Read Bilua 1 Koriniti 3 Bible Online

1 Koriniti 3 - Bilua bible

1 Koriniti 3

¹Melai a qaka ni visi poso mela, aṉata pui aba roveovi melati bazueko ko Uri ama Bazu omadeuvo se kiada keru ke zorikani vo Baṉara ko Auvana jari kasi. Melai aṉata a melati bazuekake omadeuvo meta komia ruqe ama peuru ma peuru ko mela jari inio, ni silo mebeta evani mela vo Karisito vai oqu kale.

²Aṉata a niaemele me susu ko epa kale, pui zokele ama sailao, ako meta kota pui nio me malezika kuo sole. Ni erisaṉa melai meta pui nio me male tu kuo ko.

³Ako meta mebeta eva saevo omadeuvo komia ruqe ama peuru ma peuru ko maba poso jari sole. Ako konoilo ni me ṉavio kude aiveaivekinio ta ikoana kobeta eva me tona, ni komi quli ta kasa ko ika ko meta komia ruqe ama peuru ma peuru ko mela inio kio, me mebeta saevani mela koko saevo kale.

⁴Ako so keru kala me azo eri kiola keru, “Aṉata a lulueva vo Paula,” ni kala pado ta “Aṉata a lulueva vo Apolosi” kiola, ta matu kasa ko eva ko meta se komia ruqe ama peuru ma peuru kale amu jaria iruruputo me eva sole.

⁵Lala inio vo Apolosi? Ni lala inio vo Paula? Eqeta vo Baṉara ko nabulu qela pala inio qe odiemeleni qela me nio meta oqu saṉa me eve. Eqeta vo Baṉara o katiqeleni qela koa koidi tu eqeta qe ereko ko.

⁶Aṉata a bapakeni lala meko oqu ko rui, Apolosi ta o sitekeni koa papapapa jukale, melai vo Baṉara inio o qotupikeni.

⁷So sole aṉa a bapatani lala ni vo o sitezatani jukale ta pulia quli qela, melai vo Baṉara vo o qotupikani ko papapapa inio matula.

⁸Vo o papatani ni vo ju o ikazatani ta omadeu iruruputo sanioqa, ni vo Baṉara ta reketekete saṉa o ikou nioqa kiada nioqa qo ṉaviṉavi qo erekako iruruputo ko podepodeti kale avo.

⁹Ako eqeta omadeu vati iruruputo qe vati evani qela vo Baṉara, ni me inio vo Baṉara ko matoa mela. Ni meta mata vo Baṉara ko pade o orumumelani mela inio.

¹⁰Aṉata ava irurupute vo Baṉara koa bokao vo o katilema kale ni aṉata a dauvemele me tu mevai oqu vo Jisu, omadeuvo kala roverove ala pade ko ereko kale ta o ereka ko piza kama lado vola jari. Ni erisaṉa edolola maba Apolosi inio o nianiiekatani mekasi omadeuvo kala maba vo o padematani koa vola topi jari. Melai animea kiada mela ta meva iruruputa vo Baṉara tu me dauvekinio voko qoqono kalea mela omadeuvo kala maba vo o orumukani ko pade jari. So sole animea kiada mela ta uria korokoroti me ikou animeko iruruputo.

¹¹Ako vo Baṉara ta lula kala pado vola o ive vo Jisu Karisito, ni edoloma vola ta puliala o roveani ereko sole.

¹²Koa vola topi ta kake ta uria iruruputo ke eva omadeuvo kekai orumata ko qolo ma siliva ma rarai lado jari, melai kake ta pui uria iruruputo ke eva omadeuvo ore kale ma seulele kale ma lekona kale ke orumata jari.

¹³Ni kiadama maba poso ko iruruputo ko kalo ta ko keazailou so keru vo Karisito ko Ṉaniu kale kasa ko elou keru. Ako koa Ṉaniu kale ko uza ta ko madoekou koa iruruputo ko tuvevo ama epa ni koko male avo.

¹⁴Sole ko quli kala lula o orumukako quli koa vola topi ta kobeta lojolou koa uza ko tova, inio vo lula o orumukani ko ta o kovou ko reketekete.

¹⁵Melai kala maba ko iruruputo ta ko siqailou, inio voko reketekete ta kota va parakou, vo maba kota va siqaivani ko pade jari. O ṉavi voa maba ta ota pakiovou, melai omadeuvo koa uza ko tianiʼazo o pakia jari.

¹⁶Meta pui nio me baqumuka ko me inio vo Baṉara ko Jelepade mela ni ko Baṉara ko Auvana ta ko melai loiva me, kio?

¹⁷So sole kala ta ota mela niumaekou vo Baṉara ko Jelepade mela ko oqu inio vo Baṉara ta o niumaevou vo. Ako vo Baṉara ko tabu ama Jelepade mela inio ko me sole.

¹⁸Puliala maba ta opa lipailou o ṉavi. Kala me azo voko kerukeru kale ta nianiiola komia ruqe ama peuru ma peuru kale ama nianiio kale kiovou, uri tu vota sidopu o elou, komia ruqe ama peuru ma peuru kale amu sarube ka kikelako sidopu. So inio vota tuvevo avole nianiiola ota elou vo Baṉara ko kelokelozato kale.

¹⁹Ako komia peuru ma peuru kale ama maba poso nianiio ka kikelako ta sarube ikio vo Baṉara ko kelokelozato kale. Omadeuvo ko Tabu ama Riki kikolani jari, “Vo Baṉara ta o ubeubema se nianiio mu seko matuma roverove kale; omadeuvo vo maba ta o tulumuka ko biaṉa sipata kale jari;”

²⁰ni mata kama pado zaekale ta so kikola, “Vo Baṉara ta okai nianiia ko se nianiiomu ko kerukeru ta utube ama ikio.”

²¹Sokale avo inio pui ko male tu kala ta okai raurailo kala maba o erekako quli. Ako koko tuveano ta sea kiadamu ta me ke tauvemelani mela inio sole,

²²Paula melai, Apolosi melai, Pita melai; ni kiadama quli ta mata meko ikio sole; komia peuru ma peuru, ni noqola kama saevo ni voukale azo ama pakio, komia erisaṉama taku ni ko kilo ama taku.

²³Ni meta vo Karisito ko mela, ni vo Karisito ta Baṉara vo inio.