Read Bilua 1 Koriniti 1 Bible Online

1 Koriniti 1 - Bilua bible

1 Koriniti 1

¹Aṉa Paula lala, vo Baṉara lula o nokaeleni lala o ṉaviko vatolo kale tu aṉata vo Jisu Karisito vo apositolo a elo, ta ada rikita vo animeko tamania kale ala Sosotenisi sase

²mea Baṉara ko lotu qoqono me Koriniti peuru kale me evani mela kasi, mea kiada mela meko omadeu vati elo vo Karisito kale lula Baṉara ko tabu ama maba poso me evani mela, omadeuvo sea kiadamu komia peuru ma peuru kale amu seke ilusivani vo Jisu Karisito, animea kiada mela vo Lekasa.

³Vo animevo Mama Baṉara ni animevo Lekasa Jisu Karisito ko pakiezato sama roquano ni bule ta ko elou me tona.

⁴Kiada keru aṉata a melai rauraeva vo Baṉara koa tauvezato sama roquano vo o katimelako kale ako meta vo Jisu Karisito ko mela sole.

⁵Ako meko omadeu elo vo Karisito kale ta meta lula roverovea mela kiadama quli kale sole, kiadama meko pesio kale, ni kiadama meko nianiio kale.

⁶Ako meta lula me uria tuvevo pueka vo Karisito ko Bazu sole.

⁷Sokale avo inio meta pui nieu meqai eva kovo kiadama katizato poso Tabu ala Auvana kasi azo ama, komia taku keru so keru meme dareva keru vo animevo Lekasa Jisu Karisito kasa o elou keru.

⁸Vo inio o pizatimelo ala me ti kobe kai barolou koa paitopaito ama ṉaniu kale tu meta puliama ruqe kopa melai kuiriziovou vo animevo Lekasa Jisu Karisito okai vaito ama ṉaniu kale.

⁹Vo me o nokaemeleni Baṉara tu omadeu me vati elo vovo Meqora Jisu Karisito, animevo Lekasa, ta kerula kala sole.

¹⁰Vo Jisu Karisito animevo Lekasa ko ṉikale, aṉata a mela titia mea kiada mela, a qaka ni visi poso mela, tu vaekomo meko zarazaraekinio ni omadeu pado ikomo meko kerukeru tu meta pui me bitasiovou. Meta uria omadeu emo, omadeu pado kerukeru ni omadeu pado vatolo kale.

¹¹Ako kake maba poso ko Kaloe ko saidi kale amu ta ke uria bazuela aṉa, a qaka ni visi poso, ta meko tiania ta aivekinio ta ikoana kikela.

¹²Eri nio ko aṉa so ka kialani. Kala ta so kiola “Aṉata a lulueva vo Paula” kiola. Mata kala ta “Aṉata a lulueva vo Apolosi” kiola. Mata kala ta “Aṉata a lulueva vo Pita” ni mata kala ta “Aṉata a lulueva vo Karisito” kiola.

¹³Karisito ta ota pitasiake koa pou poso kale! Vo Paula inio vo lula o mela vovini me kio? Meta lula vo Paula ko ṉikale bapitaiso meda evani mela inio kio?

¹⁴Aṉata a rauraeva vo Baṉara ako aṉata puliala inio mata bapitaiso a iva me kazo melai Kurisipasi ni Qaiasi qo kiada inio,

¹⁵sole puliala ta eri pa kiovou, “Eṉeta lula bapitaiso ṉeda eva vo Paula ko ṉikale ni voko disaipeli madu ṉe eve,” kio.

¹⁶(Koe zio, aṉata bapitaiso a ime Sitepanasi ni voko saidi; melai aṉata pui a rovea kerukerueko mata kala vo aṉa lula bapitaiso a ivani.)

¹⁷Ako Karisito ta pui opa soroele aṉa tu aṉata a ereko ko bapitaiso melai vota o soroele aṉa tu aqai bazuto ko Uri ama Bazu, tu aṉata a qaseko ko pui maba ko nianiio kale ama pesio kale. Ako maba ko nianiio kale aqai bazutou tea, se maba poso ta ke tuvevo pueko nio vo Karisito ko vou korosi topi ama ko Bazu aṉako roverove ama pesio kale ama bazubazuto kale, melai pui koa Bazu ko pizato kale.

¹⁸Ako vo Karisito ko vou korosi topi ama ko Bazu ta utube ama quli noqola tolailo kale ke ziovo amu kasi, melai anime me bakiziani mela ta koa Bazu ikio ko kaseka vo Baṉara ko pizato anime kasi.

¹⁹Ako Tabu ama Riki ta so kikola sole, “Aṉata a dokolikou se nianiiomu ma kikelani ko vatolo, zio, aṉata pulia quli a ikou seko nianiio,” kikolani.

²⁰So sole se nianiiomu ni seke lezumatani maba madu ta pulia quli jari, ni so jari se roverove amu kai zolizoliekinio kale seko kerukeru komia ruqe ama peuru ma peuru ko.

²¹Ako o ṉavi Baṉara ko ṉisa nianiio kale vota o tizaemake sea maba poso tu seta pui kevai nianiio vo koa seko nianiio kale. Pui koa nianiio seko kale melai koa bazu ko anime meqai bazubazutako kale, ko se sarube ama ka kikelako, kokale inio vo Baṉara ta lula o pitoeka tu o pakiemo seke tuvevo putani.

²²Se Jiu amu ta keka zaria kelo ko aqasiele ama iruruputo tu ke tuvevo puto, ni se pui Jiu amu ta ke vailivailila ko nianiio,

²³melai eṉeta ṉevai bazuta vo Karisito korosi topi o vovini, koa bazu ko kuvaruvarua kelo ama se Jiu amu kasi, ni se pui Jiu amu sarube ama ka kikelako.

²⁴Melai se Baṉara o nokaemani kasi, Jiu amu melai pui Jiu amu melai, komia Bazu ta ko kaseva vo Karisito, vo kasa o ikani Baṉara ko pizato ni ṉisa nianiio.

²⁵Ako koa Bazu vo Baṉara ko sarube puto ka kikelako ta matu nianiioma kokai paloasako maba ko nianiio, ni koa Bazu vo Baṉara ko lekuleku ka kikelako ta matu piza kama kokai paloasako maba ko pizato sole.

²⁶Meta kerukeruekomo noni ama maba poso mela inio ko me, a qaka ni visi poso mela, so keru Baṉara o nokaemele keru me. Komia ruqe ama peuru ma peuru kale ama maba poso ko kerukeru kale ta pui kubo mela inio nianiio mela, ni pui kubo mela inio piza kamela ni pui kubo mela inio raura kamela.

²⁷Ako Baṉara ta o pitoemele anime komia ruqe ama peuru ma peuru kale ama maba poso sarubea mela mela kikelani tu vota o quratimo se nianiiomu, ni vota o pitoemele anime komia ruqe ama peuru ma peuru kale ama maba poso lekulekua mela mela kikelani tu vota o quratimo se piza kamu.

²⁸Vota o pitoemele anime kalo pidea mela ni kedukedula mela mela kikelani komia ruqe ama peuru ma peuru kale amu, ni anime se pulia quli jaria kerukeruemelo ke evani inio vota o pitoemele tu vota o niumaekou ko quli komia ruqe ama peuru ma peuru kale ama maba poso raura kama ka kikelako quli,

²⁹tu puliala maba ta opa aikailou vo Baṉara ko tanama kale.

³⁰Ni vo Baṉara inio lula omadeu o melati ivani anime vo Jisu Karisito, ni vo Baṉara ta lula o katimela anime voko ṉisa nianiio vokale. Vokale inio animeta lula sidopu me eva vo Baṉara ko kelokelozato kale; ni vokale inio animeta vo Baṉara ko tabu ama maba poso me evani mela ni ruparupasia mela.

³¹So sole, ko Tabu ama Riki kikolani jari, “Vo oka zariani rauraraurailo ta maba o rauraraurailou vo animevo Lekasa o erekema quli kale.”