Read Bilua 1 Koriniti 16 Bible Online

1 Koriniti 16 - Bilua bible

1 Koriniti 16

¹Zio, koa takula meko riki kale ko kaseima koko koazailo ama tu ko tauvemo vo Baṉara ko qoqono se Jiudia ke evani. Meta erekomo koa omadeuma quli ko aṉa ama bazuekema se Qelesia ranama lotu qoqono poso tu ke ereko.

²Kiadama Sade ṉaniu kale meta vaekomo meko takula kama kobu meko koazato kale azo ni kati vailomo, nio meta pui me qoidipou pikazato seleni kale so keru aṉa a melai barou keru me.

³Ni so keru aṉa a qilou keru inio meta me bitoemou kake tu ke kati zio koa takula Jerusalema peuru kale, ni meta mema rikiekou ko leta poso seko koidi ko zakaremu puto sama, ni me joroemou se.

⁴Ni ko male kiavou tu aṉa melai a zio inio seta ke luluelou aṉa.

⁵Aṉako Masedoniama talio ko tova inio a qilou, ako Masedoniama peuru poso kale kude inio ada ziovou sole.

⁶Ako esa aṉata a elou saita mekasi kama taku poso kale, esa koa pado ama sarosaroro ko taku kale, ni koko tova inio meta me roveovou tauvelo aṉa tu aṉata abeta zio aṉako talio kale, lai ma lai aṉa a ziovoa koi.

⁷Pui aqa zaria tu alokato mela lelo elo me; a bokaovou ta, aṉata rosia elo inio a melai elou me, o zarielou vo Lekasa ta.

⁸Aṉata abeta elou koi Epesasi ti kobeta barou ko Penetikositi ṉojola ṉaniu,

⁹ako aṉata a qea matu uri ama rora koi tu a iruruputo, ni koi melai kubo kana poso kebeta eva sole.

¹⁰O kilou vo Timoti mekasi kude ta, meta me uria baroekivou vo tuvevo ama baroekato kale, ako vo inio kala pado maba ova iruruputani animevo Lekasa sole, omadeuvo aṉa a qavani jari.

¹¹So sole puliala ta o zaraevou vo, melai meta tauvevomo vo tu vota puliama tapata kale o taliekiko voko talio nio vota o roveovou vaito aṉa kasi, ako aṉata abe tareka voko vaito kake animeko lotu tamania kale amu sase sole.

¹²Animevo lolo Apolosi ko bazu ta eri nio. Aṉata lula a matu zuvariva vo tu vota o lulupato kake animeko lolo poso kasi tu vota o zio mekasi. Melai vota pui oka zaria tu vota o lulupato komia taku kale. Melai so keru vo o kelou keru kama rora inio vota o ziovou.

¹³Vailomo ni pizaka lojolo emo meko vai oqu kale vo Lekasa Jisu, parani putomo ni pizatomo.

¹⁴Kiadama meme erekako quli meta erekomo roquano kale.

¹⁵Meta meqai nianiia Sitepanasi ni voko saidi inio se kuleto ke liliziovini Akaia ranama peuru poso kale. Seta kema matu nabuluputani se lotu maba poso. Aṉata a basemela me a qaka ni visi poso mela,

¹⁶tu meta luluekomo soama maba poso ko odikato iruruputo ni mata kake ko, se omadeu nabuluputo ke evani ko se sase.

¹⁷Aṉata aqa zoleiva ko Sitepanasi, Potiunatasi, ni Akaikasi ko kilo, ako seko kilo koi ta ko besieka meko koizama kilo sole,

¹⁸ni seta ke zuvarila aṉa omadeuvo me ke imelani zuvarimelo me jari pado. Meta ma zoleimo se eri ama maba madu.

¹⁹Ko Eisia ko evako lotu qoqono poso ta ke kati sorota seko roquano; Akuila ni Pirisila ni koa lotu qoqono seke padoivani nioqako pade kale ta ke soroeka seko matuma lotu tamania roquano.

²⁰Seko roquano mekasi kikela sea kiadamu se koizama lotu tamania. Meta toraekiniomo muli tabu ama roquano kale.

²¹Aṉa Paula lala a ṉaviko rikito kale a ṉase kale inio a joroeka aṉako roquano.

²²O leveziovou vo pui o roquevani vo Lekasa! Marana tha—Vaite, eṉevo Lekasa ṉa!

²³Vo Lekasa Jisu ko pakiezato sama roquano ta ko elou me tona.

²⁴Aṉako roquano ta a joroeka mea kiada mela kasi me omadeu me vati evani mela vo Jisu Karisito.