Read Bilua Jone 15 Bible Online

Jone 15 - Bilua bible

Jone 15

¹Ni Jisu ta mata o mati pesiake voko disaipeli madu ni eri kiolake, “Aṉata tuvevo ama vaini siakona jaria lala ni aṉavo Mama ta vaini kiaro o kati vailani maba jari o kavani.

²Nio vota o kobueka ni o ṉamuka kiadama kata poso ko pui ko epamatako aṉa kasi azo, ni vota o puputika kiadama kata poso koko epamatako tu kota tova ko matu velokou.

³Ni vota lula o puputimele jari me koa bazubazu kale aṉa lula a qasekema mekasi.

⁴Ni meta emo aṉa tona nio aṉata a elou me tona. Ko kata ta pui ko rovea epamato ko kiada kale kude pui ko nasoiva koa qurepi ko siakona topi tea. Omadeuvo jari nio meta pui meba roveovou epamato pui me nasoilou aṉa tona tea.

⁵“Aṉata koa vaini siakona jaria lala ni meta koko kata poso jaria mela. Vo me azo o nasoilo ala aṉa tona, aṉata a elou vo tona, ni vota koa kata matu epamatoma jari o elou, ako meta pui me rovea ereko kama quli aṉa pide sole.

⁶Ni voa maba vo pui o evani aṉa tona ta o ṉamuiva omadeuvo koa kata ko pui ko epamatako jari ta ko ṉamuiva ni ko kajaova. Sai nio seta ke niaqueka soama kata poso ni ke risaeka uza kale ni ko siqaiva.

⁷Ni meta me elou aṉa tona ni aṉako bazubazu ta ko elou me tona, inio meta me basekou ko me meqa zariako quli ni meta me qovou inio ko.

⁸So inio aṉavo Mama ta o ṉaṉaidara puilou, meko matu epamato kale, ni so inio meta aṉako disaipeli mela me elou.

⁹Aṉata a roquemela me omadeuvo vo Mama aṉa o roquela jari, so sole meta emo aṉako roquano kale.

¹⁰Meta mebeta ziovou zoriko aṉako bazubazu, inio meta mebeta elou aṉako roquano kale, omadeuvo aṉata lula a zorika a Mama ko bazubazu, ni abeta eva voko roquano kale.

¹¹“Aṉata a melai bazueka komi quli tu aṉako zoleilo ta ko elo me tona, tu meko zoleilo ta ko okotou.

¹²Komi ta aṉako bazubazu, meta matu roquekiniomo muli, omadeuvo aṉata a matu roquemela me jari.

¹³Ako puliama roquano ta kota ka qulepa tu kala maba ta oma vou voko baerebaere poso.

¹⁴Ni meta me erekou kiadama aṉa a melai bazuekako quli inio meta aṉako baerebaere poso mela.

¹⁵Erisaṉa aṉata pui a qasemela meta nabulu poso mela, ako vo nabulu ta pui okai nianiia vovo lekasa o erekako quli sole. Melai meta aṉako baerebaere poso inio mela kiala, ni meta meqai nianiia ta kota tuvevo avo, ako aṉata lula a melai bazueka sole kiadama quli ko lula aṉa a viqako a Mama kasi.

¹⁶Meta pui meba pitoele aṉa melai aṉata lula a bitoemele me tu meta me ziovou tu meta me matu epamatou meko tauvemo kale edolomu, ko noqola ko elo ama epa kale. Sokale inio vo Mama ta o katimelou ko quli meme baseko ama vokasi aṉako ṉikale.

¹⁷So sole aṉata a bazuemela me, tu roquekiniomo muli.”

¹⁸“Se kutumana kamu ke melai kideipou keru me, ta meta memai nianiiovou ta seta kelai kideipe aṉa kuleto.

¹⁹Meta peuru ma peuru ko maba poso jaria mela tea, peuru ma peuru ko maba poso ta ke ṉavi jaria roquemelo inio ke elo. Melai aṉata lula a bitoemele me komia peuru ma peuru ko maba poso kale azo, ni meta pui koko mela, Sokale inio ko peuru ma peuru ko maba poso ta ke melai kideipa.

²⁰Kerukeruekomo ko lula aṉa a melai bazuekako tuvevo ama quli, ko eri kikolako, ‘Puliala nabulu inio raura kala vovo lekasa kasi azo,’ kikolako. Se lula ke niumaniumaelani aṉa ta me melai ke niumaniumaemelou, se lula ke zorikani aṉako nianiiekato ta seta ke zorikou mata meko.

²¹Seta ke melai erekou me koa kalo aṉa kale avo sole, ako seta pui kevai nianiia vo aṉa o soroeleni sole.

²²Ni aṉata pui aba kuevi bazubazuemole se tea, seta puliama sarueko samu inio. Melai erisaṉa ta lula a bazubazuema se ni seta pui kepa kamikou seko sarueko.

²³Tuvevo avole, vo olai kideipani aṉa ta mata ovai kideipa aṉavo Mama.

²⁴Aṉata pui aba ereke koa iruruputo sekasi ko puliala maba opa roveovima ereko tea, puliama ikio seko sarueko. Melai seta lula ke kea aṉa a erekako quli melai inio seta ke qelai kideipa aṉa ni a Mama.

²⁵Komi ta kota ereiva tu ko quli Mosese o katimema Bazu kale ko rikiziovima quli ta tuvevo ko elo, ko eri kikolako, ‘Seta kelai kideipa aṉa pulia quli ko kio kale avo,’ kikolako.

²⁶“Melai so keru voa Tauvezato o kilou keru, vo aṉa a joroevo ala mekasi vo Mama kasi azo, inio vota olai bazubazutou aṉa. Vo inio voa Tabu ala Auvana vo kasa o iko ala vo Baṉara ko tuveano.

²⁷Ni me melai so, meta melai bazubazutou aṉa, ako koko tanitanila keru azo meta me eve aṉa kasi sole.