Read Bilua 1 Koriniti 12 Bible Online

1 Koriniti 12 - Bilua bible

1 Koriniti 12

¹Zio, ko quli meme rikiekema azaazama iruruputo ko pizato kale avo Tabu ala Auvana kasi azo ko kuevako. Aṉata a mela zaria me a qaka ni visi poso mela tu kai nianiiomo.

²Meta me baqumuka so keru me kutumana mebeta eva keru, meta me odiziovi kama pizato kale tu me ilusiko ko saevo pide ama beku poso.

³Sokale aṉata a mela zaria me tu paqumukomo ko puliala vo o pesiani Tabu ala Auvana kale ta eri pa kiovou, “O leveziovou vo Jisu!” ni puliala ta eri pa kiovou, “Jisu ta Lekasa inio,” vo pui Tabu ala Auvana kale o pesiani.

⁴Tabu ala Auvana ta o puarika azaazama iruruputo ko pizato, ni voa omadeu pado Auvana inio o puarikani koa pizato.

⁵Animeta mevai nabuluputa animevo Lekasa azaazama koidi kale, melai voa omadeu pado Lekasa inio meva nabuluputa.

⁶Ikoana azaazama koidi tu me ereko, melai voa omadeula Baṉara inio o bokerimelani animea kiada mela tu me ereko koa koidi.

⁷Vo Tabu ala Auvana ko pizato ta ko purata azaazama keve kale omaomadeu kale kude tu vota o tauvemelo kiadama lotu qoqono mela.

⁸So inio vota o kativa kala ko pizato tu o kaseko ko uri ama kerukeru sama bazu. Mata kala maba ta voa omadeula Auvana ta o kativa ko pizato tu o kaseko ko bazu Baṉara kasi azo ama nianiio sama.

⁹Mata kala ta o kativa voa omadeula Auvana ko piza kama oqu, ni mata kala maba ta o kativa ko pizato tu urikato.

¹⁰Vota o kativa mata kala maba aqasiele ama iruruputo ko pizato, ni mata kala ta o kativa vo Baṉara kasi azo ama bazu poso kai pesio ko pizato, ni mata kala ta o kativa ko pizato tu o nianiieko ko soama bazu poso ta Tabu ala Auvana kasi azo ko kuevako ma ziolo kasi azo ko kuevako kio. Mata kala ta o kativa kai bazuto ko pui okai nianiiako pesio poso ko pizato, ni mata kala ta o kativa ko pizato tu o rupasiko ko lula ko kaseivako koa pesio poso kale.

¹¹Voa omadeula Auvana kasi azo inio ko kueva ko pizato tu me ereko kiadama komi quli; o ṉaviko vatolo kale inio vota o katima azaazama iruruputo ko pizato omaomadeu maba.

¹²Ko tupu ta omadeu pado tupu, ko kubo kata poso sama. Kota omadeu pado tupu tisoiko, kubo kata poso kobe elou melai. Ni anime Karisito ko tupu jaria mela koa azaazama iruruputo ko pizato samela ta omadeuvo voko tupu ko kata poso jari.

¹³So sole so keru anime bapitaiso me eva keru inio voa omadeula Auvana ta omadeu pado qoqono o imele animea kiada mela; Jiua mela melai, pui Jiua mela melai, mabaku mela melai, pui mabakua mela melai. So inio animeta omadeuvo voko tupu jaria mela, ako voa omadeu pado Auvana inio o puariziovini animea kiada mela kasi sole, tu animeta me bizato vokale.

¹⁴Ako ko maba ko tupu ta pui omadeu kata ko kiada pala ikio, melai kubo kata poso sama ikio.

¹⁵Kiti ta esa eri kiovou, “Aṉata pui ṉase lala inio, sole aṉata pui tupu kama kena lala inio.” Melai koko so kio ta pui kopa pitasikou tupu kasi azo.

¹⁶Ni taliṉa ta esa eri kiovou, “Aṉata pui vilu lala inio, sole aṉata pui tupu kama kena lala inio.” Melai koko so kio ta pui kopa pitasikou tupu kasi azo.

¹⁷Koa pado ama tupu ta vilu pala sama tea, nonia viqaviqazata inio ko elou? Ni kota taliṉa pala sama tea, nonia tuimito inio ko elou?

¹⁸Melai vo Baṉara ta lula o vaeke tupu tona kiadama koko azaazama kata poso voko zario kikovevo jari.

¹⁹Ako omadeu pado kata sama tupu ta kota pui tupu ikio!

²⁰Melai kota kubo kata sama, koa omadeu pado tupu.

²¹So sole vilu ta pui eri pa kiovou ṉase kasi, “Aṉata pui aṉa zaria ṉo!” Ni lezu ta pui so pa kiovou omuqa kiti kasi, “Aṉata pui a qela zaria qe!”

²²Maba pui so. Ako maba lekuleku ama tupu ko kata poso ikio koka matu zaria ko tupu;

²³ni koa kata poso ko anime pui matuma koko kalo ka kimelako, ko quli ta me rovea tu matu uria kati vailo, ni koa kata poso ko qurato ko katimelako ta me mutaka,

²⁴melai koa kata poso ko uria kelo ama ta pui me daipaeka. Vo Baṉara ta o padoeka koa tupu ko kata poso ni vota kalo saṉa o ika koa kata poso anime pui raura kama ka kimelako.

²⁵Vota so o ike tu ko tupu ko kata poso ta pui ko kanaekimou, melai kota ko tauvekinio muli.

²⁶So inio kala pado tupu ko kata ta o tolailou, nio kiadama koa tupu ko kata poso ti ko lainikou muli koa tola. Kala lotu maba ta o raurailou, nio koa pado ama lotu qoqono ta keta zoleilou muli.

²⁷Ni mea kiada mela ta vo Karisito ko tupu mela muli, ni meta voko tupu ko kata poso mela.

²⁸Vo Baṉara ta lula o vaemela animea kiada mela me ṉaviṉavi ko zaekale voko lotu qoqono kale. Kuleto ta se apositolo madu, omuqama pado zaekale ta o vaema se poropita madu, ni zouke ala pado zaekale ta o vaema se nianiiekato ko maba madu. Koko tova ta se aqasiele ama iruruputo ko maba poso, koko tova ta se urikato ko maba poso, ni seke tauvemani edolomu, ni seke korokorotimani se lotu qoqono azaazama iruruputo kale, ni se kekai pesiani pui kekai nianiiako pesio kale.

²⁹Pui sea kiadamu inio apositolo madu ma poropita madu ma nianiiekato ko maba madu. Pui sea kiadamu inio ke koani ko aqasiele ama iruruputo ko pizato,

³⁰ma vere poso ko urikiko, ma kai pesio ko pui kekai nianiiako pesio, ma pepeliko koa pesio kikolani.

³¹Meta ka zarimo ko pizato tu erekomo ko raura kama iruruputo poso. Ni erisaṉa aṉata a melai vakakukou kama pado keve, ko kokai qulepa koa kiadama.