Read Bilua Jone 1 Bible Online

Jone 1 - Bilua bible

Jone 1

¹Puliako peuru ma peuru ereilo, inio vo Bazu ta obeta eve; vota o eve Baṉara sase, ni vota vo Baṉara tisoiko.

²Ni koko maba tanitanila keru inio voa Bazu ta Baṉara sase o eve.

³Vokale kude inio Baṉara ta o ereke kiadama quli; ni koa kiadama quli ta ko erei voa Bazu kale kude peuru ma peuru ko tanitanila keru.

⁴Voa Bazu ta saevo ko raki; ni koa saevo ta ko kati kuevi vo Baṉara ko zakaremu maba madu kasi.

⁵Voa zakaremu ta o taloake kutumana kale, ni ko kutumana ta pui ko daipaevake vo.

⁶Ni Baṉara ta o soroevake vovo nabulu, voa maba ko ṉi ta Jone,

⁷vo o kuevini ni omai bazueveni voa zakaremu ko kalo se maba poso. Vota o kuevi mai bazuevole se, tu sea kiadamu ta ke viqo koa bazu ni ke tuvevo puevo.

⁸Pui vo Jone inio voa zakaremu, melai vota o kuevi tu opa mai bazuevo pala voa zakaremu.

⁹Voa Bazu ta tuvevo ala zakaremu, ni vota o kuevi peuru ma peuru kale, ni vota omai taloake kiadama maba poso.

¹⁰Voa Bazu ta o evake peuru ma peuru kale, ni Baṉara ta o erekake ko miduku vokale kude, melai sea maba madu ta pui kevai nianiiake vo.

¹¹Vota okai kuevi o ṉaviko kunia peuru, melai sea kiadamu o ṉaviko kuniale amu ta pui ke baroekivake vo.

¹²Melai kama poso madu seke baroekiveni vo, ni se kevai keruini vo, ta o katimake ko naizato tu seta vo Baṉara ko meqora poso ke elo.

¹³Seko Baṉara ko meqora poso elo ta pui dara ni tupu kale ama alilo kale pala, ni pui kala miduku kale ala mama ko alilimo kale, melai vo Baṉara inio sevo Mama.

¹⁴Ni voa Bazu ta maba o evake, ni vota o loivake eṉe kasi. Ni eṉeta ṉeda va keve voko ṉaṉaidara ko kokai sukatema ko roquano ni tuveano. Ko ikio koa ṉaṉaidara vo Mama vo pado Meqora okai evema.

¹⁵Ni Jone Bapitaiso ta ovai bazutake vo. Ni vota o velavelaoke, ni eri kiolake se maba poso kasi, “Nei nio vo vo, aṉa a melai bazueveni, ‘Vo aṉako tova o kilo ala, vo inio raura kala aṉa kasi azo, ako vota lulavo o eveni aṉa puliako alilo sole,’ ” kiolake.

¹⁶Voko qulepo ama roquano kale vota mauru mati o imelake animea kiada mela kubo keve kale.

¹⁷Vo Baṉara ko lulama bazu ta ko katiziovi Mosese kale kude, melai roquano ni tuveano ta ko katiziake Jisu Karisito kale kude.

¹⁸Puliala inio lula o veani vo Baṉara. Melai voa pado Meqora, omadeuvo vo Baṉara jari ala ni vo obeta evani vo Mama ko palo rana vasia rana, vo inio ovai nianiiani ni o mela kaseveni vo Baṉara.

¹⁹Se Jiu ama tanatanamu Jerusalema peuru kale ke eveni ta ke soroemake kake se siama madu ni se Livai toutou kale amu Jone kasi, tu kepa vai kuimaeko ko eri, “Bazueṉela, lala ṉa inio ko ṉo?”

²⁰Nio Jone ta pui o lupaoke bazuemo se, melai vota kasavole o opatake. Nio vota eri kiolake, “Aṉata pui vo Baṉara o soroevani Pakio lala inio,” kiolake.

²¹“Kio, sole lala ṉa inio ko ṉo? Ilaija ṉa inio ko ṉo kio?” va kikelake. “Pui, aṉata pui vo lala,” kiolake vo Jone. “Ṉo inio vo ṉe darevani Poropita ṉa kio?” va kikelake. “Pui,” ma kiolake voko ma opato kale.

²²“Bazueṉela tani lala ṉa inio ko ṉo. Ṉelati tiorika tu eṉeta ṉe bazuemo seke soroeṉelalani. Noi nio kiṉola ṉo ṉavi ko kio kale avo?” kikelake.

²³Nio Jone ta o tiorizatake, ni eri kiolake, “Aṉa inio vo vo lala, ko eri va kikovema: ‘Kala ta o velavelaova lealea kama zaekale matuma kora kale: Va inainaekomo vo Lekasa ko keve sai vo o taliovoa koi!’” kiolake. Ko ikio vo poropita Aisea o kasekema lulavo.

²⁴Ni se Parese madu ta ke soroemake mata kake se bazu ke borikeni.

²⁵Ni seta ke olake ni ke kuimaevake vo Jone, “Ṉota pui vo Baṉara o soroevani Pakio, ma Ilaija, ma kala Poropita ṉa kiṉola, ta noi sole inio ṉota ṉo bapitaiso puta?” kikelake.

²⁶Nio Jone ta o tiorizatake, “Aṉata a bapitaiso puta jukale pala. Melai kala ta obeta lojoa meko tiania vo me pui nio mevai nianiiani ni

²⁷vota obeta kueva aṉako tova, melai aṉata pui a male tu vovo mabaku va elo tu ava rupasiko voko buti ko raitoraito,” kiolake.

²⁸Kiadama komi quli ta ko ereivake Betani peuru kale, Jodani sukuru ko ṉaniu ko peatakoi vasia rana, sai vo Jone o erekekoi ko bapitaiso.

²⁹Ni koko raneo kale inio Jone ta o veake o maba ṉavi Jisu obeta kuevake vokasi. Ni vota eri kiolake vokasi ke padoini kasi, “Keatini, vo Baṉara vo Sipi Meqora siqasiqa o elo ala, vo o ṉamuko ala peuru ma peuru ko sarueko, ta obeta kueva!

³⁰Nei nio vo vo aṉa a qaseveni so keru aṉa eri kiave keru, ‘Kala maba ta obeta kueva aṉako tova obe luluela, melai vota raura kala aṉa kasi azo, ako vota o eveni lulavo aṉa puliako alilo sole.’

³¹Aṉata pui aba vai nianiiovi lala inio vo vo kio, melai aṉata a quevi tu a bapitaiso puto jukale, tu amai bazuevo voa maba se Izireli amu,” kiolake.

³²Ni vo Jone ta omai bazuekake vo o kevema quli, “Aṉata a veve vo Baṉara vo Auvana o saqore keru aukale azo, ni voa Auvana ko velo ta ova kurou jari ala, ni vota ovai satoke voa maba.

³³Puliako kelo komi aṉata pui aba vai nianiiovi vo, melai vo Baṉara o soroeleni aṉa tu aṉata a bapitaiso puto jukale ta lula o uria bazuele, ‘Ṉota ṉo velou vo Baṉara vo Auvana ko saqoro ni vota o satou kala maba topi. Vo inio voa maba vo o bapitaiso puto ala vo Tabu ala Auvana kale.’

³⁴Aṉata lula a veve vo, ni aṉata a bazuemela me ta vo inio vo Baṉara vo Meqora,” kiolake vo Jone.

³⁵Ni koko raneo kale inio Jone ta mata obeta evake sai omuqa voko disaipeli kidi sase,

³⁶ni so keru inio vota o veake vo Jisu obeta taliake pui matu vaṉa vokasi azo, nio eri kiolake nioqa kasi, “Keatini, vo Baṉara vo Sipi Meqora vo siqasiqa o elo ala,” kiolake.

³⁷Nio voko omuqa disaipeli kidi ta qo viqake voko so kio, ni nioqata qo zolaike ni qo luluevake vo Jisu.

³⁸Ni Jisu ta o lilitake ni o keake nioqata qope luluevake, nio o kuimaekake, “Loma ikio qeqe vailika?” kiolake. Nio nioqata qo vati tiorikake, “Titisa, lai nio ṉoṉo evakoi?” kiqolake.

³⁹Nio vota o kati tiorikake nioqa, “Kueko tu pa keko.” So sole nioqata qo olake vo sate ni qo keake koa zae sai vo o evakoi, ni sea kiadamu ta ke amaqeake pade kale ni nioqata qo evake vokasi raisiraisi ariku koloko keru azo ti kobe kai ipuke.

⁴⁰Kala pado nioqʼazo, vo Jone kiovevo ota va viqeni, ni o lulueveni vo Jisu, ta Aduru inio, Saimone Pita vo visi.

⁴¹Ni taukavole Aduru ta o saqorake pade kale azo ni o vailivake vovo kaka Saimone ni o bazuevake vo, “Eqeta qe veala vo Baṉara o soroevani Pakio,” kiolake.

⁴²Nio vota o vati olake vo Saimone Jisu kasi. Ni Jisu ta o toiritoirivake vo ni eri kiolake, “Saimone, Jone vo meqora ṉa, erisaṉa ṉoko ṉi ta koṉai nokailou Sepasi,” kiolake. Koko kalo ta Pita ta “Lado” kio kio ko so.

⁴³Ni koko raneo kale inio Jisu ta ota zio kiolake Qalili rana, so sole vota o zolaike ni ota olake. Ni vota o veake vo Pilipi sai ni eri kiolake vokasi, “Luluela aṉa!” kiolake.

⁴⁴Pilipi ta Betiseida peuru kale ala, koa omadeuma peuru sai Aduru ni Pita qo evakoi zala.

⁴⁵Nio Pilipi ta o luluevake vo Jisu, ni koko tova inio vota o veake vo Nataniala ni o bazuevake vo, “Eṉeta ṉe veala vo tivoine vo o kaseini vo Mosese ko Bazu kale, ni se poropita madu ko riki kale. Vo inio vo Nazareti ala Jisu, Josepa vo meqora,” kiolake.

⁴⁶Nio Nataniala ta o kuimanaoke, “Kama uri ama quli ta ko roveovou purato Nazareti peuru kale, kio?” kiolake. Melai Pilipi ta o opativake vo ni eri kiolake, “Kua tani tu pa vea,” kiolake.

⁴⁷Ni so keru Jisu o vea keru vo Nataniala obeta kueva keru vokasi, inio vota eri kiolake vokale avo, “Nei nio vo ṉisa Izireli ala maba, puliama vai vailizato sala!” kiolake.

⁴⁸Nio Nataniala ta ota va viqake vo kiolani ni o kuimaevake vo, “Nonia lai nianiio nio ṉoṉo eva?” kiolake. Nio Jisu ta ova opatake vo, “Aṉata lula abe ṉeala ṉo so keru piqi ore ko vima ṉo bapula keru, puliako Pilipi nokaeṉo ṉo,” kiolake.

⁴⁹“Tanala, abe paqumuṉa ta ṉo inio vo Baṉara vo Meqora ṉa! No inio se Izireli amu vo Aikovakova ṉa!” kiolake.

⁵⁰Nio Jisu ta eri kiolake, “Kio! Ṉota ṉo duvevo puta ako aṉata aṉai bazueka sole aṉako ṉelo ṉo so keru ṉoṉo bapula keru koa piqi ore ko vima, kio? Mainio ṉota ṉoba kelou koko topi tiniama quli!” kiolake.

⁵¹Nio vota eri kiolake sea kiadamu kasi, “Tuvevo avole aṉata a bazuemela me, mea kiada mela ta me qelou ko au ko veukazio, ni vo Baṉara ko mateana madu ko koilo ni saqoro aṉa maba a eveni lala tona,” kiolake.