Read Bilua Romu 3 Bible Online

Romu 3 - Bilua bible

Romu 3

¹Sole uri kio ko Jiu elo, saita inio ko pui Jiu elo, kio? Ni kama uri ama quli ta ko puratika ko moveilo, kio?

²Tuvevo kota matu uri ama quli tu Jiu elo! Ako se Jiu amu inio vo Baṉara o mati keruini o ṉaviko bazubazu sole.

³Melai kake seta vilua nabuluputo ke evake, so sole vo Baṉara ta pui kerula inio opa elou sekasi, kio?

⁴Maba pui! Melai vo Baṉara ta matu tuvevo ala se lipalipa kama maba madu kasi azo. Ko Tabu ama Riki va kikovevo jari, “Noko sidopu ta ko tuvevo puilou ṉoṉo besiovou keru, ṉota ṉo bizatou se maba poso ṉo kuiripato saṉa iṉo kale ṉo.”

⁵Melai esa kala ta eri kiovou, “Animeko ruqe ta kasa ko ika vo Baṉara ko sidopu,” kiovou, ta noi nio kimevou anime? Ta esa Baṉara inio pui sidopu ala vo o melai koqotaeka keru animeko ruqe kimevou, kio? (Kota se maba poso be kikevoavo kuimanao nio.)

⁶Maba pui! Ako vo Baṉara ko keve ta pui sidopu ama tea, vota pui opa roveo titizimelo animea kiada mela peuru ma peuru kale amu mela.

⁷Melai mata kala ta esa eri kiovou, “Aṉako lipalipato kale inio kasa ko eva vo Baṉara ko tuveano ni voko ṉaṉaidara puevo. Sole noi sole inio aṉata kobe lai kuirizia koa ruqe?” kiovou.

⁸Melai so kimela tea, animeta meda roveo nio kaseko ko sarube ama pesio ko eri kikovo ama, “Aria tu animeta me ereko ko ruqe tu sidopu ta ko purato.” Kake maba poso ta tuvevo avole kebe zarazaraela aṉa seko lai kuiriko kale ko aṉata a qaseka koa sarube ama pesio! Sokale inio seta sidopu avole kuiripato saṉa keta elou seko soama pesio kale.

⁹Uri, tani, eṉe Jiu amu ṉela ta sidopua ṉela vo Baṉara ko vilu kasa kobe kai paloasa se pui Jiu amu ko sidopu, kio? Maba pui! Aṉata lula uria zakaremu a mela ika ko se Jiu amu ni se pui Jiu amu ta kebeta eva muli sarueko ni ruqe ko pizato kale.

¹⁰Omadeuvo ko Tabu ama Riki kikolani jari: “Puliala kala pado ta sidopu ala,

¹¹puliala kala pado ta o patapataeva vo Baṉara ni o sidopua ilusivani vo.

¹²Kiadamu ta ke vaevake vo Baṉara; ni seta ruqe ko kiada keta evake; puliala ta uri ama quli o ereka, maba puliala kala pado.

¹³Seko kora ta veukaveuka kama niami ko ruqea tui kama jari; ni seta lipalipa kamu seko pesio kale, omadeuvo ko vouvatako nananana kama dole ko nanato jari ama seko pesio;

¹⁴seko pesio ta maulumauluto ni kideipo kokai sukatako.

¹⁵Jijiroa tolato ni vouvato amu;

¹⁶seta niumaniuma kamu ni biresato ko maba madu lai ma lai seke olakoi.

¹⁷Seta pui ke paqumukani ko bulezato,

¹⁸ni pui ke paqumukani tava paṉao vo Baṉara.”

¹⁹Animeta me baqumuka ko Bazu kikolani ta ko kaseiva sea kiadamu kasi, se koa Bazu ko pizato kale ke evani, tu kota ko epeziko maba poso kati zolio seko ruqe, tu pado ama peuru ma peuru kale amu ta ke elo vo Baṉara ko titizato kale.

²⁰Ako puliala ta o rovea sidopu puilo vo Baṉara ko kelokelozato kale ko Bazu kikolani ko lulueko kale; melai ko Bazu ko nianiiekato kale inio vo maba ta o vakakuka voko sarueko.

²¹Mosese ko Bazu kale ni se poropita madu ko bazu kale lulavo Baṉara ta kasa o ikake vo sidopu omai iko avo se maba poso. Melai erisaṉa vota kasa o mela ika anime vo sidopu o melai iko avo anime. Animeta pui Mosese ko Bazu kale inio sidopu me eva, melai vo Jisu Karisito vai oqu kale inio.

²²Baṉara ta sidopu o ima sea kiadamu seke ṉeamuvani vo Karisito; ako kiadamu ta omadeuvo amu sole,

²³sea kiadamu ta sarueko samu ni seta vaṉa kamu vo Baṉara oka zariako sidopu kasi azo sole.

²⁴Melai vo Baṉara ko utuakoi puariko voko roquano kale kiadamu ta sidopu ke eva vo Jisu Karisito ko tabarimo kale, vo o rupasimani.

²⁵Vo Baṉara ta lula majibolo jaria puarivo o eve vo, tu voko voukale kiadama maba ko sarueko ta ko akoilou seko vai oqu kale vo. Koa kalo kale vo Baṉara ta kasa o ikake voko sidopu. Ako lulavo vota ota ma bouluke se lulamu ko sarueko; melai erisaṉa vota o puariva vo Jisu tu o puratiko voko sidopu. Koa kalo kale vo Baṉara ta kasa o ika voko sidopu ni vota o sidopu puema seke ṉeamuvani vo Jisu.

²⁷Anime lula sidopu me evani mela ta loma ikio animeta meqai raurailou? Pulia quli! Noni kale avo inio so? Animeta pulia quli meba kai raurailou, ako animeta sidopu me eva vo Jisu vai oqu kale sole, melai pui Mosese ko Bazu ko lulueko kale.

²⁸Sokale avo inio aṉata a uria patapatae ta oqu kale inio vo maba ko sidopu elo Baṉara ko kelokelozato kale, melai pui Bazu ko kasekako quli kale.

²⁹Ma vo Baṉara ta se Jiu amu ke kiada vo Baṉara ni pui se pui Jiu amu vo Baṉara inio, kio? Pui, se pui Jiu amu melai sevo Baṉara.

³⁰Vo omadeu pado Baṉara inio o sidopu puemou se Jiu amu ni se pui Jiu amu seko oqu kale.

³¹Koa oqu kale inio aṉata a ṉamuka vo Mosese ko Bazu kio? Pui, maba pui, melai koa keve kale aṉata a qati lulueka ko ṉavi Bazu ko kio ni kalo ko kavani.