Read Bilua Jone 7 Bible Online

Jone 7 - Bilua bible

Jone 7

¹Ni koko tova inio Jisu ta o taliake Qalili rana, ni vota pui oka zariake talio Jiudia rana, ako se Jiu ama tanatanamu ta kebe tarevake vo sai tu ke vouvaevo sole.

²Ni se Jiu amu ko Ṉojola, Kokukoku Ṉojola ko ṉi sama ta sipole kota evake,

³so sole Jisu ko lasive visi poso ta eri kikelake vokasi, “Vaeka komia zae tu ola Jiudia, tu ṉo ke lulueṉani ta ke kelou koa iruruputo ṉoṉo erekako ubutiania.

⁴Puliala maba vo oka zariani uria kasa elo ta o daipaeka ko quli vo o erekako. Sole ṉota ṉo erekou ko quli tu kiadama peuru ma peuru ta koṉai nianiio ṉo!” kikelake.

⁵Ako voko visi poso melai pui ke tuvevo puevake vo sole.

⁶Nio Jisu ta eri kiolake sekasi, “Aṉako taku ta pui nio ko baroa. Meko taku ta kiada keru ti uri,

⁷ako se maba madu ta pui ke rovea melai kideipo me. Melai seta kelai kideipa aṉa, ako aṉata pui a lalamata tama kaseko seko ruqe ama kalo sole.

⁸Sole meta olamo koa ṉojola kasi. Aṉata pui a ziovou erisaṉa koa ṉojola kale, ako aṉako taku ta pui nio ko baroa sole,” kiolake.

⁹Vota so kiolake, ti ota loivake Qalili rana.

¹⁰Lula voko lasive visi poso keta olake ṉojola kale saita, inio Jisu melai ota olake seko tova. Vota pui kasavole o olake, melai moizavole.

¹¹Ni se Jiu ama tanatanamu ko kerukeru kale ta vo Jisu ta ota kilou kikelake so sole seta ke vailivake vo ṉojola kale, “Lai nio vo vo?” kikelake.

¹²Ni koa padopadoilo maba poso melai moizavole kebe kasevake vo Jisu. Kake ta “Vota sidopu ala maba,” kikelake, melai mata kake ta “Pui. Vo inio o lipalipaemani se maba poso,” kikelake, sole seta omuqa kerukeru kevai koake vo.

¹³Melai puliala ta ovai pesipesitake vo ubutiania keta ma ṉake se Jiu ama tanatanamu sole.

¹⁴Ni sipole kota tianiaoke koa ṉojola ko taku pado inio Jisu ta o olake Jelepade kale ni o taniekake nianiiekato.

¹⁵Ni se Jiu ama tanatanamu ta keta ka vuzeike voko nianiiekato, ni eri kikelake, “Noi sole inio nea maba ta matu nianiiola pui o sikuluputani melai nio?” kikelake.

¹⁶Nio vo Jisu ta o mati tiorikake se, “Aṉako nianiiekato ta pui aṉa kasi azo ama ikio, melai kota ko kuevako vo Baṉara kasi azo, vo o soroeleni aṉa.

¹⁷Vo oka zariani ereko vo Baṉara oka zariako quli ta okai nianiiovou aṉako nianiiekato ta ko kuevako Baṉara kasi azo kio ma aṉata a qaseka a ṉaviko pizato kale pala kio.

¹⁸Ako eri nio sole: vo maba vo o kasekani o ṉaviko pizato kale ta oka zaria puratiko o ṉaviko ṉaṉaidara pala. Melai vo ova zariani ṉaṉaidara puevo vo o soroeveni, ta tuvetuve ala ni puliama lipalipato sala.

¹⁹Mosese ta o katimele me vo Baṉara ko Bazu, ma pui opa katimele? Melai puliala kala pado me azo ta o zorika koa Bazu. Sole noi sole inio meta meqa zaria vouvaelo aṉa?” kiolake.

²⁰Nio koa padopadoilo maba poso ta ke vati tiorikake vo, “Ṉota ziolo salaṉa inio so kiṉolani! Puliala inio ṉo o vouvaeṉo kiolani!” kikelake.

²¹Ni vo Jisu ta o tiorizatake, “Omadeu pado aqasiele ama iruruputo ikio lula abe ereka melai mea kiada mela ta meqai vuzeiva.

²²Melai ko aṉa Sabati ṉaniu kale aqai erekani ko ta eri nio: Mosese ta o bazuemele me tu meta me movemo meko lasive meqora poso, (melai kota pui Mosese ko, melai kota meko kuleto ama taite poso ke taniekema ikio) ni Sokale inio meta me moveva kala lasive meqora Sabati ṉaniu kale melai.

²³Sokale meta me moveva kala lasive meqora Sabati ṉaniu kale tu Mosese ko Bazu ta pui ko niumailo, so sole noi sole inio meta melai korakoraiva aṉa, aṉako urikivo kale kala maba voko vere kale azo Sabati ṉaniu kale?

²⁴Epezomo pitasiko ko sidopu ni ruqe topi ama kalo kale, melai pitasikomo sidopu ama pitasato kale,” kiolake.

²⁵Sai nio kake se Jerusalema amu ta eri kikelake, “Pui nei nio voa maba vo sea tanatanamu ke vouvaevo va kikelani, kio?

²⁶Keatini! Vota o nianiiekata ubutiania, ni puliala ta o kaqariva vo! Esa ke vakakuva sea tanatanamu ta vo inio vo Baṉara o soroeveni Pakio, kio?

²⁷Melai so keru voa Pakio o kilou keru ta puliala kala pado ta o paqumukou sai vo o kiloa koi kazo. Melai animea kiada mela ta me uria paqumuka sai nea maba o kuevakoi kazo,” kikelake.

²⁸Ni Jisu ta obeta nianiiekatake Jelepade kale nio vota o opatikake seko pesio ni eri kiolake matuma kora kale, “Meta uria lai nianiio me eva aṉa, ni meqai nianiia sai aṉa a quevikoi kazo, kio? Melai aṉata pui a queva a ṉaviko pizato kale, melai vo tuvetuve ala inio o soroeleni aṉa. Melai meta pui mevai nianiia vo,

²⁹aṉa inio avai nianiia vo, ako aṉata a quevi vokasi azo, ako vota o soroele aṉa sole,” kiolake.

³⁰Nio ke viqe keru voko so kio inio sea tanatanamu ta ke noqoevo kikelake vo, melai puliala ta o roveake kamavo, ako voko taku ta pui nio ko baroake sole.

³¹Melai kubo madu koa padopadoilo kale amu ta ke tuvevo puevake vo, nio eri kikelake, “Nei tivoine voa Baṉara o soroevani Pakio o kuevini, vo puliala ota vai paloasani vo o erekako aqasiele ama iruruputo,” kikelake.

³²Ni se Parese madu ta keta ma viqake sea matu padopadoilo vai vazavazao vo Jisu, ta vota vo Baṉara o soroeveni Pakio nio kio, so sole sea Parese madu ni se raura kama siama madu ta ke soroemake se Jelepade ko vailo ko maba madu tu kepa noqoevo vo Jisu kikelake.

³³Nio Jisu ta eri ma kiolake sea padopadoilo, “Matu puju ama taku aṉata a elou mekasi, ni aṉata ada vaitou vo o soroeleni aṉa kasi.

³⁴Meta me vaililou aṉa, melai meta pui meba lelou, ako sai aṉa a ziovo kialakoi ta pui meba roveovou zio sole,” kiolake.

³⁵Nio se Jiu ama tanatanamu ta eri kikelake ke ṉavio kude, “Lai nio vo o ziovoa koi inio animeta pui meba roveovo avo velo vo? Ota ziovou nio se Quriki amu ko matu peuru kale sai Jiu amu ke evakoi, tu opa nianiiekimo se Quriki ama maba poso kio?

³⁶Vota so kiola, ‘Meta me vaililou aṉa, melai meta pui meba lelou aṉa,’ ni ‘Meta pui meba roveovou zio sai aṉa a eloa koi.’ Loma quli zae kio vo so ka kiolako?” kikelake.

³⁷Koa Kokukoku Ṉojola ko tovatovama ṉaniu ta matuma ṉaniu. Ni koa ṉaniu kale inio Jisu ta o lojoake ubutiania nio eri kiolake matuma kora kale “Vo o rokauvani ta o kilo aṉa kasi ju nozuekole.

³⁸Ko Tabu ama Riki kikovevo jari, ‘Vo o tuvevo puelo ala aṉa, ko saevo ko ju ta ko rereovou kiada keru orori jari voko bulo kale azo,’ ” kiolake.

³⁹Jisu so va kioveni ta Tabu ala Auvana inio, vo seke tuvevo puevo amu vo ke vovo ala Tabu ala Auvana. Koa taku keru Jisu soa pesio o eve keru ta pui nio o katiziake vo Tabu ala Auvana maba madu kasi, ako Jisu ta pui nio o koivake voko ṉaṉaidara kama zaekale sole.

⁴⁰Ni kubo maba madu koa matu padopadoilo kale amu ta ke viqake vo kiolani nio seta eri kikelake, “Tuvevo avole nei nio voa Poropita me darevani!” kikelake.

⁴¹Ni mata kake ta eri kikelake, “Vo inio vo Baṉara o soroeveni Pakio!” Melai mata kake ta eri kikelake, “Pui, vo Baṉara o soroevani Pakio ta pui opa kilou Qalili ranʼazo!

⁴²Ko Tabu ama Riki kikolani ta, vo Baṉara o soroevani Pakio ta vo Aikovakova Devita ko vikuvikula kale azo inio o kilo avo, ni vota o alilou Betelihema peuru kale, koa peuru sai Devita o evekoi,” kikelake.

⁴³So sole sea matu padopadoilo ta keta pitasiake voko kerukeruevo kale.

⁴⁴Ni kake sea maba madu ta keka zariake noqoevo vo, melai puliala kala pado ta o roveake kamavo vo.

⁴⁵Ni sea Jelepade vailani pazokinio ko maba poso ta ke vaitake puliala Jisu sate se raura kama siama madu ni Parese madu kasi, ni sea tanatanamu ta ke kuimaemake se, “Noi sole inio meta pui me vati kueva vo?” ma kikelake.

⁴⁶Ni sea Jelepade ke kati vailani ta ke tiorizatake, “Puliala ta nea maba jaria bazubazutola!” kikelake.

⁴⁷Nio sea Parese madu ta eri kikelake sekasi, “Me melai lula o lipaemela, kio?

⁴⁸Meta mevai nianiiani nio kala pado sea tanatanamu azo ma kala pado eṉea Parese ṉela azo ko tuvevo puevo vo kio?

⁴⁹Komia matu padopadoilo ta pui kekai nianiia vo Mosese ko Bazu inio uri ko ima voko bazubazu, sole vo Baṉara ko kuiripato ta ko movou!” kikelake.

⁵⁰Nikodimasi ta kala pado se azo, vo lula o keveni velole vo Jisu. Ni vo inio eri kiolake voko baerebaere poso kasi,

⁵¹“Animeko Bazu kikolani kale ta pui meba roveovou kuiripato saṉa ivo kala maba puliako tava viqo ni tava kelo ko quli vo o erekako,” kiolake.

⁵²Nio seta ke vati tiorikake vo, “Ṉo melai Qalili rana lana, kio? Lezumuka ko Tabu ama Riki ni ṉota ṉo baqumukou ko puliala poropita ta o purata Qalili kio, nea maba o kuevikoi kazo,” kikelake.