Read Bilua Romu 4 Bible Online

Romu 4 - Bilua bible

Romu 4

¹Sole noi nio ka kiavoavo vo eṉe Jiu amu ṉela vo kuleto ala taite Ebarahami ko saevo kale ko ereima quli ko podepodeti?

²Vota lula sidopu o eve vo o erekema quli kale tea, vota ota roveo nio raurailo, melai vota pui opa roveovi raurailo vo Baṉara ko tanama kale.

³Tabu ama Riki ta eri kikola sole, “Ebarahami ta tuvevo o ikake ko leveleveo inio ovai oqui vo Baṉara, nio koa oqu kale vota sidopu ala va kiolake vo Baṉara.”

⁴Ako vo o iruruputani maba ta o tabaria, kota pui katizato, melai kota voko tabara.

⁵Melai voa maba vo pui okai keruani voko iruruputo, melai vo okai keruani vo Baṉara, vo se kuirikuiri amu kuiripato pide o imani, voko oqu kale inio vo Baṉara ta o sidopu pueva vo.

⁶Ko ikio vo Devita so ka kiovema, so keru vo o kaseke keru vo maba ko zoleilo vo Baṉara sidopu va kiolani, pui vo o erekako quli kale, ko eri ka kiovema,

⁷“Ke zoleiva tisoiko seke koani ko akoezato, seko sarueko ta kota ma bouluiva sole.

⁸O zoleiva tisoiko voa maba vo Baṉara ota va ukaka puekani voko sarueko!”

⁹Koa zoleilo vo Devita o kasekema ta se Jiu amu ko ko kiada ikio, seke koeni ko moveilo, kio? Maba pui! Se pui Jiu amu se pui kepa koeni ko moveilo melai keta zoleilou. Ako animeta lula me qea koa Tabu ama Riki topi ama kale, “Ebarahami ta tuvevo o ikake ko leveleveo inio ovai oquke vo Baṉara, nio koa oqu kale vota sidopu ala va kiolake vo Baṉara.”

¹⁰Noi keru inio vo Baṉara so va kiovevo? Puliako vo Ebarahami kovo ko moveilo ma koko tova vasia rana? Vota so va kiolake puliako vo moveilo.

¹¹Koko tova vasi inio vota o moveike, ni koa voko moveilo ta kama pado mamola ko evake koko kasa puekema voko oqu kale ama sidopu elo Baṉara ko vilu kasa. Nio vo Ebarahami ta sevo auvana kale ala taite o evake, seke tuvevo puevani vo Baṉara se sidopu ma kiolani, se pui movemove amu melai.

¹²Vo inio mata se movemove amu vo taite seke luluekani Ebarahami ko oqu ko keve, vo animevo taite, ko vo okai saevema oqu puliako vo moveilo.

¹³Ni so keru vo Baṉara o vati korotike keru vo Ebarahami ko peuru ma peuru ta vo ni voko vikuvikula ko leveleveo ikio kio, vota so o ikake, pui vo Ebarahami ko zoriko kale ko Bazu, melai vo Ebarahami ta o tuvevo putake nio vo Baṉara ta sidopu ala va kiolake.

¹⁴Ako vo Baṉara ko leveleveo kale ama quli ta ko puariziovou se Bazu ke zorikani kasi tea, maba ko oqu ta pulia quli jari ni vo Baṉara ko leveleveo melai pulia quli jari.

¹⁵Ako ko Bazu ta ko puratika vo Baṉara ko iqailo, melai sai puliama bazu sakoi, ta puliama bazu ko bikoiriko sakoi.

¹⁶So sole oqu tona inio koko raki ko leveleveo, tu koa leveleveo ta matu vinavina ko elou, vo Baṉara ko utuakoi zama puaro kale vo Ebarahami ko vikuvikula madu kasi, pui seke zorikani pala ko Bazu, melai se vo Ebarahami jaria oqu ke evani kasi. Ako vo Ebarahami ta animea kiada mela vo auvana kale ala taite sole;

¹⁷omadeuvo ko Tabu ama Riki kikolani jari, “Aṉata taite a iṉa ṉo kubo toutou poso vo ṉa.” So sole koa leveleveo ta uri ama vo Baṉara ko vilu kasa, vo Ebarahami ovai oquini—voa Baṉara vo o saevimani se voumu, ni voko bazu kale o puratikani ko pui kopa ereima quli.

¹⁸So keru ta kubo quli ta kota roveo nio niumaeko vo Ebarahami ko kerukeru melai vota o tuvevo puevake ni ovai kerui vo Baṉara, nio vota “kubo toutou poso vo taite” o evake. Omadeuvo ko Tabu ama Riki kikovevo jari, “Noko vikuvikula ta omadeuvo ko suti poso jaria kubo ko elou.”

¹⁹Koa taku keru vota sipole omadeu paizana sabere ala, melai voko oqu ta pui lekuleku ko evake, so keru voko tupu ta matu lekuleku ama ni vota pui o malezikake tu ereko ko meqora, ni Sera melai pui ko male kovo ko meqora.

²⁰Voko oqu ta pui ko vaevake vo, ni vota pui niuniala okai evake vo Baṉara ko leveleveo, ni voko oqu ta kobeta matu pizatake, so sole vota o ilusivake vo Baṉara.

²¹Vota matu tuvevo o ikake vo Baṉara ta o roveovou ereko koa leveleveo vo ova kasekema.

²²Sokale avo vo Ebarahami voko oqu kale “Baṉara ta o veake vo ta vota sidopu ala” koa Tabu ama Riki kikolani jari, ko pui vo kaqe pala kopa rikiziovima.

²⁴Kota ko rikiziovi tu mata anime kaqe, anime sidopu me evani mela animeko tuvevo puevo kale vo o saeviveni vo Jisu animevo Lekasa voukale azo.

²⁵Ako Baṉara ta o soruevake vo tu okai vou animeko sarueko ni o saevivake vo tu animeta sidopu me elo vo Baṉara ko vilu kasa.