Read Bilua Jone 3 Bible Online

Jone 3 - Bilua bible

Jone 3

¹Ni kala maba ta obeta evake o ṉi ta Nikodimasi, ni vota kala pado se Jiu amu vo vilua pikopiko, ni kala pado se Parese madu kale ala.

²Ni vota o kuevake Jisu kasi ipu kale nio eri kiolake vokasi, “Eṉeta ṉeṉai nianiia, ṉota kala pado Titisa ṉa ṉo joroini ṉa Baṉara kasi azo. Ako ṉota pui ṉoba roveovou ereko ko aqasiele ama iruruputo ṉoṉo erekako, puliama Baṉara ko pizato salaṉa tea,” kiolake.

³Nio Jisu ta o vati tiorikake vo, “Tuvevo avole aṉata a bazueṉa ṉo, puliala maba ta opa roveovou kelo vo Baṉara ko lekasa puo puliako vo mata tova alilo,” kiolake.

⁴Nio Nikodimasi ta o vati tiorikake vo, “Sole noni o kalou nio vo qole ala maba ta mata o tova alilou? Tuvevo avole vota pui opa roveovou mata amaqeo voko niania ko siapa kale ni vota o alilou omuqama taku kale!” kiolake.

⁵Nio Jisu ta o vati tiorikake vo, “Tuvevo avole aṉata a bazueṉa ṉo, puliala kala pado maba ta opa roveovou kai amaqeo vo Baṉara ko lekasa puo vo pui nio o alilani ju ni Baṉara vo Auvana kale.

⁶Ako tupu kale ama alilo ta tupu ko pala, melai vo Baṉara vo Auvana kale ama alilo ta Auvana ko.

⁷Ṉota pui aqasiele kai elo ko aṉako eri ṉa kio ṉo ‘Ṉota mata tova alile’ ṉa kio.

⁸Kerukerueka ko ururu ko kavani. Ako kota ko puzeta ni ko ola sai ko koka zariakoi zio, ni ṉota ṉoda ka viqa koko qurumo, melai ṉota pui ṉoqai nianiia sai koko kuevakoi kazo ni koko olakoi vasi. Ni omadeuvo so jari nio sea kiadamu seke alilani vo Baṉara ko Auvana kale,” kiolake vo Jisu.

⁹Nio vo Nikodimasi ta o vati tiorikake vo, “Noni kale kude inio kota ko ereilou?” kiolake.

¹⁰Nio Jisu ta o vati tiorikake vo, “Ṉota kala pado se Izireli amu vo matula titisa ṉa melai ṉota pui ṉo vakakuka komi quli, kio?

¹¹Aṉata tuvevo avole a bazueṉa ṉo, eṉeta ṉe qaseka ko quli eṉe lula ṉeqai nianiiako, ni ṉeqai pesia ko quli eṉe lula ṉe qeako, melai meta pui tuvevo me ika eṉeko bazubazu.

¹²Meta pui tuvevo me ika so keru aṉa a melai bazueka keru komia peuru ma peuru kale ama quli, nio noni kale inio tuvevo me ikou so keru aṉa a melai bazuekou keru ko aukale ama quli?

¹³Ako puliala me azo ta opa koivi aukale, melai aṉa maba a eveni lala inio a jaqoreni aukale azo.

¹⁴“Ni omadeuvo lulavo vo Mosese ta o zolaeke o ṉavi o erekema lipalipa dole kotoku topi lealea kama zaekale, se maba madu ke kevema ni ko saevimema, so jaria zolailo inio a elou aṉa maba a eveni lala,

¹⁵ni sea kiadamu ke tuvevo puelo amu aṉa ta ke kovou ko noqola kama saevo.

¹⁶Ako vo Baṉara ta o matu roqueme se peuru ma peuru kale amu, so sole vota o soroelake aṉa vovo pado Meqora lala, tu se kelai keruvo amu aṉa ta pui kepa noqola tolailou heli kale, melai seta ke kovou ko noqola kama saevo.

¹⁷Vo Baṉara ta pui opa soroele aṉa vovo Meqora lala komia peuru ma peuru kale amu kasi tu a ditizimo se, melai vota o soroele aṉa tu seta ke pakiovou aṉa kale kude.

¹⁸“Vo o tuvevo puelani aṉa Baṉara vo Meqora lala ta pui opa koqotaevou vo Baṉara. Melai vo pui o tuvevo putani ta lula titititiziala, ako vota pui o tuvevo puela aṉa Baṉara vo pado Meqora lala sole.

¹⁹Nio eri nio koa titizato: vo zakaremu ta o kuevi komia peuru ma peuru kale, melai se maba madu ta ke matu roqueke ko kutumana voko zakaremu kasi azo, ako seta boutare samu sole.

²⁰Ako kiadama maba poso se boutare ke erekani ta kevai kideipa voa zakaremu ni seta pui kepa kilou voa zakaremu kasi, ako seta pui kasa ke ika seko ruqe ama kalo poso sole.

²¹Melai seke erekani ko uri ama iruruputo ta ke kueva voa zakaremu kasi ni voa zakaremu ta uria kasa ota ma ika seko zorivo vo Baṉara,” kiolake vo Jisu.

²²Ni koko tova inio Jisu ni voko disaipeli madu ta ke olake Jiudia rana. Ni vota o evake kama poso taku sai se sate ni o bapitaiso putake sai.

²³Ni Jone melai o bapitaiso putake Ainoni peuru kale pui vaṉa Selema peuru kale azo ako sai ta kubo ju sakoi sole, sai nio se maba madu ta kevai kuevake vo ni vota bapitaiso o imake se.

²⁴Ako so keru ta pui nio ke noqoeva ni ke vaeva pirito pade kale vo Jone sole.

²⁵Nio vo Jone ko disaipeli madu ta ke vati zolizoliekiniake kala pado Jiu ala maba seko lotu kale ama pusailo ko kio kale avo.

²⁶Ni seta ke olake Jone kasi ni eri kikelake, “Titisa, ṉota ṉobe kerukerueva voa maba vo ṉo sase o evani Jodani sukuru koa pake, vo ṉoṉo qaseveni, kio? Vota ota bapitaiso puta, ni kiadama maba madu ta kevai ola vo sai!” kikelake.

²⁷Nio Jone ta eri kiolake sekasi, “Kota uri. Vo maba ta o rovea kovo ni ereko vo Baṉara o kativake quli pala.

²⁸Meta me viqe aṉa kiavevo, ‘Aṉata pui vo Baṉara o soroevani Pakio lala’ pa kiave, ‘melai aṉa inio a joroini lala kuleto vo puliako kilo,’ inio kiavevo!

²⁹Ako eri nio sole: vo lasive rusu vo o raekani ko sinaqu rusu inio koa reko vo tanala, ni voa vairua roroto ala maba vo baerebaere ta o lojoake ni o didievake vo tu ota va viqo voko kilo, ni vota ota zoleike so keru vo o viqa keru voa vairua roroto ala maba ko kora. So jari nio aṉa kasi ni ko ikio aṉa ko zolelako.

³⁰Vota raura o elou, melai aṉata zara a elou,” kiolake.

³¹Vo o kuevini aukale azo ta raura kala kiadakiadamu azo; melai vo miduku kale ala ta miduku vo pala inio, ni vota o kaseka miduku ko quli pala. Melai vo o kuevini aukale azo ta raura kala kiadama maba poso azo.

³²Vota okai bazubazute vo Baṉara ko aqasiele ama quli vo o kevema ni o viqema, melai puliala maba ta ota va tuvevo puekake voko bazubazu.

³³Melai kala ta o tuvevo puekou voko bazubazu inio vota o patapataevou vo Baṉara ta tuvevo ala inio.

³⁴Vo Baṉara ta o soroeve vo ni vota okai bazubazute vo Baṉara ko bazubazu, ako vo Baṉara ta ovai avozike vo vovo pado ala Tabu ala Auvana sole.

³⁵Vovo Mama ta o roqueva vo Meqora ni vota o kativa ko pizato tu o ereko kiadakiadama quli.

³⁶Vo tuvevo o ivani vo Meqora ta noqola kama saevo sala, melai vo pui o zorivani vo Meqora ta pui opa kovou ko saevo, melai vo Baṉara ko korakorailo ta noqola ko elou vo tona kiada keru.