Read Bilua Jone 2 Bible Online

Jone 2 - Bilua bible

Jone 2

¹Ni omuqa ṉaniu ko tova Jisu o vati pesiake vo Nataniala saita, ta ko ereike kama pado rorotato Kena peuru kale, Qalili rana. Ni Jisu ko niania ta ko keve sai rorotatole,

²ni Jisu ni voko disaipeli madu melai ke koake koa bau vuato ko taipazato sole se melai sai.

³Ni ko bau vuato kobeta ola keru nio ko vaini ko ju ta kota paitake, so sole Jisu ko niania ta eri kikolake vokasi, “Keatini, ko mati paita ko vaini ko ju,” kikolake.

⁴Nio Jisu ta o kati tiorikake, “Niania, ṉota pui lati sorueko kama quli tu a ereko, ako aṉako taku ta pui nio ko baroa sole,” kiolake.

⁵Nio Jisu ko niania ta ko bazuemake se nabulu poso, “Meta me erekou ko quli vo o melati sorueko ama quli,” kikolake.

⁶Se Jiu amu ko lotu ko kama bazu ta pusailo ikio, sole koko kio kale avo ta varimuja matu vaka ju ta kobeta papuake sai, ko omadeu ta karabete ma zouke toni qaloni ju ko teamukako.

⁷Nio Jisu ta eri kiolake sea nabulu poso kasi, “Kai sukatikomo ko ju koa vaka ju poso,” kiolake. Nio seta ke zorivake vo ni matu sukasukati ke ikake koa kiadama.

⁸Nio vota o soruemake se, ni eri kiolake, “Erisaṉa meta tiniekomo ko ju koa vaka ju poso kale azo, ni kati Olamo vo bau vuato ko lekasa kasi,” kiolake. Ni seta ke kati olake ko voa lekasa kasi,

⁹ni vota o madoekake koa ju, ta lula vaini ko ju kota evake. Vota pui okai nianiiake koa vaini ko ju ko kuevakoi kazo, melai voa nabulu vo o tiniekeni koa ju vaka jukale azo ta o paqumukake. So sole voa bau vuato ko lekasa ta o madoekake koa vaini ko ju ni ota ka lainikake koko saroro roquroqu nio vota o nokaevake vo vairua roroto ala maba

¹⁰nio eri kiolake vokasi, “Animeko kalo ta matu uri ama vaini ko ju ikio me buarikako kuleto maba poso kasi, ni ke paidaeka nozueko ko Saita inio me buarika ko pui matu uri ama vaini ko ju. Melai ṉota ṉo buarikala ko pui matu uri ama kuleto, ni erisaṉa pado inio ṉo buarika ko matu uri ama vaini ko ju!” kiolake.

¹¹Jisu ta o erekake koa kuleto ama voko aqasiele ama iruruputo Kena peuru kale sai Qalili, ni koa kalo kale vota uria kasa o ikake voko ṉaṉaidara, ni voko disaipeli poso ta ke tuvevo puevake vo.

¹²Ni koko tova inio Jisu ni voko niania ni voko visi poso ni voko disaipeli madu ta keta vaitake Keponeami, ni ke evake sai kama poso ṉaniu.

¹³Ni koa taku ta sipole se Jiu amu ko Alokato ko Ṉojola ko taku, so sole Jisu ta ota olake Jerusalema.

¹⁴Ni vo o baroa keru sai nio vota o meake kubo maba madu Jelepade ko taqo kale kekai tatabaraovani ko bulumakau, ni sipi, ni kurou, ni so jari se takula ke besiekani ke papuani seko tevolo poso kasi.

¹⁵Ni vota tutumazi avole o tubotuboekake kama qusini ni o sisiparuemake ni o butuemake sea kiadamu seko ariku kiti ama biaṉa poso sate Jelepade kale azo. Ni vota ota ma bekolikake ko tevolo poso se takula ke besitani ko, ni kota raibiziake seko takula poso,

¹⁶ni vota o bazuemake se kurou kekai tatabaraovani, ni eri ma kiolake, “Taukavo saqorikomo ko quli koi kazo! Pui tatabaraekomo ko pade tava iko a Mama ko pade!” kiolake.

¹⁷Nio voko disaipeli madu ta ke keake vo o erekako quli ni ke kerukeruekake ko Tabu ama Riki kikovevo kokale avo, ko eri kikovema, “Aṉako roqueko Baṉara ṉa ko pade ta vualavuala ko ila aṉa uza ko baina jari.”

¹⁸Nio se Jiu ama tanatanamu ta pui kekai zoleike koa iruruputo vo o erekako, ni kevai liliziake nio ke kuimaevake vo, “Nonia aqasiele ama iruruputo ikio ṉo erekou inio eṉeta ṉeqai nianiiovou vo Baṉara ko kai zoleilo ṉoko butuemo nia maba poso?” kikelake.

¹⁹Ni Jisu ta o mati tiorikake, “Meta me biresukou komia Baṉara ko Jelepade, nio zouke ṉaniu kale aṉata mata a lojoekou ko,” kiolake.

²⁰Nio se Jiu ama tanatanamu ke viqa keru ko, nio seta eri kikelake, “Koe, matu rosi ama taku kale ariku toni varimuja sabere inio ko erei nio ko paizai ko Jelepade, melai ṉota zouke ṉaniu kale ko kiada mata ṉo lojoekou ko kiṉola, kio?” kikelake.

²¹Melai Baṉara ko Jelepade ka kiovema vo Jisu koko kalo ta voko tupu ikio.

²²So sole vo o saeve keru voukale azo ko tova, inio voko disaipeli madu ta ke kerukeruekake komia vo o erekema pesio, nio seta ke tuvevo puekake ko Tabu ama Riki kikovevo ni Jisu kiovevo.

²³Ni vo o eve keru Jerusalema Alokato ko Ṉojola kale, inio kubo madu ta ke tuvevo puevake vo, so keru seke keve keru vo o erekema aqasiele ama iruruputo poso.

²⁴Melai o ṉavi Jisu ta pui okai keruake seko tuvevo puto, ako vota o uria paqumumake kiadama maba poso sole.

²⁵Puliala obe vai bazuemou se maba poso vo Jisu melai vota o uria paqumukake maba ko bulo kale ama kerukeru.