Read Bilua Iruruputo 27 Bible Online

Iruruputo 27 - Bilua bible

Iruruputo 27

¹Ni so keru seke vatoeka keru tu eṉeta ṉeda pakeo vaka kale Itali, inio Paula ni mata kake maba poso pirito pade kale ke evani ta ke vaemake kala Romu ala sirula ko ṉase topi, Juliasi o ṉi sala. Vota kala pado vo “Romu ala Matu Aikovakova ko Vaki Poqala” kale ala.

²Ni eṉeta ṉe zazuake kala Adaramitiumi vaka topi vo o zio kiolani Eisiama keta kale ama peuru poso kale, ni eṉeta ṉe dadaovake. Ni Arisitakasi, kala Masedoniala maba Tesalonaika peuru kale ala ta o lulueṉelake eṉe.

³Ni koko tovala ṉaniu kale inio ṉe varerikake Saidoni peuru kale. Sai nio Juliasi ta o zarievake vo Paula tu vota o zio melole voko baerebaere poso tu seta ke tauvevo vo kiolake sole.

⁴Ni eṉeta ṉe dadaovake sai kazo ni kapea ururu ko ṉela loake so sole ṉeda babatake Saipirasi udu ko daipadaipa.

⁵Ni eṉeta ṉe bakekake ko Silisia ni Pamipilia ama kolo ni ṉe varerikake Laisia rana Maera peuru kale.

⁶Sai nio voa sirula ta o veake kala vaka Alekezadaria azo, Itali o zio kiolani, so sole vota o zazueṉelake eṉe sai.

⁷Ni eṉeta matu oluoluavole tepe kale ṉe daliake kubo ṉaniu ni koa talio ta matuma tapata kale kude inio eṉeta ṉe varerikake Kanaidasi peuru kale. Kapea ururu kale ta pui ṉe roveake togarao, nio eṉeta pui sidopua talio ṉe evake, so sole eṉeta ṉe bakeake Kiriti udu ko daipadaipa vasi, ni ṉeqai alokatake ko Salomone kelekele.

⁸Ni eṉeta ṉe babatake koa keta ko sipole ni matuma tapata kale kude eṉeta ṉevai baroake kala zavaṉa, Uri ama Titiana ka kikelakoi, kota pui vaṉa Lasia peuru kasi azo.

⁹Ni eṉeta matu tu ṉeda keuvake sai, ti kobeta baroake inio ko tapata kama sabere ko taku so keru ko vaka poso pui ko talia keru, ako eṉe sai maqa inio sarueko ko akoekato ko ṉojola ko ṉaniu ta lula kota paloasake sole. So sole Paula ta o katimake se komia balauvato sama pesio:

¹⁰“Meva, aṉata a qea ta animeko talio koi kazo ama ta tapata kota elou, zurana ta kota matu niumailou ni vaka melai, ni anime melai me voukale,” kiolake.

¹¹Melai vo Romu ala sirula ta okai keruake vo vaka ko vilua pikopiko ni koa vaka sala kiqolani, vota pui o tuvevo puekake Paula kiolani.

¹²Ni koa titiana ta pui uri ama tu kai elo sabere ko sarosororo ko taku kale ama taku kale; so sole kubo maba madu ta keka zariake tadao koa titiana kale azo tu ke madoekou tu kekai barolo ko Poenikisi ni sai ke elo koa sarosaroro ko taku kale. Poenikisi ta kama pado Kiriti udu kale ama titiana sama peuru ikio, koko ṉaniu ko sulupakoi vasia rana ko evako, palo ni made rana veukaveuka sama. Sai nio uri ama daipadaipa sakoi koa sabere ko taku.

¹³Ni uri ama ururu ta kota tanitake puzeto, nio sea maba poso ko kerukeru kale ta keta roveovou talio kikelake, sole seta ke koiviekake ko titi, ni seta ke babatake Kiriti udu ko keta ko sipole.

¹⁴Melai puliako tu keu nio matu piza kama ururu ta kota buiritake—koa udu kale ama Togarauru, Eurakuilo ko ṉi sama, Quriki pesio kale.

¹⁵Kota ko pazovake voa vaka ni pui o roveake togarao koa ururu kale, so sole koa kapea ururu ta ko vabaliṉelake ni ko boriṉelake.

¹⁶Ni eṉeta ṉe daliake ni ṉeqai alokata keru ko Kauda sasa udu ko daipadaipa, ta sai ta sasa bule. Sai nio matuma madolo kale ṉe zazuevake vo diqi tu pui o mumailo.

¹⁷Seta ke zazuevake vo diqi, ni ke vati vinatake lupivo qusini kale voa vaka tu pui o potasio kikelake sole. Seta keta ṉake kailo Libia keta kale ama karokoni bolebole kale so sole se vaka topi amu ta ke soloekake ko tepe ni ko ururu ta ko soleṉelake eṉe.

¹⁸Ni ko matu piza kama varo ta pizatole kobeta olake, nio koko raneo kale inio ke taniekake ṉamuko kama voa vaka ko zurana,

¹⁹ni koko zouke ala ṉaniu kale inio seta ke ṉamukake voa vaka ko iruruputo ko lomaloma.

²⁰Kubo ṉaniu eṉeta pui ṉe roveake velo vo ṉaniu ni pui ṉe roveake kelo ko Suti poso, ni ko ururu ta kobeta olake matu buirito. Ti “Koe so tinia, animeta pui meba pakiovou,” kiṉelake.

²¹Ni rosi ama taku sea maba poso ta pui ke vuatake, so sole Paula ta o lojoake seko kuleto ni eri kiolake, “Meva, meta meda la viqe ko pui me dadao Kiriti azo mela kio aṉa tea, animeta pui nio meba toraeko komia pisailo ni duluilo.

²²Melai aṉata a basemela me, tu meta pui me ṉalou! Ako mea kiada mela ta meda pakiovou sole, melai vaka o kiada pala inio ota niumailou.

²³Ako raisi ipu kale ta kala pado vo Baṉara vo mateana ta o kuela ana kasi. Aṉata voa Baṉara vo nabulu lala ni a ilusivani lala vo.

²⁴Ni eri pa lati kiolala, ‘Ṉota pui ṉalo Paula! Ako ṉota ṉoda ziovou ni ṉoda lojolou sole vo Matu Aikovakova ko tanama kale Romu, ako Baṉara ta so kiove sole. Ni vo Baṉara voko uri kale vota o pakieṉou ṉo ni seke zazuani vaka topi ṉo sate.’

²⁵So sole pui ṉalo, meva! Ako aṉata avai kerua vo Baṉara ta ko quli vo aṉa olai bazuekako quli ta ko ereilou.

²⁶Melai animeta meda sakeilou kala pado udu ko keta kale ama mati kale,” kiolake vo Paula.

²⁷Ni toni ariku ala ipu kale matuma kailokailo kobe boriṉela eṉe Meditareniani kolo kale. Nio sipole ipu tiania vasi nio se vaka topi ke iruruputani ta kekai mamurake ta eṉeta lula udu ketaketa kikelake.

²⁸So sole seta ke soloekake ko tali bati sama, kolo ko saqoro kekai podetikako, ni seta ke keake ko ivere ta kota karabete ta tiniavo koko saqoro. Silo pala taku ko tova seta mata ke keake ta kota toni sike ta tiniavo koko saqoro.

²⁹Ni seta ke vati ṉake vo vaka tu o paparou lado topi so sole seta ke jouraekake ariku ṉoma titi, ni seta keka vararaitake ko raneto seko baṉara poso kasi.

³⁰Ni sea vaka topi ama iruruputo ko maba poso ta ke madoekake soqoilo vaka kasi azo, sole seta ke soloekake ko diqi ivere kale tu seta ke saqoriko kama titi koa vaka ko votonio ama, ka kikevema, melai kota seko lipalipato.

³¹Melai Paula ta eri kiolake vo sirula ni se solodia madu kasi, “Se vaka ko iruruputo ko maba madu ta puliala o elou vaka topi ta meta maba pui meba roveovou pakio,” kiolake.

³²So sole se solodia madu ta ke paqoekake ko qusini voa diqi kevai soloekako se keka zariani soqoilo ni voa diqi ta ota o soleake.

³³Ni puliako raneto elo inio Paula ta omai titiake se tu seta ke vuato. Vota eri kiolake, “Meta lula me daruana toni ariku ṉaniu, ni kiadama komia ṉaniu poso kale ta meta pulia quli me qua.

³⁴So sole aṉata a melai titia me erisaṉa tu meta vuatomo ko sailao tu kota ko pizatimelou me tu meta me bakiovou. Puliama ka pado meko lezu kale ama tou lava ta kopa tamela mumailou,” kiolake.

³⁵Ni voko so kio ko tova, Paula ta o koake kama bereti, ni vota o kasekake voko uriavo Baṉara kasi sea kiadamu ko tanama kale, ni vota o palamukake ko, ni vota o tanitake kuo.

³⁶Ni seta ke patukake ni sea kiadamu ta ke kuake ko sailao.

³⁷Ni eṉeko ataataiti vaka topi ṉe zazini ṉela ta 276 ṉela.

³⁸Ni sea kiadamu lula ke maqinake Saita, inio seta aukozo ke ikake ko vaka taka ṉamuko kale koko vuiti zurana ivere kale.

³⁹Ni raneto keru nio koa vaka topi ke iruruputani ta pui ke nianiiekake ko keta, melai seta ke kati inotake kama pado loqu karokoni keta sama sole seta keka zariake tu, ke rovea tea, ke ṉaritivo vo vaka sai kikelake.

⁴⁰So sole seta ke paqoekake ko titi poso, ni ke vaekake ko titi poso ivere kale, ni koa omadeuma taku kale inio seta ke rupasikake ko qusini poso koko noqoekako vaka ko omuqa qelu ṉomaṉoma. Ni seta keta va koiviekake voa vaka ko votonio ama tepe ni kekai taikake koa ketaketa.

⁴¹Melai voa vaka ta ota jaṉariake karokoni bolebole kale, ni ota naritake; ni o votonio voa vaka ta kota va vinai ni pui ko vatutake, ni so maqa inio ko matu ti matuma tovoko ta pisa ma pisa kota va ikake o noma.

⁴²Nio se solodia madu ta ke erekake kama pado nakatato tu seta ke vouvaemo kiadama piripiri amu tu seta pui ke ruazo ni ke kailo keta kale tu ke soqoilou kikelake.

⁴³Melai vo sirula ta ova zariake pakievo vo Paula, so sole vota o dokolimake se tu seta pui ke vouvaemo se. So sole vota o bazuemake se tu seke roveani ruazo ta kuleto ke jouro vaka topi azo tu ruazole ke vareriko keta kale;

⁴⁴ni sea kiadamu ta seko tova ke luluemou se papani noqoekole ma o pisaivani vaka ko putiputilana kale. Ni koa keve kale inio eṉea kiada ṉela ta ṉe uria varerikake keta kale ni ṉeda pakiake.