Read Bilua Iruruputo 15 Bible Online

Iruruputo 15 - Bilua bible

Iruruputo 15

¹Ni kake lotu maba poso seke kuevini Jiudia azo Anitioko ta ke taniekake nianiiekimo seke tuvevo putani ni eri kikelake, “Meta pui me qovou ko moveilo vo Mosese ko Bazu ko kasekako ta meta pui meba roveovou pakio,” kikelake.

²Ni Paula ni Banabasi ta ṉaloṉalo ama zolizoliekinio qo mati erekake kokale avo, so sole Paula ni Banabasi ni kake maba madu Anitioko amu ta ke pitoike tu ke zio Jerusalema ni kepa paqumuko se apositolo madu ni se lotu tanatanamu ko kerukeru kokale avo.

³Nio ko lotu qoqono ta ko soroemake se, ni seta ke olake Ponisia ni Sameria kude, ni seta kekai bazutake se pui Jiu amu ko lilizio Baṉara kasi. Koa bazu ta ke viqe matuma zoleilo sate seke tuvevo putani kiadama zaekale.

⁴Ni so keru seke baroi keru Jerusalema inio se lotu qoqono ta ke baroekimake se, ni so jari se apositolo madu ni lotu tanatanamu, ni Paula ni Banabasi ni mata kake ta ke kasekake kiadama quli vo Baṉara o erekako quli seko iruruputo kale.

⁵Melai kake Parese madu se lula ke tuvevo putani ta ke lojoake ni eri kikelake, “Se pui Jiu amu ta maba ke moveilo ni ke bazuilo tu ke zoriko vo Mosese ko Bazu kikolani,” kikelake.

⁶Nio se apositolo madu ni se lotu tanatanamu ta ke padoivake tu seta ke kerukerueko koa kuimanao kikelake.

⁷Ni seko rosi ama pesipesito ko tova inio Pita ta o lojoake ni eri kiolake, “A lolo poso, meta meqai nianiia rosi ama taku ko paloasema kale vo Baṉara ta o pitoele aṉa tu aṉata aqai bazubazuto ko Uri ama Bazu se pui Jiu amu kasi, tu seta ke viqo ni ke tuvevo puto.

⁸Ni vo Baṉara vo okai nianiiani maba ko kerukeru, ta kasa oma ike se pui Jiu amu voko mai zoleilo se, ako vota o katimake sole se vovo Tabu ala Auvana, omadeuvo vo o katimele anime Jiua mela jari.

⁹Vota pui edolovoa puariko opa eve anime kasi ni sekasi, ni vota ota ma akoekake seko sarueko poso ako seta ke tuvevo putake sole.

¹⁰Noi sole inio meta meqa zaria meomeovo vo Baṉara meko mai sakeko kale ko duki ama bouro seke tuvevo putani, ko anime ni animeko taite poso pui meba roveovima boriko?

¹¹Pui so me imo! Ako anime ni se ta omadeu pakio meda elou vo Lekasa Jisu ko pakiezato sama roquano kale sole,” kiolake.

¹²Ni koa pado ama padoilo kale ama maba madu ta pui ke kuṉubake so keru seke viqake keru Banabasi ni Paula qo kaseke keru kiadama aqasiele ama iruruputo ko bazu nioqako vo Baṉara o erekema nioqa kale kude se pui Jiu amu kasi.

¹³Ni so keru nioqa qo paika keru pesio nio vo Jemisi ta o pesiake ni eri kiolake: “Didielomo aṉa, me a baerebaere poso mela!

¹⁴Saimone ta lula zakaremu o ike vo Baṉara o imevoa mati vailo se pui Jiu amu tu vota o movo kake tu seta o ṉaviko maba madu ke elo.

¹⁵Komia pesio poso ta ko uria kaseke se poropita madu ke rukuekema, ko Tabu ama Riki kikolani jari,

¹⁶‘Komi quli ko tova aṉata a vaitou, kiola vo Baṉara, ni aṉata vairu a ikou vo Devita ko toutou. Ni aṉata a dova orumukou ko biresuivima ni a dova pizatikou ko.

¹⁷Ni sea kiadama maba poso ta ke kilou aṉa kasi ni kiadamu se pui Jiu amu se aṉa a nokaemeni ta a ṉaviko madu ke elou.

¹⁸So inio kiolake vo Baṉara vo okai bazuteni ko matu lulavo.’ ”

¹⁹Ni Jemisi ta obeta olake pesio ni eri kiolake, “Aṉako kerukeru ta eri nio kikolani. Animeta pui tapata me imo se pui Jiu amu seke liliziani Baṉara kasi.

²⁰Melai animeta me rikieko kama pado leta sekasi tu me bazuemo tu seta pui ke kuo ko sailao ko lula ko katiziako beku poso kasi, ako kota tabu tu kuo sole; tu ke balauvo ke ṉavio kude pauvezato ereko kale azo; ni seta pui ke kuo ke rouraekako biaṉa ni dara.

²¹Ako vo Mosese ko Bazu ta lula ko tiromiovi matu lulavo azo ti kobeta baroa vairutu Jiu amu ko ilusato ko pade poso kale kiadama Sabati ṉaniu kale, ni vo kiolani ta kekai bazubazuta kiadama peuru kale sole,” kiolake.

²²Nio se apositolo madu ni se lotu tanatanamu ta ke padoivake koa pado ama lotu qoqono sate, ni ke pitoemake kake maba poso koa poqala kale azo tu seta ke soroemo se Anitioko Paula ni Banabasi sate kikelake sole. Ni seta ke pitoekake omuqa maba kidi sea lotu qoqono keta ka matu paṉaovani nioqa, Jiudasi, vo Basabasi va kikelani, ni Sailasi,

²³ni seta ke kati soroekake ko leta eri kikolako bazu sama: “Eṉe apositolo ṉela ni lotu tanatanamu ṉela, meko tamania kalea ṉela, ta ṉe joroeka eṉeko roquano kiadama eṉeko visi poso ni kaka poso mea maba poso pui Jiu amu mela Anitioko peuru kale me evani mela kasi, ni Siria ni Silisia.

²⁴Lula ṉe viqa ta kake eṉeko maba poso seke keveni eṉeko poqala kale azo ta tapata ni upotuqu ke imela seke kasekako quli kale; melai eṉeta pui ṉeba soroeme se tu seta so ke imelo.

²⁵Sokale avo inio eṉeta lula ṉe badoi eṉea kiada ṉela tu eṉeko omadeu vatolo kale ṉe bitoemo kake maba poso bazu ke boriko amu mekasi. Seta ke ziovou eṉe ṉe roquekani nioqa sate Banabasi ni Paula,

²⁶nioqa qo toraekeni nioqa ko tapata kama saevo animevo Lekasa Jisu Karisito va nabuluputo kale.

²⁷Eṉeta ṉe joroeka mekasi Jiudasi ni Sailasi, qo melai bazuekoa nioqa koa omadeuma quli eṉe ṉe rikiekake.

²⁸Vo Tabu ala Auvana ni eṉe ta lula omadeu ṉe ika eṉeko zario tu puliama edoloma bouro ta ko elou me tona melai komia qulepo ama bazu poso ko kiada ta me qati vailou, ko eri:

²⁹meko pui kuo koa sailao ko lula ko katiziako beku poso kasi; ni pui kuo ko dara; ni pui kuo ke rouraekako biaṉa poso; ni balauvomo me ṉavi meko pauvezato ereko kale azo. “Meta me qati vailou komi quli poso inio meta uri ama iruruputo me erekou. “Meta emo sai vo Lekasa Jisu ko roquano kale.”

³⁰Ni se bazu ke borikani ta ke soroivake ni seta ke olake Anitioko peuru kale, sai seke padoemekoi kiadamu seke tuvevo putani ni ke katimake ko leta.

³¹Ni so keru sea maba poso ke tiromike keru koa leta, seta keka matu zoleike koa zuvarato sama bazu.

³²Ni Jiudasi ni Sailasi ta poropita kidi nio rosi ama taku kale qo kasekani nioqa sekasi ko zuvarato ni pizatimo ko bazubazu.

³³Ni nioqa sai qo evake saita inio seke tuvevo putani ta ke soroekake nioqa roquano kale ni qota vaitake seke soroekeni maba poso kasi.[12]

³⁵Melai Paula ni Banabasi ta qopeta evake saita Anitioko peuru kale, ni se ni matu kubo madu ta kekai nianiiekatake ni kekai bazubazutake vo Lekasa ko bazubazu.

³⁶Ni kama taku poso ko tova inio Paula ta eri kiolake Banabasi kasi, “Aria tu qe vaito tu qepa soipimo sea lotu maba poso kiadama koa peuru poso kale sai aniqe lula qekai bazubazutekoi vo Lekasa ko bazubazu, tu qe melo noi nio kebe kava se seko lotu saevo kale kio,” kiolake.

³⁷Nio Banabasi ta ova zariake odievo vo Jone Maka tu o lulueko nioqa,

³⁸melai Paula ko kerukeru ta pui ko korota tu odievo vo, ako vota pui opa paike koa iruruputo nioqa sate nioqako kuleto ama talio kale sole, melai vota ota vaite ni o vaeke nioqa Pamipilia sole.

³⁹Nio matu zolizoliekinio qota evake, ni qota pitasiake. Banabasi ta o odievake vo Maka ni qota pakeake Saipirasi udu kale.

⁴⁰Nio Paula ta o pitoevake vo Sailasi, ni qota zolaike, ni seke tuvevo putani ta ke soroekake nioqa vo Lekasa ko vailo sama roquano kale.

⁴¹Ni nioqata qo olake Siria ni Silisia saizama peuru poso kale, ni qo pizatimake se lotu qoqono poso.