Read Bilua Jone 11 Bible Online

Jone 11 - Bilua bible

Jone 11

¹Ni kala pado maba vo Lazarasi o ṉi sala, vo o eveni Betani peuru kale, ta ota matu verepake. Betani peuru ta sai Mere ni koko kaka Mata qo evekoi, ni nioqavo kaka inio vo Lazarasi.

²(Koa Mere ikio koko raibikema ko uria tui ama lumu vo Lekasa ko kiti topi ni ko puqoekema koko toukale, ni kovo kaka Lazarasi ta ota matu verepake.)

³Sole nioqa reko tamania kidi ta qova soroekake kama pado bazu vo Jisu, “Lekasa, ṉoṉo matu roquevani ṉovo baerebaere ta ota matu verepa,” kikolako.

⁴Nio so keru Jisu o viqa keru ko, vota eri kiolake, “Komia vere ta pui kopa ruvurivou vo Lazarasi. Kota ko ereiva tu kota kasa ko iko vo Baṉara ko ṉaṉaidara, tu vo Baṉara vo Meqora ta o ṉaṉaidara puilou kokale kude,” kiolake.

⁵Jisu ta o roquekake ko Mata ni koko visi ni Lazarasi.

⁶Melai so keru vo o koe keru vo Lazarasi ko lula ota verepa kio sama bazu nio vota o loivake mata omuqa ṉaniu sai vo o evakoi.

⁷Ni koa omuqa ṉaniu ko tova inio vota eri kiolake voko disaipeli madu kasi, “Aria tu meda vaito Jiudia,” kiolake.

⁸Ni se disaipeli madu ta ke vati tiorikake vo, “Tanala, maba vairutu inio saizamu kebe ṉa zarilavo taiṉo ṉo lado kale, melai ṉota ṉo bitoeka vaito sai!” kikelake.

⁹Nio Jisu ta eri kiolake, “Omadeu ṉaniu ta toni omuqa aoa sama ikio koko zakaremu, ma pui kio? So inio vo o taliani ṉaniu ko zakaremu kale ta pui o tuparia, ako vota o kea ko peuru ma peuru ko zakaremu sole.

¹⁰Melai vota o talia ipu kale tea vota ota tupario nio, ako vota puliama zakaremu sala sole.”

¹¹So kiolake vo Jisu ti obe kati paqulikake inio ko eri, “Animevo baerebaere Lazarasi ta ota maroṉala, melai aṉata a ziovou ni aba toirativou vo,” kiolake.

¹²Nio se disaipeli madu ta ke vati tiorikake, “Lekasa, vota o maroṉou nio vota ota urikou,” kikelake.

¹³Melai Jisu so kai kiovevo ta Lazarasi ta lula ota vouva, melai seko kerukeru kale ta maba maroṉo ikio so ka kiolako kikelake.

¹⁴So sole Jisu ta omai uria bazuekake se, “Lazarasi ta lula ota voula kio,

¹⁵melai meko tauvemelo ko kio kale avo aṉata a zoleiva ta aṉata pui vokasi a eva, ako so inio meta me duvevo puelou aṉa. Ariamo tu meda zio vokasi,” kiolake.

¹⁶Sai nio Tomasi, vo “Modi” ṉi sala, ta eri kiolake vokale ama disaipeli madu kasi, “Uri tani, animea kiada mela ta me zio vo sase, tu animeta me vou vo sase!” kiolake.

¹⁷Nio so keru Jisu o baroa keru sai Betani peuru kale vota o viqake vo Lazarasi ta lula ariku ṉaniu ota eva keaka niami kale kio.

¹⁸Betani ta pui vaṉa Jerusalema peuru kasi azo, sipole omuqa maelo tiniavo koko vaṉa,

¹⁹sole kubo Jiu amu ta ke kuevake koa matu peuru kale azo kelole ko Mata ni Mere tu ke patukiko nioqavo saqi ko voukale.

²⁰Ni so keru Mata ko viqa keru Jisu ta obeta kueva kio sama bazu, inio kota kota olake toraevole vo, melai ko Mere ta kota loivake pade kasi.

²¹Ni so keru Mata ko toraeve keru vo kota eri kikolake Jisu kasi, “Lekasa, ṉo lula koi tea aṉavo saqi ta pui nio opa vou!

²²Melai aṉata aqai nianiia vo Baṉara ta o katiṉou ṉo erisaṉa melai ko quli ṉo ṉovai paseko ama quli vo,” kikolake.

²³Nio vo Jisu ta eri ka kiolake, “Ṉovo saqi ta mata ota saevou,” kiolake.

²⁴“Aṉata aqai nianiia, vota mata ota saevou tovatovama ṉaniu kale,” kikolake.

²⁵Nio Jisu ta eri kiolake kokasi, “Aṉa inio ko tuvevo ama saevo ni voukale azo ama mata saevo lala. Vo o tuvevo puelani aṉa ta o saevou, vota o vouvou melai mata o saevou,

²⁶ni vo o saevani ni o tuvevo puelani aṉa ta pui opa vouvou. Ṉota ṉo duvevo pueka komi, kio?” kiolake.

²⁷“Zio Lekasa! Aṉata a duvevo pueṉa ṉota voa Pakio ṉa inio, vo Baṉara vo Meqora ṉa, vo Baṉara ko soru kale ṉo quevani ṉa peuru ma peuru kale,” kikolake.

²⁸Ni Mata ko so kio ko tova inio kota kota vaitake ni moizavole ko nokaekake koko visi Mere, ni eri kikolake, “Vo Tanala ta lula koi, ni vota oṉa kuima ṉo,” ka kikolake.

²⁹Nio so keru Mere ko viqa keru ko, kota ko lojoake ni taukavole ko saqorake tu kopa toraevo vo.

³⁰(Nio so keru ta Jisu ta pui nio o baroake koa zavaṉa kale, melai obeta evake inio sai ko Mata ko toraevekoi vo.)

³¹Ni sea maba poso, seke eveni pade kale Mere sase patukikole ko, ta ke keake koko lojo ni koko taukavoa saqoro, ni ke luluekake ko. Seko kerukeru kale ta kota kota ola niami kasi zialole kikelake sole.

³²Ni so keru Mere ko baroi keru sai Jisu o evakoi, ni ko vea keru vo, inio kota ko iqeiqeake voko kiti raki kasi ni eri kikolake, “Lekasa, ṉo lula koi tea aṉavo saqi Lazarasi ta pui nio opa vou!” kikolake.

³³Ni Jisu ta o keake koko zialo, ni mata o meake sea maba poso seke evani ko sase zialo, ni kota kota va tibaekake voko bulo, ni matu duki kota va ikake.

³⁴Nio vota eri kiolake, “Lai nio vo me mutavalakoi?” kiolake. Ni seta ke opatake, “Kua tu pa kea, Lekasa,” kikelake.

³⁵Ni Jisu ta ota ziake.

³⁶Nio so keru seke kea keru voko zialo seta eri kikelake, “Keatini, vota o matu roqueva vo!” kikelake.

³⁷Melai kake sea maba poso ta eri kikelake, “Vota o leqosivala vo leqa kala maba kio? Noi sole inio vota pui opa rovela kaitivo vo Lazarasi tu vota pui o vou?” kikelake.

³⁸Ni matuma upotuqu sase mata Jisu ta o olake keaka niami kasi, lado tibulu sama.

³⁹Ni Jisu ta eri ma kiolake se, “Bekolikomo ko lado,” kiolake. Melai Mata, vo o vovini maba ko visi, ta eri kikolake, “Kei, Lekasa, ruqe ama tui kota elou. Ako lula ariku ipu ota evala kea kale sole!” kikolake.

⁴⁰Nio Jisu ta eri ka kiolake ko, “Pui ṉo qerukerueka aṉa ṉati kiavevo ta ṉota ṉo qelou vo Baṉara ko ṉaṉaidara ṉo duvevo putou ta ṉa kiavema kio?” kiolake.

⁴¹Nio seta ke bekolikake ko lado. Ni Jisu ta o tadatake ni o vararaitake ni eri kiolake, “Matu uri, Mama, ṉota lula ṉoda la viqa aṉa.

⁴²Aṉata lula aṉai nianiia ta ṉota ṉoda la viqa aṉa kiada keru, melai aṉata so kiala, tu nia maba poso koi ke evani ta ke tuvevo puekou ko ṉo inio ṉo joroeleni ṉa aṉa kio,” kiolake.

⁴³Ni voko so kio ko tova inio vota o nokaoke matuma kora kale, “Lazarasi saqore!” kiolake.

⁴⁴Ni vo o vovini ta o saqorake. Voko ṉase ni kiti ta lupilupi ama sala, ni kama suma voko loilo topi ama ta kobeta evake. Nio Jisu ta o soruemake se, ni eri kiolake, “Rupasivomo vo ni zarievomo tu o zio,” kiolake. Ni ke rupasivake ni ota olake.

⁴⁵Ni kubo madu sea maba poso seke kuevini Mere soipikole ta ke keake vo Jisu o erekema aqasiele ama quli, nio seta ke tuvevo puevake vo.

⁴⁶Melai kake se azo ta ke vaitake se Parese madu kasi ni kemai bazuekake vo Jisu o erekako quli.

⁴⁷So sole se Parese madu ni se raura kama siama poso ta ke padoivake se Jiu ama lotu tanatanamu ko Kauniseli madu sase seko padoilo kale nio eri kikelake, “Loma ikio animeta me erekou? Keatini nea maba ta o ereka kiadama aqasiele ama iruruputo sole!

⁴⁸Animeta me zarievou pala vo tu o ereko soama kalo tea, kiadamu ti ke tuvevo puevou inio vo, ni se Romu ama lekasa poso ta ke kelou ko ni seta ke niumaekou ni ke biresukou nio animeko Jelepade ni pado ama Izireli qoqono!” kikelake.

⁴⁹Nio kala pado sea tanatanamu azo, Kaepasi ṉi sala, vo koa sabere kale Ṉisa Siama o eveni, ta eri kiolake, “Meda sarubeputa!

⁵⁰Meta pui me baqumuka ta kota uri tu omadeu maba ta oma vou se maba poso, pado ama qoqono ko biresuilo kale azo, kio?” kiolake.

⁵¹Vota pui so kiolake o ṉaviko vatolo kale, melai kota vo inio vo Ṉisa Siama koa sabere keru ala kio, so sole voko pesio ta ko pidokikake ta vo Jisu inio oma vouvo ala se Jiu ama maba poso,

⁵²ni pui seke kiada, melai voko voukale vota omadeu qoqono o imou kiadama vo Baṉara ko maba poso se lula ke birebireini.

⁵³So inio koa ṉaniu keru azo inio se Jiu ama lekasa poso ta ke erekake ko vadovadomu tu ke vouvaevo vo Jisu.

⁵⁴So sole Jisu ta pui o salebapuike talio Jiudia rana kale, melai vota o mati olake voko disaipeli madu Iparemi peuru kale, lealea kama zae ko ketaketa, ni seta sai ke evake.

⁵⁵Ni se Jiu amu ko Alokato ko Ṉojola ko taku ta sipole kota baroake, nio kubo maba madu ta ke peatake peuru poso kale azo Jerusalema peuru kale tu seta ke bulebuleilo puliako baro koa ṉojola.

⁵⁶Nio seta ke vailivake vo Jisu melai seta pui ke veake vo, so sole seke padoi keru koa Jelepade kale, ta keta kuima-kuimaekiniake ke ṉavio kude, ni eri kikelake, “Noni ta be kimela? Vota pui opa kilo ala inio ṉojola kale kio, ma ota kilou?” kikelake.

⁵⁷Ako se raura kama siama madu ni Parese madu ta lula ke bazuema se maba poso tu kala vo okai nianiiovo ala sai vo Jisu o evakoi ta okai bazutou, tu seta ke noqoevo vo.