Read Bilua 1 Koriniti 10 Bible Online

1 Koriniti 10 - Bilua bible

1 Koriniti 10

¹A qaka ni visi poso mela, aṉata a mela zaria me tu meta me qerukeruekou ko quli koko ereima quli se animeko taite poso kasi seke lulueveni vo Mosese. Sea kiadamu inio ko odiemake ko lei ni sea kiadamu inio uria pakeko ke eve koa Diri ama Ivere ni keta pakiake.

²Nio koa lei ko lulueko kale ni koa Diri ama Ivere ko pakeko kale ta sea kiadamu inio bapitaiso jari ke evake tu ke luluevo vo Mosese.

³Mata sea kiadamu inio ke kuake koa omadeuma sailao vo Banara o katimema,

⁴ni sea kiadamu inio ke nozuekake koa omadeuma ju vo Baṉara o katimema. Ako seta ke nozuekake koa ju vo Baṉara o reretikema koa lado kale koko luluemema se, ni koa lado ta o ṉavi Karisito.[1]

⁵Melai inio vo Baṉara ta pui oma zoleike matu kubo madu se azo, nio seta keta vovi ni seko tupu poso ta birebire aero kota evake lealea kama zaekale.

⁶Kiadama ko quli ko ereima animeko taite poso kasi ta balauvato poso anime kasi, tu animeta pui viluloqu meqai elo ko ruqe ama quli, seke eveni jari.

⁷Meta pui ilusiko ko beku poso, kake seke kaevo. Ako ko Tabu ama Riki kikovevo ta eri, “Se maba poso ta keta papuake beku ko ilusiko ko ṉojola kale ni seta ke nozute ni ke vuate ni ke vailikinie.”

⁸Animeta maba puliama kama zave ni pauvezato me ereko, omadeuvo kake se jari, ko kekai vovima karabete zouke vuro madu omadeu pado ṉaniu kale.

⁹Animeta pui me madoevo vo Karisito tu tava kelo vota o titizimelou ma pui kio, omadeuvo kake seke iveni jari. Seta so ke kae nio ko dole poso ta ko vouvaemake se.

¹⁰Animeta pui me ṉuruṉuruo, omadeuvo kake seke kaevo jari. Seta so ke kae nio vouvato ko mateana ta ko vouvaemake se.

¹¹Kiadama komi quli poso koko ereima se tona ta kama uri ama balauvato ikio ko evema anime kasi, ni kota ko rikiziovi lula tu animeko bazu kaqe. Ako komia lulavo ko ereima quli ta ko zuatike vo Karisito ko tuveano, ni anime inio lula ko melai baroani mela koa tuveano sole.

¹²So sole kalaṉa pizaka lojo ṉo eva kiṉolani ṉa ta ṉo matu balauvou tu ṉota pui ṉo bialou.

¹³Kiadama madolo ko meme doraekako ta kiada keru ko kuevako ikio maba poso kasi. Melai meta me rovea vai keru vo Baṉara ta pui opa zariekou tu meta me madoilo meko pizato ko topi tiniama madolo kale. So inio meme doraekou keru ko madolo, vota o katimelou me kama pizato tu meta meqai pataitou, ni vota o katimelou kama rora tu meda ka pakiovou.

¹⁴So sole me a lolo poso mela meta taka papariomo ko beku poso ko ilusiko.

¹⁵Aṉata a melati pesiovou omadeuvo nianiioma maba poso kasi jari, sole meta titizikomo ko quli aṉa a qasekako quli tu meda ka kelou kota uri ama ma pui uri ama.

¹⁶So keru anime me nozueka keru koa vaini ko ju ko anime mevai ilusikako animevo Lekasa ta ko kaseka animeko omadeu kai elo vo Karisito ko dara. Ni so keru anime me qua keru koa bereti anime me balamukako ta ko kaseka animeko omadeu kai elo vo Karisito ko tupu.

¹⁷Ako koa bereti ta omadeu pado lezu ama, so jari nio animeta kubo mela melai animeta omadeu qoqono mela, ako animeta mevai palaita voa omadeu lezu bereti sole.

¹⁸Kerukeruekomo ko Izireli qoqono; seke palaitani kuo ko siqato sara kale ta kekai zomana ilusivo vo Baṉara kokale.

¹⁹Aṉako so kio ta ko beku ni koa sailao koko katiziako beku kasi siqato kale ta kama kalo sama quli kio, kio?

²⁰Pui! Ko aṉa so ka kialako ta koa siqasiqa se kutumana kamu ko ta ko katiziako ziolo poso kasi, ni pui vo Baṉara kasi. Ni aṉata pui a mela zaria tu meta omadeu me qati elou ko ziolo poso.

²¹Meta pui meba nozuekou koa vaini ko ju ko anime mevai ilusikako animevo Lekasa Jisu ni mata koa vaini ko ju ko se kekai ilusikako ko ziolo poso; ni meta pui meba kuovou vo Baṉara ko bereti ni mata ziolo poso ko bereti.

²²Ma animeta meqa zaria tu vai konoilo vo Baṉara, kio? Ta animeta mevai paloasa vo animeko pizato kale, kio?

²³“Kiadama quli ta ko zarizia anime kasi tu me ereko.” So inio kake mela kimelani. Kota tuvevo ko so melai pui kiadama quli kio uri ama. “Animeta me zarizia tu me ereko kiadama quli,” kimelani, melai pui koa kiadama ikio tauvezato sama quli.

²⁴Meta pui kerukerueko me ṉaviko tauvezio pala, melai edolomu ko tauvemo kio me qerukeruekou saita.

²⁵Kota ko mela zarizia tu meta me quovou ko marabau ko me dabarikako tatabarao ko zaekale. Meta pui tiṉoliṉoli kai elo ni pui meqai kuimakuimanaovou koa marabau.

²⁶Ako ko Tabu ama Riki kikolani ta eri sole, “Kiadama peuru ma peuru ni kiadama saizama quli ta vo Baṉara ko ikio,” kikola.

²⁷Esa kala maba vo pui o tuvevo putani ta o taipazimelou me o pade kasi tu me vuato ni meta meqa zariovou tu me zio sai, uri tu me ziovou ni me quovou ko quli vo o katimelo ama quli ni pui tiṉoliṉoli kai elo ni pui meqai kuimakuimanaovou koa sailao.

²⁸Melai kala maba ta eri ṉa kiovou ṉo, “Komia sailao ta lula ko puariziako beku poso kasi ikio,” kiovou, nio meta pui me quovou koa sailao. Meta me qerukeruevou voa maba vo o mela bazuekani ko so, ni pui me quovou, tu pui niuniala me ivou vo ako voko kerukeru kale ta kota sarueko sole.

²⁹Kota pui me ṉaviko kerukeru ikio koko tizaemela tu pui me quo, melai voa edolola maba ko kerukeru ikio ko tizaemela me. Esa kala mekale ala ta eria kuimanao o elou, “Noi sole inio edolola maba ko kerukeru ta ko tizaelou aṉa a erekako quli kale omadeuvo aṉata pui nio ruparupasia lala jari?

³⁰Lula aṉako uriavo a qativa vo Baṉara aṉako sailao kale saita, ta noi sole inio kala maba ta olai titizika koa sailao ko lula uriavo saṉa a ikako?” kiovou.

³¹Zio, melai koa kiadama quli meme erekako, ni meme quako ni me nozuekake quli kale, meta vai ṉaṉaidara puekomo vo Baṉara kiada keru.

³²Meta pui ereko kama quli koko odiemo ama maba poso tu ke ereko se sarueko ka kikelako quli, Jiu amu kebe elou, ma se kutumana kamu kebe elou, ma vo Baṉara ko lotu qoqono kale amu kebe elou melai.

³³Meta me qalou omadeuvo aṉa a qavani jari, ako aṉata a madoe tu kiadama maba poso ta kekai zoleilo kiadama aṉa a erekako quli. Aṉata pui aqai kerukeruiva aṉako tauvezio, melai edolomu ko tauvemo ikio, ako aṉako zario ta sea kubo madu ta ke pakiovou.