Read Bilua Jone 13 Bible Online

Jone 13 - Bilua bible

Jone 13

¹Ni so keru ko Alokato ko Ṉojola lea kota barou kio keru, inio koa raisiraisi nio Jisu ta o papuake ni o vuatake voko disaipeli madu sase. Jisu ta lula okai nianiiake ta taku ta lula kota baroa tu vota o vaeko komia peuru ma peuru tu o vaito o Mama kasi aukale ama peuru kale. Koko tanitanila keru azo Jisu ta o roqueme voko pitasa maba madu seke eveni vo sase peuru ma peuru kale, ni erisaṉa vota kasa oma ikake voko roquano ko matu.

²Ni Jisu ni voko disaipeli poso ta kebeta papuake ni kebeta vuatake. Ni kala pado vovo disaipeli, Jiudasi va kikelani, Saimone Isikarioti vo meqora, vo Setani ta lula ota va niumaeka voko kerukeru tu vota o saiqorivo vo Jisu.

³Nio Jisu ta lula o paqumukake ta vovo Mama ta lula o kativa vo ko pizato tu o ereko kiadakiadama quli, ni vota o kuevi Baṉara kasi azo ni vota mata ota tova vaitou Baṉara kasi kio.

⁴So sole Jisu ta o lojoake sai se kebeta vuatakoi kazo ni vota o ivikake voko topia rosia sabosabo ni o koake ko taolo ni okai luitiziake.

⁵Ni koko tova inio vota o koake ko ju ni o raibikake kama pado ju ko teamuteamu ko poro kale, ni vota o taniekake tama pusaeko omaomadeu kale voko disaipeli madu ko kiti poso, nio koa taolo ko vo okai luitiziovima kale vota ota ma puqoekake seko kiti.

⁶Ni Jisu ta obeta olake tama pusaeko seko kiti. Ni so keru obe tava pusaeko kiola keru vo Saimone Pita ko kiti, nio Saimone Pita ta eri kiolake, “Kei, Lekasa, ṉota ṉoda la pusaekou nio aṉako kiti kio?” kiolake.

⁷Nio Jisu ta o vati tiorikake vo ni eri va kiolake vo, “Koe Pita, ṉota pui nio ṉo baqumuka aṉa ṉoko kiti taṉa pusaeko ko kalo, melai mainio ṉota ṉoba uria kelou ni ṉoba paqumukou koko kalo,” kiolake.

⁸Nio Pita ta o dokolivo kiolake sole mata matuvole eri kiolake vokasi, “Lekasa, ṉota maba pui ṉoba tala pusaekou aṉako omuqa kiti, vairutu ni tova, maba pui ti pui,” kiolake. Nio Jisu ta eri kiolake vokasi, “Tuvevo avole aṉata a bazueṉa ṉo, Pita, aṉata pui ada ṉa pusaekou ṉoko omuqa kiti tea, ṉota pui ṉoba roveovou aṉavo disaipeli elo,” kiolake.

⁹Nio so keru Saimone Pita o viqa keru koa pesio pado inio vota eri kiolake vokasi, “Koe, Lekasa, so ko kalou ta pui tala pusae aṉako kiti pala, melai ṉota tala pusae aṉako omuqa ṉase ni so jari a lezu!” kiolake.

¹⁰Nio Jisu ta eri kiolake vokasi, “Pui, vo maba vo lula o siusiutani ta lula uri ni bulebule ala, voko omuqa kiti pala keta va pusaekou, so inio erisaṉa aṉata ada mela pusaekou meko kiti pala. Ni mea kiada mela aṉako disaipeli poso mela ta lula uria elo ni bulebule meda eva, omadeu pado maba me azo ta pui inio bulebule o eva,” kiolake.

¹¹(Ako Jisu ta lula ovai nianiiake voa maba vo o saiqorivo ala vo, Sokale avo inio vota so kiolake, “Mea kiada mela ta lula bulebule muli, melai omadeu maba me azo ta pui inio bulebule o eva,” kiolake).

¹²Ni so keru vo Jisu o paike keru pusaeko seko kiti inio vota o kiakake mata voko sabosabo, ni vota mata ota papuake, ni eri ma kiolake, “Meta me baqumuka koko kio ni kalo ko quli aṉa a melai erekalama, kio?

¹³Meta Titisa ni Lekasa la kimela aṉa, ni kota tuvevo ko so me kimelani, ako so inio ko aṉa.

¹⁴Sole eri nio. Aṉa, mevo Lekasa ni Titisa lala ta a busaekala meko kiti, so sole me melai pusaekomo kala mati kala ko kiti.

¹⁵So inio aṉata a qatimelala me kama pado mamola tu meta me erekou muli omadeuvo aṉa a mela erekalama jari me.

¹⁶Aṉata a bazuemela me, puliala nabulu inio raura kala vovo lekasa kasi azo, ni puliala o soroivani bazu sate ta raura kala vo o soroevani kasi azo.

¹⁷Erisaṉa meta me baqumuka koa korokoroti ama kalo ko meme ereko ama, so sole meta me erekou koa kalo inio meta maurumaurua mela meda elou.

¹⁸“Aṉata pui mea kiada mela ta soa maurumaurua mela kiala, ako aṉata amai nianiia se sidopu amu aṉa lula a bitoemani sole. Melai ko Tabu ama Riki ko kasekema ta tuvevo ko elou ko eri, ‘Voa maba o kuani aṉako sailao aṉa sase ta o jaṉarilou aṉa voko mauta kale’.

¹⁹Aṉata a melai bazueka komi erisaṉa puliako ko ereilo, tu tova ko ereilou keru ko, ta meta tuvevo me ikou ko ‘Aṉa inio ko aṉa lala’ kio.

²⁰Tuvevo avole aṉata eri kiala mekasi, vo o baroekimani se aṉa a joroemani ta o baroekila aṉa, ni vo o baroekilani aṉa ta o baroekiva vo o soroeleni aṉa,” kiolake vo Jisu.

²¹Ni Jisu ta o paikake voko bazubazu ni vota upotuqu ota evake voko auvana kale, ni eri kiolake, “Aṉata a bazuemela me, kala me azo ta o saiqorilou aṉa,” kiolake.

²²Nio ke viqa keru ko se disaipeli madu ta keta toirikiniake ke ṉavio kude, matu niuniala kekai evake lala inio o kasevani kikelake sole.

²³Nio kala pado sea disaipeli madu azo, voa pado vo Jisu o matu roquevani, ta obeta papuake Jisu ko ketaketa.

²⁴Sole Saimone Pita ta o simoevake vo ni eri kiolake moizavole, “Kuimaeva vo lala inio vo o kasevani, kive,” kiolake.

²⁵So sole voa disaipeli ta Jisu ko matu sipole o vatutake ni vota o kuimaevake, “Lala inio vo vo, Lekasa?” kiolake.

²⁶Nio Jisu ta o tiorizatake, “Aṉata a balamukou ko bereti ni a jusekou, ni a qativo ala tu o kuo, vo inio voa maba.” So sole vota o ṉisurikake koa bereti ni o susekake ko ni o kativake vo Jiudasi, vo Saimone Isikarioti vo meqora.

²⁷Ni eria kovo obe evake vo Jiudasi koa bereti, inio vo Setani ta ovai amaqeake vo. Sai nio Jisu ta eri kiolake vo Jiudasi kasi, “Taukavole ereka ko ṉo ṉoqa zariako ereko!” kiolake.

²⁸Melai puliala kala pado koa tevolo kasi o evani ta o paqumukake koko kio ni kalo ko quli Jisu so ka kiovema quli vokasi.

²⁹Jiudasi ta seleni baeke o kati vailani, so sole sea disaipeli madu ta ke kerukerutake ta Jisu ta o soroeva vo tu vota opa tatabaraeko kama ṉojola ko quli esa, ma tu o katimo kama seleni se ozaoza kamu tauvemole esa, kikelake.

³⁰Nio Jiudasi ta o koake koa bereti ti omadeu saqoro inio obeta evake. So keru ta lula ipu.

³¹Ni lula vo Jiudasi o vaemake se saita inio Jisu ta kasavole eri kiolake, “Erisaṉa aṉa maba a eveni lala ko ṉaṉaidara ta ko puratou, ni vo Baṉara ko ṉaṉaidara ta piza kavole ko puratou aṉa kale kude.

³²Ni vo Baṉara ko ṉaṉaidara ta ko puratou aṉa kale kude, so sole vo Baṉara ta mata o puratikou nio aṉa maba a eveni lala ko ṉaṉaidara o ṉavi kale kude, ni vota o puratikou ko taukavole.

³³A matu roquemelani lolo poso mela, puliako tu keu aṉata a vaemelou me. Ni meta me vaililou aṉa, melai erisaṉa aṉata a melai bazuekou ko quli se Jiu ama tanatanamu lula amai bazuekema quli, ‘Meta pui meba roveovou zio sai aṉa a ziovoa koi.’

³⁴Vairu ama bazu aṉata a qatimela me, ko eri: meta roquekiniomo muli. Omadeuvo aṉa lula a roquemela me jari, meta matu roquekiniomo muli.

³⁵Meta me roquekiniou muli inio, kiadama maba poso ta kekai nianiiovou kokale ta meta aṉako disaipeli mela inio kio.”

³⁶Nio vo Saimone Pita ta eri kiolake vokasi, “Lai nio ṉoda ziovou, Lekasa?” kiolake. Nio vo Jisu ta eri va kiolake, “Ṉota pui ṉoba roveovou luluelo aṉa sai aṉa a ziovoa koi. Melai ṉota ṉo lulueloa laṉa inio aṉa tova,” kiolake.

³⁷Nio Pita ta eri kiolake, “Lekasa, noi sole inio aṉata pui aba lulueṉou ṉo erisaṉa? Ako aṉata a inainaovani lala inio tu aṉata aṉa vou ṉo sole,” kiolake.

³⁸Nio Jisu ta o vati tiorikake, ni eri kiolake, “Ṉota ṉo uria inainaova tu ṉota ṉola vouvou aṉa, kiṉola kio? Tuvevo avole aṉata a bazueṉa ṉo, maba komia ipu kale puliako kokorako zialo ṉota ṉoda zoliovou ni eri kiṉovou zouke taku, ‘Aṉata pui avai nianiia vo,’ kiṉovou,” kiolake.