Read Bilua Iruruputo 25 Bible Online

Iruruputo 25 - Bilua bible

Iruruputo 25

¹Ni zouke ṉaniu ko tova inio Fesitasi ta o baroake Jiudia rana sai vo o taniekekoi Qavuna elo, ni vota ota olake Sizaria azo Jerusalema,

²ni se raura kama siama madu ni se Jiu ama tanamu ta keta olake vokasi vai kuirikole vo Paula. Ni seta kevai matu titiake vo Fesitasi

³tu vota o vati kilo vo Paula Jerusalema tu o zolemo se, ako seta lula ke ereke ko nakatato tu ke vouvaevo vo Paula voko talio kale Jerusalema kikelake sole.

⁴Ni Fesitasi ta o opatake ni eri kiolake, “Paula ta kebe vati vaila Sizaria pirito pade kale, ni aṉata pui vaṉa inio sai ada vaitou.

⁵So sole kake meko tanamu ta ke ziovou aṉa sate Sizaria tu kepa vai kuiriko voa maba sai, vota lula o sarueka kama quli kimevou ta,” kiolake.

⁶Ni Fesitasi ta o evake se sate sai siotolu ma toni ṉaniu sai kazo inio vota ota olake Sizaria peuru kale. Ni koko raneo kale inio okai papuake voko titizato ko papupapu ni vota o bazuemake voko maba madu tu ke amaqivo vo Paula.

⁷Ni so keru Paula o baroa keru sai, nio se Jiu amu seke kuevini Jerusalema azo ta ke levoevake tava lojo voko levoano ni ke taniekake ereko ko matuma kuiripato vokasi, ko pui ke roveako kasa taka iko koko tuveano.

⁸Melai Paula ta ota qaraqaraike pesio ni eri kiolake, “Aṉata puliama sarueko a ereka ko aṉa aqai bikoirikako ko Mosese ko Bazu se Jiu amu ke luluekako ni kai kedu ko Jelepade ni vai kedu vo Romu ala Matu Aikovakova,” kiolake.

⁹Melai Fesitasi ta oka zariake tu zolemo se Jiu ama tanamu so sole vota o kuimaevake vo Paula ni eri kiolake, “Ṉota ṉobe ka zariovou tu zio Jerusalema ni me madoekou taka vailiko komia kuiripato ko tuveano aṉako tanama kale sai kio?” kiolake.

¹⁰Nio Paula ta eri kiolake, “Aṉata abeta lojoa vo Romu ala Matu Aikovakova ko titizato ko zaekale, sai aṉa a malea koi tu a vatoilo. Aṉata pui a erekani lala kama sarueko se Jiu ama tanamu kasi, ṉo ṉavi melai ṉobe kai uria nianiia.

¹¹Aṉata lula a bazoka Mosese ko Bazu ni a ereka kama quli koko reketekete ta vou aqai toraeko ama tea, aṉata pui aba pasetou tu ada ka soqoilo ko. Melai se kelai kuirikako quli aṉa ta pui nio tuvevo ama ka kinola, sole puliala ta o zarizia vaelo seko ṉase topi. Aṉata ava zaria vo Romu ala Matu Aikovakova tu vota o vatoelo aṉa voko titizato kale,” kiolake.

¹²So sole vo Fesitasi ta o mati pesipesitake voko maba poso saita inio eri kiolake, “Ṉota ṉoqa zaria zio Matu Aikovakova kasi tu vota o vatoeṉo voko titizato kale kiṉola, sole uri tu ṉota ṉo ziovou vo Matu Aikovakova kasi,” kiolake.

¹³Ni kama ṉaniu poso ko tova inio Aikovakova Aqiripa ni Benisi ta qo kuevake Sizaria tu qopa zolevo vo Fesitasi nioqako soipivo kale vo kiqolake.

¹⁴Lula kubo ṉaniu qota evake nioqa sai, nio Fesitasi ta o vati pesiake vo Aikovakova Aqiripa vo Paula kale avo, ni eri kiolake, “Inevoana kala pado maba koi pirito pade kale obeta evani Filekisi o vaeveni sai.

¹⁵Ni so keru aṉa a qeve keru Jerusalema, ta se raura kama siama madu ni se Jiu ama tanamu ta ke lati kasekake koa kuiripato se kevai kuirikema vo ni seta ke paselake aṉa tu aṉata a ditizivo tu vota o vou kikelake.

¹⁶Melai aṉata amai bazuekake se ta anime Romua mela ta pui animeko kalo ikio tu vai kuiriko kala ni vouvaevo, melai vota o toraemou seke vai kuirikani saita tu vota o opatikou se kevai kuirikako quli.

¹⁷Ni so keru seke kue keru koi, aṉata maba pui a daruanake melai maba koko raneo kale ala ṉaniu kale inio aṉata a daniekake ko titizato ni aṉata a bazuemake aṉako maba poso tu ke amaqivo voa maba.

¹⁸Nio se kevai kuirikani melai ke lojoake, melai seta pui kevai kuirikake kama vou sama matu ruqe ama quli ko aṉa aqai kuirikevo.

¹⁹Melai koa kiadavo se kikevevo ta vati aivekinio vo ke ṉaviko lotu ko kio kale avo ni vo Jisu o ṉi sala maba kale avo, vo o vovini, melai Paula ta o kasekake ta vota mata ota saeve voukale azo kiolake sole.

²⁰Aṉata pui a uria paqumukake tu a bitasiko koa bazu poso kale avo, nio aṉata a quimaevake vo Paula ta o zariovou ta o ziovou Jerusalema tu kepa vai kuirikou sai komi quli.

²¹Melai Paula ta o pasetake tu vota o kovou ko titizikinio Romu ala Matu Aikovakova kasi tu vo inio ova pitasikou koa aivekinio vo ni seko kiolake. So sole aṉata a bazuevake vo tu vota obeta elo koa vailo kale ti kobeta barolou aṉa a roveovou keru soroevo vo Romu ala Matu Aikovakova kasi,” kiolake.

²²Ni Aqiripa ta eri kiolake Fesitasi kasi, “A ṉavi ada va viqou nea maba.” Nio vo Fesitasi ta eri kiolake, “Ṉota ṉoda va viqou vo leama ṉaniu kale,” kiolake.

²³Nio koko raneo kale inio Aqiripa ni Benisi ta qo kuevake ni qo amaqeake matuma rauraeko kale nioqa koa taku koa titizikinio ko matu lose kale raura kama solodia poso sate ni koa peuru kale ama tanatanamu sate. Nio Fesitasi ta o bazuemake se tu seta ke amaqivo vo Paula.

²⁴Ni Fesitasi ta eri kiolake, “Aikovakova Aqiripa ni mea kiada mela meme evani mela koi anime kasi: Meta me vea nea maba kiadama se Jiu amu kevai kideipani, komia zaekale ni so jari Jerusalema, ta lula kelai nurunurua aṉa. Seta ke matu upaupatake tu vota taukavole o vou kikelake.

²⁵Melai aṉata pui a rovea tava kelo kama quli vou ko male ama tu vota o vou. Vota lula o erekala voko paseto tu vota o ziovou Romu ala Matu Aikovakova kasi, ni aṉata lula a vatoeka tu a joroevo.

²⁶Melai aṉata pui aqai nianiia aṉa a rikieko ama quli koa voko tavai bazuto ko leta kale. So inio aṉata lula a vati kuela koi meko tanama kale—ni matuma quli ta ṉoa Aikovakova Aqiripa ṉa ko tanama kale! — nio so keru aṉa aqai nianiiovou keru voko vai kuiriziako quli, nio aṉata ada va rikiekou ko quli.

²⁷Ako kota pui uri ama quli aṉa kasi tu aṉata a joroevou kala piri kale puliako uria zakaremu elo vo maba kovai kuiriziako quli,” kiolake.