Read Bilua Iruruputo 2 Bible Online

Iruruputo 2 - Bilua bible

Iruruputo 2

¹Ni so keru Penetikositi ṉojola ko ṉaniu ko baroake, nio kiadamu seke tuvevo puteni ta ke padoivake kala pado zaekale.

²Ni ota podoloa koi kama pado qurumo ta ko kuevake aukale azo, piza kama ururu ko puzeto ko qurumo jaria viqo ama, ni koa pade se kekai papima ko poro ta kokai sukatake.

³Ni seta ke keake uza jari ama quli, lenio poso jaria kelo ama, ni koa lenio poso ta komai okotake mai sato kiadamu sea maba poso.

⁴Nio sea kiadamu ta omai sukatake Tabu ala Auvana, ni seta ke tanitake kai pesio edoedoloma pesio poso, voa Tabu ala Auvana ko ikirimo kale.

⁵Ni kake Jiu amu ta inisiana Jerusalema ke eveni, Jiu amu ko lotu ko piza kama maba poso seke kuevini sipole kiadama peuru ma peuru kale azo.

⁶Ni so keru seke viqe keru koa ṉiṉoreo, matuma vaki ta ko padoivake. Ni sea kiadamu ta keta matu polosake, ako kiadamu ta ke viqake ke navinavi ko pesio kale seke tuvevo putani ke rukuekema pesio poso sole.

⁷Nio seko vuzeilo ni seko aqasiele kai elo kale seta eri kikelake, “Nia maba poso eria pesio ke evani ta sea kiadamu ti Qalili amu inio!

⁸Nio noi nio animea kiada mela ta meda ma viqa seke pikairikako quli me navinavi ko maba pesio poso kale?

⁹Ako kake mela anime ta Patia azoa mela, ni kake mela ta Midia, ni Ilamu ni Mesopotemia azo, ni Jiudia, ni Kapedosia azo, ni Ponitasi, ni Eisia azo,

¹⁰ni Pirijia, ni Pamipilia azo, ni Ijipi azo ni Libia ranʼazo Sairini peuru ko sipole. Kake mela anime ta Romu azo,

¹¹Jiu amu melai, pui Jiu amu seke luluekani Jiu amu ko lotu melai, ni kake mela anime ta Kiriti ni Arebia azo—melai animea kiada mela ta mebe tama viqa se kekai bazubazutake quli me navinavi ko maba pesio kale koa matuma quli vo Baṉara o erekako!” kikelake.

¹²Seko vuzeilo ni niuniala kale seta keta kuimaekiniake ke ṉavio kude, “Loma ikio komi ko kio ni kalo?” kikelake.

¹³Melai kake maba poso ta kemai balebaleitake seke tuvevo puteni, ni eri kikelake, “Nia maba poso ta piza kama ju ikio tairuru ko ima ni sarube ko ima!” kikelake.

¹⁴Ni Pita ta o lojoake sea toni omadeu vokale ama apositolo madu sate ni vota o tanitake pesio matuma kora kale koa matu padopadoilo kasi, ni eri ma kiolake, “Me Jiu amu mela ni mea kiada mela Jerusalema me evani mela, meta didielomo aṉa tu a melai bazueko komi ko kio ni kalo.

¹⁵Nia maba poso ta pui piza kama ju ikio sarube ko ima, me memai kuirikani jari; ako erisaṉa ta siakava koloko vikale inio kobe eva sole.

¹⁶Melai komi ta vo poropita Joili o pidokikema ikio, ko eri ka kiovema,

¹⁷‘Komi quli kio aṉa a ereko ama tovama taku kale kiola vo Baṉara: Aṉata a raibikou aṉako Auvana kiadamu tona: Meko lasive meqora poso ni reko meqora poso ta kekai bazutou aṉako bazubazu; meko vairu ama maba poso ta ke kelou kama kelokelozato ni meko qole ama maba poso ta ke uloitikou kama uloito.

¹⁸Tuvevo, se aṉako nabulu poso lasive amu ni reko amu ta amai raibivou vo Tabu ala Auvana koa taku kale, ni seta kekai bazubazutou aṉako bazubazu.

¹⁹Aṉata a redanikou ko aqasiele ama quli aukale ni a erekou ṉaloṉalo ama quli miduku kale. Sai ta dara kota elou, ni uza, ni mota kama kolu,

²⁰vo ṉaniu ta kutumana ota elou, ni kaboso ta dara jaria diridiri ota elou, puliako vo Lekasa ko matuma ni ṉaṉaidara kama Ṉaniu barolo.

²¹Nio vo o paseko ala ko tauvezato vo Lekasa kasi ta o pakiovou.’

²²“Me Izireli amu mela, meta viqomo komia bazu! Vo Baṉara ko vai zoleilo ni kativo voko iruruputo Nazareti ala Jisu ta ko uria purata mekasi kiadama aqasiele ama urikato ni aqasiele ama iruruputo kale vo Baṉara o erekema vokale. Me ṉavi meta meqai nianiiani mela ko quli, ako kota kota erei koi mekasi sole.

²³So keru vo o katiziovi keru meko pizato kale vo Baṉara ko vatolo ni korokoroti kale, meta mema luavive vo se kutumana kama maba madu ti seta ke mela vouvaevake vo korosi topi.

²⁴Melai Baṉara ta o saevivake vo voukale azo, ni vota o rupasivake vo koko sisikara kale azo, ako ko vou ta pui kopa roveovi noqola pirieve vo sole.

²⁵Ako Devita ta eri kiove vo Jisu kale avo sole, ‘Aṉata a veve vo Lekasa ta vota kiada keru obeta elou aṉako kuleto vasi, vota aṉako sipole, so sole aṉata pui tapata aba elou.

²⁶Sokale avo inio ko zoleilo ta kolai sukata, ni aṉako pesio ta kokai sukata ko zoleilo. Ni rouka vou kobe lovo ala maba lala inio ko aṉa, melai aṉata a dodemuilou tu a atanaziekou koa tuvevo ama saevo aṉa a qovo ama;

²⁷ako ṉota pui ukaka ṉoba ilou voumu ko zaekale sole; ṉota pui ṉoba zarielou aṉa ṉovo tabu ala nabulu lala tu aṉata a japeo niami kale.

²⁸Ṉota ṉola kaseke ko keve saevo kale ko baroako, ni ṉoko zoleilo ta kolai sukatou ṉoko tanama kale,’ kiove.

²⁹“A lolo poso, aṉata a melai uria bazuekou ko quli vo animevo matula taite voa Aikovakova Devita kova ereima quli. Vota o vouvake ni ke mutavake, ni voko niami ta kobeta eva koi anime kasi vairutu.

³⁰Melai vota kala poropita ni vota okai nianiiovi vo Baṉara o vati korotikema quli: Baṉara ta o erekake ko matu piza kama leveleveo tu vota aikovakova o ivou kala pado maba Devita ko vikuvikula kale ala Devita o evevoa lekasa puo jari.

³¹Devita ta o keve vo Baṉara ko mata saevivo voa Pakio voukale azo ko kilo ama taku kale ama, so sole vota okai pesiovi ko, nio vota so kiolake, ‘Ṉota pui ukaka ṉoba ilou voumu ko zaekale sole; ṉota pui ṉoba zarielou aṉa ṉovo tabu ala nabulu lala tu aṉata a japeo niami kale.’

³²“Vo tisoiko voa Jisu vo Baṉara o saeviveni voukale azo, ni eṉea kiada ṉela ta ṉeqai zomane kelo voko tova saevo.

³³Vovo Mama Baṉara ta o koivieve vo Jisu aukale ni vota o papueve vo o ṉavi Baṉara ko palo rana vasia rana, ni vo Jisu ta o voake vokasi azo vo Tabu ala Auvana vo lula ova kaseveni tu o kativo. Ko erisaṉa meme qeako ni me viqako quli, ko ikio vo Jisu ko katizato vo eṉe tona o ṉelai raibikake.

³⁴Ako Devita ta pui opa koivini nio aukale, melai vota o rukueke ko eri kio, ‘Vo Baṉara ta eri kiolake aṉavo Lekasa kasi: Papi koi aṉako palo rana vasi

³⁵ni aṉata zara a imou ṉoko kana poso ni ṉoko kiti iviivi a imou se,’ kiolake.

³⁶“So sole kiadama Izireli amu mela ta kai nianiiomo komi ko tuveano, ta vo Jisu meme vouvaeveni korosi topi, vo inio voa Jisu, vo Baṉara Lekasa ni Pakio o iveni!” ma kiolake vo Pita.

³⁷Ni so keru se maba madu ke viqa keru ko quli, kota kota ma jataekake seko bulo ni eri kikelake Pita ni sea kiadama apositolo madu kasi, “Baerebaere poso, sole eṉeta noi nio ṉe qalou?” kikelake.

³⁸Nio Pita ta eri kiolake sekasi, “Mea kiada mela ta liliziomo muli meko sarueko poso kasi azo ni bapitaiso puimo vo Jisu Karisito ko ṉikale, nio meko sarueko poso ta kota mela akoilou; ni meta me qovou vo Baṉara ko katizato, vo Tabu ala Auvana.

³⁹Ako vo Baṉara ko leveleveo ta me kaqe ni meko meqora poso kaqe, ni kiadamu se vaṉa kebeta evani—sea poso kaqe vo Lekasa animevo Baṉara o nokaemo amu o ṉavi kasi,” kiolake.

⁴⁰Ni Pita ta o balauvimake se komi kale ni mata kubo voko piza kama pesio kale, ni eri ma kiolake, “Meta pakiemo koa koqotato kasi azo vo Baṉara o soroeko ama se erisaṉama ruqe ama maba poso kasi se kevai keduini sevo Pakio!” ma kiolake.

⁴¹Ni kubo madu ta ke tuvevo puekake voko bazubazu ni seta bapitaiso ke evake, ni zouke vuro maba madu ta ke amaqeake seke tuvevo puteni ko poqala kale koa ṉaniu kale.

⁴²Ni seta ke vinaitake se apositolo madu ko nianiiekato tama viqo kale kiada keru, ni kekai zomanake seko baerebaereo ko saevo, ni seta omadeu vuato ni vararaito ke evake.

⁴³Ni se apositolo madu ta ke erekake kubo urikato ni aqasiele ama iruruputo, so sole kiadama maba poso ta komai sukatake vo Baṉara tava paṉao.

⁴⁴Ni sea kiadamu ke tuvevo puteni ta omadeukoi ke evake ni seta kekai puarikiniake seko lomaloma ke ṉavio kude.

⁴⁵Seta kekai tatabaraovake mati seko miduku ni seko lomaloma ni seta kemai tauvekake koko seleni sea kiadamu seke toraekeni ko tapata seko poqala kale amu.

⁴⁶Ni seta ke padoivake kiadama ṉaniu poso Jelepade ko poro kale omadeu vatolo kale, ni seta omadeu vuato ke evake seko zoleilo ni inobe sate,

⁴⁷ni seta ke ilusivake vo Baṉara, ni kiadama maba madu ta kemai zoleike se. Ni kiadama ṉaniu vo Lekasa Jisu ta o padoemake se ṉaniu ma ṉaniu ke liliziovini ni ke koeni ko pakio seke tuvevo puteni ko poqala kale.