Read Bilua Jone 4 Bible Online

Jone 4 - Bilua bible

Jone 4

¹Ni se Parese madu ta ke viqake vo Jisu ko movo ni bapitaiso puemo kubo disaipeli madu se Jone ko madu azo.

²Melai o ṉavi Jisu ta puliala opa bapitaiso pueve, melai voko disaipeli poso inio ke bapitaiso pute.

³Nio Jisu o viqe keru soama bazu inio vota o vaekake ko Jiudia rana ni ota vaitake Qalili rana.

⁴Nio voko vaito kale sai, vota o olake Sameria kude.

⁵Ni vota o baroake kama pado Sameriama peuru kale, sai Saika ka kikelakoi, pui vaṉa vo Jekopi lulavo o kativema zae vovo meqora Josepa kasi azo,

⁶sai vo Jekopi ko soqili ju ko evakoi. Ni Jisu ta ota jairokake talio, so sole vota ota papuake ni ota mamazake koa soqili ju ko ketaketa. Ni koa taku kale ta ṉadale ama taku ikio.

⁷Ni kama pado Sameriama rekoreko ta ko kuevake ju tobetole, nio Jisu ta eri kiolake kokasi, “Ju aqa zaria,” kiolake.

⁸So keru ta voko disaipeli madu ta lula keta keve peuru kale sailao tatabaraole.

⁹Nio koa rekoreko ta ko vati tiorikake vo, “Koe ṉoela, ṉota kala Jiu ala ṉa, melai aṉata kama pado Sameriama rekoreko lala—noni ko roveo nio ṉota ṉolai paseka aṉa ko ju?” kikolake. So kai kikovevo ta se Jiu amu ni se Sameriamu ta pui ke lolopareani sole.

¹⁰Nio Jisu ta o kati tiorikake, “Ṉota ṉoqai nianiia vo Baṉara oka zariako katiṉo ni ṉota ṉo nianiiela aṉa ju aṉai pasekani lala tea, ṉota ṉolai paseko inio aṉa, ni aṉata a qatiṉo inio ko saevo ko ju,” kiolake.

¹¹Nio koa rekoreko ta eri kikolake, “Koe, tanala, ṉota puliama tobeto ko lomaloma salaṉa tu ṉota ṉo dobekou ko ju, ako soqili ju ta matu saqoroma sole. Ni lai kazo inio ṉo qovou koa saevo ko ju ṉoṉo qasekako?

¹²Eṉevo taite Jekopi ta lulavo o katiṉele eṉe Sameriamu ṉela komia soqili ju, ni vo ni voko meqora poso ni kiadama voko rovaṉa poso ta ke koe ko ju kokale azo, ni eṉe melai ṉebe nozueka vairutu. Ṉota ṉo qaseka ta ṉo inio raura kala ṉa Jekopi azo, kio?” kikolake.

¹³Nio Jisu ta o kati tiorikake ko, “Vo o nozuekani komia soqili ju ta mata kabare ota elou,

¹⁴melai vo o nozueko ala koa ju ko aṉa a qativo ama vo ta ko koilou vuolovuolo jari vo tona kiada keru ni ko kativou ko noqola kama saevo,” kiolake.

¹⁵Ni kota va viqa keru voko so kio inio koa rekoreko ta ko vati tiorikake vo ni eri kikolake, “Tanala, katila koa ju! Nio aṉa pui mata kabare a elou, ni pui mata a jairokou kilo koi ju tobetole,” kikolake.

¹⁶Nio Jisu ta o bazuekake koa rekoreko, “Ola tu pa odieva ṉovo lasive ni ṉo vati kilou koi,” kiolake.

¹⁷“Aṉata lasive pidea lala inio,” kikolake koa rekoreko. Nio Jisu ta o kati tiorikake ko, “Zio, ṉo kiṉolani ta tuvevo ṉota puliala lasive salaṉa.

¹⁸Melai ṉota lula ṉo raema sike lasive madu, ni voa maba ṉoṉo voani erisaṉa ta pui ṉovo maba lasive inio. So ṉo kiṉolani aṉa kasi ta tuvevo,” kiolake.

¹⁹“Tanala, vairutu pado inio aṉata a baqumuṉa ta ṉota kala poropita ṉa,” kikolake koa rekoreko.

²⁰“Eṉe Sameriamu ṉela ko taite poso ta ke ilusive vo Baṉara komia sopu kale, melai me Jiu amu mela ta Jerusalema ikio koa zae sai anime me ilusivoa koi vo Baṉara kimelani,” kikolake.

²¹Nio Jisu ta o kati tiorikake ko, “Ṉoiza, ṉota tuvevo ila aṉa, ko taku ta kobeta kueva so keru se maba madu ta pui kepa ilusivou vo Mama komia sopu kale ni so jari Jerusalema.

²²Me Sameria mela ta pui me uria vai nianiia vo meme ilusivani; melai eṉe Jiu amu ṉela ta ṉe uria vai nianiia vo eṉe ṉe ilusivani, ako pakiezato ta se Jiu amu kale kude inio ko kueva sole.

²³Melai ko taku ta kobeta kueva, ni kota lula kota barola, se tuvetuve ama ilusato ko maba poso ta ke ilusivou vo Mama seko auvana kale ni tuveano kale. Se inio sea ilusato ko maba poso vo Mama oma zariani tu ke ilusivo vo.

²⁴Vo Baṉara ta Auvana tisoiko, ni seke ilusivo amu vo ta ke ilusivou auvana kale ni tuveano kale,” kiolake.

²⁵Ni koa rekoreko ta eri kikolake vokasi, “Aṉata avai nianiia vo Baṉara o soroevo ala Pakio ta ota kilou. So keru vo o kilou keru vota kasa o ikou kiadama quli anime kasi,” kikolake.

²⁶Nio Jisu ta o kati tiorikake ko, “Aṉa inio voa Pakio lala, abe ṉati pesiani lala,” kiolake.

²⁷Nio so keru pado inio Jisu ko disaipeli poso ta ke vaitake, ni seta matu aqasiele kekai evake voko kati pesio Sameriama rekoreko. Melai puliala se azo ta o kuṉubake tu kuimaeko koa reko, “Loma ikio ṉo ṉoqa zariako?” ka kio, ma kuimaevo vo Jisu, “Noi sole inio ṉota ṉo qati pesia koa reko?” va kio.

²⁸Nio koa rekoreko ta ko vaekake ko vaka ju, ni ko vaitake peuru kale, ni ko bazuemake sai ke evani maba poso,

²⁹“Kuemo tu pa vemo voa maba vo olai bazuekalani kiadama quli ko aṉa lula a erekema quli! Vo inio vo Baṉara o soroevani Pakio esa?” kikolake.

³⁰So sole seta ke vaekake ko peuru ni ke olake Jisu kasi.

³¹So maqa inio se disaipeli madu ta kevai titiake vo Jisu, “Titisa, keazate ko sailao!” kikelake.

³²Melai vota o mati tiorikake, “Aṉata lula ada keazatala koa sailao ko me pui meqai nianiiako,” kiolake.

³³So sole se disaipeli madu ta ke taniekake kuimakuimaekinio ke ṉavio kude, “Noi nio, lula kake kepa niaevala esa?” kikelake.

³⁴Nio Jisu ta eri kiolake sekasi, “Aṉako sailao ta zoriko vo aṉa o soroeleni ko vatolo, tu aṉata a okotiko ereko koa koidi vo o katilema aṉa.

³⁵Meta kama bazubazu samela, ‘Ariku kaboso ikoana ti kajoro ko taku ikio,’ melai aṉata a bazuemela me, ta pui so! Meta uria kemo ko kiaro poso; ko papapapa poso ko epa ta lula kota muqarala tu ko padoilou!

³⁶Voa maba vo o kajorikani ko epa ta lula o tabaria, ni koa epa vo o kajorikake ta maba poso inio, se kekai barolo amu ko noqola kama saevo. So sole vo papato ko maba ni vo kajoro ko maba ta omadeu zoleilo qo elou.

³⁷Sole koa bazubazu kikolani ta tuvevo avo ikio, ‘Kala maba ta o papatani, ni edolola maba inio o kajorani,’ kikolako.

³⁸Aṉata a joroemele me kajorikole jari ko papapapa ko epa kiaro kale, sai me pui meba iruruputekoi, melai kake edolomu ke iruruputekoi, ni meta me badoeke seko iruruputo kale ama epa,” kiolake vo Jisu.

³⁹Ni matu kubo Sameriama maba madu koa peuru kale amu ta tuvevo ke ivake vo Jisu, koa rekoreko kokai bazutema kale, eri ka kikovema, “Vota olai bazuekala kiadama quli aṉa a erekema quli,” kio.

⁴⁰So sole se Sameriamu kevai kuevi keru vo, seta ke pasevake vo tu vota o elo sekasi, nio vota o evake sai omuqa ṉaniu.

⁴¹Ni matu kubo madu ta ke tuvevo putake voko puariko kale voko bazu,

⁴²nio sai nio seta ke bazuekake koa rekoreko, “Pui ṉoko vai bazuto kale inio eṉeta ṉe duvevo puta, melai ṉe ṉavi eṉeta ṉeda va viqa vo, so sole eṉeta ṉevai nianiia ta vo tivoine vo peuru ma peuru vo Pakio,” kikelake.

⁴³Ni voko omuqa ṉaniu ko elo ko tova inio vo ni voko disaipeli madu ta keta olake Qalili rana.

⁴⁴Ako Jisu ta lula eri kiove o ṉavi, “Vo poropita ta pui ke rovea tava paṉao o ṉaviko ṉisa peuru kale amu,” kiolake.

⁴⁵Ni so keru o baroa keru Qalili voko disaipeli madu sase, inio saizama maba poso ta ke baroekivake vo zolezole amu, ako seta kebe vairua ola tisoiko Alokato ko kerukerueko ko Ṉojola kale Jerusalema, ni seta lula ke keake sai kiadakiadama aqasiele ama iruruputo vo o erekema koa Ṉojola ko taku kale.

⁴⁶Ni Jisu ta o vaitake mata Kena peuru kale Qalili rana, sai vo lula ju o pepelikekoi ni vaini ko ju o ikekoi. Ni kala matula maba vo o iruruputani qavuna kale ta inevoana sai, ota va verepani vovo lasive meqora Keponeami peuru kale.

⁴⁷Ni so keru voa matula maba o viqa keru Jisu ko barolo Jiudia azo Qalili, vota o olake vokasi tu o pasevo vo tu o zio Keponeami peuru kale urikivole vovo meqora, vo lula vou ko ededeu kale ala.

⁴⁸Nio Jisu ta eri kiolake vokasi, “Puliala me azo ta opa tuvevo putou puliako me kelo ko aqasiele ama iruruputo,” kiolake.

⁴⁹Nio voa matula maba ta eri kiolake, “Tanala, luluela aṉa puliako aṉavo meqora vou,” kiolake.

⁵⁰Nio Jisu ta eri kiolake vokasi, “Ṉota ola, ṉovo meqora ta ota urika!” kiolake. Nio voa matula maba ta o tuvevo puekake vo Jisu kiovevo, nio vota o olake.

⁵¹Ni voko vaito keru peuru kale vota o toraemake voko nabulu poso eri ama bazu samu, “Ṉovo meqora ta lula ota urikala,” kikolako.

⁵²Nio vota o kuimaemake se loma taku kale inio vovo meqora o urikalani, ni seta eri kikelake, “Omadeu koloko kale ravi ṉadale inio ko vaevala ko vere,” kikelake.

⁵³Nio vovo mama ta o kerukeruekake koa taku kale pado inio Jisu ovai bazueke keru vo ko, “Ṉovo meqora ta ota urika,” kio. Nio vo ni kiadama voko saidi ta ke tuvevo puevake vo Jisu.

⁵⁴Ko ikio koa omuqama aqasiele ama iruruputo vo Jisu o erekema Jiudia ranʼazo o kuevi keru Qalili rana.