Read Bilua Iruruputo 1 Bible Online

Iruruputo 1 - Bilua bible

Iruruputo 1

¹Ṉova Tiopilasi: Aṉako kuleto ama buka kale ta a rikieke kiadama vo Jisu o erekema quli ni nianiiekato vo o tanieke keru iruruputo keru azo ama,

²ti kobeta baroi koa ṉaniu vo Baṉara o koivievo keru vo aukale. Puliako vo koilo aukale ta vo Tabu ala Auvana ko pizato kale vota o katimake ko bazu sea maba poso vo o pitoemeni tu voko apositolo madu ke elo.

³Ni ariku toni ṉaniu ko poro kale voko vou ko tova inio vota omai purapurataitake kubo taku matu zakaremu ama kalo kale, tu seta pui niuniala kekai elo ta vota lula mata ota saevala kio, ni seta ke veake vo, ni vota omai bazuekake se vo Baṉara ko lekasa puo.

⁴Ni so keru seke padoiva keru inio vota eri mati kiolake se, “Meta pui vaeko ko Jerusalema, melai meta tarekomo koa katizato aṉa lula a qasekema, koa katizato aṉavo Mama o kasekema ta me qovou ka kiovema.

⁵Jone ta o bapitaiso pute jukale, melai puliako tu keu meta me bapitaiso puilou Tabu ala Auvana kale,” kiolake.

⁶Ni so keru se apositolo madu ni Jisu ke toraekinie keru, seta ke kuimaevake vo ni eri kikelake, “Lekasa, komia taku kale inio ṉota mata ṉo dova lojoekou koa Izireli toutou ko lekasa poso ko lekasa puo, kio?” kikelake.

⁷Nio Jisu ta o mati tiorikake se ni eri ma kiolake, “Ko taku poso ni ko ereilo ama quli ko ṉaniu poso ta o ṉavi Baṉara ko vatolo kale inio o korotikou, so inio pui ko male tu meta meqai nianiio ko quli ko ereilo ama quli.

⁸Melai so keru vo Tabu ala Auvana o kilou keru mekasi inio ko pizato ta ko melai sukatou me, nio meta melai bazubazutou aṉa sai Jerusalema, ni koa pado ama Jiudia ni Sameria peuru poso kale, ti kobeta barolou peuru ma peuru ko pakale,” kiolake.

⁹Voko so kio ko tova, vota ota koivake aukale, se kebe toiritoiriva keru vo, ni lei ta ko daipaevake vo seko vilu kasi azo.

¹⁰Ni se kebe toiritoirika keru ko au, vo lula ota koiva saita, inio omuqa maba tapo sabosaboa nioqa ta ota podoloa koi qopeta lojoake seko ketaketa,

¹¹ni eri kiqolake, “Mea Qalili amu mela, noi sole inio meta meda lojoa koi ni me doiritoirizata aukale vasi? Nea Jisu vo obe koivani aukale ta omadeuvo mebe tava kea voko zio aukale so pado jaria vaito inio o elo avo,” kiqolake.

¹²Nio koko tova inio se apositolo madu ta keta vaitake Jerusalema Olive Ore sama Sopu kale azo, omadeu kilomita jari koko vaṉa Jerusalema peuru kale azo.

¹³Seta kekai amaqeake koa matu peuru ni kekai zakeike okate ama lose kale sai seke evakoi: Pita, Jone, Jemisi ni Aduru, Pilipi ni Tomasi, Batolomiu ni Matiu, ni Jemisi Alepiasi vo meqora, ni Saimone kala pado sekale ala se keka zariovini rupasimo Izireli qoqono Romu ko vailo kale azo tu ke ṉavi ke lojolo, ni Jiudasi Jemisi vo meqora.

¹⁴Seta ke padoiva mati ni ke vararaita omadeu poukale, rekoreko sate ni Mere Jisu ko niania ni voko visi poso sate.

¹⁵Ni kama poso ṉaniu ko tova nio seke tuvevo puteni ko pesipesito ko padoilo ta ko ereivake, ni seko ataataiti ta omadeu paizana karabete madu. Ni Pita ta o lojoake, ni eri kiolake,

¹⁶“A baerebaere poso mela, Tabu ama Riki kale ko kaseima quli ta lula tuvevo kota eva Tabu ala Auvana o kasekema Devita kale kude, vo Jiudasi ko pidokivo kale, vilua pikopiko oma eveni se Jisu ke noqoeveni. Ni kota ko malezikake ni so ko kake, ako Tabu ama Buka kale ama pidokato ta ko puratika kiada keru koko epa sole.

¹⁷Jiudasi ta kala pado animeko poqala kale ala o eveni, vota lula o pitoi tu o ereko voko kena animeko iruruputo,” kiolake.

¹⁸(Vo Jiudasi o koema seleni voko ruqe ama iruruputo kale ta o tatabaraekake kama pado miduku, sai vo o vovikoi ni o piavekoi, vota ota podokake ni kiadama siapa kota va saqorake.

¹⁹Kiadamu se Jerusalema ke eveni ta kekai nianiiake, so sole seta kekai nokaekake koa miduku ko ṉi ta Akelodama, koko kio ni kalo ta dara ko miduku.)

²⁰Ni Pita ta obeta olake pesio ni eri kiolake, “Ako koko rikiziovima Devita ko kera kale ta eri nio kikolani, ‘Voko pade ta ota kota elou; ni puliala maba ta opa loilou koko poro kale,’ ni kota mata ko rikiziovi ko eri kio, ‘Edolola maba ta ota va kovou voko iruruputo,’ kikolako.

²¹“So sole ko male tu kala ta o ṉelati zomanou kai bazubazutole vo Jisu Karisito ko mata saevo voukale azo. Ni uri tu vota kala pado se eṉe ke lulueṉeleni kale ala eṉeko poqala kale koa kiadama taku kale vo Lekasa Jisu o lipilipite keru eṉe sase, Jone okai bazubazute keru azo ko bapitaiso ko bazubazu ti kobeta baroi koa ṉaniu vo Baṉara o koivieve keru vo Jisu aukale,” kiolake vo Pita.

²³So sole seta keta ka puratikake omuqa maba kidi ko ṉi, Matiasi, ni Josepa. Ni Josepa kake ta Basabasi va kikeveni, kake ta Jasitasi va kikeveni.

²⁴Nio seta ke vararaitake, “Lekasa, ṉota ṉoqai nianiia kiadama maba poso ko bulo kale ama kerukeru, sole ṉota ṉela kaseva eṉe lala pado nioqia omuqa maba azo inio ṉota lula ṉo bitoeva

²⁵tu vota apositolo jaria nabuluputo o elo Jiudasi ko zaekale, ako vo Jiudasi ta o epeini ni o keveni voko male ama zaekale sole,” kikelake.

²⁶Nio seta ke erekake ko lojilojiekinio daisi kale tu lala pado inio nioqʼazo o pitoilo, ni vo o pitoini ta Matiasi, vo o tiovimeni sea toni omadeu apositolo seko poqala kale.