Read Bilua 1 Koriniti 9 Bible Online

1 Koriniti 9 - Bilua bible

1 Koriniti 9

¹Aṉata kala ruparupasi ala maba lala ko Mosese ko Bazu kale azo. Ni aṉata apositolo lala, a veveni lala vo Jisu vo animevo Lekasa. Ni meko oqu ta aṉako va iruruputo vo Baṉara ko epa ikio.

²So sole esa kake ta pui kepa tuvevo puekou ko aṉata kala apositolo lala inio kio, melai meta me male tu matu tuvevo iko aṉako apositolo elo. Ako meko omadeu elo kale animevo Lekasa Jisu sase me ṉavi ta kasa me ika koa aṉata kala apositolo lala inio kio.

³So keru maba madu pui ke tuvevo puela keru, aṉata eria opato a eva:

⁴Ta eqeta pui qe male tu ko sailao ni ju ta ko katizio aṉa ni Banabasi ko iruruputo kale, kio?

⁵Kota pui ko zarizia tu a raeko kama pado lotu kale ama reko ni a odieko ko aṉako talio kale kake apositolo madu ni vo Lekasa Jisu ko visi poso ni vo Pita ke kavani jari, kio?

⁶Ma aṉa ni Banabasi qe kiada inio qe erekou ko ṉase kale ama iruruputo eqeko kovo kale ko saevo ko korotikako quli, kio?

⁷Me inio me male tu katiqelo eqe saevo ko korotikako quli. Ako puliala pazokinio ko maba nio o tabarikani o ṉaviko tabara. Ni puliala kiaromato ko maba inio pui o roveani kuo koa vaini ko epa o ṉavi o papakema. Ni puliala sipi o kati vailani maba inio pui o koani o ṉaviko sipi ko susu.

⁸Pui a ṉavi a qiada pala inio a qasekani lala ko so, ako vo Mosese ko Bazu ta ko kaseka omadeuma quli pado sole.

⁹Ako kota so kikola, “Ṉota pui taka mukieko ka pado bulumakau ko suto tu pui ko vuato so keru ṉoqai iruruputou keru ko tu kokai lojo ko vuiti ko rurururu,” kikola. Noi nio? Bulumakau ko kiada ikio o kerukeruekako vo Baṉara, kio?

¹⁰Pui! Anime inio so mela kioveni mela koa rukuruku o ereke keru, ni kota ko rikiziovi tu anime kaqe. Seke papatani ni seke kajorani ta ke iruruputo seko tuvevo pueko kale seko kovo seko kena koa iruruputo ko puratikako epa.

¹¹Omadeuvo so jari eṉe apositolo ṉela ta lula ṉeqai bazubazuta ko Uri ama Bazu mekasi. Esa kota matuma quli kio tu eṉeta ṉeda mela kovo me kama tabara kio?

¹²Kake ta ke male tamela kovo soama tabara jaria kelo, so sole eṉeta maba matuvole ṉe male ṉela inio! Melai eṉeta pui ṉeba tamela koe koa tabara eṉe ṉe male ama. Eṉeta ṉeqa zariovi tapata elo, tu pui ṉe qorakoraemo kake eṉeko kovo kale ko tabara kai bazubazuto kale ko Uri ama Bazu.

¹³Tuvevo avole meta meqai nianiia ko sea maba madu seke iruruputani Jelepade kale ta ke koa seko sailao Jelepade kale azo, ni seke iruruputani siqato ko sara kale ta ke koani seko kena koa siqato kale azo.

¹⁴Ni omadeuvo so jari nio Baṉara ko vatolo ta se kekai bazubazutani vo Jisu ko Uri ama Bazu ta mata ke kovou seko tabara seke viqani kasi azo.

¹⁵Melai aṉata pui aba ka zariovi kovo koa kiadama aṉako male ama quli. Ni aṉata pui a rikieka komi quli erisaṉa tu aṉata ada mela kovo kama quli. Ako aṉata a vouvou melai uri, melai aṉata pui ada mela kovou kama quli sole! So inio puliala ta opa roveovou parakiko aṉako sidopu ama kai raurailo aṉako tabara pidea puariko ko Uri ama Bazu!

¹⁶Ana ta pui a rovea kai raurailo ko aṉata aqai bazubazutani lala ko Uri ama Bazu kio. Ako vo Baṉara ta o soroele aṉa tu aqai bazubazuto ko Uri ama Bazu sole. Pui aqai bazutou ko Uri ama Bazu nio aṉata ada titiziovou.

¹⁷Aṉata a erekani lala aṉako iruruputo a ṉaviko vatolo kale tea, a roveo nio kovo ko tabara; melai vo Baṉara ta o lati sorueka koa koidi tu aṉata a erekou komia iruruputo.

¹⁸So sole loma ikio esa aṉako tabara a qovo ama? Aṉako tabara ta aṉako puariko ko Uri ama Bazu se maba poso kasi pui kai kovo kaqe koa reketekete, ko aṉa a male ama.

¹⁹Aṉata kala ruparupasi ala maba lala, ni puliala vo mabaku lala. Melai a ṉavi aṉata kiadamu vo nabulu a eva tu a lilimo kubo maba madu.

²⁰So keru aṉa a iruruputa keru se Jiu mu sase, aṉata Jiu mu jaria saevo a eva tu koa keve kale aṉata a lilimo se. So inio se sase a eva keru, aṉata se jaria lulueko a eva Mosese ko Bazu. Aṉata pui a lulueka vo Mosese ko Bazu tu aṉako sidopu kaqe Baṉara ko kelokelozato kale, melai aṉata se jaria pado saevo ni iruruputo a eva, tu aṉata a lilimo se.

²¹Koa omadeuma keve kale, so keru aṉa abeta iruruputa keru pui Jiu amu sase, aṉata se pui Jiu amu jaria elo a eva, aṉako pui lulueko kale Mosese ko Bazu, tu aṉata a lilimo se pui Jiu amu. Komi ta pui kota la epezikako ikio ko aṉako tava zoriko vo Baṉara ko Bazu. Melai aṉata a lulueka vo Karisito ko Bazu tu a lulueko Baṉara ko Bazu.

²²Se lekuleku ama kerukeru samu kasi a eva keru ta aṉa melai se jaria lekuleku a eva, tu se jaria lulueko kama tabu kale aṉata a lilimo se. So sole aṉata a mati ijatinia puekinia kiadama maba poso kiadama quli kale, tu kiadama keve kale aṉata a lilimou kake.

²³Aṉata a ereka koa kiadama tu ko Uri ama Bazu ta ko aerou, tu se sase aṉata aqai zomanou kovo koa mauruto poso koko kuevako seke luluekani koa Uri ama Bazu kasi.

²⁴Tuvevo meta memai nianiia kubo rereo ko maba madu ta kekai zomana ko rereo voziekinio, melai kala pado se azo inio o koani ko tabara. Sole meta soa saevo emo tu meta me qovou ko tabara vo Baṉara kasi azo ama!

²⁵Kiadamu seke kai zomanani ko voziekinio ta ke kaitizia ke ṉavi tu seta kekai tarapae puilo koa lekona tarapae ko pui tu kopa keuvo ama, melai animeta meqai kaitizia tu me qovou ko noqola kama tabara vo Baṉara kasi azo ama.

²⁶Sokale avo aṉata pui zuato pidea saevo a eva omadeuvo kala zuato pidea rereo o evani jari, ni omadeuvo kala tupato ko maba ṉase kale ala jari vo o utu tupaekani ko oka.

²⁷Pui soa lala, melai aṉata a qaitizia a ṉavi tu pui a ereko koa ruqe aṉa aqa zariako ereko. Ako pui uri tu a ṉavi ta pui a qovo koa tabara Baṉara kasi azo ama aṉako bazubazuemo se edolomu ko tova sole.