Read Bilua Romu 10 Bible Online

Romu 10 - Bilua bible

Romu 10

¹Me aṉako tamania kale amu mela, aṉako pado ama bulo sate ama kerukeru ni vararaito kale vo Baṉara kasi ama kale, ta ama zaria a ṉaviko mabamu se Jiu amu ta ke pakiovou!

²Aṉata tuvevo a ima seta pizaka luluevomu vo Baṉara; melai seko ilusato ta pui sidopu ama.

³Seta pui ke vakakukake koa keve vo Baṉara omai sidopu puekako se maba madu o ṉaviko kelokelozato kale, melai seta kekai zariake sidopu elo ke ṉaviko kalo ko lulueko kale, ni seta keta lupaovake sidopu elo vo Baṉara o pitoekako keve kale.

⁴Ako vo Karisito inio vo Mosese ko Bazu ko paitopaito o eveni,[4] nio sea kiadamu seke tuvevo puevo amu vo ta sidopu keta elou vo Baṉara ko kelokelozato kale.

⁵Mosese ta o kasekake maba poso sidopu kekai elo avo Baṉara ko kelokelozato kale Bazu ko lulueko kale, ko eri kikolako, “Vo o zorikani koa Bazu kikolani ta o saevou.”

⁶Melai ko Tabu ama Riki ko kasekako oqu kale sidopu elo vo Baṉara ko kelokelozato kale ama ta eri nio: “Ṉota pui kuimailo ṉo ṉaviko kerukeru kale tu eri kio, lala inio o ziovo ala aukale?” — kota, tu vo Karisito ko saqorivo ikio.

⁷“Ni mata pui eri kio ṉo ṉaviko kerukeru kale, lala inio o ziovo ala voumu ko zaekale peuru ma peuru ko vima?” ko ikio, tu vo Karisito ko zolaevo voukale azo.

⁸Koa Riki kikolani ta eri nio; “Vo Baṉara ko bazu ta ṉoko sipole, kota ṉoko suto kale ni ṉoko bulo kale ama tuvevo puto kale” —kota ko kaseka koa oqu ko bazu ko eṉe ṉeqai bazubazutako.

⁹Ṉota ṉovai bazutou ta vo Jisu inio vo Lekasa ni ṉota pizaka tuvevo pueko ṉo elou ko vo inio vo Baṉara o saeviveni vo voukale azo kio nio so inio ṉota ṉo bakiovou.

¹⁰Ako animeko oqu kale inio animeta sidopu me eva vo Baṉara ko kelokelozato kale sole, ni animeko saruilo kai eraerao kale inio me bakia.

¹¹Ako ko Tabu ama Riki kikolani ta eri, “Se tuvevo ke ivani vo ta pui kepa quratou.”

¹²Komi ta ko tuboemela kasemelo animea kiada mela, ako anime Jiu amu mela ni anime pui Jiu amu mela ta puliama koko edolovo sole; Baṉara inio animea kiada mela vo Lekasa vo mauru o imelani animea kiada mela ni o nokaemelani vokasi.

¹³Omadeuvo ko Tabu ama Riki kikolani jari, “Vo okai zaivotani vo Baṉara ko tauvezato ta o pakiovou,” kikolako.

¹⁴Melai nonia paseko inio ke elou ko tauvezato se maba madu pui tuvevo ke ivou vo ta? Ni nonia tuvevo puto inio ke elou puliako viqo ko Uri ama Bazu? Ni nonia viqo inio ke elou ko bazu pui ko pikairiovou ta?

¹⁵Ni noni ko kalou inio ko bazu ta ko kaseilou puliala bazubazuto ko maba o soroilou ta? Omadeuvo ko Tabu ama Riki kikovevo jari, “Matu zolezole ama quli anime kasi seko kati kilo ko Uri ama Bazu!” kikolako.

¹⁶Melai pui sea kiadamu ke zorikake koa Uri ama Bazu. Aisea kiovevo jari, “Baṉara, lala inio lula tuvevo o ika eṉeko bazu?”

¹⁷So sole maba poso ko oqu ta ko tanita ko Uri ama Bazu ko viqo kale, ni ko Uri ama Bazu ta ko kueva vo Karisito vai bazuto kale.

¹⁸Nio noi nio: tuvevo ikio ko seta pui kepa viqe koa Bazu kio? Koe, seta maba ke uria viqe—omadeuvo ko Tabu ama Riki kikolani jari: “Seko pesio ko kora ta lula kokai zaroa kiadama peuru ma peuru; seko pesio poso ta lula ko baroa au ko sipo kasi,” kikolako.

¹⁹Ni mata noni: Se Izireli amu ta pui kepa paqumuke koa Bazu kio? O ṉavi Mosese inio kuleto o kasekeni vo Baṉara kiovevo: “Aṉata a bitoevou kala pado utu ala toutou tu konoilo saṉa a imo a ṉaviko maba madu. Aṉata a bitoevou kala pado sarube ala toutou tu korakorailo saṉa a imo se.”

²⁰Ni vo Aisea ta matuvole so kiove se pui Jiu amu kale avo so keru eri kiove keru, “Se pui ke vaililani aṉa ta lula ke lati inota aṉa; Aṉata lula kasa a eva se pui ke paselani aṉa kasi,” kiolake.

²¹Melai se Izireli amu kale avo vota eri kiolake, “Koa pado ama ṉaniu kale aṉata a okekake aṉako ṉase tu a baroekimo sea maba madu, melai seta pui kepa zoripate ni seta ke meomeotake,” kiolake.