Read Bilua Jone 21 Bible Online

Jone 21 - Bilua bible

Jone 21

¹Ni kama taku ko tova vasi inio Jisu ta mata o puratake sikeura voko disaipeli madu kasi Qalili toupa kasi, kama pado ṉi ta Taibiriasi sama. Eri nio ko kaevo.

²Saimone Pita, ni Tomasi “Modi” o ṉi sala, ni Nataniala Kena peuru kale ala Qalili rana, ni Zebeti ko omuqa lasive meqora kidi, ni mata kama omuqa Jisu ko disaipeli kidi ta ke padoivake omadeukoi.

³Nio Saimone Pita ta eri kiolake sekasi, “Aṉata ada zio sabaole,” kiolake. Ni seta, “Uri. Eṉe melai ṉe lulueṉou,” kikelake. So sole seta ke olake nio ke zazuake koaka topi ni ke tadaoke, melai koa ipu ta puliama kama pado niuniu ke koake.

⁴Ni lekito se kebeta sabaova keru inio Jisu ta o puratake ni obeta lojoake keta kale. Melai se disaipeli madu ta pui ke nianiievake vo inio vo Jisu kio.

⁵Nio Jisu ta eri kiolake sekasi, “Meva, puliama niuniu me qoa kio?” kiolake. “Puliama,” kikelake.

⁶Nio vota eri ma kiolake, “Risaekomo ko saru koaka ko palo rana vasia rana, ni meta me qovou kama niuniu,” kiolake. So sole seta ke risaekake ko saru koa koaka ko palo rana vasia rana, nio seta pui kekai roveake koivieko ko saru, ako matu kubo niuniu kokai sukatake sole.

⁷Nio voa disaipeli Jisu o matu roqueveni ta eri kiolake Pita kasi, “Lekasa inio vo!” kiolake. Nio so keru Pita o viqa keru koa pesio, vo inio vo Lekasa kio sama, vota taukavole okai luitiziake voko topia sabosabo (vota lula o ivikake sole) ni ota jouparake toupa kale tu o baro taukavole Jisu kasi.

⁸Ni kake sea disaipeli madu ta ke vikuake koaka kale keta kale, ni ke rajaekake ko saru sukasukati ama niuniu sama. Ako so keru ta seta pui vaṉa keta kale azo, omadeu paizana vakerana tinia vaṉa.

⁹Ni so keru ke kaila keru keta kale seta ke keake ko maripu niuniu nabulo sama, ni kama bereti.

¹⁰Ni Jisu ta eri kiolake sekasi, “Kati kuemo kama niuniu ko me vairua kovo me evako,” kiolake.

¹¹So sole Saimone Pita ta o olake ni o zazuake koaka topi, ni ota ka koake ko saru ko paka ni o koiviekake keta kale. Matumatuma niuniu poso sukasukati sama, omadeu paizana sike toni zouke. Kota matu kubo, melai saru ta pui ko rotiziake.

¹²Ni Jisu ta eri kiolake sekasi, “Kuemo tu pa keazaitomo.” Ni sea disaipeli poso ta keta paṉaoke tu kuimaevo vo, “Lala ṉa inio ṉo?” kio, ako seta ke paqumuvake ta vota vo Lekasa sole.

¹³Ni Jisu ta o kuevake, ni vota o koake ko bereti ni vota oma puarikake ko so jari mata ko niuniu.

¹⁴Komi ta zouke ama taku Jisu kasa o eve keru voko disaipeli madu kasi voko voukale azo ama saevo ko tova.

¹⁵Ni seko vikalea keazaito ko tova inio Jisu ta eri kiolake Saimone Pita kasi, “Saimone, vo Jone vo meqora ṉa, ṉota ṉo qulepa roquelo aṉa komi quli kale azo, kio?” kiolake. Ni vo Pita ta o opatake ni eri kiolake, “Tuvevo, Lekasa, ṉota ṉoqai nianiia aṉata a roqueṉa ṉo,” kiolake. Sai nio Jisu ta o bazuevake vo, “Ṉota niaeka aṉako sipi meqora poso,” va kiolake.

¹⁶Mata omuqama taku kale inio vo Jisu ta so kiolake vokasi, “Saimone, Jone vo meqora ṉa, ṉota ṉo maba roquela aṉa, kio?” kiolake. Ni vota o tiorizatake, “Tuvevo, Lekasa, ṉota ṉoqai nianiia aṉata a roqueṉa ṉo,” kiolake. Nio Jisu ta eri kiolake vokasi, “Kati vaile aṉako sipi poso,” kiolake.

¹⁷Ni zouke ama pado taku kale Jisu ta so kiolake vokasi, “Saimone, Jone vo meqora ṉa, ṉota ṉo roquela aṉa kio?” kiolake. Sai nio Pita ta duki ota evake ako Jisu ta ovai kuimaekake ko zouke taku “Ṉota ṉo roquela aṉa, kio?” sole, sole vota eri kiolake, “Lekasa, ṉota ṉoqai nianiia kiadama quli, ni ṉota ṉoqai nianiia aṉako tuvevoa roqueṉo ṉo kio!” kiolake. Ni Jisu ta eri va kiolake vo, “Ṉota niaeka aṉako sipi poso.

¹⁸Tuvevo avole aṉata a bazueṉa ṉo, so keru ṉo vairua laṉa keru ṉota ṉo qiake ṉo ṉavi ṉoko sabosabo ni ṉota ṉo lipilipite ni ṉo qeve sai ṉo ṉoqa zariovikoi zio, melai so keru ṉoṉo qolekou keru ṉota ṉo dotozikou ṉoko ṉase ni edolola maba ta o saboeṉou ṉo ni o odieṉou ṉo ni o ṉati ziovou sai ṉo pui ṉoqa zariovoa koi zio,” kiolake.

¹⁹Jisu vo vai bazueko kale ko ta noni ama voukale inio Pita ta ṉaṉaidara o ivo avo vo Baṉara. Nio sai kazo Jisu ta eri kiolake vokasi, “Luluela aṉa!” kiolake.

²⁰Nio nioqa Jisu ni Pita qopeta ola keru inio Pita ta o liliziake ni o veake voa disaipeli, vo Jisu o matu roqueveni, vo o zukaideni Jisu ko sipole vuato keru ni eri kioveni, “Lekasa, lala inio ṉo o saiqoriṉo ala?” kioveni, ni vo inio mata o luluekani nioqa.

²¹Ni so keru Pita o vea keru vo inio vota eri kiolake Jisu kasi, “Lekasa, nea maba ta noi nio o kalo avo?” kiolake.

²²Nio Jisu ta eri kiolake vokasi, “Aṉata ava zariovou vo tu obeta elou ti kobeta barolou aṉako vaito keru tea, kota pui ṉoko tu ṉota ṉoqai nianiio. Ṉota luluela aṉa kio!” kio.

²³So sole Jisu ko so kio kale avo, bazu ta ko aerake ta voa disaipeli ta pui opa vouvou kio sama, seke luluevani vo Jisu kasi. Melai Jisu ta pui opa kaseke ko vota pui opa vouvou kio. Eri pala inio kiolake, “Aṉata ava zariovou vo tu obeta elou ti kobeta barolou aṉako vaito keru tea, kota pui ṉoko tu ṉota ṉoqai nianiio,” kiolake.

²⁴Vo inio voa disaipeli vo o kasekeni ni o rikiekeni komi quli poso, ni animeta me baqumuka ta vo kiovevo ta tuvevo avo.

²⁵Ni matu kubo quli ta mata ikoana vo Jisu o erekema quli. Koa kiadama ko paziziovou rikizio tea, esa peuru ma peuru ta pui kopa malezou koko rikiziovo ama quli kale.