Read Bilua 1 Koriniti 2 Bible Online

1 Koriniti 2 - Bilua bible

1 Koriniti 2

¹So keru aṉa a melai kuevi keru me, a qaka ni visi poso, tu aqai bazuto ko Baṉara ko mutamuta kama tuveano, aṉata pui aba kai pesi ko tapata kama keve ni raura kama nianiio kale.

²Ako so keru aṉa abeta eva keru mekasi, aṉata lula a vatoeke tu a melai bazubazuevou me vo Jisu Karisito ni voko vou korosi topi ama ko kiada.

³Ni so keru aṉa a quevi keru mekasi, aṉata lekulekua lala ṉalo ni dedero kale,

⁴so sole aṉako nianiiekato ni bazubazuto ta pui kama aṉako matuma nianiio kale, melai kota ko tuvevo pui Tabu ala Auvana ko piza kama iruruputo kale.

⁵So inio meko oqu ko raki ta pui maba madu ko nianiio kale melai vo Baṉara ko pizato kale inio.

⁶Melai aṉata a qaseka ko raura kama nianiio ko bazu se piza kama oqu samu kasi, melai kota pui komia peuru ma peuru ni koko lekasa poso ka kikelako nianiio, seke noqola tolailo amu.

⁷Koa bazu aṉa a qasekako ta o ṉavi Baṉara kasi azo ama bazu kio. Kota lula mutamuta kama, melai vo Baṉara ta lula o vatoeke korotiko puliako peuru ma peuru ereilo tu o katimelo anime aqasiele ama quli.

⁸Puliala kala pado lekasa komia peuru ma peuru kale ala ta opa vakakuke komia raura kama nianiio ko bazu. Ako seta lula ke paqumuke ko tea, pui nio kepa patoevo animevo ṉaṉaidara kala Lekasa korosi topi.

⁹Sokale avo inio ko Tabu ama Riki ta so kikola, “Aqasiele ama quli ko puliala kala pado maba lula o keako ni o viqako quli, ni ko puliala kala pado maba lula o kerukeruekako ikio ko quli lula Baṉara oma inainaekake tu o katimo se vo ke roquevani,” kikola.

¹⁰Melai vo Baṉara ta lula kasa o mela ika koa bazu anime voko Auvana kale. Ako voko Auvana ta kokai nianiia kiadama quli ni so jari vo Baṉara ko repaso ama vatolo poso melai kokai nianiia.

¹¹O ṉavi maba o ṉavi tonama auvana ko kiada ikio ko paqumuka voa maba ko kerukeru, ni omadeuvo so jari nio vo Baṉara ko Auvana ko kiada ta ko paqumuva vo Baṉara.

¹²Pui komia ruqe ama peuru ma peuru ko kerukeru ikio anime lula me qoako, melai animeta lula me qoani mela vo Baṉara o soroekema Auvana, tu animeta me baqumuko kiadama quli vo Baṉara lula o katimelo anime ka kiolako.

¹³So sole animeta pui meqai bazubazuta koa vo o katimelo ama quli komia ruqe ama peuru ma peuru ko nianiio kale, melai vo Baṉara ko Auvana kale inio, so keru anime me zakaremu pueka keru voko Auvana ko tuveano se lula ke koani voko Auvana kasi.

¹⁴Voa maba vo pui o koani koa Auvana ta pui o rovea kovo koa pizato vo Baṉara ko Auvana kasi azo ko kuevako tu o ereko ko azaazama iruruputo poso. Soala maba ta pui o paqumukani koa azaazama iruruputo maba madu ke erekako koa pizato kale, ni sarube ama ka kiolani ko, ako koa iruruputo ta Auvana kale ko kiada inio ko paqumuivako sole.

¹⁵Melai vo lula o koani ko Auvana, ta kokale o rovea titiziko kiadama iruruputo tu ota ka kelo koko uri ma ruqe; melai puliala maba ta opa titizivou vo.

¹⁶Omadeuvo ko Tabu ama Riki kikolani jari, “Puliala inio o paqumukani vo Baṉara ko kerukeru, ni puliala inio o roveani kativo vo kama uri ama bazu.” Melai animeta lula me ṉeamukani mela vo Karisito ko kerukeru.