Read Bilua 1 Koriniti 7 Bible Online

1 Koriniti 7 - Bilua bible

1 Koriniti 7

¹Erisaṉa aṉata aqai pesipesitou ko quli me lula mela rikiekako meko leta kale aṉa kasi. Uri kio vo maba ta pui o rorotou.

²Melai ikoana matu kubo pauvezato ni ruqe ama iruruputo, so sole maba ta o kovou kalakala o ṉaviko reko, ni reko poso ta ke ṉeamumou ke ṉaviṉavi ko lasive poso.

³Vo maba ta o korotiko voko koidi tanala lasive ko, ni ko reko melai ko korotiko koko koidi tanama reko ko, tu nioqa kiada nioqa ta qokai puarikiniou nioqako saqe ko kalo.

⁴Ako reko ta pui kota va kaitikou koko tupu kovo lasive, ni voa lasive melai pui ota ka kaitikou voko tupu voko reko.

⁵Lasivea laṉa ta pui taka lupao ṉoko reko, ni so jari ṉoa reko ṉa ṉovo lasive kasi. Melai pitopito ama taku kale uri ama vatolo kale qe vaekou vararaito kaqe saita, inio mata tova padoekinio qe elou. Komia keve kale kude inio qeta qe pakiziovou vo Setani ko zolizolito kale azo. Ako lekulekua qela qeko kaitizio kale sole.

⁶Ko ikio ko aṉako kerukeru a qelai bazuekako qe melai pui kama lojolojo ikio.

⁷Mea kiada mela ta omadeuvo aṉa jaria mela tea uri, melai Baṉara ta o katimela anime azaazama bokao, tu kake ta ke rorotou, melai kake ta pui ke rorotou.

⁸Aṉata eri kiala se pui roroto amu ni se naboko poso kasi, uri tu meta soa kiada elo beta emo aṉa jari.

⁹Melai meta pui me roveovou lalamiko meko kerukeru, ta uri tu rorotomo tani, ako roroto ta uri saita inio pazakelo puto kale sole.

¹⁰Komi ta se lula roroto amu ko bazu ko pui aṉa kasi ko puratako melai kota animevo Lekasa Jisu ko: ko reko ta maba pui ko zarizia tu ko vaevo kovo lasive.

¹¹Melai kota so ko kalou tea, kota rusu ama jari mata ko elo, ma ko vati bulekikinio kovo lasive. Mata vo lasive ta pui o zarizia tu o vaeko voko reko.

¹²Aṉata eri kiala se pui nio a qasemani maba poso kasi (pui vo Lekasa Jisu kiolani, melai a ṉavi kialani). Esa kala lotu kale ala maba ta ko pui ko tuvevo putako reko sala melai kota koka zariovou elo vokasi, uri tu vota pui o vaekou ko.

¹³Ni esa kama lotu rekoreko ta tanala sama vo pui o tuvevo putani melai vota oka zariovou elo kokasi, uri tu kota pui ko vaevou vo.

¹⁴Ako vo pui o tuvevo putani lasive ta lula tabu o iva vo Baṉara voko omadeu kati elo kale voko reko, ni ko pui ko tuvevo putako reko ta lula tabu o ika vo Baṉara koko omadeu vati elo kale kovo lotu maba lasive. Komi ta pui so tea, seko meqora poso ta kutumana meqora poso jari amu inio; melai koko tuveano ta seta lula tabu amu inio vo Baṉara kasi.

¹⁵Melai kala ma kama pui qo tuvevo putani nioqa ta qo ziovou voa lasive ma koa reko kasi azo vaeka tu so qo kalo. So ko kalou ta vaeka tu qo lulueko koa keve voa lasive ma reko lotu kalea nioqa. Ako Baṉara ta lula o odiemela anime tu animeta bule kale me elo sole.

¹⁶Ako ṉota pui ṉo rovea kai nianiio ṉoa lotu reko ṉa ko ṉota ṉo bakievou ṉovo lasive ma pui. Ni ṉota pui ṉo rovea kai nianiio ṉoa lotu lasive ṉa ko ṉota ṉo bakiekou ṉoko reko ma pui sole.

¹⁷Animea kiada mela ta mebeta ziovou koa uri ama kalo kale ko anime meqai evema so keru vo Lekasa Jisu o nokaemele keru anime. Komi kio koa bazu ko aṉa aqai nianiiekatako kiadama lotu qoqono poso kale.

¹⁸Omadeuvo kala movemove ala maba lula o zorikani vo Baṉara ko nokao, vota pui o madoekou tu pui movemove ala o elo. Ni vo pui movemove ala maba vo lula o zorikani vo Baṉara ko nokao, vota pui o kovou ko moveilo.

¹⁹Ako ko moveilo ni pui moveilo ta puliama koko kalo sama, melai qulepo ama quli ta ereko vo Baṉara o melati soruekako quli.

²⁰Kiadama maba ta kebeta ziovou vo Baṉara lula o nokaeme keru kekai evema saevo kale.

²¹Ṉota kala mabakua laṉa inio so keru vo Baṉara lula o nokaeṉa keru ṉo kio? Uriavo ṉota pui dukia kerukerueko elo ko, melai ṉota ṉo qelou kama rora ṉoṉo rupasiovo avo, ṉota taupeka ko tu koa.

²²Ako kala mabaku vo Lekasa Jisu lula o nokaevani ta kala ruparupasi ala vo Lekasa vo maba, ni so jari nio vo ruparupasi ala maba vo Karisito lula o nokaevani ta vovo mabaku.

²³Baṉara ta lula o tatabaraemele me kama pado tatabara kale, tu meta pui maba ko mabaku poso me elo.

²⁴A qaka ni visi poso mela, mea kiada mela ta mebeta ziovou vo Baṉara sase koa me ṉaviṉavi ko saevo ko vo o nokaemele keru meqai evema kale.

²⁵Zio, ko quli me lula me rikiekake se pui ke rorotani reko poso kale avo, ta puliama bazu ada ka koa vo Lekasa Jisu kasi azo. Melai aṉata a melai bazuekou aṉako kerukeru, ni vo Baṉara ko roquelo kale aṉata a male tu lai kerumo.

²⁶Aṉako kerukeru ta komia erisaṉama taku se kutumana kamu ke vouvaemela keru ni ke niumaniumaemela keru ta uri tu meta mebeta elo tu pui me besieko meko roroto saevo ni me pui me rorotani mela ta pui me rorotou.

²⁷Ṉota kama pado reko salaṉa inio kio? So ko kalou ta ṉota pui madoeko tu vaeko ko. Ṉota pui rorotoa laṉa inio kio? So ko kalou ta ṉota pui vailiko kama pado reko.

²⁸Melai ṉota ṉo rorotou ta ṉota pui ṉo ereka kama pado sarueko. Ni ko pui roroto ama reko ta ko rorotou ta kota pui ko ereka kama sarueko. Melai aṉako zario ta a bakiemelou me koa kiadama ṉaniu kale ama naqunaquto kale azo se roroto amu ke toraeko ama kale azo.

²⁹Ko aṉa so ka kialako a qaka ni visi poso mela kasi ta komi: animeko taku ta puju kota eva, sole erisaṉa azo ta me lula rorotoa mela ta pui pado ama meko taku memai ṉamukou meko reko ni lasive poso;

³⁰ni meme ziani mela ta zoleimo, ako koa duki ta kota paitou sole, ni meme niureani mela ta kerukeruekomo ko me ko niureki-melako quli ta kota paitou, ni meme dabarikani mela kama quli, ta kerukeruekomo ko quli meme databaraekako quli ta kota paitou,

³¹ni me riteraite meqai evani mela komia peuru ma peuru kale ama quli ta pui pado ama meko taku jari meba kai ṉamukou. Ako komia peuru ma peuru anime me qeako erisaṉa ta sipole inio kobeta paitou sole.

³²Aṉata a mela zaria me tu meta puliama tiṉoliṉoli saṉa me elou. Vo pui o rorotani maba ta o kerukerueka vo Baṉara ko iruruputo tu vota o zolevo vo Baṉara.

³³Melai vo roroto ala maba ta okai mumuasa pua miduku kale ama quli tu vota o roveo zoleko voko reko,

³⁴nio vota kovai tataekinia omuqa quli. Ko pui roroto ama reko ma sinaqu rusu ta ko kerukerueka vo Baṉara ko iruruputo, ako kota koka zaria tu kota Baṉara ko maba ko elo koko pado ama saevo kale sole. Melai ko roroto ama reko ta ko kerukerueka ko miduku kale ama quli, tu kota ko zolevo kovo lasive.

³⁵Aṉata a qaseka komi quli, ako aṉata aqa zaria tauvemelo me sole. Aṉata pui aqa zaria tu a dizaemelo me pui me rorotani mela tu me roroto, ni mata pui aqa zaria duki imelo me lula me rorotani mela. Melai aṉata a mela zaria me tu meta me luluekou me ko tauvemelo ama kalo tu meta tuvevoa nabuluputo meva elou vo Baṉara aukozo ama bulo kale.

³⁶Melai esa kala maba ta pui oka zariovou biresuko voko leveleveo lula o erekako tu o raeko koa sinaqu rusu ko lula ke vati korotikako tu o raeko, ni voko tupu ko zario ta ko matu tataevou, ta vaeka tu nioqata qo roroto, vo oka zariani jari. Komi kale ta puliama sarueko.

³⁷Melai esa kala maba ta lula o vinaeka voko kerukeru kale tu vota pui o raeko, ni puliama voko zolizolievo kale vota okai lekasa pua o ṉaviko vatolo ni lula o vatoeka tu vota pui o raeko koa sinaqu rusu, vo inio mata o erekani ko uri ama quli vo pui o raekani.

³⁸So sole voa maba vo o raekani voko sinaqu rusu ta uri o kavani, melai voa maba vo pui o raekani ta matu uri o kalo ala.

³⁹Ko roroto ama reko ta pui ruparupasi ama kovo lasive obeta saeva keru, melai so keru vo o vouvou keru, kota ruparupasi ama tu kota ko raevo kala maba ko kova zariovo ala, vota lotu maba o elou ta.

⁴⁰Melai soa pui roroto elo kobeta elou nio kota uria saevo kota elou. Ko ikio aṉako kerukeru ni aṉa melai vo Baṉara ko Tabu ama Auvana salala kiala.