Read Bilua Jone 9 Bible Online

Jone 9 - Bilua bible

Jone 9

¹Ni Jisu ni voko disaipeli madu ta ke vaekake koa zae ni keta olake. Ni so keru Jisu obeta taliake keru inio vota o veake kala leqa kala maba, vo soa alilo o eveni.

²Nio voko disaipeli madu ta ke kuimaevake vo, “Tanala, lalako sarueko kale inio voa maba ta leqa alilo ota eve? O ṉaviko ma o mama ni niania kanioqa ko sarueko kale kio?” kikelake.

³Nio Jisu ta o mati tiorikake se, “Voko leqa elo ta pui voko sarueko ni pui voko mama ni niania kidi ko sarueko ikio kopa podoeke. Melai voko leqa elo ta ko puratikou vo Baṉara ko pizato nea maba tona.

⁴Sole animeta me ereko vo aṉa o soroeleni ko iruruputo ṉaniu palate, ako ipu ta kobeta kueva sole, puliala maba o rovea keru iruruputo.

⁵Ana peuru ma peuru abeta eva keru ta aṉa inio peuru ma peuru ko zakaremu lala,” kiolake.

⁶Ni voko so kio ko tova inio Jisu ta o supatake miduku topi, ni o valuvaluekake kama mesoka supasupa sate, ni vota ota va ikake koa mesoka voa maba ko omuqa vilu topi,

⁷ni vota o bazuevake vo, “Ola tu pa pusaeka ṉoko loilo Sailome Toupa kale.” Koa toupa ko ṉi ko kio ni kalo ta “Soroini.” So sole voa maba ta o olake ni vota o pusaekake voko loilo. Nio vota o kelo-kelozatake ni mata ota vaitake.

⁸Ni voko mabamu ni kake maba poso seke veveni vo o pasepasete keru puliako ko ereilo ta keta vuzeike ni eri kikelake, “Koe! Pui nei nio voa maba papule o pasepasetani, kio?” kikelake.

⁹Ni kake ta eri kikelake, “Koe, vo inio vo vo,” melai kake ta eri kikelake, “Koe, pui vo inio vo vo, melai vo jaria velo ala,” kikelake. Nio sai nio o ṉavi voa maba inio eri kiolake, “Aṉa inio ko voa maba lala,” kiolake.

¹⁰“Noni kota kala inio ṉoko vilu ta kota ṉa leqosala?” kikelake.

¹¹Ni vota o mati tiorikake se, “Voa maba vo Jisu o ṉi sala ta o erekala ko mesoka, ni vota ota lai ikala aṉako omuqa vilu, saita inio vota eri la kiolala, ‘Ola tu pa pusaeka ṉoko loilo Sailome Toupa kale,’ nio aṉata a olala, nio a busaekala ti abeta rovea nio kelokelozato,” kiolake.

¹²“Lai ta vo vo?” kikelake. “Aṉata pui avai nianiia sai vo o evakoi,” kiolake.

¹³Nio seta ke vati olake voa leqa kala maba vo o leqoseni se Parese madu kasi.

¹⁴Nio koa ṉaniu so keru Jisu mesoka kale ota va rureke keru ni ota va leqosike keru voa maba ko vilu ta Sabati ṉaniu.

¹⁵So sole se Parese madu ta ke kerukeruekake ko Sabati ko bazu ni kevai kuimaekake mata voa maba noi nio o leqosala kio. Nio vota o bazuemake se, “Vota ota la ikala kama mesoka aṉako omuqa vilu topi, saita inio aba pusaekala aṉako loilo, ti erisaṉa ta ada rovea keazakeazato,” kiolake.

¹⁶Ni kake Parese madu ta eri kikelake, “Voa maba vo o erekalani ta maba pui o kuevani Baṉara kasi azo, ako vota pui o zorikani ko Sabati ko bazu sole,” kikelake. Melai mata kake ta eri kikelake, “Vo sarueko sala maba ta pui opa roveovou ereko eri ama aqasiele ama iruruputo poso,” kikelake. So sole seta omuqa pitasa keta evake seko kerukeru kale.

¹⁷So sole se Parese madu ta mata kama kuimaevo ke evake voa maba, “Ṉota so kiṉola vo inio oṉa leqosikala ṉoko vilu kiṉola—uriavo, ṉota noi nio va kiṉola voa maba?” kikelake. Nio vota o mati tiorikake, “Vota kala poropita inio,” kiolake.

¹⁸Melai sea Jiu ama tanatanamu ta kebeta evake lipato iko ta voa maba ta leqa o eveni ni ota rovea keazato erisaṉa kio, so sole seta ke nokaekake voko mama ni niania kidi

¹⁹ni seta ke kuimaekake nioqa, “Nei ta qevo meqora inio kio? Qeta qe paqumuka ta tuvevo ikio vota leqa kala ota alile kio? Nio noi nio vota ota rovea keazato erisaṉa?” kikelake.

²⁰Nio voko mama ni niania kidi ta qo mati tiorikake, “Vota eqevo meqora inio, ni eqeta qevai nianiia ta tuvevo leqa kala ota alile.

²¹Melai eqeta pui qekai nianiia noi nio vota ota keazata erisaṉa ni lala inio voko vilu ota va leqosikalani. Kuimaevomo o ṉavi ako o ṉavi ta lula qole ala inio tu, ni o ṉavi ta o roveovou opato,” kiqolake.

²²Voko mama ni niania ta so kiqolake, ako nioqata qota ma ṉake se Jiu ama tanatanamu sole. Ako se inio lula ke nakatikani vo Jisu ta vo Baṉara o soroevani Pakio kio okai eraeraovo ala ta keta va kaitikou voko zomano ilusato ko pade kale kio sole.

²³Sokale avo inio voko mama ni niania ta “Vota qole ala inio tu kuimaevomo vo,” kai kiqovevo.

²⁴Nio omuqama taku kale sea tanatanamu ta ke nokaevake voa leqa alilo o eveni maba nio eri kikelake vokasi, “Tuvevo ama quli kaseka Baṉara ko tanama kale! Ako eṉeta ṉevai nianiia ta voa maba ta sarueko sala sole,” kikelake.

²⁵Ni vota eri kiolake, “Aṉata pui a uria vai nianiia vota sarueko sala ma pui kio. Omadeu quli pala kio aqai nianiia, aṉata lula ta leqa kalala, melai erisaṉa ta ada kelokelozata,” kiolake.

²⁶Nio eri kikelake, “Loma ikio oṉai erekalama quli? Ni nonia leqosiko inio ota ṉa ikalavo ṉoko omuqa vilu?” kikelake.

²⁷“Lula a bazuemelala, melai meta pui meda la viqa. Noi sole inio meta meqa zaria mata tova viqo? Esa me melai esa meqa zariovou voko disaipeli poso elo kio?” kiolake.

²⁸Sai nio seta kevai korakoraivake ni ke ruqe kasevake vo ni eri kikelake, “Ṉo inio voa maba vo disaipeli ṉa, eṉeta Mosese ko disaipeli ṉela inio.

²⁹Eṉeta ṉeqai nianiia ta vo Baṉara ta o pesiovi Mosese kasi, melai voa maba ta eṉeta pui ṉeqai nianiia sai vo o kuevikoi kazo!” kikelake.

³⁰Nio voa maba ta o mati tiorikake se, “Koe! Matu aqasiele ama quli ko meta pui meqai nianiia sai vo o kuevikoi kazo, melai nio vota ola leqosikala aṉako omuqa vilu!

³¹Ako animeta meqai nianiia ta vo sarueko sala maba ta Baṉara ta pui o didieva vo kiolani, melai vota o didiema seke tava paṉaovani vo ni seke erekani vo oka zariako quli tu ke ereko.

³²Peuru ma peuru ko tanite keru azo ti kokai baroa komia vairutu ta pui nio ko dimania ko kala maba ta lula ota va leqosika ko vilu voa maba vo leqa alilo o eveni kio.

³³Nea maba ta pui Baṉara kasi azo o kuevani tea, vota maba pui opa roveovou ereko soama quli,” kiolake.

³⁴Sai nio seta ke vati tiorikake vo seko korakorailo kale, “Ṉota ṉo alile ni ṉo rapukeni ṉa ṉoko niania ko sarueko sate, melai ṉota ṉoqa zaria nianiiekiṉelo eṉe kio?” kikelake. Nio seta ke kupevake vo ilusato ko pade kale azo.

³⁵Ni Jisu ta o viqake se Parese madu ko kupevo voa maba nio vota opa veake ni o kuimaevake vo, “Ṉota tuvevo ṉo iva vo maba o eveni kio?” kiolake.

³⁶Ni voa maba ta o tiorizatake, “Tanala, lai bazueva lala inio vo vo, tu aṉata a duvevo puevo vo!” kiolake.

³⁷Nio Jisu ta o vati tiorikake vo, “Ṉota lula ṉo veala vo, aṉa inio vo vo lala abe ṉati pesiani lala ṉo erisaṉa,” kiolake.

³⁸“Aṉata a duvevo pueṉa, Lekasa!” kiolake, ni vota o iqeiqeake Jisu ko kuleto.

³⁹Nio Jisu ta eri kiolake, “Aṉata a quevi peuru ma peuru kale korotato sate, tu se leqa kamu ta ke keazatou, ni seke keazatani ta leqa ke elou,” kiolake.

⁴⁰Nio kake Parese madu, seke eveni sai vo sate, ta keta va viqake soama pesio nio seta ke kuimaevake vo, “Noko so kio ta eṉe melai leqa kaṉela inio ṉo ṉela kiṉola kio?” kikelake.

⁴¹Ni Jisu ta o tiorizatake, “Meta leqa kamela tea, meta pui kuirikuiria mela inio, melai meta eri kimela, ‘Eṉe inio ṉe qeazatani ṉela,’ kimela, Sokale inio meko sarueko ko kuiripato ta kobeta eva me tona,” kiolake.