Read Bilua Jone 6 Bible Online

Jone 6 - Bilua bible

Jone 6

¹Ni koko tova inio Jisu ni voko disaipeli madu ta ke pakekake ko Qalili toupa vaka kale ko Taibiriasi kekai nokaekema.

²Ni matuma vaki ta ko luluevake vo, ako seta lula ke keve voko aqasiele ama iruruputo se vere amu ko urikimo sole.

³Nio Jisu ta o saqorake vaka topi azo ni o peatake kama pado sopu kale ni o papuake sai voko disaipeli madu sate.

⁴Ni koa taku ta Alokato ko Ṉojola ko taku se Jiu amu ko ta sipole kota evake.

⁵Ni o lilililitake vo Jisu nio o keake matuma vaki kebeta kuevake vokasi, nio Jisu ta eri kiolake Pilipi kasi, “Lai nio animeta me databaraekou ko sailao nia maba poso kekai malezo ama tu animeta me niaemou se?” kiolake.

⁶Jisu ta so kiolake tu vota o madoevo vo Pilipi, noi nio vo kiovo avo, ako vota lula obe kai nianiiake o ṉavi o ereko ama quli sole.

⁷Nio Pilipi ta o vati tiorikake vo, “Koe, varimuja kaboso ko tabara kale ko tatabarailo ama bereti melai pui kepa kai malezou nia vaki!” kiolake.

⁸Ni mata kala vovo disaipeli, vo Aduru, vo Saimone Pita vo visi ta eri va kiolake vo Jisu,

⁹“Nei ta kala lasive rusu, vo sike silo ama bereti ni omuqa niuniu sala. Melai noni ko kalou nio komia sailao ta ko malezimou nia vaki?” kiolake.

¹⁰Nio Jisu ta o bazuemake voko disaipeli madu tu ke papuemo sea vaki. Sai ta matu kubo seulele sakoi, uri ama mamazo ko zae sakoi. So sole sea matuma vaki ta ke papuake sai, ni seta sike vuro maba madu, rekoreko ni silo amu melai kubo madu melai seta pui kepa ataeme.

¹¹Sai nio Jisu ta opa koake koa bereti ni o kati petaoke Baṉara kasi, ni vota oma puarikake sea maba poso sai ke papuani. Ni koa omadeuvo jari oma ikake koa omuqa niuniu. Ni sea kiadamu ta kekai atapake.

¹²Ni so keru sea kiadamu ke atape keru inio Jisu ta eri kiolake voko disaipeli madu kasi, “Niaquekomo koa sailao koko palakiako ni koko nieuvako, animeta pui me niumaeko,” kiolake.

¹³So sole seta ke niaquekake koa kiadama, ni ko sukatikake toni omuqa suakao koa sike kena bereti ni omuqa niuniu sea maba madu ke kiema koko nieuvako sailao.

¹⁴Sai ke evani maba poso ta ke keake koa aqasiele ama iruruputo vo Jisu o erekako, nio eri kikelake, “Matu tuvevo, nei nio voa Poropita vo o kaseini tu o kilo peuru ma peuru kale!” kikelake.

¹⁵Melai Jisu ta omai mamurake ta seta keka zaria tu ke noqoevo, se vai zuruzurueko kale tu aikovakova ke ivo, so sole vota o vaemake se ni mata ota peatake sopu poso kale vasi o kiada pado.

¹⁶Ni raisiraisi kota evake, nio voko disaipeli madu ta keta saqorake toupa kasi,

¹⁷ni keta zazuake koaka topi ni keta tadaoke ni ke pakekake koa toupa ni keta olake Keponeami. Ni kota ipukake, melai Jisu ta pui nio o vaitake sekasi.

¹⁸Ni koa taku inio matuma ururu ta kota buiritake ni ko qiloqiloekake koa toupa.

¹⁹Ni se disaipeli madu ta lula ke qelutake zouke ma ariku maelo tinia vaṉa ni toupa ko kolo tiania keta baroake pado inio ke veake vo Jisu obeta taliake toupa ko ju topi, obeta olake koaka ko sipole, ni seta keta matu ṉake.

²⁰Nio Jisu ta eri kiolake matuma kora kale, “Meta pui ṉalo; aṉata Jisu lala inio,” kiolake.

²¹Nio seta keva zariake tu ke zazuevo vo koaka topi, ni koa koaka ta taukavole kota varerikake koa pake sai seke kevekoi.

²²Ni koko raneo kale inio sea matuma vaki toupa kama pake kebeta evani ta ke nianiievake ta voa koaka ta vo tisoikoni sai kazo o vaekaziovini kio. Seta ke veveni lula voa koaka, nio seta ke paqumukake ta Jisu ta pui opa zazula koaka topi voko disaipeli madu sate, melai seta ke tadaovi ke kiada vo pide, kikelake.

²³Nio kama koaka poso Taibiriasi ama ta ko varerike sai sea matu padopadoilo ke kiekoi ko bereti ko sipole, Lekasa o kati petaovima ta kubo ko evema.

²⁴Nio seta pui ke veake vo Jisu sai, ni voko disaipeli madu melai pui ke meake, so sole sea maba madu ta keta zazuake koa koaka poso topi ni keta olake Keponeami peuru kale vailivole vo sai.

²⁵Nio so keru seke varerika keru koa toupa ko kama pake seta ke veake vo Jisu ni seta eri kikelake vokasi, “Tanala, noi keru inio ṉoda barola koi?” kikelake.

²⁶Nio Jisu ta o mati tiorikake, “Tuvevo avole aṉata a bazuemela me, meta mebe vailivailila aṉa, ako meta me qie ko kubo bereti ni meta meda atape sole, pui meko vakakuke kale koko kalo aṉako aqasiele ama iruruputo.

²⁷Meta pui ka iruruputo koko sapeovo ama sailao melai ka iruruputomo koa sailao koko melati barolo ama noqola kama saevo kale. Koa sailao ikio aṉa maba a eveni lala a qatimelo ama me, ako aṉa inio vo Baṉara voa Mama aṉa lula ola zoleini lala,” kiolake.

²⁸So sole seta ke kuimaevake vo, “Sole loma iruruputo kale inio eṉeta ṉe erekou vo Baṉara o ṉela zariako eṉe tu ṉe ereko?” kikelake.

²⁹Nio Jisu ta o mati tiorikake, “Vo Baṉara okai zariako iruruputo tu me ereko ta eri. Meta tuvevo puelomo aṉa vo o soroelani lala,” kiolake.

³⁰Nio seta eri va kikelake, “Noni ama aqasiele ama iruruputo ikio ṉota ṉo erekou tu eṉeta ṉe qelou ni ṉe duvevo pueṉou ṉo? Loma ikio ṉo ereko ama?

³¹Ako animeko taite poso ta ke kie ko mana lealea kama zaekale, ko Tabu ama Riki kikovevo jari, vota o katime se ko aukale azo ama bereti tu seta ke kuo,” kikelake.

³²Nio Jisu ta eri kiolake, “Tuvevo avole aṉata a bazuemela me, vo Mosese meko taite poso o katimema bereti ta pui aukale azo ama. Melai aṉavo Mama o katimelako bereti ta aukale azo ama.

³³Ako koa bereti vo Baṉara o puarikake ta ko kueva aukale azo ni kota ko katima ko saevo peuru ma peuru kale amu,” kiolake.

³⁴Nio seta eri kikelake, ‘Tanala, ṉota katiṉela koa bereti kiada keru,” kikelake.

³⁵Nio Jisu ta eri kiolake sekasi, “Aṉata saevo ko bereti lala, sole vo o kilo ala aṉa kasi ta pui opa luapou, ni vo o tuvevo puelo ala aṉa ta pui opa rokauvou.

³⁶Zio, aṉata lula a bazuemelala me, meta me qea aṉako iruruputo melai meta maba pui me duvevo puela aṉa.

³⁷Sea kiadamu aṉavo Mama o katilo amu aṉa ta ke kilou aṉa kasi. Ni aṉata pui aba butuemou seke kilo amu aṉa kasi,

³⁸ako aṉata a jaqore aukale azo tu a ereko vo aṉa o soroeleni ko vatolo.

³⁹Vo Baṉara vo o soroeleni aṉa ta ola zaria aṉa tu aṉata pui a mumaevo kala sea kiadamu vo o katileni azo, melai vota ola zaria tu aṉata a jaevimou sea kiadamu tovama ṉaniu kale.

⁴⁰Ako aṉavo Mama oka zariako ta, kiadamu seke lelo amu aṉa vo Baṉara vo Meqora lala ni ke tuvevo puelo amu aṉa ta ke kovou ko noqola kama saevo, ako aṉata a jaevimou se sole noqola kama saevo kale tovama ṉaniu kale,” kiolake.

⁴¹Nio sai ke lojoani Jiu amu ta ke taniekake vai ṉuruṉuruo vo, ako vota eri kiolake sole, “Aṉa inio voa bereti aukale azo a jaqoreni lala,” kiolake sole.

⁴²Sai nio seta eri kikelake, “Pui nea maba inio vo Jisu, vo Josepa vo meqora? Vo eṉe ṉeda vai nianiiani voko mama ni niania kidi. Noi sole inio vota so kiola, vota o saqoreni aukale azo?” kikelake.

⁴³Nio Jisu ta eri kiolake sekasi, “Epezomo ṉuruṉuruo me ṉavio kude.

⁴⁴Puliala ta o roveovou kilo aṉa kasi, aṉavo Mama pui o odievou tu o kilo aṉa kasi, vo o soroeleni aṉa. Ni aṉata a jaevivou vo o kilo ala aṉa kasi tovama ṉaniu kale.

⁴⁵Ako se poropita madu ta ke rikieke ko eri, ‘Kiadama maba poso, Baṉara ta o nianiiekimou!’ So sole kiadamu keta va viqani vo Mama ni ke koani ko nianiio vokasi azo ta ke kilou aṉa kasi.

⁴⁶Puliala inio lula opa veveni vo Mama; melai aṉa a quevini lala Baṉara kasi azo, aṉa inio lula a veveni lala vo Mama.

⁴⁷Aṉata a bazuemela me tuvevo avole, vo o tuvevo puelani ta lula noqola kama saevo sala.

⁴⁸Aṉata saevo ko bereti lala.

⁴⁹Meko taite poso ta ke kie ko mana lealea kama zaekale ni koko tova seta keta vovi seko vou ko taku keru.

⁵⁰Melai voa bereti vo o saqoreni aukale azo o vuovo ala ta pui opa vouvou.

⁵¹Aṉata noqola kama bereti lala a jaqoreni lala aukale azo. Vo o vuovo ala voa bereti ta noqola saevo o elou. Koa bereti aṉa a qativo ama voa maba ta aṉako marabau kio, ko aṉa a qatimo ama peuru ma peuru kale amu aṉako voukale tu seta ke pakiovou,” kiolake.

⁵²Ni Jisu ko soama pesio kale nio se Jiu amu ta keta tanitake ṉuruṉuruo ke ṉavio kude. “Noni o roveovou nio o katimelou voko marabau nio animeta me quovou?” kikelake.

⁵³Nio Jisu ta eri kiolake sekasi, “Tuvevo avole aṉata a bazuemela me: meta pui me quovou aṉa maba a eveni lala ko marabau ni pui me nozuekou aṉako dara ta meta pui meba kovou ko tuvevo ama saevo meko saevo kale.

⁵⁴Vo o kuani aṉako marabau ni o nozuekani aṉako dara ta o koa ko noqola kama saevo, ni aṉata a jaevivou vo tovama ṉaniu kale.

⁵⁵Ako aṉako marabau ta ṉisa sailao, ni aṉako dara ta ṉisa ju.

⁵⁶Ni vo o kuovo ala aṉako marabau ni o nozueko ala aṉako dara ta noqola o elou aṉa tona ni aṉata noqola a elou vo tona.

⁵⁷Vo saevola ni noqola kala Mama ta o soroele aṉa, ni aṉa melai soa noqola saevoa lala. So sole vo o luovo ala aṉa ta o saevou aṉa kale.

⁵⁸Aṉa inio voa bereti aṉa tuvevo avole a jaqoreni lala aukale azo, pui se meko taite poso kepa kiema bereti jaria lala. Ako seta ke kie ni pui noqola saevo kepa eve, melai vo o kuovo ala komia saevo ko bereti ta noqola saevo o elou,” kiolake.

⁵⁹Jisu ta o kasekake koa nianiiekato so keru o bazubazute keru ilusato ko pade kale Keponeami peuru kale.

⁶⁰Ni kubo madu vo ke lulueveni ta ke viqake vo kiolani ni eri kikelake, “Koa nianiiekato ta matu tapata kama. Lala inio o roveovou didieko ko tu o lulueko ko?” kikelake.

⁶¹Nio Jisu ta omai nianiiake voko disaipeli madu ta kekai ṉuruṉuruake ko, so sole vota eri ma kiolake se, “Koa aṉako pesio ta ko maba epezimelo me kikola kio?

⁶²Sole noi nio meme dova lelou keru aṉa maba a eveni lala ko tova koilo aukale sai aṉa a quevikoi kazo!

⁶³Vo Baṉara vo Tabu ala Auvana inio o saevizatani, maba ko pizato ta puliama saevizato sama. Koa pesio poso aṉa lula a qasekako mekasi ta pizato sama tu kota ko vati kilo vo Baṉara vo saevizato sala Auvana.

⁶⁴Melai kake mela meta pui me duvevo pueka koa pesio,” kiolake. Ako Jisu ta omai nianiiovi vima sase se pui kepa tuvevo puto amu, ni vo o saiqorivo ala vo.

⁶⁵Ni Jisu ta so kiolake sekasi, “Kokale avo inio aṉata a bazuemele me, puliala maba ta opa roveovou kilo aṉa kasi, aṉavo Mama ko zariekato pide,” kiolake.

⁶⁶Ni koa Jisu ko pesio kale avo inio kubo madu vo ke lulueveni ta keta epeike ni keta epezake luluevo vo.

⁶⁷Sai nio Jisu ta eri kiolake voko toni omuqa disaipeli madu kasi, “Noi nio, me melai meqa zaria vaelo aṉa kio?” kiolake.

⁶⁸Nio Saimone Pita ta o vati tiorikake, “Lekasa, lala kasi nio eṉe ṉeba ziovoa koi? Ako ṉoṉo qiada inio ṉo buarikani ṉa ko ṉisa saevo ko pesio sole.

⁶⁹Eṉeta ṉe duvevo pueṉa ni ṉeṉai nianiia ta ṉo inio vo Tabu ala ṉa ṉo quevini ṉa Baṉara kasi azo,” kiolake.

⁷⁰Nio Jisu ta eri kiolake sekasi, “Aṉa a ṉavi nio lula a bitoemela mea toni omuqa, melai kala me azo ta Setani vo maba inio!” kiolake.

⁷¹Jiudasi inio o kasevake, Saimone Isikarioti vo meqora. Ako Jiudasi ta kala pado sea toni omuqa disaipeli kale ala, melai vo inio o saiqorivo ala vo sole.