Read Bilua Jone 12 Bible Online

Jone 12 - Bilua bible

Jone 12

¹Ni varimuja ṉaniu ikoana ti kota barolou Jiu amu ko Alokato ko Ṉojola, nio Jisu ta o olake Betani peuru kale, sai Lazarasi o evakoi, voa maba vo lula o saeviveni voukale azo.

²Ni seta keva inainaekake ko sailao sai, Mata kokai zomanema puariko, ni Lazarasi melai kala pado Jisu sate tevolo kasi.

³Ni Mere ta kopa koake ko sukasukati ama lumu matu tatabara kama ko uria tui ama nadi ka kikelako papapapa kale ko ereima, matu bulebule ama, ni ko raibikake Jisu ko kiti topi, ni kota kota va puqoekake koko rosi ama toukale. Ni koa lumu ko tui ta kokai zaroake koa pado ama pade ko poro.

⁴Sai nio kala pado Jisu ko disaipeli madu kale ala, Jiudasi Isikarioti, vo o saiqorivo ala vo, ta eri kiolake,

⁵“Noi sole inio komia uria tui ama lumu ta pui meqai tatabaraova tu kai kovo matu kubo seleni tu koa seleni ta ko katizio se ozaoza kamu kasi?” kiolake.

⁶Voko so kio ta pui voko se ozaoza kamu mati vailo kaqe melai vota kala kuilokuilo ala maba. Vo inio o kati vailani se disaipeli madu ko seleni ni vota o bibizatani.

⁷Melai Jisu ta eri kiolake, “Pui kaqariko ko! Ako koko erekako quli ta ko malezikou aṉako mutailo ko taku sole.

⁸Ako se ozaoza kamu ta ke elou me sase kiada keru, melai aṉata pui aba elou mekasi kiada keru,” kiolake.

⁹Ni matuma vaki ta ko viqake ta vo Jisu ta Betani peuru kale o evake kio, so sole seta ke olake sai, pui Jisu kale avo ko kiada melai ke velo vo Lazarasi, vo Jisu lula o saeviveni voukale azo kio kale.

¹⁰So sole se raura kama siama madu ta ke erekake kama nakanakati tu Lazarasi melai ke vouvaevo,

¹¹ako voko kio kale kubo Jiu amu ta ke vaemake se siama madu ni ke tuvevo puevake vo Jisu sole.

¹²Ni koko raneo kale inio koa matuma vaki koko kuevima Alokato ko Ṉojola kasi ta ke viqake Jisu ta obeta kueva Jerusalema kio sama bazu.

¹³So sole seta ke koake kama pamu ore ko dauko ni seta ke olake toraevole vo, ni ke vaelavelaoke ni eri kikelake, “Me ilusivo vo Baṉara, Baṉara ta mauru o ivou vo o kuevani voko ṉikale, vo Izireli ala Aikovakova!” kikelake.

¹⁴Ni Jisu ta o veake kala doqi ni vota o zazuake vo topi, omadeuvo ko Tabu ama Riki kikovevo jari,

¹⁵“Pui ṉalo Jerusalema peuru kalea mela! Keatini, mevo Lekasa ta obeta kueva, Obeta papua kala vairu ala doqi topi ni obeta kueva,” kikovema.

¹⁶Ni voko disaipeli poso ta pui ke paqumukake koa taku kale, melai koko tova, voko mata saevo keru voko ṉaṉaidara sate inio seta ke kerukeruekake ta koa Tabu ama Riki va kikovevo ikio koko ereima quli Jisu kasi kikelake.

¹⁷Ni sea maba poso seke eveni Jisu sase, so keru vo o nokaeve keru vo Lazarasi kea niami kale azo vo o saevive keru vo voukale azo, ta lula kekai bazutake koko ereima quli sai.

¹⁸Sokale avo inio koa matuma vaki ta ko toraevake vo, ako seta lula ke viqake ta vota lula o erekake koa aqasiele ama saevizato ko iruruputo sole.

¹⁹Nio se Parese madu ta eri kikelake ke ṉavio kude, “Kemoni, animeta puliama rora me rovea kelo, kiadama maba ta ke lulueva vo sole!” kikelake.

²⁰Ni kala poqala maba madu Quriki amu ta ke olake Jerusalema sai ke keveni Jiu amu sase ilusatole Ṉojola ko taku keru.

²¹Ni seta ke olake kala Jisu vo disaipeli Pilipi kasi, Betiseida ala Qalili rana, ni eri kikelake, “Tanala, eṉeta ṉeva zaria velo vo Jisu,” kikelake.

²²Nio Pilipi ta o olake ni opa bazuevake vo Aduru, nio nioqata qo olake, ni qopa bazuevake vo Jisu.

²³Nio Jisu ta o tiorizatake ni eri kiolake, “Erisaṉa ta kota baroa ko taku aṉa maba a eveni lala ko tu aṉata a qovo ko raura kama ṉaṉaidara.

²⁴Tuvevo avole aṉata a bazuemela me, vuiti ko sisu pui ko papailou miduku kale ni pui ko vouvou, ta omadeu pado sisu pala kobeta elou. Melai ko vouvou ta matu kubo sisu ko erekou.

²⁵Ako vo o roquekani o ṉaviko saevo ta vota o niumaeka inio voko saevo tovama saevo kale ama, melai vo o ṉamukani o ṉaviko saevo komia peuru ma peuru kale ama aṉako luluelo kale, ta o kovou noqola kama saevo.

²⁶Vo oka zariani la nabuluputo aṉa ta o luluelo aṉa, tu voa aṉavo nabulu ta o elou aṉa sase sai aṉa a eloa koi. Ni aṉavo Mama ta o rauraevou vo vo ola nabuluputo ala aṉa,” kiolake.

²⁷Ni Jisu ta mata eri kiolake, “Erisaṉa aṉata tumanioro ada eva ni aṉata niuniala ada eva. Noni kiavou esa? —‘Mama pakiela aṉa komia taku kale azo’ kiavou? Koe pui so kiavou, ako komi kio aqai kuevima, sole aṉata a zio komia tola sama taku kale.

²⁸Mama, ṉota ṉaṉaidara pueka ṉoko ṉi!” kiolake. Sai nio kama pado kora aukale azo ta ko kuevake, “Aṉata lula a ṉaṉaidara pueka ko, ni mata aṉata ṉaṉaidara a ikou ko,” kikolako.

²⁹Ni sea vaki se sai ke lojoani ta ke viqake koa kora, nio kake sea vaki ta au kalea paka ka kikelake, mata kake ta “Kala mateana inio o vati pesia vo!” kikelake.

³⁰Melai vo Jisu ta eri kiolake sekasi, “Koa kora ta pui ko kueva aṉa kaqe, melai kota ko kueva tu me kaqe.

³¹Erisaṉa ta komia peuru ma peuru ko titizato ko taku ni erisaṉa komia peuru ma peuru ko lekasa Setani ta o ṉamuilou.

³²Ni so keru aṉa ke zolaelou keru miduku kale azo inio aṉata a badoemou kiadamu a ṉavi kasi,” kiolake.

³³(Vota so kiolake tu kota kasa koma iko noni ama voukale inio vota o vouvou kio.)

³⁴Nio sea vaki ta ke vati tiorikake ni eri kikelake, “Eṉeta ṉe viqa eṉeko Bazu kale ta vo Baṉara o soroevani Pakio ta noqola elo ota elou kio. Ta loma ko kio kale inio ṉota vo maba o eveni ta ke zolaevou miduku kale azo kiṉola? Lala inio voa maba o eveni va kiṉolani?” kikelake.

³⁵Nio Jisu ta o opatake ni eri kiolake, “Zakaremu ta ko elou mekasi kama puju ama taku, so sole koa zakaremu palate, meta talimo zakaremu kale, tu ko ipu ta pui ko melai barolou me. Ako vo o taliani kutumana kale ta pui okai nianiia sai vo o ziovoa koi sole.

³⁶Ko zakaremu mekasi palate, meta tuvevo puekomo koa zakaremu, tu meta zakaremu ko maba mela me elou,” kiolake. Nio Jisu ko so kio ko tova inio vota ota olake edolokoi ni vota ota daipaivake sekasi azo.

³⁷Vota obe erekake kiadama koa aqasiele ama iruruputo poso seko vilu kasa melai seta pui ke tuvevo puevake vo,

³⁸tu vo poropita Aisea eri ka kiovema ta tuvevo ko elo, “Baṉara, lave inio lula ke tuvevo pueka koa bazubazu ko eṉe lula ṉeqai bazutako? Ni lave kasi nio vo Baṉara ta lula kasa o ika voko pizato?” kikolako.

³⁹So inio seta pui ke rovea tuvevo pueko, vo Aisea mata eri ma kiovevo,

⁴⁰“Baṉara ta ota ma leqa pueke seko vilu poso tu seta pui ke kelokelozatou, ni zokele ota ma ikake seko kerukeru, tu seta pui ke paqumatou, ni seta pui ke liliziovou ni ke kilou aṉa kasi tu aṉata a urikimou se, kiola vo Baṉara,” ka kiovema.

⁴¹Aisea ta so kiove, ako vota o keve vo Jisu ko ṉaṉaidara, ni so inio vota o kasevake.

⁴²Melai kubo se Jiu ama tanatanamu ta ke tuvevo pueve vo Jisu, melai seta pui kepa kai erierite ubutiana ako seta keta ma ṉake se Parese madu sole, tu pui ke tizaemou se zio ilusato ko pade kale.

⁴³Ako seta keka zariake maba ko rauraemo ni pui vo Baṉara ko rauraemo sole.

⁴⁴Ni vo Jisu ta mata o kuevake ni oma puratake sea vaki, ni vota o velavelaoke ni eri kiolake, “Vo tuvevo o ilani aṉa ta o tuvevo pueva vo aṉa o soroeleni voko tuvevo puelo kale aṉa.

⁴⁵Ni vo o leani aṉa ta o vea vo aṉa o soroeleni.

⁴⁶Aṉata a queva peuru ma peuru ko zakaremu jari, tu vo o tuvevo puelo ala aṉa ta pui opa elou kutumana kale.

⁴⁷Kala vo o viqani aṉako bazubazu melai vo pui o zorikani ko, ta pui aṉa inio aba titizivou vo. Ako aṉata pui aba kuevi tu titizimole se maba poso sole, melai pakiemole se.

⁴⁸Melai vo olai kaikuapani aṉa ni vo pui o viqani aṉako bazubazu ta koa bazubazu ikio ko titizivou vo. Ako koa bazubazu aṉa a qasekako ta ko titizivou vo tovama ṉaniu kale sole.

⁴⁹Ako tuvevo avole aṉata pui a bazubazuta a ṉaviko pizato kale, melai aṉavo Mama vo o soroeleni aṉa ta o bazuele tu aṉata a besio ni a qaseko ko.

⁵⁰Ni aṉata aqai nianiia ta koa Baṉara ko soru kale ko kaseivako ta noqola kama saevo sama. Ko quli aṉa aqai bazubazutake ta ko ikio aṉavo Mama lula olai bazuekako aṉa tu a qaseko,” kiolake.