peuru kale Neini o ṉi sala, ni voko disaipeli madu ni matuma vaki ta ke luluevake vo.

¹²Ni vo sipole baro kio keru koa matu peuru ko veutu tona inio vota o meake kake seke borivani kala pado maba voula, tu kepa mutavo kikelake. Ni voa voula maba ta kama pado naboko vo pado meqora, ni matuma vaki koa peuru kale amu ta ke luluekake ko.

¹³Ni Jisu ta o keake ko ni o roquekake ko ni eri kiolake kokasi, “Pui zialo,” kiolake.

¹⁴Ni Jisu ta o olake ni o tibaekake koa vouma tupu sama bourobouro, ni seke borikani ko ta keta dokolake talio. Ni Jisu ta eri kiolake, “Vairu ala maba ṉa, zolai!” kiolake.

¹⁵Nio voa voula maba ta ota saevake, ni ota papuake ni ota pesiake, ni Jisu ta o vati vaitake vo o niania kasi.

¹⁶Ni sea kiadamu ta keta matu ṉake, ni seta ke rauraevake vo Baṉara ni eri kikelake, “Matula poropita ta o purata anime kasi!” kikelake, ni mata “Baṉara ta lula o kueva tu o pakiemo voko maba poso!” kikelake.

¹⁷Nio koa Jisu ko bazu ta kokai zaroake pado ama Jiudia rana ni kiadama koko levoano kale ko evako peuru poso.

¹⁸Nio vo Jone Bapitaiso ko disaipeli madu ta kevai bazuekake vo Jone kiadama komi quli vo Jisu o erekema. So sole Jone ta o nokaekake omuqa kidi,

¹⁹ni vota o soroekake nioqa vo Jisu kasi tu qopa ka kuimanao vokasi ko eri, “Jisu, ṉota bazueṉela eṉe, ṉo inio voa maba ṉa Jone o kaseveni vo eri va kioveni, mainio kala opa kilou va kioveni, kio? Ma eṉeta mata ṉe darevou kala edolola?” kiqolake.

²⁰Koa taku kale inio Jisu ta o urikimake kubo maba poso seko azaazama vere kale azo ni ota ma rerike ko ziolo poso ni kubo madu se leqa kamu melai o leqosimake. Nio nioqata qo kuevake Jisu kasi ni eri kiqolake vokasi, “Vo Jone Bapitaiso ta o soroeqelala eqe tu qe kuimaeṉo ṉo, ‘Ṉo inio voa maba ṉa Jone o kaseveni vo eri va kioveni, mainio kala opa kilou va kioveni, kio? Ma eṉeta mata ṉe darevou kala edolola?’ kiola,” kiqolake.

²¹

²²So sole Jisu ta o kati tiorikake Jone ko disaipeli kidi ni eri kiolake, “Qeta vaitoko ni bazuevoko vo Jone ko quli qeqe keako ni qe viqako quli, se leqa kamu ta keta keazata, ni se raiqo amu ta keta talia, ni se pokupoku amu ta keta urika, ni se qiqili amu ta keta viqazata, ni se voumu ta mata ke tova saeva, ni ko Uri ama Bazu ta ko kaseiva se olaquamu kasi. Ako aṉa inio a erekani lala ko quli.

²³Ni qeta qe bazuevou vo Jone, voa maba vo pui niuniala olai evani aṉa ta maurumauru ala!”[15] kiolake.

²⁴Ni vo Jone o soroekeni nioqa lula qo olake saita inio Jisu ta ovai bazubazutake vo Jone koa matuma vaki kasi, ni eri kiolake, “So keru meme qeve keru lealea kama zaekale viqole Jone ko bazubazu ta noni ala maba inio me meba velou va kimeveni? Kala lekuleku ala maba, seulele ko leko jari ala ko ururu ko viliviliekako? Pui!

²⁵Sole noni ala maba inio me meva keveni velole? Kala maba vo okai saboivani ko matu ileile ama suma? Pui! Ako se lekasa poso ko sabosabo ke kiakani ta lekasa poso ko pade kale inio ke evakoi sole.

²⁶Bazuelomo, noni ala maba inio me meba velou va kimeveni? Kala poropita, kio? Tuvevo, vota kala poropita inio, melai vo Jone vo me mebe veveni inio matu qulepo ala kiadama poropita madu azo.

²⁷Ako Jone inio ko kaseveni ko Tabu ama Riki ko eri kikovema, ‘Baṉara ta eri kiolake, Aṉata a joroevou aṉavo talitalio ko maba ṉoko kuleto tu oṉa inainaekou ṉoko keve.’ ”

²⁸Ni Jisu ta obeta olake pesio ni eri kiolake, “Aṉata a bazuemela me, vo Jone ta raura kala kiadama maba poso ke alilani peuru ma peuru kale, melai vo matu zara kala Baṉara ko lekasa puo kale ala ta ovai paloasa vo,” kiolake.[16]

²⁹Ni kiadama maba poso ni takisi ke koani ta keta va viqake vo, se lula ke zorikeni vo Baṉara ko sidopu kikolani, ni se lula bapitaiso keta eveni Jone ko bapitaiso kale.

³⁰Melai se Parese madu ni Mosese ko Bazu kekai nianiiekatani ta ke tizaekake vo Baṉara ko vatolo sekale avo ama, ni keta lupaoke bapitaiso puilo vo Jone ko bapitaiso kale.

³¹Nio vo Jisu ta obeta olake bazubazuto, ni eri kiolake, “Sole loma ikio a mati podetikou komia taku ama maba poso? Loma quli jari amu inio ko se?

³²Seta se sasa rusu ke papuani tatabarao ko zaekale jari amu inio, seke nokaemani edoloma poukale amu, ni eri kikelani, ‘Eṉeta lula ṉe mela kelaeke me ko vivo melai meta pui meba pekaovi! Ni eṉeta ṉeqai keraovi ko mutazato ko kera melai meta pui meba ziavi!’ kikelani.

³³Soa kaseqelo inio se maba poso ke evani aṉa ni Jone sole. Ako Jone Bapitaiso ta o kuevi ni vota o tabutabuake voko pui kuo kale kama sailao ni vaini ko ju, nio seta eri kikelake, ‘Ziolo kovai onobata!’ va kikelake.

³⁴Ni aṉa maba a eveni lala ta a quevi ni aṉata a quani lala kiada keru ama sailao ni a nozuekani lala ko vaini ko ju kiadama maba poso jari, nio meta eri la kimela, ‘Vemo nea maba! Vota kala olavo ala ni vaini ko ju ko nozuto ko maba, vota se takisi ke koani ni se ruqe amu vo baerebaere!’ la kimela.

³⁵Melai vo Baṉara ko nianiio sama nakanakati ta sea kiadamu se ko ke ṉeamukani ke puratikako epa kale inio me qelou koko tuveano.”

³⁶Ni kala Parese ta o taipazivake vo Jisu tu vota opa vuato vokasi kiolake, so sole Jisu ta o olake voko pade kasi ni o papuake ni o vuatake.

³⁷Ni koa peuru kale ta ikoana kama pado rekoreko ko sarueko sama saevo sama. Kota ko viqake ta Jisu ta obeta vuata Parese ko pade kale kio, so sole kota ko borikake kama pado matu tabara kama lumu teamuteamu sama ni koa teamuteamu ta matu tabara kama dikidoke ama lado alebasita ka kikelako,

³⁸ni kota ko lojoake Jisu ko kado vasi, voko kiti papara[17], ni kota ko ziake ni koko deumu ko tibiatako kale inio kota va sitekake voko kiti. Ni kota kota va puqoekake voko kiti koko toukale, ni sai nio kota va lumekake ko ni ko raibikake koa lumu voko omuqa kiti topi.

³⁹Ni so keru voa Parese o kea keru koa iruruputo inio vota eri kiolake voko kerukeru kale, “Nea maba ta tuvevo ala poropita tea, vota okai nianiio nio komia reko koko tibaevako vo, ni ota kai nianiio nio koko matu ruqe ama ni sarueko sama saevo koko elo kale!” kiolake.

⁴⁰Sai nio Jisu ta o pesiake ni vota eri kiolake vokasi, “Saimone, omadeu quli kio aṉata aqa zaria ṉai bazueko ṉo,” kiolake. Nio vota eri kiolake, “Zio, tanala, lai bazueka,” kiolake.

⁴¹Nio Jisu ta eri kiolake, “Inioqiana omuqa maba lipulipu qota va ikeni nioqa kala batiro ala maba ko seleni. Nio kala ta sike paizana seleni lipulipu ota va ikake, ni vokale ala ta sike toni seleni lipulipu ota va ikake.

⁴²Nio nioqata pui qo roveake va lipueko ko, so sole vota ota ka vouvaekake nioqa kiada nioqa ko lipulipu. Lala pado nioqʼazo ta o matu roqueva ta be kiṉola?” kiolake.

⁴³Nio vo Saimone ta o tiorizatake ni eri kiolake, “Esa vo matuma lipulipu ota va vouvaekani kiala,” kiolake. Nio Jisu ta eri kiolake, “Ṉoda tuveana,” kiolake.

⁴⁴Ni vota oka lilitake koa rekoreko ni eri kiolake Saimone kasi, “Ṉota ṉo qea komia rekoreko? So keru aṉa a amaqeala keru ṉoko pade kale, ṉota pui ṉoba katilala kama ju aṉako kiti kasi, melai kota kola sitekala koko deumu kale ni kola puqoekala koko toukale aṉako kiti.

⁴⁵Ni ṉota pui ṉoba baroekilala lumezato kale, melai kota pui ko lalamata tala lumeko aṉako kiti aṉa a amaqeala keru azo.

⁴⁶Ni mata ṉota pui ṉoba la lumuekala aṉako lezu, melai kota kola lumuekala aṉako kiti uria tui kama lumu kale.

⁴⁷So sole aṉata eri kiala ṉokasi, koko matuma roquano kale inio kasa ko eva koko matuma boutare ta kota ka akoiva. Melai vo o koani ko silo ama sarueko ko akoekato, ta mata silo ama voko roquano,” kiolake.

⁴⁸Nio Jisu ta eri kiolake koa rekoreko kasi, “Noko boutare ni sarueko poso ta kota ṉa akoiva,” kiolake.

⁴⁹Ni seke papuani tevolo kasi ta eri kikelake ke navio kude, “Noni ala maba inio nei o akoekani ko boutare ni sarueko poso?” kikelake.

⁵⁰Melai Jisu ta eri kiolake koa rekoreko kasi, “Noko vai oqu vo Baṉara ta ko pakieṉa ṉo, sole ola ni pui ṉo ṉalou,” kiolake.