Read Bilua Romu 8 Bible Online

Romu 8 - Bilua bible

Romu 8

¹Maba puliama kuiripato ta ikoana erisaṉa anime omadeu me vati evani mela vo Jisu Karisito animeko saevo kale.

²Ako vo Tabu ala Auvana ko bazu, ko anime omadeu saevo ko imelako vo Jisu Karisito sase, ta lula ko rupasile aṉa sarueko ni vou ko bazu kale azo.

³Ko ikio vo Mosese ko Bazu pui kopa roveovima ereko, ako tupu kale ama saevo ta lekuleku sole, melai vo Baṉara ta o roveovi ereko ko. Vo Baṉara ta o titizikake ko sarueko so keru vovo Meqora o vovi ni sarueko ko siqasiqa o eve keru. Sokale avo inio vo Baṉara ta o soroeve vovo Meqora, vo o kuevini ni anime jaria maba elo o eveni, melai vota puliama sarueko sala.

⁴Baṉara ta so o ikake tu vo Mosese ko Bazu koka zariako sidopu ta meqai baro anime me jaevani mela Baṉara ko Auvana kale, ni pui komia tupu ko saevo ko zario kale.

⁵Seke saevani tupu kale ta ke vaeka seko kerukeru tupu ko saevo koka zariako quli topi. Melai seke saevani Baṉara ko Auvana kale ta ke vaeka seko kerukeru voko Auvana koka zariako quli tona.

⁶Seke vaekani seko kerukeru tupu ko saevo kale ama quli tona ta komai barolou ko vou, melai seke vaekani seko kerukeru Auvana kale ama saevo ko quli tona ta komai barolou ko tuvevo ama saevo ni bule sama.

⁷So sole voa maba vo o vaekani voko kerukeru komia tupu ko saevo kale ama zario tona ta vo Baṉara vo kana ota eva, ako vota pui o zorika vo Baṉara ko bazu sole, ni tuvevo avole vota pui o rovea zoriko ko kikolani sole.

⁸Seke zorikani seko tupu kale ama saevo ko zario ta pui ke rovea zolevo vo Baṉara.

⁹Melai meta pui me jaeva ko meko tupu ko saevo ko kavani jari. Me inio me jaevani mela vo Baṉara ko Auvana ko melai bazuekako saevo kale, vo Baṉara ko Auvana tuvevo avole ko saeva meko saevo kale ta. Ako voa maba vo pui o koani vo Karisito ko Auvana ta pui vovo inio.

¹⁰Melai vo Karisito ta o saevou me tona, inio meko auvana ta saevoma ikio, ako meta lula sidopu meda eva sole vo Baṉara kasi, rouka meko tupu kobe vouvou meko sarueko kale melai.

¹¹Vo Baṉara ta o saevive vo Jisu voukale azo, ni voko Auvana ta ko elou me tona inio vota mata o saevikou meko tupu, koko vouvo ama. Vo o saeviveni vo Karisito ta o saevikou meko tupu voko Auvana kale koko evako me tona.

¹²A visi poso, animeta kama koidi samela, tu pui me lulueko ko tupu kale ama saevo koka zariako quli tu me ereko.

¹³Ako meta soa saevo me elou, ta meta meda vouvou. Melai vo Baṉara ko Auvana kale meta me vouvaekou ko sarueko ko iruruputo, ta meta meda saevou.

¹⁴Seke odiziani vo Baṉara ko Auvana kale se inio vo Baṉara ko meqora poso.

¹⁵Ako koa Auvana vo Baṉara lula o puarikema mekasi ta pui ṉalo ko mabaku ko imela, melai kota o ṉavi Baṉara ko meqora poso ko imela me, ni koa Auvana ko pizato kale inio animeta mevai zaivota vo Baṉara ni eri kimela, “Mama, a Mama!” kimela.

¹⁶O ṉavi Baṉara ko Auvana ta ko bazueka animeko auvana poso ta animeta voko meqora poso mela inio kio.

¹⁷Animeta voko meqora poso mela, sole animeta me qovou koa mauruto ko lula vo o inainaekema voko maba madu kaqe, ni animeta me ṉeamukou vo Karisito sase ko quli ko lula vo ova inainaekema quli, ako animeta meqai zomana vo Karisito ko tola, sole animeta me zomanou voko ṉaṉaidara kale.

¹⁸Aṉata tuvevo a ika ta komia taku keru ama tola anime meqai evako ta pui voko ṉaṉaidara jaria pizato ama ko kasa ko elo ama anime kasi.

¹⁹Kiadama quli koko ereima ta ko matu tareka vo Baṉara ko kasa imo voko meqora poso.

²⁰Ako kiadama quli koko ereima ta kuirikuiri ama, ti kota utube kota eve, melai kota o ṉavi Baṉara ko vatolo kale inio so o ikake. Melai koko zuato ta ikoana sai

²¹tu koa kiadama quli koko ereima ta ko rupasiovou sapesapelo ko pizato kale azo tu kiadama quli ta vairu ko elou omadeuvo Baṉara ko meqora poso vairu ke elou keru voko ṉaṉaidara kale.

²²Ako animeta lulavo azo ti kobeta baroa erisaṉa ta meqai nianiia ta kiadama quli koko ereima ta tola sama vo meqora ko alilo keru ama niania ko tola jari ama.

²³Pui koa auvana pide ama quli vo Baṉara o erekema ko kiada ikio ko tolaivako, melai anime lula me qoeni mela ko Tabu ama Auvana melai duki meda eva animeko bulo kale, animeko tareko kale vo Baṉara ko meqora poso elo tu rupasio animeko pado ama saevo kale. Ko Tabu ama Auvana ta Baṉara ko kuleto ama puaro anime kasi.

²⁴Ako koa zuato kale inio animeta me bakiovi, melai animeta lula me qoa ko quli anime me zuatikako tea, ta pui tuvevo ama zuato ikio. Ako puliala ta o zuatika ko vo lula o koako quli sole.

²⁵Melai animeta me zuatikou ko quli anime pui me qoako so inio pataitole me darekou ko.

²⁶Koa omadeuma keve kale inio vo Tabu ala Auvana ta o tauvemela anime animeko lekuleku kale. Ako animeta pui meqai nianiiani mela ko vararaito ko kalo sole; melai o ṉavi Tabu ala Auvana ta o melati zomana vararaito vo Baṉara kasi koa voniu kozato ko anime pui me buratikako kale.

²⁷Ni vo Baṉara vo o keani kiadama animeko bulo kale ama quli, ta o paqumuka vo Tabu ala Auvana ko kerukeru, ako vo Tabu ala Auvana inio o melati zomanani vararaito anime o ṉavi Baṉara ko vaki mela sole, ni vota o vararaita o ṉavi Baṉara ko vatolo kikolani jari.

²⁸Animeta meqai nianiia ta kiadama quli vo Baṉara ta uria ereko o eva anime me roquevani mela vo kaqe ni anime o nokaemelani mela voko vatolo kale.

²⁹Anime vo Baṉara lula o pitoemelani ta o edolimelake tu animeta vovo Meqora Jisu jari me elo, nio voa Meqora ta kubo tamania poso vo kaka kala Meqora o elo.

³⁰Ni anime lula o edolimelani ta o nokaemelake, ni anime lula o nokaemelani, ta o sidopu puemelake, ni vota o zomanimelake voko ṉaṉaidara kale.

³¹Koa kiadama quli ko zakaremu puto kale ta noi nio kimevou? Vo Baṉara ta o melati vailou, ta lala inio ruqe o imelou ko anime? Puliala!

³²Tuvevo avole vo Baṉara ta pui, ako vota pui opa kaitive vovo pado Meqora, melai vota o puarive animea kiada mela kaqe! Vota lula o katimele anime vovo pado Meqora, so sole vota mata pui opa mela zariekou utuakoi katimelo anime kiadama uri ama quli, kio? Zio, vota pui opa kaitikou!

³³Ni lala inio kuiripato sana o imelo ala anime, vo Baṉara lula o pitoemeleni mela? Puliala! Ako vo Baṉara inio o sidopu puemela anime sole!

³⁴So sole lala inio o titizimelou anime? Mata puliala, ako vo Jisu Karisito, vo o vovini ni mata o saeveni voukale azo ta pui opa titizimelou. Vo inio o papuani Baṉara ko palo rana vasi, vo o tauvemelani anime vararaito kale!

³⁵Sole loma ikio ko pitasimelo ama anime vo Baṉara ko roquano kasi azo? Ko tapata kio, ma tola, ma maba poso ko niumaemelo, ma nioṉe, ma ozaoza, ma vou ni saevo ko tiania elo, ma vouvato kio? Maba pui!

³⁶Ko Tabu ama Riki ta eri nio kikolani sole, “Ṉoko ṉi ko kio kale, Baṉara, seta keka zaria vouvaeṉelo eṉe kiada keru, eṉeta ṉe bitasia omadeuvo ko sipi jari ko ke vouvaeko ama jari.”

³⁷Pui, melai kiadama komi quli kale animeta me matu pizatou vo Karisito kale, vo anime o roquemelani!

³⁸Ako ko aṉa tuvevo a ikako quli ta pulia quli ta kopa pitasimelou anime voko roquano kasi azo, kota pui vou, ni pui saevo, ni pui mateana madu ni pui auvana lekasa poso ni pizato poso, pui komia taku kale ko ereivako quli ni pui koko kilo ama taku kale ko ereilo ama quli,

³⁹pui peuru ma peuru ko topi vasi ko evako quli ni koko vima ko evako quli[2] —pui koa kiadama quli vo Baṉara o erekema peuru ma peuru kale ikio kopa pitasimelou anime vo Baṉara ko roquano kasi azo vo o mela puarikema vo animevo Lekasa Jisu Karisito kale kude.