Read Bilua Iruruputo 24 Bible Online

Iruruputo 24 - Bilua bible

Iruruputo 24

¹Ni sike ṉaniu ko tova vasi nio vo Ṉisa Siama Ananaiasi ni kama lotu tanatanamu ni kala loea Tetalasi va kikelani ta ke olake Sizaria peuru kale. Ni seta ke olake Qavuna Filekisi ko tanama kale tu kasa ke iko se kevai kuirikako quli vo Paula.

²So sole seta ke amaqivake vo Paula, ni Tetalasi ta o taniekake tava lulueko kaseko koa kuiripato poso ni eri kiolake: “Matu raura kalaṉa, Qavuna Filekisi, ṉoko uri ama odikato kale eṉeta lula rosi ama taku ṉe eva bule kale, ni ṉoko qulepo ama iruruputo kale inio eṉeko peuru poso kale ta uri ama quli ko ereiva ni ko besieka ko ruqe ama quli.

³Eṉeta ṉeqa zoleiva komi quli komia kiadama peuru poso kale amu ke kavani kiadama taku, ni eṉeta ṉeṉa matu zuraiva ṉo.

⁴Aṉata pui aṉa zaria ṉo tu a jairokiṉo, Sokale avole aṉata a baseṉa tu ṉoko uri kale ṉota taṉela viqe eṉeko puju ama pesio.

⁵Eṉeta lula ṉevai potoi nea maba ta vota matu ruqe meomeo kala maba, ni o taniekani ko ṉiṉoreo ko ikirato se Jiu amu kasi peuru ma peuru kale ke evani, ni vo inio kala pado se Nazareti ama poqala ko kuleto ota ka evani.

⁶Ni vo inio o madoekeni sarosaroro iko ko Jelepade voko kapokapoto kale, ni eṉeta ṉe noqoeve vo.[19]

⁸Sole ṉo ṉavi ṉo inio ṉo quimaevou nea maba inio ṉota ṉoda vai nianiiovou koa kiadama quli eṉe lula ṉevai kuirikako vo,” kiolake.

⁹Ni se Jiu amu sai ke zomaneni ta ke kasekake koa kiadama quli ta tuvevo ama, kikelake.

¹⁰Ni vo Qavuna ta o siqailivake vo Paula tu vota o pesio, nio Paula ta eri kiolake, “Aṉata aqai nianiia ta ṉota ṉo ereka ko titizato komia matuma qoqono kale kubo sabere poso, so sole aṉata ada zoleiva tu a qaraqarailo a ṉavi ṉoko kuleto.

¹¹Matu olu ṉokasi tu ṉoda ka kelo komi ko tuveano, ta pui kokai paloasa toni omuqa ṉaniu aṉa a qeve keru azo Jerusalema ilusatole.

¹²Ni se Jiu amu ta pui kepa tala keve aṉa vati aivekinio kala Jelepade kale, ni odiemo ṉiṉoreo kale se maba poso, se Jiu amu ko ilusato ko pade poso kale ma mata kama zaekale Jerusalema peuru kale.

¹³Ni seta mata pui ke rovea tuvevo saṉa iko ko quli se aṉa kelai kuirikako quli.

¹⁴Aṉata aqai eraeraova komi quli ṉokasi: aṉata a ilusiva vo eṉeko taite poso vo Baṉara ko se lipalipa kama keve ka kikelako kale. Melai aṉata a duvevo puekani lala kiadama riki poso kale ama quli vo Mosese ko Bazu kale ama ni se poropita madu ke rikiekema buka poso kale ama.

¹⁵Ni aṉako keru vo Baṉara o ereko ama quli kasi ta omadeuvo seko jari ama, se sidopu amu ni se ruqe amu ta mata o saevimou voukale azo kikolako.

¹⁶So sole aṉata a matu madoe kiada keru sidopua elo Baṉara ni maba ko kuleto tu aṉako kerukeru ta pui kopa titizilou aṉa.

¹⁷“Aṉata a vaeke ko Jerusalema kubo sabere poso, ni aṉata mata a qeve sai ni a qati keve kama seleni a mabamu kasi ni mata a ṉavi ta a ereko ko siqasiqa kialake.

¹⁸Ni so keru aṉa komi abe ereka keru inio seta ke lati inotake aṉa Jelepade kale so keru aṉa lula a okotika keru aṉako bulebuleilo ko iruruputo. So keru ta puliama matuma vaki kopa eve aṉa sase ni puliama ṉiṉoreo kopa eve koa taku.

¹⁹Melai kake se Jiu amu Eisia ranʼazo ke kuevini ta sai kebeta evake, se inio ke male tu kilo ṉoko kuleto ni kelai kuiriko ko ruqe, ikoana seko lai ṉuruṉuruo tea.

²⁰Melai pui so tea, nita ke kasekou inio aṉa a erekako ruqe ni sarueko keta la kevema so keru aṉa a loje keru se Kauniseli madu ko tanama kale—

²¹melai seta kekai korakorai esa aṉako pesio so keru a velavelaova keru a loje keru seko kuleto, aṉa eri kiave keru, ‘Aṉata a ditizia meko kuleto vairutu aṉako tuvevo pueko kale ko mata saevo voukale azo ama,’ ” kiolake.

²²Nio so keru vo Filekisi o viqa keru komia pesio vota o dokolikake koa titizato, ako vota okai uria nianiiake koa Jisu ko lotu ko keve sole, ni vota o bazuemake se ni eri kiolake, “So keru vo Laisiasi solodia madu vo kuleto ala o barolou keru inio aṉata a mela pitasikou meko aivekinio,” ma kiolake.

²³Ni vota o bazuevake kala pado sirula tu vota o vati uria vailo vo Paula, melai vota oma zarievou tu voko baerebaere poso ta ke kilo vokasi tu seta ke kativo vo oka zariovo ama quli.

²⁴Ni kama ṉaniu poso ko tova inio Filekisi ta o kuevake voko reko Darusila[20] sate, ni kota kama Jiu ama reko. Ni vota o nokaevake vo Paula tu vota ota va viqo voko kai bazubazuto vai oqu vo Jisu Karisito

²⁵Ni so keru Paula okai pesipesita keru ko sidopu ni inobe ama kalo, ni ko kilo ama ṉaniu kale ko ereilo ama titizato, inio Filekisi ta ota ṉake ni eri kiolake, “Ṉota ṉo rovea saqoro erisaṉa. Aṉata mata a nokaeṉou ṉo so keru aṉa uri ama taku a qovou keru,” kiolake.

²⁶Melai mata vota o kerukerutake ta koa taku kale inio vota o kativou ko zuzuku ko seleni tu o rupasio kiolake so sole vota o odievake vo kubo taku ni o vati pesipesitake.

²⁷Ni omuqa sabere kota paloasake inio Pokiasi Fesitasi ta o besievake voa Qavuna Filekisi. Ni Filekisi ta oka zariake zolemo se Jiu amu so sole vota o vaevake vo Paula pirito pade kale.