Read Bilua Iruruputo 26 Bible Online

Iruruputo 26 - Bilua bible

Iruruputo 26

¹Nio Aqiripa ta eri va kiolake vo Paula, “Ṉota ṉo roveovou pesio tu ṉo qasekou ṉo ṉavi kale avo.” So sole Paula ta o totozikake voko ṉase tu o pesio nio eri kiolake voko qaraqarailo sama pesio kale:

²“Aikovakova Aqiripa! A qerukeruta ta vairutu ta mauru ada eva ṉoko kuleto aṉako qaraqarailo kale a ṉavi koa kiadama quli se Jiu amu aṉa kelai kuirikako kasi azo,

³ako ṉota ṉoqai uria nianiia kiadama Jiu amu ko kalo poso ni kiadama seko pesipesi poso. Aṉata a baseṉa ṉo tu ṉota didiela ṉoko inobe kale.

⁴“Kiadama Jiu amu ta kelai nianiia aṉako elo koizama aṉa vairua lala keru azo. Seta kekai nianiia aṉako pado ama elo aṉako saevo kale, kuleto ta a ṉaviko peuru kale ni koko tova ta Jerusalema.

⁵Seta kelai nianiiovi aṉa lulali azo sole seta keka zariovou tea ke kaseko inio, aṉata a eveni lala sea maba poso ko poqala kale se matu piza kavole ke lulupatani animeko lotu kale se inio se Parese madu.

⁶Ni vairutu aṉata abeta lojoa titizikinio kale aṉako kai keru kale avo vo Baṉara ko leveleveo ko oma kasekema animeko taite poso kasi tu o ereko—

⁷koa leveleveo animea toni omuqa toutou mela meqai keruako tu me qovo ama ka kimelako, anime me ilusivani mela vo Baṉara ipu ni ṉaniu. Ni komia keru kale inio, aikovakova Aqiripa ṉa, se Jiu amu ta kelai kuirika!

⁸Noi sole inio me koi me evani mela ta pui me rovea tuvevo pueko vo Baṉara ta o saevima se voumu kio?

⁹“Lulali aṉa melai a qerukerutake ta sidopu ikio tu aṉata a erekou kiadama quli aṉa aqai kanaekiko ama vo Nazareti ala Jisu ko ṉi.

¹⁰Ni ko ikio aṉa a erekema Jerusalema. Aṉata a qoake ko zariekato se raura kama siama madu kasi azo, ni a vaemake kubo Baṉara ko maba madu pirito pade kale; ni so keru ke vouvaemo kikeve keru, ta aṉa inio kala pado lala aqa zariovini lala seko vouvaemo.

¹¹Kubo taku ta aṉa inio a lipilipiteni lala animeko ilusato ko pade poso kale koqotaemelo se, ni aqa zariani lala zuzuemo tu seta keta ka zolio seko oqu. Aṉata amai matu iqaike se so sole aṉata a qeveni lala edoloma peuru poso kale pui Jiu ama peuru poso kale tu sai melai a naquemo sea pitasa maba madu.

¹²“So kale avo inio aṉata a qeve Damasikasi se raura kama siama madu ko soru kale.

¹³Aikovakova Aqiripa ṉa, ṉadale ama taku kale koa keve tona ota podoloa koi aṉata a qeake kama pado zakaremu ṉaniu ko tipatipato kokai paloasako, kota ko kuevake ni ko qoloelake aṉa ni se aṉa sate ke taliovini.

¹⁴Ni eṉea kiada ṉela ta ṉe biake muli miduku kale, ni aṉata a viqake kama pado kora ko eri kikovema aṉa kasi Hiburu pesio kale, ‘Saula, Saula! Noi sole inio ṉota ṉo naquela aṉa? Ako ṉota ṉo dolaiva ṉo ṉavi pazoilo kale, omadeuvo ko bulumakau koko tupaekako jari vo bulumakau o kati vailani ko daṉa sole.’

¹⁵So sole aṉata a quimanaoke ni eri kialake, ‘Lalaṉa inio ṉo Lekasa?’ Nio vo Lekasa ta o lati tiorikake, ni eri kiolake, ‘Aṉa Jisu lala ṉoṉo naquelani lala.

¹⁶Melai ṉota zolai ni loje. Aṉata kasa aṉai eva ṉo ako a bitoeṉa ṉo tu ṉota aṉavo nabulu ṉo elou. Ṉota ṉomai bazuekou maba poso ṉoṉo ilania lelo aṉa vairutu ni ko quli aṉa aṉa kaseko ama quli ko kilo ama taku kale.

¹⁷Aṉata a bakieṉou ṉo se Jiu amu ni se pui Jiu amu ko ṉase topi azo sai aṉa ṉo a joroeṉoa koi sekasi.

¹⁸Ṉota ṉoda ma toiratikou seko vilu ni no lilimou se kutumana kale azo zakaremu kale, ni vo Setani ko pizato kale azo Baṉara kasi, nio seko lai oqu kale aṉa ta ada ma akoekou seko sarueko poso ni seta ke kovou seko zae se Baṉara tabu o imeni sate.’

¹⁹“Sokale avo inio, Aikovakova Aqiripa ṉa, aṉata pui aba bikoirike koa kelokelozato aukale azo ko kuevima aṉa kasi.

²⁰Kuleto ta Damasikasi ti Jerusalema ni koa pado ama Jiudia ni mata se pui Jiu amu kasi aṉata aba bazubazute sai tu seta ke lilizio seko sarueko poso kale azo ni ke lilizio Baṉara kasi ni ke ereko ko quli seko lilizio kasa ko iko ama.

²¹Komi ko kio kale avo inio se Jiu amu ta ke saputilake so keru aṉa Jelepade kale abeta eve keru ni seta ke madoeke tu ke vouvaelo aṉa.

²²Melai vo Baṉara ta o tauvelake aṉa ti kobeta baroa komia ṉaniu, so sole aṉata abe lojoa ni avai bazubazuta vo Jisu mea kiada mela kasi, silo ni matu. Ko quli aṉa a qasekako quli ta koa ijama quli se poropita madu ni Mosese ke kasekema ta kota elo ama quli ka kikevema ikio, ko eri;

²³vo Baṉara o soroevani Pakio ta o vouvou ni vo inio kuleto ala maba vo o saevo ala voukale azo, tu o katimo ko pakio ko zakaremu se Jiu amu ni pui Jiu amu,” kiolake.

²⁴Ni so keru vo Paula soa qaraqarailo pesio o eva keru, nio Fesitasi ta ovai upaupatake vo, “Ṉoda sarubeputa inio ṉo Paula! Noko matuma nianiio ta ko sarube pueṉa ṉo!” kiolake.

²⁵Melai Paula ta eri kiolake, “Aṉata pui a jarubeputa, matula Qavuna Fesitasi ṉa. Aṉata inobea pesio aqai eva ko tuveano.

²⁶Aikovakova Aqiripa, aṉata parani putole a besia ṉokasi, ako ṉota ṉoqai nianiia kiadama komi quli sole. A duvevo pueka ta ṉota lula ṉo viqa komia kiadama koko ereima quli, ako komi quli ta pui ko mutaivako kama livaṉale sole.

²⁷Aikovakova Aqiripa, ṉota tuvevo ṉo ikani ṉa inio se poropita madu ke rikiekema quli kio? Aqai nianiia ta ṉota tuvevo ṉo ikani ṉa!” kiolake vo Paula.

²⁸Nio Aqiripa ta eri kiolake Paula kasi, “Ṉo qerukeruta ta komia puju ama taku kale inio Karisito o luluevani maba ṉo ilo kinola kio?” kiolake.

²⁹Ni Paula ta o opatake ni eri kiolake, “Rosi ama taku kale ma puju ama taku kale, aṉako vararaito kale vo Baṉara kasi ama ta ṉo ni mea kiada mela me meda la viqani mela aṉako pesio vairutu ta aṉa jari me elou, melai pui komia piri kale,” kiolake.

³⁰Nio vo Aikovakova Aqiripa, ni Qavuna Fesitasi ni ko Benisi ni sea kiadamu sai ke evani ta ke lojoake ni keta saqorake titizikinio ko zaekale azo.

³¹Ni seke saqora keru seta keta pesipesitake ke ṉavio kude ni eri kikelake, “Nea maba ta pulia quli o ereka tu vota o vou ma vaevo pirito pade kale,” kikelake.

³²Nio Aqiripa ta eri kiolake Fesitasi kasi, “Nea maba ta ota roveo nio rupasio, pui opa pasetala tea tu o zio Romu ala Matu Aikovakova kasi,” kiolake.