Read Bilua Jone 8 Bible Online

Jone 8 - Bilua bible

Jone 8

¹Ni sea kiadamu ta keta vaitake pade kasi, melai Jisu ta ota peatake Olive Ore sama Sopu kale, ni vota ota raneake sai.

²Ni omadeu lekito koko raneo kale inio vota o vaitake Jelepade kasi. Sai nio sea matu padopadoilo ta mata kevai uburake vo, nio vota ota papuake ni o taniekake nianiiekimo se.

³Ni se Mosese ko Bazu kekai nianiiekatani maba poso ni se Parese madu ta ke kati olake kama pado ko pauvezatema reko ni ke lojoekake ko sea kiadamu ko ubutiania.

⁴Ni seta eri va kikelake vo Jisu, “Tanala, komia reko ta kekai potoa koko ereka keru ko pauvezato.

⁵Ni eṉeko Bazu kale vo Mosese o ṉelai bazuekema kale ta soama reko ta ṉe daiko ko lado kale tu ko vou. Melai ṉota noi nio kiṉola?” kikelake.

⁶Seta so kikelake tu seta ke madoevo, tu seta kevai zuakaeko ko titizato kikelake sole. Melai Jisu ta ota loquloqutake puliama pesio sate ni ota rikitake miduku topi voko ṉase kale ama seseu kale.

⁷Ni sai kebeta lojoa keru inio seta ke kuimakuimaevake vo, nio vota o aunariake ni eri kiolake sekasi, “Vo me azo puliama sarueko sala ta kuleto o taiko ko lado kale,” kiolake.

⁸Ni vota mata ota tova loquloqutake ni ota rikitake miduku topi.

⁹Ni so keru seke viqa keru koa pesio poso, nio sea kiadamu ta keta tuluaziake padopado zolailo kale, qoleqole amu ta kuleto ni se vairuvairu amu ta koko tova. Ni o kiada Jisu ta ke vaevake sai, ni koa reko ta sai kobeta lojoake.

¹⁰Ni vota o aunariake ni eri kiolake kokasi, “Ṉoiza, lai ta se, kala ta obe titiziṉa ṉo, ma pui kio?”

¹¹“Puliala, tanala,” kikolake. Nio Jisu ta o kati tiorikake ko, “Uri, aṉa melai pui aṉai kuirika ṉo, melai ola ni pui mata tova sarueko ṉo elou,” kiolake.

¹²Ni Jisu ta mata eri kiolake sea maba madu kasi, “Aṉata peuru ma peuru ko zakaremu lala. Vo o luluelo ala aṉa ta o ṉeamukou ko saevo ko zakaremu ni vota pui opa taliovou kutumana kale,” kiolake.

¹³Ni se Parese matiu ta eri kikelake vokasi, “Ṉota ṉo bazuiva ṉo ṉavi, ta so ṉo kiṉolani ta pui tuvevo avo,” kikelake.

¹⁴Ni Jisu ta o mati tiorikake, “Abe bazuilou a ṉavi melai, aṉa kialani ta tuvetuve avo, ako aṉata aqai nianiia sai aṉa a quevikoi kazo ni aqai nianiia sai aṉa a ziovoa koi sole. Meta pui meqai nianiia sai aṉa a quevikoi kazo ni pui meqai nianiia sai aṉa a ziovoa koi.

¹⁵Meta me ereka ko titizato maba ko erekako titizato kale, melai aṉata puliala a ditiziva ko meme erekako titizato kale.

¹⁶Melai aṉata a ditizata tea, aṉako titizato ta tuvevo ama ikio, ako kokale ta aṉata pui a qiada kalala; ako aṉavo Mama vo o soroeleni aṉa ta aṉa sase tu vota o tauvelo sole.

¹⁷Me Mosese o katimelema Bazu kale ta ko rikiziovi ko omuqa kidi qokai bazutako quli ta tuvevo ama, kikove.

¹⁸Ni koa Bazu ko lulueko kale avo inio aṉata ada bazuiva a ṉavi, ni aṉavo Mama vo o soroeleni aṉa melai olai bazuta,” kiolake.

¹⁹Nio seta eri kikelake, “Lai ta vo ṉovo mama?” Ni Jisu ta eri kiolake, “Meta pui melai nianiia aṉa ni pui mevai nianiia aṉavo Mama. Meta lula melai nianiia aṉa tea meta mevai nianiio nio mata aṉavo Mama,” kiolake vo Jisu.

²⁰Jisu ta o kasekake koa kiadama quli vo o nianiiekate keru Jelepade kale, sai pikazato ko teamuteamu ke vaekakoi zama zaekale. Ni puliala se lotu tanatanamu azo se kekai kaikuapani voko nianiiekato ta o noqoevake vo ako voko taku ta pui nio ko baroake sole.

²¹Nio Jisu ta mata eri kiolake sekasi, “Aṉata a vaemelou ni ada ziovou, ni meta me vaililou aṉa, melai meta pui meba lelou aṉa ni meda vouvou meko sarueko poso sate. Meta maba pui meba roveovou zio sai aṉa a ziovoa koi,” kiolake.

²²Nio se Jiu ama tanatanamu ta eri kikelake ke ṉavio kude, “Vota o kaseka ta, ‘Meta pui meba roveovou zio sai aṉa a ziovoa koi’ kiola ta o ṉavi ota vouvailou kiola inio kio?” kikelake.

²³Ni Jisu ta o mati tiorikake, “Meta koi miduku kalea mela, melai aṉata a quevini lala aukale azo. Meta komia peuru ma peuru kalea mela, melai aṉata pui komia peuru ma peuru kalea lala.

²⁴Sokale avo inio aṉata a bazuemela ta meta meda vouvou meko sarueko poso sate. Ako meta pui me duvevo puekou ko ‘Aṉa inio ko Aṉa lala’[2] kio, ta meta meda vouvou meko sarueko poso sate,” kiolake.

²⁵Sole “Lala ṉa inio ko ṉo?” va kikelake. Ni Jisu ta o mati tiorikake, “Kulekuleto aṉa melati kiavevo ko tisoiko.

²⁶Kubo quli kio aṉata a melai kuirikou me ko sarueko kale avo. Melai vo o soroeleni aṉa ta kerula kala, ni aṉata ama kaseka se peuru ma peuru kale ama maba poso ko quli aṉa a viqema vokasi,” kiolake.

²⁷Melai seta pui kepa vakakuke ta vo Baṉara inio voa Mama vo omai bazueveni se.

²⁸So sole Jisu ta eri kiolake sekasi, “Meme zolaelou keru aṉa maba a eveni lala nio meta meqai nianiiovou ko ‘Aṉa inio ko Aṉa lala’ kio. So inio meta meqai nianiiovou ko aṉata pui a ereka a qiada kama quli, melai kota aṉavo Mama olai nianiiekikema aṉa tu a qaseko nio kimevou.

²⁹Ni vo o soroeleni aṉa ta pui o vaela aṉa a qiada, melai vota aṉa sase, ako aṉata a ereka vo ko zolevako quli kiada keru sole,” kiolake.

³⁰Ni kubo madu sai ke viqeni Jisu kiovevo ta ke tuvevo puevake vo.

³¹So sole Jisu ta eri kiolake se Jiu amu kasi seke tuvevo puekeni voko pesio, “Meta tuvevo avole me zorikou aṉako nianiiekato inio meta aṉako tuvevo ama disaipeli poso mela me elou,

³²ni meta meqai nianiiovou ko tuveano, nio koa tuveano ta ko rupasimelou me,” kiolake.

³³“Eṉeta Ebarahami ko vikuvikula ṉela inio, ni eṉeta pui mabaku ṉela. Nio loma ikio koko kalo ko ‘Meta me rupasiovou’ ka kiṉolako?” kikelake.

³⁴Nio Jisu ta eri kiolake sekasi, “Tuvevo avole aṉata a bazuemela me, vo o erekani ko sarueko poso ta sarueko vo mabaku.

³⁵Vo mabaku ta pui saidi ko ataataiti kale ala opa elou kiada keru, melai vo meqora inio noqola kala koa saidi kale.

³⁶So sole vo Meqora ta o rupasimelou me, inio meta tuvevoa ruparupasia mela me elou.

³⁷Aṉata a melai nianiia meta vo Ebarahami ko vikuvikula mela inio kio, melai meta mebe la abamata tu me vouvaelo aṉa, ako meta pui meba ṉeamukou aṉako nianiiekato sole.

³⁸Aṉata a qaseka ko quli a Mama ola kasekema quli, melai meta mebeta erekala vo mevo mama melati kiovevo,” kiolake.

³⁹Nio seta ke vati tiorikake vo, “Eṉevo mama ta Ebarahami tivoine,” kikelake. Nio Jisu ta eri kiolake, “Tuvevo avole meta Ebarahami ko meqora poso mela tea, meta me lulueko inio ereko vo o erekema sidopu.

⁴⁰Kiadama quli ko aṉa a melai bazuekako ta koa tuveano lula aṉa a viqako vo Baṉara kasi azo, melai meta mebe la abamata aṉa tu me vouvaelo kimela. Ebarahami ta pui opa ka zariovi koa kalo!

⁴¹Meta mebe ereka inio ko quli mevo mama o erekako quli,” kiolake. “Baṉara inio omadeu pado eṉevo Mama, eṉe inio voko tuvevo ama meqora poso ṉela, pui buniu meqora ṉela,” kikelake.

⁴²Nio Jisu ta eri kiolake sekasi, “Tuvevo avole Baṉara inio mevo mama tea, meta me roquelo inio aṉa, ako aṉata a quevi Baṉara kasi azo, ni erisaṉa aṉata koi. Aṉata pui aba kuevi a ṉaviko vatolo kale, melai vo inio o soroeleni aṉa.

⁴³Noi sole inio meta pui me baqumuka aṉa kialani? Tuvevo avole meta pui me baqumuka ko, ako meta meda lupaova didieko aṉako bazubazu sole.

⁴⁴Meta vo Setani ko meqora poso mela inio, nio meta meqa zaria lulueko voa mama ko vatolo. Koko tanitanila keru azo vota o vouvaeke ko maba. Ni vota pui o vinaiva tuveano kale, ako vo tona ta puliama tuveano sole. So keru vo o lipalipata keru vota okai pesia maba o ṉaviko pesio ako vota kiadama lipalipato ko raki sole.

⁴⁵Melai aṉata a melai bazueka ko tuveano, ni sekale meta pui tuvevo me ila aṉa.

⁴⁶Lala me azo ta olai kuirikani aṉa ko sarueko? Puliala! So sole noi sole inio meta pui me duvevo puela aṉa, so keru aṉa a melai bazueka keru ko tuveano?

⁴⁷Vo Baṉara vo maba ta o viqa vo Baṉara ko pesio. Meta pui Baṉara ko mela sole pui meba tava viqou voko pesio,” kiolake.

⁴⁸Nio se Jiu ama tanatanamu ta eri va kikelake vo Jisu, “Eṉe kiṉelani ta tuvevo ikio, ṉota utube ala Sameriala maba ṉa ni oṉai onobatani ṉa kala ziolo!” kikelake.

⁴⁹Nio Jisu ta o mati tiorikake se, “Aṉata puliama ziolo salala, aṉata a rauraeva a Mama, melai meta me zarazaraela aṉa.

⁵⁰Aṉata pui a vailika a ṉaviko raurailo mekasi. Melai vo o vailikani ko mekasi ta inevoana, ni vo inio vo o titizato ala.

⁵¹Tuvevo avole aṉata a bazuemela me, vo o zoriko ala aṉako bazubazu ta pui opa vouvou,” kiolake.

⁵²Nio ko quli ke viqake se Jiu ama tanatanamu nio eri kikelake vokasi, “Vairutu ta maba ṉe duvevo pueṉa ta ṉota kama pado ziolo salaṉa! Ebarahami ta lula ota vovi, ni se poropita madu melai lula keta vovi, melai ṉota eri kiṉola, ‘Vo ota la zoriko ala aṉako bazubazu ta pui opa vouvou,’ kiṉola!

⁵³Eṉevo taite Ebarahami ta lula ota vovi; noi sole inio ṉoda va paloaso vo Ebarahami kiṉola? Ni se poropita madu melai lula keta vovi. Nonia kerukeruilo inio ṉo evani ṉo ṉavi?” kikelake.

⁵⁴Ni Jisu ta o mati tiorikake, “Aṉata a rauraiva a ṉavi tea, aṉako raurailo ta kalo pide ama ikio. Melai vo o rauraelani aṉa ta a Mama inio, vo mevo Baṉara va kimelani.

⁵⁵Meta maba pui me baqumuva vo, melai aṉata avai nianiia vo. Melai aṉata pui avai nianiia kiala tea, aṉata kala lipalipa kalala inio, me jari. Melai aṉata avai nianiia vo ni a zorika voko bazu.

⁵⁶Mevo taite Ebarahami ta ota zolei so keru vo o paqumuke keru ta vota o kelou aṉako kilo miduku kale. Ni vota o keve ko ni ota zoleike,” kiolake.

⁵⁷Ni se Jiu amu ta eri kikelake vokasi, “Ṉota matu vairua laṉa, pui nio sike toni sabere ṉo eva, melai nio ṉota ṉo veve vo Ebarahami kiṉola kio?” kikelake.

⁵⁸Nio Jisu ta eri kiolake sekasi, “Aṉata a bazuemela me tuvevo avole. Puliako Ebarahami alilo ta ‘Aṉa inio,’” kiolake.

⁵⁹Sai nio seta ke niaquekake ko lado ni ke taivo kikelake, melai Jisu ta taukavole ota daipaike ni ota saqorake Jelepade kale azo.